南瓜妹@PN大作戰(完結)

PN 大作戰經已完結 ........

南瓜妹已有原校收PN，所以無乜壓力，起碼有書讀先 (最初 in 得唔好，我係有唔開心，不過去到後期，我都半放棄，哈！哈！)

我一共報左10間， in左8間 ，2間不獲面試。(其中1間，係最最最最心儀既學校，不過連面試機會都無 >< )

結果：4 offer(s)、3 waiting(s)、1 reject ，南瓜妹 in 成咁都有offer(s)！？？都叫做好彩 ........


幸運地，南瓜妹入到我最心儀既學校，但就入唔到 hd 最心儀既學校。

當收到我最心儀學校既offer時，我竟然並無特別開心，只係覺得「真係收左！？」(係唔係好冷靜呢！？但係"派彩"前，我都有緊張，仲不停問 hd：「你估收唔收南瓜妹！？會唔會上午班！？咁下午班讀唔讀好！？」，仲四圍問朋友意見，唔知以為我入左添！><)


係我心目中，一早已經有心水次序，但當現實有得俾我揀時，我係有動搖過 ........

因收到呢個offer時，亦收到南瓜仔間學校既offer，自己都幾滿意南瓜仔間學校，但最後決定唔揀南瓜仔間學校既原因.......

當大部份家長都鐘意小朋友讀同一間學校時，我就係唔想佢地讀同一間學校，我好想參與佢地學校既活動(陸運會、旅行)，但我得1個人，真係分身唔到 (平時 hd 又請唔到假)！！

就正正好似宜家咁，南瓜兄妹不同校，放假(南瓜仔間學校好多假)又唔同，我就可以唔駛請假 (我仲未試過南瓜兄妹一齊放假，我或 hd 不在家，我真係未放心工人姐姐，一對二照顧佢兩個，而公公要去表姐家幫手，來年可能幫唔到手。)，所以對我來說，佢地唔同一間學校係較方便。

另一個原因，當然係口啤，既然有咁多家長支持，一定有其好處，對嗎！？


現在既 offer 已經好好，不過真心唔想「小一大作戰」(南瓜仔係龍年，又係細B，真係超頭痛)，在朋友既分享，小學係十分十分十分難考 .....

所以一心諗住試下龍校，點知聽朋友講，讀龍校 (大部份都唔係100% 直升)壓力係由 K1 開始，大家都深怕係被"OUT"既學生，嘩！咁轉去龍校未仲大壓力！？？？

呢個問題再諗諗吧，都係報左先，收左先算！！right！？

親子好去處@blogger 聚會(歡迎 Mrs Wu 回港)

24/04/2016 (43M5D) + (25M3D)

我期待呢一日好耐.......

點知 hd 突然間同我講 --- 我。要。返。工！！

我真係晴天pig pig，叫我一拖二去，我暫時仲未得(只限屋苑會所或樓下商場)，我最怕係佢兩個係車瞓左，我一個人點抱住兩個落車呢！？？？

有諗過叫工人姐姐調假，但前一日 hd 都係要返工，南瓜仔又要學游水 (我要同南瓜仔沖涼，更加唔可以帶南瓜妹一齊去啦！)，唯有放棄 ><

隔左一日，我既腦「突然」清醒喎，不如叫姨媽陪我去啦 .........

收到姨媽 whatsapp，寫住 -- ok，真係好開心呀！！


目的地：小檬媽屋企會所(歡迎 Mrs Wu 回港)

同左南瓜兄妹去麥當奴食午餐先，其實我都有點怕，因為我要出去買野食，怕佢兩個唔肯坐定定，好彩佢兩個都乖乖坐定定 (我對眼無乜離開過佢兩個)。

食完就出發去姨媽家，再去小檬家！！

呢兩個小朋友係車上瞓左啦(我抱住南瓜妹、姨媽抱住南瓜仔)，正當我地要落車時，姨媽就拍醒南瓜仔：「落車啦！」(我 O 左咀，因為我同hd都唔會叫醒佢地，我地會抱佢地落車，等佢地自然醒！)，之後姨媽仲講：「你自己落地行！」南瓜仔又肯自己落地行喎！？？(平時一定會喊住要我抱！)

去到目的地，等了一陣就見到小檬一家，小檬媽就安排我地上去會所先！

之後就陸續各 bloggers 就黎到，而主角就黎埋添！！！(可惜我無同 mrs wu 合照 ><)


最攪笑係，我地好多媽咪都幫小朋友著上「兄妹裝 / 姐妹裝」，呢個可能係每個媽媽既天性，哈！哈！

而另一樣驚訝係.......南瓜妹俾小檬媽抱！？？？？平時hd抱都會喊哂，睇黎小檬媽可以轉行做幼兒教育！哈！哈！

南瓜仔就掛住玩車，而南瓜妹對眼就掛住 d 野食！唔知點解南瓜兄妹去到就不停，食食食 .......... 不過係食零食，唔係正餐 ><


↑ 食完又玩過，再去 playroom 玩，我諗南瓜仔玩左個滑梯起碼20次！

見到一班小朋友一齊玩，做媽咪係最開心！！

多謝姨媽睇住南瓜兄妹，等我可以同其他媽媽傾下計！！

回程去婆婆家時，南瓜兄妹當然又係車上瞓啦，落車時，姨媽都係拍醒南瓜仔 (我沒有阻止姨媽咁做)，又係叫佢自己行！(原來南瓜仔可以咁拍醒佢，之後自己行 ....... 之前我擔心一拖二，係最怕佢兩個係車訓左，我就唔知點落車，原來我擔心是多餘！^^)。

去完婆婆屋企食飯後，南瓜妹同我講：「我好鐘意姨媽！」，睇黎可以次次搵姨媽幫手！！hahahahhahah~~~~~

南瓜妹@25個月

21/04/2016 (25M)

呢個月，南瓜妹咳左好耐 .......

食完一星期西藥，都係止唔到咳，再食猴棗末 ($200，1支)連續食左幾日，都係唔得！！

再轉番去食西藥，今次就要食抗生素！唉！

明明之前超愛食藥，今次就唔肯食，次次都要氹、強迫(似打扙)，好彩後期都肯合作，但就指明邊個餵佢食藥 (佢肯食，邊個餵都無所謂)，好彩食完抗生素就好了九成！

就係因為南瓜妹病，所以都無乜去街，只係去左屋企附近公園玩就算！

食
病左，咩都唔食，勁煩！

如廁
因為病，所以停止左帶南瓜妹去洗手間。

其實我覺得都唔駛急，只要小朋友ready，就好快戒到！


瞓
晚上放落床無耐就會瞓著！

但又係因為病左，一定要我陪佢入房瞓！

發展 
1) 語言能力：

行過商場，南瓜妹：「媽咪，佢無眼睛！」(指模特兒公仔)
之後再行過另一舖位，南瓜妹：「呢個無頭！」
再行多幾個舖位：「呢個一樣係無頭！哈！哈！」

學校水果日....
我：「今日d同學帶左咩水果！？」
南瓜妹：「SS帶左香蕉、LL 帶左蘋果、HH帶左藍莓、TT帶左士多啤梨。」(停左，無再講)
我：「咁仲有其他同學帶咩水果！？」
南瓜妹：「XX，無呀，佢病左，無返 (但點解無返學，就係病左呢？？) .....YY 同我一樣帶橙，ZZ無帶！」
(南瓜妹全對，又幾叻喎！)

我：「咁你今日食左咩水果！？」
妹妹：「我咳咳嘛，無食！」
(都唔知係唔係真係無食！？無理由打俾班主任問架！？？)

2) 活動能力：
我仲見過南瓜妹跑(只會快行) ....... 更加唔識雙腳跳，唯有多d帶南瓜妹去公園玩啦！！

仲係好懶，成日要人抱，我又心軟抱佢 (慈母多敗兒 ><)


返學
最初俾南瓜妹返學，真係十五十六，一個只係16個月既小朋友，要搭校巴 + 返全日！

16個月時，我問南瓜妹鐘唔鐘意，佢答鐘意，當時呢個答案我都唔知真定假 .......

到今天25個月，南瓜妹可以好肯定同我講，佢好鐘意佢既同學，更鐘意佢既班主任。 

唔知將來南瓜妹會不記得自己係咁細果時已經返學呢！？？？



其他

-  16隻牙
-  21.6磅(9.8kg) 
-  都係"樹熊"，有時我只係行左去洗手間就狂喊，都唔明點解！？？

 
↑ 明明發緊燒，仲要帶太陽眼鏡同書包去睇醫生 ><

幅畫，唔係南瓜妹畫，係上一手既小朋友畫咋！！

南瓜兄妹@聖洗聖事

10/04/2016 (42M22D) + (24M20D)

對於南瓜兄妹，係一個重要既日子 ........

雖然南瓜兄妹仲未識，但往後既日子，我同hd都會帶南瓜兄妹去認識，待南瓜兄妹升上K3後，也會返「主日學」(最早都要K3先可以上)。當然，現在我地只係帶南瓜兄妹去認識，將來南瓜兄妹長大後有他們的思想，到時候就由他們自己決定。

「聖洗聖事」既時間撞正南瓜兄妹午睡時間 .........

13:30 - 14:15  綵排
14:30 - 16:30  聖洗聖事
 

南瓜兄妹都算合作，成個過程都無亂走、無亂叫，更無攪大破壞。

去到中段，南瓜妹就瞓著左，只係瞓左15分鐘，就到南瓜妹聖洗，咁南瓜妹就醒左 (都喊左幾聲)，之後就無再瞓！！

完成後，我地就去姨媽家再去婆婆家，南瓜兄妹都無瞓，不過我呢個媽媽當然知呢對小朋友好攰，所以食完飯後就快快回家！！

但攪掂完佢地，已經九點多，南瓜妹就好快就瞓左，而南瓜仔就要聽埋圖事書先肯瞓 (雖然知佢好攰，但既然佢咁鐘意，就講埋先)，最後唔駛5分鐘就瞓左！！


題外話：

呢一日，係南瓜仔出世到現在，第一次無午睡。

有些朋友會係假日 CUT 左去，但我暫時無意 CUT 左去 .......

一來，南瓜仔學校有午睡安排 (去到K3下學期先會CUT)，唔想俾佢覺得假日有得玩，就唔駛瞓。
二來，有足夠休息，唔想因為唔夠瞓而扭計。
三來，暫時都係想 KEEP 住南瓜妹作息時間大致相若。

親子好去處@觀塘遊樂場

09/04/2016 (42M21D) + (24M19D)

路過：觀塘遊樂場

只係咁啱經過，見幾靚就停低影下相........

雖然南瓜兄妹影相已定了好多(起碼唔會四圍走)，但眼神永遠不一致，睇黎仲要等多2年，佢地會影到靚相！！

影完相，見到隔離有個遊樂場，當然俾佢地玩下啦！！

之前成日覺得南瓜仔 ok 大膽(原來唔係)，自從同過南瓜仔既同學去過遊樂場後，先知咩叫大膽，只係大南瓜仔2個月，真係成個「蜘蛛俠」(睇到我眼都突埋)，睇黎我都帶南瓜仔再多d去公園玩先得！


題外話：

呢一排，有好幾位C9就叫南瓜仔做姐姐/妹妹(明明全套衫都係男仔look  ><)，而且天氣開始熱，係時候要剪頭髮。

但南瓜仔唔肯出街剪，話要屋企剪 (出街剪唔係靚d咩！？)，既然佢唔想出街剪，我地都無迫佢(內心唔想屋企剪，次次都剪得好醜樣 ><)，但今次出乎意料，hd 又剪得幾好喎！！哈！哈！

親子好去處@大埔海濱公園

04/04/2016 (42M16D) + (24M14D)

目的地：大埔海濱公園

今次約左表哥、表妹(姐)、表弟們一齊去.......

天功造美，天氣好好，有陽光 + 微風！

小朋友一開始就食野、食野同食野！(南瓜妹食唔停！哈！哈！)

食左一陣就去玩啦 ......


↑ 玩單車、滑板車、放風箏、彩虹傘、吹泡泡、踼足球 ........

呢班小朋友既笑聲不停，聽到佢地既笑聲，自己都開心埋一份！！

之後又係食野、食野同食野！(南瓜妹再次食唔停！)

再之後就去左「昆蟲屋」(我無去，因為南瓜妹開始攰，咁就 hd 同南瓜仔去)！

呢度環境好好，唯一唔好係好好多昆蟲，地下有好多蟻 ><

玩到四點就回家！！

南瓜妹上車無耐就瞓左，但南瓜仔點都唔瞓，仲講：「媽咪，我係唔會瞓！」

當南瓜仔見到表弟落左車，唔夠1分鐘，瞓左......... (我估係南瓜仔見到表弟唔瞓，佢都唔瞓)


題外話：

南瓜妹d頭髮開始拮眼，雖然可以帶髮夾，但南瓜妹係一星期裡已經唔見左3隻，都唔係辦法 ><，都係剪瀏海方便d。

原本我想剪埋後面，但hd講：「我要我既女長頭髮！」

都唔明點解！？短頭髮咪仲好！？？

親子好去處@調景嶺體育館遊戲室

01/04/2016 (42M13D) +(24M11D)

目的地：調景嶺體育館遊戲室

前幾日 hd 帶南瓜仔去玩，我‧都‧要‧去‧玩......

是日，我就同南瓜妹一齊放假，諗住去戶外公園玩，但天氣太濕，空氣又不太好 (我有鼻感敏，一早起身就黎料)，見係平日放，不如去假日幾勁多人既「調景嶺體育館遊戲室」！！
 

↑ 南瓜仔最愛既地方，小朋大好簡單，一個簡簡單單既地方，已經好開心！！

玩完就回家食午餐，之後午睡！！

瞓醒後，就同南瓜妹面試 ......

今次南瓜仔好乖，無大喊話要跟住我地一齊去，之前仲怕佢會大喊，仲同我講：「bye bye」添！