2018 父親節

南瓜妹係一個好聽老師話既小朋友，學校係星期五派回父親節禮物.......
南瓜妹一落校巴就同我講：「老師話要放係枕頭底，唔好俾爸爸知道，父親節先送！」

回家後，衫都未換，就係書包拎份禮物俾我，叫我放係枕頭底.......

我笑住講：「放係枕頭底會整摷，不如我幫你收埋去啦！」


晚上，南瓜妹見爸爸沖涼，靜雞雞拎出黎睇，點知俾哥哥知道左......(哥哥份禮物未到父親節已經拎左俾爸爸睇了)

哥哥就好衰地拎出黎，諗住俾爸爸睇，妹妹就大叫：「老師話父親節先可以俾架！」

我唯有快快幫妹妹 (呢個哥哥 .........=.=)


第二天(星期六)，hd 帶南瓜仔去學跆拳道時，我就叫妹妹畫咭送俾爸爸 .........

女仔，寫字真係靚啲，所有字都係妹妹寫，我無拎住佢隻手！！


17/06/2018 (5Y8M29D + 4Y2M27D)

到了父親節當天，妹妹/哥哥一起床就送了禮物俾爸爸............

不過，呢個懶媽咪乜都無安排！哈！哈！

我相信爸爸不會介意的！呵！呵！

晚上，約左公公全家人一齊食晚飯 ~~~~~~~

南瓜妹@48個月

21/03/2018 (36M)

不經不覺你已經4歲了！

隨著你越來越大，你和哥哥相處時間就越來越多，有時可以為了一件好少既事就嘈亂巴閉，見到都心煩 .......

但有時亦為了一件少事，你地又會玩得好開心，最攪笑係你扮馬俾哥哥玩！！

妹妹，我希望你知道你只有一位哥哥，我好希望你地能夠相親相愛！！

食
唉！都係無乜進步！！

妹妹，你可唔可以食多啲野呀！？？

瞓
都係 keep 住有午睡，晚上9點前就瞓。

仲係好愛我，晚晚都要我陪佢瞓！哈！哈！
 
發展 
語言發展比哥哥更快，可能係女仔，加上有哥哥每天同佢傾計！

我已經無乜抱佢了，仲可以自己行山2小時，呢樣真係要讚下佢！！

記性同哥哥一樣咁好，所以應承左佢地既野，唔可以唔做！！



返學
現在可以朝朝帶佢上校巴，放學就我同 hd 輪住接！！

班主任不會任何野都出 MEMO /通告/ 手冊通知小朋友要帶乜返學，要小朋友回家自己講，若果當天南瓜妹「發夢」，佢就唔識同我地講 .......

好彩係南瓜妹算專心上堂(因為佢識回家同我地講)，所以佢叫我帶乜我就帶乜，而且現在有 whatsapp group 所以就更加加強我對南瓜妹既信心。

有次，班主同我講，見南瓜妹眼腫腫，老師問佢乜事(證明老師真係好細心)，南瓜妹竟然將爸爸尋晚罵佢既事講出來，仲要講得好清楚.........事後我同hd講，「你唔好蝦妹妹，妹妹會報串！哈！哈！」

過去兩次家長日，班主任俾南瓜妹既評價都正面，希望妹妹繼續 keep 住！！

媽咪只望你能原校升小學，媽媽真係唔想「小學大作戰」，妹妹，你要學校乖乖呀！

其他

-  14kg

↑ 南瓜妹4歲生日當天，我地沒有特別慶祝，只係買左個蛋糕俾佢！！

妹妹，媽咪祝你：
「身體健康！」
「有個快樂既童年！」

南瓜妹@預祝4歲生日會

今次生日會，原本有諗過取消........最後都開得成！！

因為前一天，南瓜妹突然發燒，仲有咳 ><

醫生話唔係流感，只係普通感冒 ...... 好彩食完一次退燒藥後，就無再燒，而咳都係星期日減少左好多，最後都決定如期進行！！

18/03/2018 (3Y11M25D)

我都係只邀請屋企人黎，簡簡單單慶祝就算 (太多人，要做好多野)

由於屋企太細，所以都係會所搞！！

 ↑ 年年都係食 PIZZA，今年就改左去太興買炒野食就算 ........

而今次生日主題係 Melody，所以蛋糕都買埋  Melody！！

↑ 生日禮物及夾糖機，妹妹仲玩得好投入，仲成功夾到3粒糖！！

親子好去處@【2018 農曆新年(初五至初十)】

20/02/2018 (初五) (5Y5M1D + 3Y4M30D)

是日，我就要返工啦！！

晚上就帶埋南瓜兄妹同我啲朋友仔食晚食！！

去左黃埔既「香港海賊王餐廳」，去到都唔駛等位就有得食 (食完呢次，不會有下一次，你地明啦！！)

 

21/02/2018 (初六) (5Y5M2D + 3Y5M)

hd 帶左南瓜兄妹行魔鬼山炮台。



兩位小朋友都好叻，自己行足全程 .......

特別係南瓜妹，佢真的大個女啦，唔駛再抱佢啦！！




22/02/2018 (初七) (5Y5M3D + 3Y5M1D)

約左朋友仔食晚飯！！

感謝友人們咁愛鍚南瓜兄妹，送上厚禮 ......... 其實大家聚下舊，下次希望係去你地既婚宴啦！！


23/02/2018 (初八) (5Y5M4D + 3Y5M2D)

hd 帶左南瓜兄妹去 Hong Kong Observation Wheel .......

無人去，所以可以包廂咁，只有佢地三個！！

之後就去左維港，鬥快搵南瓜.......結果南瓜仔勝出！

左去 Espuma QRE 食下午茶，終於可以食棉花糖啦 ~~~~~ 不過都沒有下次 (你地明啦！)

精力無限既三人，再去埋藍屋、玉虛宮、玩具街等 .......



24/02/2018 (初九) (5Y5M5D + 3Y5M3D)

主日學既新春團拜，因南瓜仔去上跆拳道，所以只帶了南瓜妹去 .......

雖然平時佢地兩個成日「互蝦」，但南瓜妹內心係愛鍚哥哥，妹妹叫我拎定啲食物俾哥哥，等哥哥學完跆拳道後有得食！！

南瓜妹仲中埋獎，真開心！！


25/02/2018 (初十) (5Y5M6D + 3Y5M4D)

堂區既新春團拜.......

除有有午餐外，仲有表演節目，而南瓜兄妹對神父跳舞留下心刻記憶！！

之後就去挑戰鴨仔山 (係我挑戰)，明明 hd 只話行 30 分鐘，但點解行咁耐仲未到！？

對於一個長期無運動既人黎講，真係  .........

hd 仲不停講：「妹妹仲叻過你.........」

親子好去處@【2018 農曆新年(初一至初四)】

16/02/2018 (初一) (5Y4M29D + 3Y4M27D)

早上，當然要同我地拜年。

↑ 之後就去 6299 家，食完午餐就去同班小朋友一齊去公園玩。

去 mega box 睇 paw patrol。
 

17/02/2018 (初二) (5Y4M29D + 3Y4M27D)

中午時段，就去公公婆婆家拜年。


18/02/2018 (初三) (5Y4M30D + 3Y4M28D)

早上，去左感恩祭。

之後去左林村許願廣場，再去鐵路博物館。


↑ 晚上，就去舊同事家拜年，回到家已是11點多，攰到呢 .........


19/02/2018 (初四) (5Y5M + 3Y4M29D)

我既最後一日假期，去左圓方 THE RINK 溜冰！！

再去睇埋口琴隊表演，最後當然去公園玩啦！！

晚上，就留在家打邊爐！！

親子好去處@【2018 農曆新年前】

農曆新年前，因流感「突然」(08/02/2018) 開始停課 .........

原本南瓜兄妹既新春活動都取消左 (南瓜妹就於返學第一日補回)、南瓜妹生日會都取消 (將會與3月份一齊慶祝)

對於在職父母當然頭痕，但都無法，小朋友既健康係最重要！！

同表姐(妹)商量公公「工作安排」同埋大家都各自請假 (又要請假 =.=)


10/02/2018 (年廿五)

上年係南瓜妹派福袋，今年就由南瓜仔去派福袋。

南瓜仔派剩3個，一個俾我、一個俾婆婆、一個俾嫲嫲！！^^


11/02/2018 (年廿六)

晚上，同公公婆婆一齊食團年飯！

幾個表兄弟姐妹一齊玩，都唔太專心食飯 ..........


12/02/2018 (年廿七)

請了半天假，同南瓜兄妹去公園玩，再去食麥當奴！！


13/02/2018 (年廿八)

晚上，hd 自己一個去行年宵，佢話要買年花，因佢話帶住小朋友買唔到野。

而我就負責封利是，南瓜仔只係入左數封就停左手 =.="，最後都係由我入哂！！(但我前幾天先拆南瓜兄妹既利是........原來好多人都好似我咁，過左成年都未拆利是！哈！哈！)


14/02/2018 (年廿九)

hd 帶小朋友去維園行年宵。

↑ 晚上，就叫南瓜兄妹入全盒，幫手準備新年！！


15/02/2018 (年三十)

早上，hd 帶了南瓜兄妹去左饒宗頤文化館。

待我放工後，就去6299家食團年飯。

今年，多左個堂弟，南瓜兄妹好鐘意佢，最攪笑係南瓜妹同堂弟度高，佢好自滿高堂弟一個頭以上 (堂弟得七個半月！哈！哈！)

2018 情人節

14/02/2018 (5Y4M26D) + (3Y10M24D)

「 情人節快樂！」

今年情人節，都係好簡單咁過 ........

第八年黎呢間餐廳，原本我唔諗住出街食飯，但諗諗下無理由「斷」左去架！？

又係未開門就到，不過可以將近年三十，今次無乜人等枱喎！？？

- 甜蝦魚生沙律
- 刺身盛 (牡丹蝦、三文魚腩、池魚、珍寶帆立貝)
- 彩虹卷
- 海老沙椎魚天婦羅
- 香草燒法式羊扒
- 茄汁海鮮意粉
- 飲品
- 甜品

 另外，仲叫左五件厚切魚生、玉子壽司/粟米壽司/腐皮！！


↑ hd 買左個蛋糕喎！？又幾靚喎！！！

老土d講，只要有1大2小既情人一齊，天天都係情人節 ~~~~~~

親子好去處@南瓜妹第一次公開表演

11/02/2018(5Y4M23D + 3Y10M21D)

記得南瓜妹 PN 學校表演時，全班只得佢一個坐係地上，郁都無郁過，而且眼框內有仲淚水 ......

愉景新城 

今次，係第一次正式「公開」表演，但今次我對南瓜妹信心十足，點解！？因為當佢知道要表演時，係屋企跳次幾百次，無誇張 ........ 南瓜妹真係一日跳數十次！！

表演當天，見到南瓜妹台上「滿足」既笑容，就知道佢真係鐘意跳舞！！

當然順利跳足全程(雖然只得1分鐘)，我好私心地覺得佢係跳得最好。

我有無喊！？當然無喊啦 (有乜好喊！？哈！哈！)

原本我好擔心天氣會好凍，好彩是日天氣唔叫凍，而且係商場內，而佢地只係臨出場前先會除外套，所以都叫 ok


鯨魚花園

去到愉景新城，又點可以唔去出名既鯨魚公園呢！？正當南瓜妹入去預備時，我地就帶去南瓜仔去玩！！

雖然南瓜仔細細粒，但佢已經可以自己爬上去！！
 

親子好去處@2018明愛義賣樂繽FUN

27/01/2018(5Y4M8D + 3Y10M6D)

目的地：2018明愛義賣樂繽FUN (明愛專上學院 / 明愛白英奇專業學校)

是日，我要返工，所以由 hd 單拖帶小朋友去玩！！

估唔到入面有咁多野玩，仲嬴左好多獎品(每個攤位$10-$20)同買左好平既玩具($10-20)添，只係用左 $2xx！真係好抵玩呀，仲可以做慈善 (活動收益用作支持明愛服務及發展天主教大學之用)，真係好有意義！！

有乜玩！？遊戲攤位、DIY工作坊、美食攤位、兒童樂園、舞台表演及電視欣賞。


P.S：每次當我要返工，hd whatsapps 既相時，我內心都好欣賞 hd，一個願意單拖帶住兩個小朋友去玩、跟小朋友功課/溫書 (我無跟過！哈！哈！) 、半夜會去睇小朋友無有踢被(有著睡袋，但都有加張被俾佢地)，呢啲爸爸可以去邊度搵！！

南瓜兄妹，你長大後要好好愛錫你既爸爸呀！！

親子好去處@MTR Gallery + 空中花園公眾休憩公園

21/01/2018(5Y4M2D + 3Y10M)

目的地：MTR Gallery

睇到【漫柑遊】既blog，知道原來已經係好容易 book，我就快快手book去參觀！！

南瓜兄妹不是「港鐵迷」，但都book左去睇！！

要早 5分鐘係門口等 (佢地既入口都唔似入口，職員開門時，仲嚇了南瓜兄妹一跳添)

 雖然入面唔算大，有職員導賞講解(但南瓜兄妹應該唔係好明、模擬楂 MTR (用滑鼠)，都值得一去！！


目的地：空中花園公眾休憩公園

黎到香港站，當然是去下公園啦 ........

講好玩既好公園，除左寶康公園、坪石遊樂場外，呢個都係好吸引公園之一！

若不是新聞講，仲以為係私人住宅既公園，原來係公眾可以去玩既公園黎。

上次黎，已經係3年前了 ........


今次，南瓜仔已經向「高難度」挑戰，而南瓜妹仲係玩「低難度」，所以佢地各有各玩 ........

親子好去處@大拗門

14/01/2018(5Y3M26D + 3Y9M24D)

目的地：大拗門

天氣好，最好當然去郊遊，吸收下新鮮空氣啦！！(是日，我咳到半死！)


↑ 今次只係睇好多「風箏垃圾」， 原來係印度人社團既風箏節，破壞了環境 >< 我都唔明點解唔清走垃圾呢！？

另外就係見到大野豬 (真係有啲驚)！！！

除了踢波外，我仲第一次同南瓜兄妹玩「狐狸先生幾多點」，兩個小朋友爭住做「狐狸」，好攪笑 ..........

而見到南瓜妹已經不怕辛苦，自己行上山都覺長大了不少，見住南瓜兄妹行上山既背影，真係好大既感觸 (當然我沒有喊啦！)

親子好去處@香港歷史博物館 + 香港科學館

07/01/2018 (5Y3M19D + 3Y9M17D)

目的地： 香港歷史博物館

「綿瓦萬里 - 世界遺產絲綢之路」，你地覺得 3.5歲 同 5歲 既小朋友會識幾多呢！？

仲遇上 hd 大學同學(又係同一類人)，同學講：「呢度啱中一以上睇喎，最多咪小五、六！？」

我自己都笑了出來，咁都唔明白，佢目的係乜！？咪佢自己想睇囉！哈！哈！

不過，hd 都「捉住」一個小朋友黎講 (嗱，南瓜妹就醒，知道爸爸會抱住黎講，佢就叫爸爸陪佢，妹妹聽左幾多，我估 0 囉！哈！哈！)

睇完，就去埋隔離既香港科學館......


目的地：香港科學館

「生物多樣性展廳」，佢地明幾多我就唔知，但好明顯佢地好有興趣........

↑ 學習不一定係書本，佢地今次黎未必識到啲乜，但我相信到佢地再大一點，佢地會更明白！！

親子好去處@【2017 元旦】we 嘩！恐龍遊樂園 + 朗屏士多啤梨園

01/01/2018 (5Y3M13D + 3Y9M11D)

其實無諗過黎，但最後都黎左「we 嘩！恐龍遊樂園 」！！

目的地：青衣體育會足球場

買了套票 $180 有4遊戲 + 2個攤位！！

最少 90cm，南瓜妹又可以玩啦！哈！哈！

原本有個 100cm (充氣大恐龍) 南瓜仔可以玩，但南瓜仔話想陪妹妹一齊玩，所以就揀左個啱佢地兩個都玩到，又唔太「低能」既充氣遊戲！

之後南瓜仔「敵」不過電動車(兒童森林越野車)既吸引，放低左妹妹........

咁，妹妹再玩多個充氣遊戲啦！！

佢兩個仲俾小食吸引住 .....=.="


玩完，去左青衣城食午餐，再去朗屏士多啤梨園........

↑ 點知，無哂靚靚士多啤利=.=" (職員話要等多一個星期先可以摘)

山長水遠黎到，唯有食超甜粟米吧！
 

親子好去處@【2017 除夕】香港仔水塘

31/12/2017 (5Y3M12D + 3Y9M10D)

早上，照返聖堂 ......... 再食埋午餐就出發！！

目的地：香港仔水塘

↑ 是日天氣好好，所以好適合行山，而且呢度唔難行，理論上行30分鐘就到，雖然南瓜妹行得比較慢，仲要行百多級樓梯 (唔緊要，媽咪/爸爸/哥哥會陪住你 ^.^)

而南瓜仔呢！？又進步左，背住好重既背包(入面除玩具外，仲有支好重既水樽)，亦沒有叫我地幫手拎...........


行完就回程去婆婆家啦，有我最鐘意既打邊爐！！

↑ 除夕夜，南瓜仔仲睇埋煙花先瞓 (係屋企睇咋！)，而南瓜妹就早早就瞓了！！

親子好去處@【2017 聖誕】D2 PLACE + 龍蝦灣 + 玩轉極樂園

29/12/2017 (5Y3M10D + 3Y9M8D)

我要返工，就由 hd 帶兩隻南瓜仔去玩 ......

目的地：D2 PLACE

去睇 igloo，不過未去睇就知係假！哈！哈！


目的地：龍蝦灣

據 hd 所講，南瓜妺再無叫佢抱了，真的好開心 .........

呢度係我同 hd 拍拖時行過既山，可惜我無得去！！！


目的地：戲院 (玩轉極樂園)

hd 帶埋小朋友黎接我放工，一齊去睇戲！

睇frozen時，南瓜兄妹都無乜野，南瓜仔仲笑得好大聲添！！

但到睇「玩轉極樂園」既骷髏骨頭人時，南瓜妹就喊爆，為左唔好影響人，我就帶南瓜妹出去，安撫一輪後，買埋支檸檬茶俾佢，再入戲院......(其實我自己想睇，不過就去番原位，坐係門口位，萬一南瓜妹再喊，我可以立刻走人)

之後南瓜妹全程都係背住個螢幕，不過我就可以順利睇埋套戲！！

完場後，我問 hd ：「南瓜仔有無睇！？」

hd：「佢有睇，不過有時用手遮住對眼，但又係手指縫「偷睇」」！

事後，我再問南瓜仔，南瓜仔就話唔鐘意睇喎 .........

↑ 晚餐，就去食韓國燒烤.........我真食好耐啦！！

親子好去處@【2017 聖誕】深圳野生動物園

27/12/2017 (5Y3M8D + 3Y9M6D)

今次係第二次黎 ........

不過，大意既媽媽忘了帶 PASSPORT，只帶了身份證 + 回鄉證，好彩最後入境處既職員都俾我地過關，但當然有手續要做 (出入境都要，所以係浪費左自己 + 職員時間，所以下次記得要帶)

最大「收獲」係乜！？就係南瓜妹全程都係自己行 ..........

我同自己講，若南瓜妹不能全程自己行，我係不會再帶佢去旅行，經過今次，我就要計劃下去旅行了！！

可能係平日，所以人流不多，所以都好舒服！！

兩個小朋友見到唔同動物，就已好高興！！

而南瓜仔就越來越大膽，可以自己一個人餵動物 .......... 上年都係敢放食物係地上俾大象食，今年就親手俾大象！！

南瓜妹都係怕，部份動物要我抱住佢，但都有些佢夠膽自己餵！！

仲玩埋機動遊戲，只係人民幣10蚊一次，hd 話平過 AIA 好多添 =.=

回程時，兩隻小南瓜就瞓著了，不過當落車時，佢兩個都醒左，仲肯自己行 (南瓜妹又進步了) 

我地揀左沙田食晚飯，沙田多人到呢 ........ 點解平日都人山人海！？？？

親子好去處@【2017 聖誕】聖誕親子活力派對 + 睇燈飾

26/12/2017 (5Y3M7D + 3Y9M5D)

今次係第一年黎，真係又幾好玩喎！

有免費既攤位遊戲，仲有禮物添 ...........

 ↑ 仲有神父唱歌，唔知點解南瓜兄妹咁鐘意呢位神父！？佢一唱歌，就走埋去！


↑ 玩完，就去食雪糕火鍋 ......

上年，南瓜仔無乜食，今年就不停咁食，不過點快，都唔夠大人快！哈！哈！



聖誕節，當然要去睇燈飾啦(雖然唔多靚)

↑ 去左食壽司，南瓜仔最愛，一人可食7-8件 (一個一向細食既小朋友)

對於燈飾，小朋友就無乜特別鐘意，不過就帶佢地感受下氣氛罷了！！

親子好去處@【2017 聖誕】2017 友邦歐陸嘉年華 + 聖誕派對

25/12/2017 (5Y3M6D + 3Y9M4D)

呢度已經係第4年黎，hd 不是太想黎，但我就堅持要去！哈！哈！

價錢都係大人 $130 (包10個代幣)，小童 $90 (包7個代幣)

南瓜妹又大個女，而且已夠 90cm，有部份機動遊戲已經可以自己玩，而南瓜妹又好大膽，玩既時候只係聽到佢既笑聲！！

↑ 南瓜仔又對妹妹好好，當玩完火車後，立刻去搵妹妹，仲幫妹妹開埋門 ，工作人員都大讚南瓜仔細心！！

南瓜妹同我一樣，都好鐘意食爆谷($30，都唔平)........ 仲要話全部都係佢，要佢分俾我食 =.="

佢地玩左幾個機動遊戲 (火車、mcqueen 車、碰碰車、直昇機)、仲有免費既 AIA REAL LIFE ZONE 扮去動物園。

玩完就走人啦！！


↑ 仲有時間行下 IFC！不過部份已經壞左了 =.="


玩完，就去婆婆家開聖誕派對........

我地今次無叫 pizza hut 啦，買了壽司 + 炒飯/麵，仲加埋婆婆整既小食！！

南瓜兄妹好好彩，有一大班表哥/表姐(妹)/表弟，見地佢地玩 ，就知道有同輩一齊玩，係一件好快樂既事！！

今次係就每人買自己小朋友份禮物 (咁就唔會唔啱心水)，繼續由 hd 扮聖誕老人，班小朋友一眼就知邊個扮，呃唔到佢地添！哈！哈！

2017 回顧 + 2017 重要生活點滴 + 2018 展望

2017 回顧 

睇番上年既展望…….

1) 全家人都身體健康

→ 南瓜兄妹，佢地十分健康，無乜大病，小病都無乜 (touch wood)，唔知係唔係同打左流感針有關！？

→ hd，佢做了一個手術，亦放左個「漫長」既病假，足足三個月，希望之後會無事 >.< (仲啱啱撞正「小一大作戰」)



2) 南瓜兄妹相親相愛

 → 兄弟姐妹就要這樣！？一時又玩得好開心、一時又話唔同對方玩！！

有時，我真係覺得佢地好煩 (南瓜仔最鐘意就係坐住妹妹)，講左 n 咁多次，佢地都係咁 ><

不過，好多時佢地又會兩個又會愛錫對方。

哥哥，買任何野時，都會要我地買埋妹妹份。

妹妹，當有人請佢食糖時，佢會問人拎多一粒，話要俾哥哥。

最攪笑係佢兩個互相扮「牛牛」俾對方，南瓜仔就話姐........ 妹妹咁細粒，都扮「牛牛」！？不過唔好理，妹妹又笑得好大聲！！
 

3) 南瓜仔/南瓜妹入到適合佢地既學校

→   放下心頭大石，因為南瓜兄妹各自入到最適合佢地既學校！

南瓜妹，入了最心儀 K1(2017/2018)。

南瓜仔，考入最心儀小一(2018/2019)。



2017 重要生活點滴

南瓜仔：

- 「小一大作戰」

考到我地最心儀學校，超額完成。(龍年/男仔/細b/非舊生/非專業人士/無錢，我已心滿意足)

收結果當天，係星期六，我送完南瓜妹上興趣班後，就係大堂等郵差，但都等唔到 ........ 唯有接完南瓜妹後再等，當我回到樓下大堂時，啱啱見到郵差正在派信，咁我我就同南瓜妹一齊等信(郵差仲叫我唔駛緊張)，當郵差將封信入左信箱後，我就立即開信箱 ......封信係「厚身」，一開 .......見到有金額，放鬆哂！！ (要交錢就知係收左啦！哈！哈！)

收到信一刻有無喊！？當然無啦，有乜好喊！？？ (sorry，我係有點冷血)

經過係呢個面試，我發覺佢真係好「天真」，佢根本唔怕面試、更唔怕失敗，對佢來話不是一件大事，所以從不擔心考唔考到學校，佢唯一要求係有小食部，可以買魚蛋食！

雖然南瓜仔從未驚過，但我相信佢每一次都好認真(因為佢能講得出佢有乜識、有乜唔識 ........最搞笑，有次南瓜仔同我講：「呢間學校一定唔收我，我都唔識答佢問題！」(但佢無所謂，因為間學校無小食部)


- K3 生活

基本上都之前無乜分別，只係同班同校車既小朋友太熟(識左3年多，出年就「各奔前程」)，熟到呢(俾校巴ee投訴) ......... 佢地係校巴太開心。


南瓜妹：

- K1 生活

南瓜妹考到入龍校 (K1)，雖然不是 100% 直升，但總好過幾千人去爭百多個位！！

轉左校，最多分別係搭校巴既車程，回程時已在校巴瞓左，咁我就再無安排午睡俾佢，晚上就九點前已瞓著！！

學習方面，班主任並不是每件事都會寫 memo 俾家長，係由小朋友自已回家講，所以好多時都係靠南瓜妹自己講出來，好彩地，南瓜妹基本上都有回家講 (可能有野無講，只係我唔知！哈！哈！)


試過一次，南瓜妹弄濕了校服，學校借了後備衫俾南瓜妹，件衫放了一星期都無拎走 (我已叮囑南瓜妹要還俾老師)，最後都係由南瓜妹親自還。
  

- 其他
 
女仔呢 ........ 講野真係叻的，轉數又快好多，有時都唔明佢點學回來！
 

2018 展望
 
1) 全家人都身體健康！ 

2) 南瓜兄妹相親相愛！

3) 可以買樓！！(呢個講左 n 咁多年 >.<)

親子好去處@【2017 聖誕】同學生日會 + 6299 聖誕派對

24/12/2017 (5Y3M5D + 3Y9M3D)

又係南瓜仔同學生日會，一年去左 n 個！哈！哈！

呢個生日會足足玩左4小時，只係有一個大型波波池，已經滿足一大班小朋友，真係超級放電！哈！哈！

 ↑連南瓜妹都玩得好開心！


玩完再去6299 家，仲有堂哥/姐、表姐(妹)，6個小朋友一齊玩，咩都玩一餐！哈！哈！

雖然佢地不是同年，最大已是小三，最細就係南瓜妹，但佢地一齊玩得好開心！！

不過最開心唔係班小朋友，係 6299 ..........


↑ 晚餐

我地今日再無每人買禮物一份禮物，變左一個小朋友買一份 (我絕對同意，小朋友太多禮物係唔會珍惜，但又想「應下節」)，之後就抽獎 ........

可惜，南瓜仔抽中一份「女仔禮物」，抽中後 ........ 眼中有淚水，我地都明白抽獎未必一定抽中心水，不過都要俾佢知道無野一定係「如意」，等佢自己慢慢接受一下！

而南瓜妹就抽中 frozen，佢當然好開心啦！！

抽完獎都十點了，所以就快快回家！！