南瓜妹@健康院(6個月)

22/09/2014 (6M1D)

因前多天先去醫院覆診，所以南瓜妹既體重已經知道左......

體重：6.15 KG (3%-10%線中間)
長度：62.5 CM (為何會矮左1CM呢！？)

雖然比起初生時50%跌了好多，但比起5個月時進步了好多.....

4個月：5.66 KG
5個月：5.7x KG (升得0.1 KG)
6個月：6.15 KG (升左0.4 KG)

都係同健康院姑娘講番南瓜妹既情況，現在希望南瓜妹無嘔後，體重會上升，而最後都係叫我記得去見營養師同醫生。

而姑娘都講，可以我本身瘦，所以南瓜妹基因似我喎........唉！

跟住就睇南瓜妹既發展......

1) 一直都擔心南瓜妹坐唔合格，因為到現時為止都係坐得不太好，要扶住先坐得好。(南瓜仔同期已經唔駛扶坐到5分鐘)

原來南瓜妹咁坐都叫合格，而姑娘仲話比想像中好添！！

2) 企，合格

3) 捉住物件，合格

之後就打13價肺炎鏈球菌疫苗，當時南瓜妹正左熟睡，一打針就喊了幾聲，之後就繼續瞓！！

安排南瓜妹返屋企後我就返工，之後母親大人打俾我，叫南瓜妹好似發燒，我就叫幫佢探燒，點知母親大人同工人姐姐都唔識用.......

最後母親大人去左隔離屋叫人幫南瓜妹探熱，雖然係怪左少少，但母親大人又幾叻喎！！

南瓜妹@6個月

21/09/2014 (6M)

我平時都係等南瓜仔瞓著先有時間打blog，當然會睇下大家既blog (好懶既我只係睇無留言囉！哈！哈！) / 上bk / 上ek / 搵學校資料 / 睇fb，11點左右就瞓啦，第二日6點先起身，都有7小時瞓！！

我都算好幸福，南瓜仔同南瓜妹晚上好乖乖咁瞓，一瞓就天光，佢地個都算係咁(除左南瓜仔唔食飯外)，當然佢兩個都會有喊，有頑皮 / 唔聽話既地方，但我都覺得可以接受。

講番正題先......

今日個月南瓜妹好叻叻，無乜嘔奶......

06:15  奶 (6安) 
07:00  小睡
09:00  遊戲時間 
10:00  奶 (6安) 
11:00  小睡
12:00  遊戲時間
14:00  奶 (6安) 
15:00  小睡
16:00  遊戲時間
17:00  小睡
18:00  糊仔 (2安)
18:15  奶 (3安)
19:00  遊戲時間 (自己玩)
20:30  洗白白
20:35  遊戲時間 (與南瓜仔玩)
22:00  奶 (6安)
22:30  瞓

食
真係死蠢，早知一早帶南瓜妹睇醫生，拖下拖下，要南瓜妹嘔足5個月！！

現在南瓜妹無嘔奶啦！！yeah ~~~~~

大部份時間都食得哂支奶，仲可以自己拎住支奶食，勁！ (南瓜仔要9個月先肯自己拎黎食)。

而糊仔方便，食得麻麻地，主要係食食下糊仔佢就食手指，放唔到匙入口！！

仲有食其他野，我諗住等佢食多少少糊仔先加入其他食材！

大便
1 - 2 次。

仲用緊S碼片。

瞓
平均13-14小時。

晚上瞓得好好，無半夜喊，勁乖！！

能力發展

-   自己拎奶樽食
-   可以自己坐，但要有野扶住

其他
- 2隻牙 (南瓜仔8個月先出牙！)

↑ 6個月啦！！

南瓜仔@24個月

19/09/2014 (24M)

2歲啦，話咁快就2年，時間真係過得好快！！

九月開學了，所以時間表亦有好大改變 ........

07:25  早餐 - 奶 (6安) + 餅
07:35  換校服 / 換片 
07:50  出門 (搭港鐵)
08:20  上校巴
09:00  校園生活
12:00 (11:40)  放學 - 上校巴
13:05  落校巴 (應該有瞓掛！？)
13:20  午餐 + 水果
14:00  遊戲時間
15:00  午睡
16:00  下午茶
16:15  遊戲時間
19:00  晚餐 + 水果
19:45  遊戲時間 (自己玩)
20:15  洗白白
20:20  遊戲時間 (與妹妹玩)
21:00  宵夜 - 奶 (6安)
21:30  瞓覺
 
食
原本進步左好多，基本上都係自己食，但有時食到尾段可能要餵佢。

但呢幾日唔肯食，都唔明點解！？煩到死！！

大/小便
一日 1次！

為配合學校生活，我亦開始幫南瓜仔戒片，現在要主動問佢，佢先會答 (除第一次 poo poo 外)，成功去 poo poo，亦成功用尿兜去vee vee。

不過試過幾次用尿兜vee vee時，都整濕條褲，咁就唔想再用尿兜，要用坐廁。(學校係教企係度 vee vee)

我次次都會問佢用唔用尿兜，佢say no，我唔想迫佢，唔想令佢抗拒去洗手間！

基本上(晚上)都會成功去poo poo 或 vee vee，但距離戒片我相信有一段好大距離 >< 。

瞓
基本上10點前會瞓著，平均瞓 11小時！！

唉，越瞓越少......

發展
1) 說話：基本上都講到完整句子(英文同中文)，亦好識得表達自己。有時聽到佢既說話覺得好攪笑，例 .......

- 我：「妹妹可以唔可以食蛋糕！」
  南瓜仔：「唔可以，妹妹食奶奶、食糊仔！XX (自己名) 食蛋糕！」

- 準備出街，南瓜仔：「妹妹坐車車、 XX (自己名) 坐HIPSEAT、爸爸媽媽行路！」

- 有次睇書，書中既爸爸唔係書中，南瓜仔：「爸爸唔見左！？」(本書食講緊食午餐，所以爸爸不左，而我自己都無留意唔見左爸爸)。

我：「咁爸爸去左邊！？」

南瓜仔：「爸爸返工！」

2) 開始有情緒，成日叫：「媽媽抱抱！」，hd 抱又得！開始有脾氣，又唔肯行，好似食左「軟骨散」咁，又要帶ELMO公仔/車仔出街，唔俾帶出街就喊，都唔知佢想點！！！

3) 返學：未肯同老師講野、未同同學仔玩、聽老師指示 (除唔肯排隊，自己走去另一邊)、自己食茶點 (最奇係佢平時唔食包，但學校肯食喎！？)

其他
- 瘦b (22磅)
- 16隻牙

↑ 24個月。

↑ 我無特別安排生日會，只係去左婆婆屋企咋，但都收到好多禮物！！

P.S：南瓜仔2歲啦，為保障佢既私隱(blog係公開，無得"私有化")，我唔會再POST南瓜仔既樣(有興趣可以add 我 fb)，文字都會照寫！而南瓜妹則會繼續POST相同文字，直至2歲為止！

南瓜妹@向“嘔奶”SAY NO (5) - 覆診

17/09/2014 (5M27D)

南瓜妹好叻叻，已經無嘔奶啦 ~~~~~

原本尋日約見營養師，但「海鷗」(8號風球)來臨，所以睇唔到，要改期到10月，最慘係浪費左我半天大假！！

今日覆診，再次見劉醫生，他一定好好好高級，因為南瓜妹見佢，劉醫生仲帶住7-8個學生(醫生)，南瓜妹有一次過見到咁多醫生，真係威！！

雖然無嘔奶，但體重都係無乜大進展 (其實我係屋企有幫佢重)....

體重：6.05KG
身長：63.7CM
頭圍：42CM

體重應該3%，但南瓜妹再無嘔奶，我已經好滿足！！

女仔唔係咁重，太重將來要減肥 ~~~~ 哈！哈！( 唯有咁安慰自己)

最攪笑(無奈)，劉醫生對住班醫生講：「睇下，好明顯係有脂肪！(劉醫生按住南瓜妹手臂位)，而好明顯有肉過媽媽！」

我：......... (苦笑)

真的好感謝劉醫生，上次聽完佢既建議後，南瓜妹嘔奶情況改善哂，我都相信南瓜妹應該唔會再嘔！！


↑ 南瓜妹好叻，已經可以自己拎奶樽食4安奶，超勁！！

 ↑ 係媽咪心目中，你永遠都係最可愛！！

南瓜仔@自己返學(DAY 6-9)

08/09/2014 (23M19D) - DAY 6

今日開始返3小時，亦開始搭校巴.......

南瓜仔並不是屋企樓下上車 (上車時間 7:35)，而係我公司附近 (8:20)，而由我屋企去公司都係15-20分鐘車程，所以決定帶佢係公司附近上車，一來佢唔駛咁早起身、二來唔想南瓜仔自己係校巴上咁長時間、三來我可以陪佢多點時間！！

第一次離開身邊既人，南瓜仔會點呢！？

南瓜仔好乖上校巴，仲同我揮手bye bye 添，而校巴姨姨好好人，whatapps 我南瓜仔係車上既情況，話佢好乖、坐得好定、無喊！

放學接校巴，校巴司機同姨姨 (放學另一組人)，都話南瓜仔好乖、坐得好定、無喊。

09/09/2014 (23M20D)

中秋節翌日，放假

10/09/2014 (23M21D) - DAY 7

唔多肯著校服，但都係用1分鐘時間就著好哂！

今次有少少不願上校巴，抱實我，但我用好快時間就放俾校巴姨姨，之後再whatapps校巴姨姨，都係讚南瓜仔坐得好定、無扭計！！

放學， 我都有問校巴司機同姨姨，佢地都係讚南瓜仔！！

11/09/2014 (23M22D) - DAY 8

都係有少少不肯著校服，但都係用1分鐘時間就著好哂.......

但佢話要帶ELMO返學！？無端端愛上！？明明只愛車！？但我無俾佢帶返學，唔想成為習慣，喊了兩聲就收聲......

懶到死，成日話唔夠力揹書包，唔肯行，要抱 ><

返學/放學搭校車都無問題，YEAH！！

咁返學情況點呢！？作為家長真係好想知 ~~~~~~

一直都諗好唔好打俾學校，但又怕煩到班主任，今日班主任打來，真好！！

班主任評語：
- 靜
- 乖 (做到哂老師指令，放/拎書包、食物盒、水樽、毛巾盒、自己食野/飲水等)
- 慢熱 (未同老師講野、去操場玩，自己企埋一邊，要隔一陣先肯出去玩、未同同學一齊玩)
- 無喊過

DAY 6，南瓜仔學校攪生日會，放學就問佢.....

我：「有無食蛋糕！？」
南瓜仔：「有」
我：「 有無吹蠟燭！？」
南瓜仔：「無」

南瓜仔答完我，我都唔知係唔係！？今日班主任打來，我就問，原來南瓜仔真係有食蛋糕、無吹蠟燭！！

12/09/2014 (23M23D) - DAY 9

今日，又轉了一個樣！！

平時等校巴時，南瓜仔會成舊飯企定定、拖住我，今日佢見到同校同學玩，佢又跟住一齊玩 (雖然哥哥姐姐唔啋佢)，好似好開心咁！！

見到南瓜仔咁，我就諗......企定定好！？定係周圍玩好呢！？一舊飯好！？定係走圍玩好呢！？

南瓜仔@返學了(DAY 1-5)

一直都好期待南瓜仔返學，因為返左學就有老師等人照顧，好過留係屋企，

但一個未到2歲就返學，做媽媽當然有擔心啦 ~~~~~~

1-3日，返1小時，家長可陪同。

4-5日，返1小時，家長不可陪同。

原本諗住CALL定的士，但無的士司機肯做，話呢段時間大把街客，唯有自己等的士！！

01/09/2014 (23M13D) - DAY 1

 一朝早，就叫醒佢，好合作就起左身，首先係食藥 (氣管敏感，食埋今日咋)，食完藥就唔多肯飲奶，我就由得佢，換埋校服！

而母親父親大人黎左我屋企，因為母親大人有「儀式」俾南瓜仔，就係 放蔥係書包！哈！哈！哈！哈！仲有封利是仔既！

 

↑ 之後父親大人話陪我一齊去，咁咪一齊去囉！！(書包係自己)

等左20分鐘先有的士，勁多人！

上左車5分鐘後，發現自己無帶銀包，好彩父親大人有陪我咋，唔係唔知點算！？

臨落車時，南瓜仔嘔，佢嘔左我身 (勁臭)同車箱，但佢就無嘔係自己身上！(我估因為食左抗生素，食奶完搭車)，好彩嘔完南瓜仔無乜事咋！！

第一日返學，都係玩下玩具、排隊去洗手間 VEE VEE / 洗手、茶點、唱歌仔！

02/09/2014 (23M14D) - DAY 2

朝早到左，咪俾南瓜仔玩下(車、鞦韆、滑梯)先上堂......


 ↑ 我無諗過南瓜仔會「夠膽」玩，仲玩得咁高添！？？？

上堂啦，南瓜仔「零」反應，老師同佢講野佢唔理，班主任仲問我，佢係唔係唔識講野，我話佢識講句子了......

唔多肯低玩具、又要我抱、又唔唱歌，唉，都唔知佢發生乜事！？

放學，HD就打俾我，問南瓜仔返學點，我咪講俾佢知囉......

HD：「緊係啦，你一早俾佢玩，佢咪唔想上堂囉！」

HD；「玩左幾耐！？」

我：「40分鐘！」

HD：「XXXXXXXXX」(一大堆話我既說話，叫我下次唔好再俾佢玩，又係佢叫我早點帶南瓜仔回校)

03/09/2014 (23M15D) - DAY 3

今日推遲左出門口，因為怕太早返到學校......

但我等的士等左30分鐘，返到學校時間啱啱好咋！

今日反應比尋日好，有講「唔該ee！」(俾玩具佢玩)，但老師同佢講野，都係無講野回應，只係笑囉(好過無啦)！

明天唔可以家長陪上堂，要係學校門口送/接，唔知南瓜仔會不會喊呢！？

老師問我南瓜仔會不會喊！？我估可能唔會，因為平時南瓜仔見唔到我，佢既表現會仲好，但小朋友既野話唔埋，所以我同老師講：「唔肯定！」

老師：「唔緊要，有小朋友會喊幾日，有些喊個多月，所以家長唔駛擔心！」

04/09/2014 (23M16D) - DAY 4

早左返學，所以係附近行一陣就先送南瓜仔返學。

第一日自己入學校，雖然南瓜仔有少許不想離開我，但最後都好順利(無喊)入左學校！

我不能入學校，所以我就同其中一位家長傾計(交換埋電話 ^^ )等南瓜仔放學.......

好快就放學，班主任話南瓜仔無喊過 (叻仔)，但唔肯食野(一向都唔like食，所以對我來說無乜特別)！

05/09/2014 (23M17D) - DAY 5

都係早到左，所以都係四圍行下......

第二日自己入學校，南瓜仔好合作地入學校，放學見到佢都無喊！

班主任同我講：「今日有食麵包 (南瓜仔平時唔多肯食喎！)，亦沒有喊！」(叻仔)


↑ 拎左唔夠1分鐘就話：「唔夠力！唔夠力！」(書包內：水樽、食物盒、毛巾盒、文件袋、尿片2片)，都唔知佢做戲定係真！？？

之後既日子，南瓜仔就要搭校車，唔知會點呢！？？