親子好去處@【2018 復活節】白鷺湖 + 中文大學

01/04/2018 (5Y6M13D + 4Y11D)

早上，我地就去感恩祭，食完午餐就出發.......

目的地：白鷺湖

水上單車，越來越少地方有得玩，今次就係白鷺湖 .......

呢個最好係水山單車有蓋，唔會太曬，正！！

↑ 地方好優美，仲有一個草地，啱哂小朋友玩！！

如果一班人黎，仲可以一齊 BBQ，收費好似$170 (成人價) .......

玩完又再中大食 tea！！


目的地：中文大學

hd 堅持要黎食下午茶！！

其實，我已攰到得半條人命 ~~~~~~~~

南瓜妹@出世啦

20/03/2014 (37W1D)

朝早起身時，個肚又痛，但今次係痛下又唔痛，但我都係照返工。

返到公司都係咁，我就怕係陣痛，因為我胎水多，萬一穿左就有危險，所以決定入院睇下。

去到B4做左簡單檢查就去左產前病房，去到都係聽下bb心跳，但最攪笑係我入到醫院一啲都唔痛，應該南瓜妹報假案。

一心以為可以隨時出院，但醫生要我留院觀察，而佢地原來安排左我38周催生 (QE 既預產期比私家早2日)，而我又足月，同38周只係相差3日，我又入左院，又有妊娠糖尿，胎水多，又太大隻，所以都可能提早少少催生。

21/03/2014 (37W2D)

一早，我已食左豐富既早餐先，我怕一催生就食唔到野，到時候無力生。

見醫生啦，醫生話我可以今日催生或等多幾日，我就決定催生埋，都入左院，而且計過時間，星期六hd可全日照顧南瓜仔，而我應星期日可出院，hd又可以接我出院，又唔洗請假，時間上好配合。

醫生話大約10小時bb就會出世。

上次生南瓜仔係塞藥，今次南瓜妹因子宮口成熟，唔駛塞藥，可直接上產房用催生藥水。

我用最短時間澡涼洗頭，仲吹埋頭先上產房。

- 用人手穿胎水，再落催生藥水

- 姑娘話第二胎好快生，叫我叫定老公來 (吓，醫生又話10小時)，因hd得5天侍產假，我唔想浪費，所以叫佢請半天，我估唔會快到2個鐘就出世架！?

- 2小時後，開始痛，但仲可以接受

- 再1小時後，勁痛，吸笑氣，再打止痛針

- hd 已到，但我已痛到講唔到野

- 開始失控，忍唔住狂叫，狂吸笑氣，成個人好唔清醒

- 聽到開到4度

- 見番我跟開助產士姑娘，因我中左妊娠糖尿，所以俾人踢左出來，但佢竟然主動同我接生喎，真係好開心，助產士小組真係太好啦。

- 差少少開哂，但南瓜妹心跳不太好，所以要立刻push佢出來

- 用左10分鐘就push 左出來

南瓜妹出左世啦，3.34 kg(7.3磅)，私家話有8磅，相差好遠喎!!!

-  hd剪臍帶

-  但胎盤出唔到，黏住左，再過半小時都係出唔到，助產士要轉俾醫生，再過多半小時醫生同我拎出來，勁痛，要吸住笑氣先無咁痛，好彩最後醫生拎到出來，因為再拎唔到出來就要半身麻醉，要做手術。

- 可能有點失血，頭勁暈，好彩血壓正常。

全程用左7小時，痛左4小時，真係第二胎快好多喎!!

當了18個月媽媽 + 快升任第2任媽媽

19/03/2014

南瓜仔：18M (歲半啦！)
南瓜妹：37W(足月啦！)

南瓜妹將出世，我估到時候我應該無時間打BLOG，有時間都用黎瞓啦！

不經不覺南瓜仔已18個月，這18個月真係過得好快，由手抱到現在識行識跑，可以見証南瓜仔成長，真係百般滋味在心頭........

南瓜仔除食野會扭計外，平時好時會扭計，照顧佢真的不是太難既事！

由坐完月(返工)到現在，除左 HD 放假係屋企，我午膳時間會回家同佢玩/餵生果，即使現在37周，我都係日日回家睇佢，在些同事問我為何要回家！？會不會好辛苦！？我回答：「值得！」，咁我平時LUNCH點安排！？未有南瓜妹前，我會買壽司/手捲/包/冷麵食，但只從有左南瓜妹後，我多數買包食，一係一路行一路食，又或者回到公司後用5分鐘食！

放工就同大部份媽媽一樣，用最快時間返屋企，快快可以見到自己既愛兒！

假日，我不會安排工人姐姐照顧南瓜仔，即使換片、餵粥都係自己做番，唔會假手於人 (HD 除外)。

無聊既我，我會計一計自己一天有幾多時間陪南瓜仔(清醒時間計)....

我返工： 6.5 - 7 小時陪佢，作為一個在職媽媽，相信係好高既數字！
我放假：10小時以上
工人姐姐： 4 - 4.5 小時
(當hd係屋企時，我都會偷下懶，玩下whatapps 同 facebook 啦！！)

所以in學校時，老師問邊個照顧南瓜仔，我一定話：「我同爸爸！」

南瓜仔鐘唔鐘意工人姐姐，我就覺得佢願意同工人姐姐玩，但我從來未見過佢要工人姐姐抱，亦未見過工人姐姐行開左佢會喊，更未見過佢狂叫姐姐 (有時南瓜仔要我抱，我一行開(間唔中)佢就會喊，不斷叫媽媽！)

而南瓜妹今日足月，yeah！

我中左妊娠糖尿、胎水又多、南瓜妹36周已8磅，真係好多野呀！！又唔知QE點安排！？會否催生！？會否開刀(機會不大)！？我只希望南瓜妹健健康康出世，最重要係母女平安，我要睇住佢地成長！

我對南瓜妹唔太公平，第一胎時我成日會同南瓜仔傾計，而南瓜妹呢！？真係無乜，我所有精神放哂係南瓜仔身上，基本無乜時間......

南瓜妹快將出世，點樣照顧佢兩個我仲未知，我應該會全力照顧南瓜仔(因為南瓜仔已識性，我唔想俾佢覺得有左妹妹就唔理佢，等佢慢慢習慣後，我就會俾番多啲時間俾南瓜妹！)，而南瓜妹會安排俾母親大人或工人姐姐，但詳細會點安排，要等到發生先處理！

題外話：

母親大人叫我去佢屋企坐月，南瓜仔由工人姐姐同hd照顧，但我點會捨得唔理南瓜仔！？

我仲同母親大人講：「生得出來就要照顧佢地，若生左出黎唔理佢，咁不如唔好生啦！」

母親大人：「咁你會好辛苦，我想你好好坐月咋，坐月好重要！」

我：「你果時生我地，咁咪一樣，而且現在又有工人、老公，最多咪無得瞓，唔駛死！」

母親大人：「咁我去你屋企啦！」

我：「好！」

我產假將係38周放，前2後8計，我應6月頭返工，但我想有多些時間陪佢地兩個，所以多請3星期假，7月先返工！

最煩一件事係工人姐姐將於8月尾完約，佢已經講明唔續約，一來南瓜仔應10月開學(又唔知入唔入到全日制學校)，二來新工人姐姐黎到，我又要重新教一次，三來要照顧2個小朋友，唔係好多工人願意做.......煩煩煩！

暫計劃新工人姐姐7月中到(HD會放假多天)，舊工人姐姐就即時炒，因我唔想2個工人姐姐同時存在我屋企！

南瓜妹@第8次私家產檢

15/03/2014 (36W3D)

hd上午要返工，所以由我負責帶南瓜仔上playgroup，因上次帶完南瓜仔上playgroup後勁唔舒服 (因要抱佢)，所以今次決定打的去，無謂咁辛苦啦!!

上完堂，hd就係校巴站等我地，之後就出發去做私家產檢.......

去到當然要講番中左妊娠糖尿(指數7.9)、胎水多(指數21)、南瓜妹太大隻俾醫生知！

醫生話我血糖只係高左少少，唔駛咁擔心，之後就做超聲波。

胎水減至17，合格水平，yeah!!

但南瓜妹唔乖，玩臍帶，圈左1個圈~>_<~

而最大問題係南瓜妹超大隻，差不多8磅，我從來無諗過自己會生巨嬰，我已戒口一段長時間，我既體重無乜點升，但南瓜妹就越來越大，點解會咁架！？

我再問醫生我駛唔駛催生，醫生話我血糖控制得好就無必要催生，即使太大隻都最好38周才催生，太早出世bb肺功能唔係咁好，咁當然佢話bb要早出世就無法，但佢估計南瓜妹早出世機會不大。(但QE醫生話我胎水多，容易早產，都唔知邊個啱!？)

最後，約左2星期後覆診，若南瓜妹超過8磅8，醫生會寫信建議我開刀。

P.S:我啲朋友去私家生，我都會問點解唔開刀，開刀又唔駛痛十幾個鐘，又可以計劃定，不知幾好……

但當我聽到南瓜妹太大，可能要開刀時，我突然覺得開刀唔好，為何要個肚開一刀呢？

不過政府多數叫你try左先，唔得先緊急開刀，現在唯有等覆診先知會點安排……

南瓜妹
BPD(頭骨橫徑)=8.99CM(36W6D)
HC(頭圍)=32.2CM(36W4D)
AC(腹圍)=37.5CM(>40W)
FL(大腿骨長度)=6.96CM (38W3D)

EFW(體重)=3674GRAMS(約8lbs)

自己
體重：52.2KG (+12.2KG)
肚圍：39.5吋 (超大個肚)

南瓜妹@第13次QE產檢(見營養師)

12/03/2014 (36W)

醫生睇完超聲波報告後，就話南瓜妹太大，所以安排我見營養師，但我其實唔係好明！？我只係高左0.1度，點解要見營養師呢！？唔係話控制唔到先要見喎！？不過醫生安排到，我無理由唔去睇......

妊娠糖尿姑娘建議：一星期1-2次，最少1次！

醫生建議：一星期2次！(醫生話南瓜妹太大，所以一定要 check 2次)

但我見自己買多左試紙，又想 check 住自己既血糖，而且我相信南瓜仔38周前後會催生，都唔係篤好多次姐，咁不如自己 check 得密少少啦 ......

我發覺原來食完後行下，血糖真係會低D，因為平時返工無可能行來行去，但晚上我就可以食完飯就行下，血糖都係KEEP住四點幾！！

而星期六、日早上，我食完早餐就瞓番，血糖又會升得多D喎 ~~~~~

即係除左要戒口外，運動真係好重要！！

 ↑ 連續check左六日：空腹 (3.8-4.7)，餐後2小時 (4.4-6.5)
               合格指數：空腹 (4.0-5.5)，餐後2小時 (4.0-7.5)

上次聽妊娠糖尿姑娘講，好多媽媽會「挑戰」(即嘗試食某種禁食食物)血糖，睇下血糖會否上升！？當我聽完後，我就覺得呢d媽媽點解會咁架！？戒口姐，駛唔駛 「挑戰」呀！？bb先係最重要嘛......

但我係呢幾日 check 到自己血糖無事，唔知點解好想 「挑戰」食下朱古力、甜既食物，睇下自己血糖會否上升喎 ，原來呢d係人既本性！哈！哈！(我有無「挑戰」，我係唔會講架！)

好啦！要講番正題 ......

去到日間中心一樓交款 ($100)，再落去閣樓營養部，登記完就磅重 (52.2kg) 同度高。

等了一會就見姑娘，姑娘都係問平時既飲食習慣、有無運動，問完之後就等見營養師。

到見營養師，都係睇住姑娘問我問題俾左意見，再睇埋我份「家居血糖監測記錄紙」，話我keep得幾好，仲話可以食多少少澱粉質，都係叫我戒甜，仲埋以我現時既體重可以重多1-2磅喎！(以我未有bb前計，BMI <18.5，應可重 12.7kg - 18kg (28磅-40磅)，我現時重左 12.1kg)

營養師都話我本身太瘦(40kg)，生完應該要增肥少少，但我同佢講，我已經好努力咁增過肥，但唔成功，佢叫我食多d澱粉質，咁就會肥喎！！(我生完想有95磅左右)

其實今日唔去都得，因為營養師講既野我都知啦!

↑ 「妊娠糖尿病飲食指南」

南瓜妹@BOOK 私家疫苗

08/03/2014 (35W3D)

南瓜仔係智匯打疫苗，咁啱佢地又做緊優惠 (優惠期：31/3/2014)，所以都諗住join番佢地……

hd帶南瓜仔上playgroup，我就自己一個去銅鑼灣俾錢！

上到去職員同我講，我本身揀既地區既醫生唔再接job，現在只有太子、銅鑼灣或荃灣，對來我說當然唔太方便啦，但我唔知屋企樓下有無得打，亦唔知幾多錢，咁都上左去囉，而南瓜妹都快快出世，而且都係去四次打針，咁就決定俾錢！！

同南瓜仔唔同，因健康院會加入水痘疫苗，所以佢地既PACKAGE係無包，雖然政府話2014年開始有，但現在仲未有得打，不過南瓜妹要1年後先要打，到時已經2015年，應該有掛！？？

現在南瓜妹去私家打 ($3900)：

五合一混合疫苗2針
六合一混合疫苗2針
口服人類輪狀病疫苗2劑

↑ 真係有好多禮物送，以巿價計，應有$2000以上，我仲未決定南瓜妹食咩奶粉，諗住 QE 補乜奶粉就食乜奶粉，其餘既奶粉會放上網賣啦，應可賺七至八百蚊！哈！

美贊臣 - 1號 400g 2 罐
美贊臣 - 2號 400g 1罐
惠氏 - S26 1 號 400g 1罐
惠氏 - S26 2號 400g 1罐
惠氏 - 金裝膳兒加 (偏食奶粉) 900g 1罐
牛欄 - 1號 900g 1罐
牛欄 - 2號 900g 1罐
illuma - 1號 900g 1罐
illuma - 2號 900g 1罐
美贊臣 - 包被，衫仔，紗巾，飛行棋，袋
惠氏 - 書(精靈bb食譜)，食物盒，奶粉盒
Huggies -NB 試用裝尿片2片
Softouch -試用裝
司各脫 - 魚肝油
迪士尼 - 書
Organic - 手套及手巾仔
Lotion同一堆coupon
仲有一張$50百佳 coupon

估唔到有咁多野送，有成10罐奶粉喎，最勁係我一個人拎去的士站 (約5-8分鐘路程)，超勁!!

南瓜妹@第12次QE產檢(見醫生 + 超聲波 + B型鏈球菌)

05/03/2014 (35W)

啱啱做完「全日血糖測試」，又安排做產檢！！！

去到由自己做番「三步曲」-  驗小便、量血壓同磅重，體重 52.4KG !!

QE再安排超聲波，等左30分鐘左右就到我！！

幫我做檢查係上次妊娠糖尿既姑娘.......

一照，我就知南瓜妹超標，因我見到 HC (頭圍) 己去到39W幾啦，姑娘話佢真係好大隻，照完之後就出埋估計體重，嘩！已去到6.5磅 (南瓜仔出世都係得6.27磅)！！

南瓜妹體重已超過90%，明明己係幾星期前開始戒口，點解仲係重得咁快架！？

而胎水都係21，但姑娘話20先叫合格！？(我估係睇周數，可能周數大胎水應該少掛，下次問下私家醫生)

做埋B型鏈球菌，我順便問姑娘南瓜妹頭係落成點？姑娘話已落左5分之2啦，同預產期差不多！！

照完同做完B鏈就等睇醫生.......

估唔到唔駛等好耐就到我，真好，我仲以為要等1-2小時添！！

醫生一見到超聲波結果就話南瓜妹大隻，就安排我下星期見營養師！(唉！又要去多一次醫院)

我：「我胎水多咁點！？駛唔駛催生！？」

醫生：「你現在未到37周，唔會同你催生住，但你胎水多，所以建議 37-38周催生！」

我：「咁即係幾時催生！？」

醫生：「你要入院做檢查，睇下 XXX (我唔記得係乜) 成唔成熟，成熟的話先可以催生！而你胎水多可能早產，萬一胎水穿左，可以連臍帶都會衝埋出黎，你就要立刻入院，或者你可以現在入院，等到37-38周催生！」

我：「咁咪要瞓3星期醫院！？咁唔駛啦！」(無啦啦要瞓三星期醫院，邊個照顧南瓜仔呀！？)

醫生：「咁都 OK！」

見完醫生，佢地就就安排左「分娩程序」講座，聰明既我當然拎左藥單去藥房先，再上番去等聽講座 .......

其實我上次都聽過，聽完就快快去番藥房拎藥，去到時已經有得拎，YEAH，唔駛浪費時間！！

南瓜妹
BPD(頭骨橫徑)=39W3D
HC(頭圍)=39W6D
AC(腹圍)=37W3D
FL(大腿骨長度)= 36W4D

EFW(體重)=2952g ( 6.5 lbs / 2.95 kg)

自己 
體重：52.4 kg (+12.4 kg)
肚圍：38.5 吋 

南瓜妹，你要乖乖呀，唔好自己出來，等醫院安排催生呀，媽媽唔想妳有任何危險呀！！(我仲有野要做，妳哥哥要去健康院、又要去 in 學校，我想做埋呢兩件事妳先出世呀！)

南瓜妹@血併AEON (PART 2) + 走佬袋

02/03/2013 (34W4D)

上次買唔成床單，原來AEON當時仲未做推廣，好彩當時無買咋 (原價$799，推廣價$499)，不過我最後無買番南瓜仔果款 (CASABLANCA 小熊維尼床上套裝)，因為我見到迪士尼既床單更可愛，而價錢、包既野又一樣，所以揀左佢！！

思詩樂清潔棉，$54 二包 (@140片+送40片)，買左8包，真係好抵買！！

最後買埋產婦乳墊，咁就應該無乜野買啦 ~~~

仲未計佢地感謝日有95折！

↑ 埋單 $710.70

不過屋企空間有限，而且仲多埋南瓜妹，所以都唔可以買得咁多！！


終於執左 走佬袋 啦，今胎好難估計會早生(胎水多、第二胎)定遲生(BB較大隻)，若俾我選擇，最好當然係38W-39W啦，最好係見紅先，唔好咁快穿羊水，定我有多D時間預備！！

根據上次既經驗，就執左以下既物品：

孕婦-
- 網褲 1包
- 衛生巾 2 包
- 床墊 4 張
- 生理沖洗瓶 1 個
- 日用品 (牙膏、牙刷、沐浴露、洗頭水、毛巾、廁房紙、杯)
- 束腹帶
- 後備電話

南瓜妹
- 手套
- 和尚袍
- 包被
- 尿片 2 包
- 濕紙巾

執完發覺真係好多既，但其實D野唔係好重，只係好"大舊"(紙巾、衛生巾、尿片)！

南瓜妹@第11次QE產檢(全日血糖測試)

03/03/2014 (34W5D)

因為中左妊娠糖尿，所以要去QE做「全日血糖測試」(食佢地安排既餐同驗血)，仲要去足12小時 (早上八點半至晚上八點半).......

本來可以約上星期四，但HD呢日晚上開會，好晚先返屋企 (平時我五點半返到屋企後，南瓜仔就會醒，工人姐姐就預備南瓜仔晚餐，若我倆都唔係屋企，工人姐姐又要煮粥，咁邊個睇住南瓜仔！？)，而HD今日又可以OFF，咁就安排今日囉！

首先要去急症室登記，再去 E2！

時間表
08:45  驗血(空肚) - 篤手指 : 4.3

↑ 08:55  早餐
09:15  講座 (妊娠糖尿)
10:55  驗血 - 抽血及篤手指 :4.4
            小食 - 脫脂奶 + 梳打餅
11:15  講座 (餵人奶)

↑ 12:00  午餐
15:00  驗血 - 篤手指:5.0 及 聽bb心跳
            小食 - 脫脂奶 +梳打餅
17:15  驗血 - 篤手指:4.7

↑ 17:45  晚餐
20:15  驗血 - 篤手指:5.0

因為要自己屋企做血糖測試，所以要去買血糖機，所以係「自由活動」時間，就同幾個(院友)媽媽一齊去買，因有時間，所以去左護協 ($680)、永安 (無得買) 同《卓思廊》QE復康用品專賣店(QE提供優惠券 $600)格下價，最後當然去最平既地方買啦！！

↑ACCU-CHEK PERFORMA ，血糖機、採血針機、採血針100支、試紙100張

1日測試4次 (空腹、早午晚餐後2小時)，一星期1-2次 (低危)，即係一星期要用8次(1星期2次計)，假設我係42周生，咁即係仲有7周，咁即係要56次！！

買完之後怕自己唔識用，所以就用自己私人機篤手指驗血，用左2次我已經識得用，返到屋企後仲同 hd 驗下添，佢又合格喎！！ 

目標指數：餐前 4 - 5.5，餐後 4- 7.5

講真，要食以上既餐血糖又點會升高，我食完仲未飽，好彩係我係咁後期先中左，若十幾周發現，要日日食以上既食物，真係有點"惡頂"呀，又係果句 -- 媽媽真偉大！！

戒食食物：糖果、朱古力、汽水、果汁、果占、甜醬、甜品、糕點、罐頭水果、牛油、豬油、雞油、五花腩、雞皮、腸、臘味、香腸、牛肉乾、午餐肉、回鍋肉、薯條、杯麵、肥膩湯水

少食食物：澱粉質食物 (白飯、河粉 (可轉食紅米、糙米、意大利粉 (唔要醬)、米粉代替)、薯仔、蕃薯等

適當運動：每天步行20分鐘或交替運動

呢日當入院做驗查，費用$150，我最初以為唔駛錢添！哈！哈！

南瓜妹@血併AEON

22/02/2014 (33W3D)

終於買南瓜妹既野啦......

AEON做緊BB展，又係感謝日(原本逢2、20)，最重要係有送貨服務，唔駛自己拎！！

南瓜妹都係用番南瓜仔既野，如衫、包被等，只係要買奶樽同床單(最後友人俾左張bb床我，所以會放南瓜妹係廳瞓！)

仲有一些耗用品，如BB洗衣液、BB洗奶樽液要買定多少少，因為坐月期間唔放便去買！！

南瓜妹就用 CHU CHU 奶樽 (南瓜仔用 AVENT)，因為屋企得一部蒸奶機，因為現在我仲用緊 STEAM 機 STEAM 南瓜仔奶樽，而AVENT係"肥奶樽"，怕唔夠位 STEAM 南瓜妹既奶樽，唯有轉用"瘦奶樽"啦，我希望我坐月其間可以教到南瓜仔戒奶樽啦！！

 ↑ 奶樽 (3個5安、4個8安)、BB洗衣液、BB洗奶樽液、棉花球、尿墊 (舊既尿墊已經爛爛地)、三角枕 (之前果個係家姐俾，但已經用到凹哂)、奶樽刷、防夾門膠、毛巾仔、網褲，仲有送俾朋友 COMBI 餐具，埋單 $1,911.70。

仲有床單未買，上次買俾南瓜仔同一套只係 $599 (未折)，現在已升價 $799(未折)，駛唔駛升得咁快呀！？要再格下價先 ~~~~~

懶懶行既我，終於肯拎番南瓜仔既初生衫出來啦 (南瓜仔真係好多初生衫，起碼有30件以上)！

洗衫都要睇天氣，上天文台既apps睇，話呢幾日有太陽，之後會潮濕，咁咪安排工人姐姐洗，點知早上洗完下午就落雨，第二日仲潮濕，唯有開抽濕機整乾去......... ><

待工人姐姐洗埋出院用既衫、包被、手套等，咁就可以完成走佬袋！！

↑ 母親大人已安排薑醋同洗涼洗頭既薑皮啦！！

南瓜妹@祝健健康康、平平安安出生

24/02/2014 (33W5D)

陀南瓜妹真係一波多折......

1) 12W：紅血球少，要食鐵丸，食到生為止
2) 26W：胎水多，私家建議驗血糖，結果合格 (空腹 4.3, 糖水後2小時 5.8)
3) 28W：胎水多、太大隻，已戒甜同澱粉質
4) 33W：胎水多、 太大隻，QE再安排驗血糖，結果不合格，中左妊娠糖尿(空腹 4.4, 糖水後2小時 7.9 (高過7.8為不合格)

我都唔明點解我會中妊娠糖尿，又唔係高齡、又無家族遺傳、又咁瘦，點解會咁！？？

但現在無得諗點解，我只希望南瓜妹平平安安，健健康康出生！！

PIXTURE@家庭照

23/02/2014

南瓜仔：17M4D
南瓜妹：33W4D

我一直都好想影大肚照/全家福，但HD就覺得無乜需要，所以我都無迫佢.......

今次係家姐介紹下，亦係約埋表哥同表妹一齊影，所以HD無反對！！

呢間公司係自助式，無攝影師、無化粧、無執相，佢地只係提供場地、道具 (自行設計)、相機 (有個搖控器，自行拍攝)，最好既地方係所有相都會俾番我地！

雖然唔係"正式"大肚照，但都好過無.......

唯獨南瓜仔無乜笑囉，點引佢佢都無乜笑(肯望鏡頭已經算係咁)！


↑ 好不容易先影到！

↑ 可愛既BEAR BEAR！

 ↑ 幾型喎！

 

↑ 我幾鐘意呢一張！

↑ 個肚係唔係唔係好似唔大呢！？已經38吋腰啦 ....

↑ 扮 SWEET！

↑ 南瓜仔想"逃走"！

因家姐識人有優惠，$300，唔限人數，所以我地book左2節！

最後拎番5XX張相，其中15X張係有南瓜仔既樣，10X張就係全家福，單人相只得幾張 (因為根本佢唔係定定咁影)，若影得靚都有3X張，不過有部份係同一背景！(影婚紗相要影一日先得3X張靚，都算係咁啦！)

若以玩票性質影，真係好OK，佢地又玩左2小時 (影完好快就訓左)，仲有全部相拎走，價錢又唔貴！

點解無佢地3個既合照！？因為係完全影唔到，各有各"走佬"，所以最後都放棄影佢地3個合照，由大人"捉"住佢地影算數！

公司：PIXTURE
地址：灣仔軒尼詩道場99號30樓
電話：25277077
費用：$300(每節50分鐘) - 包3人，隨後$100@1人

P.S：佢地有4間房，當天計埋我有3個大肚媽媽，我估佢地都係影大肚照！！

南瓜妹@第10次QE產檢(驗血糖)

22/02/2014 (33W3D)

QE 真係好，除左安排早期唐氏、結構俾我，當知道我既胎水多時又安排我做超聲波，照完發覺南瓜妹太大，又安排我驗血糖，最重要係一蚊都無收，真係好好服務！！

講開又講，已是第10次QE產檢，HD只係陪過我去一次咁大把，今次因為南瓜仔要返 PLAYGROUP，我無理由晨早叫醒南瓜仔/HD陪我一齊去架！？之後又要趕去返學，而且陪黎都無乜用，唯有自己去啦！

之前成日唔覺南瓜妹存在，因為同平時差不多，無任何不適，但去到前幾天，我再開始有抽筋、腰痛、肚脹同埋夜尿 (都係1次，唔算太多)，行路都開始有點吃力，抱多一陣南瓜仔都好辛苦！！

講番正題，我都係怕自己無食早餐，又要抽血會暈，所以前一晚要食啲野，上次食杯麵，今次當然唔敢食啦，澱粉質勁高.......最後都係飲左杯奶同小量果仁就算！

今日安排左9:00去驗血糖，又係要去會計部(E2)，再去B3！

都係填完問卷，之後等一陣就抽血，抽完血就飲糖水！

 ↑ 嘩！好大碗！飲完，真係有少少想嘔，但我知自己唔可以嘔，唔係又要黎多一次！

抽血完都係無四圍走，一來怕自己暈，二來去得邊！？乜舖頭都無開，唯有玩手機打發時間！

好不容易先等到兩小時，咁就抽埋第二次血！
 
↑ 估唔到抽完血，有鈣思寶同餅食，太好啦！！

食完就走人，落到去先記得自己未拎到症紙，好彩早記得咋......

再去血併AEON買南瓜妹既物品(去到33周先買，都唔叫太遲既)，再接南瓜仔放學，勁 FIT！

雖然我估我血糖報告應該無事，但都希望唔好收到電話啦！！

後記：係今天 (24/02/2014)醫院打左電話俾我，我真係中左妊娠糖尿，要安排我入醫院，點解會咁架！！

上次驗完(飲完糖水後)只得5.8，但今次係7.9，我真係唔想入院呀！！！

南瓜妹@第9次QE產檢(超聲波)

17/02/2014 (32W5D)

上次產檢QE知道我胎水多，所以安排左我照超聲波.......

因為BOOK左10:45，所以時間上都好鬆動，不過我都係要晨咁早起床，因為要餵南瓜仔食奶！

首先去到E2會計部，再去B3，上次去做結構時唔覺得條路咁長，但今次唔知點解覺得好似好遠咁 .......

去到時醫生仲未到(早左到)，我仲要排第5，心諗，有排等添，但估唔到11:00左右就到我，呢個醫生應該好快手.......

姑娘過鞋都唔駛我除，醫生唔駛5分鐘就同我照完，雖然快，但都照哂應該要照既野！

胎水再減少左，指數係 21(第1次：23.3，第2次：22.5)

醫生話都係合格指標(合格 8-24)內，都係叫我放心，我當然問我有乜可以做，可以令胎水減少啦......

醫生回答：「無！」，唯一做係「觀測」！(心諗，你地都應該唔會再安排超聲波俾我，我都係去私家睇啦！)

我再問：「胎水多有乜影響！？」

醫生：「胎水多最怕係當一穿左，可能連臍帶都衝埋出黎，咁bb就可能缺氧！」(私家醫生都係講番同一番說話)

而醫生話南瓜妹好大隻，要我驗血糖，1月頭先去私家驗完，現在又再驗，唉！！

上次私家仲話我血糖有少少偏低，再驗可能係一樣，但醫生話上次CHECK 已是6星期既事，所以一定再驗！！

我當然不忘記住南瓜妹超聲波既數字啦，佢真係好大隻，比預產期多3周，但我已經食少左好多澱粉質同甜既食物.......唯有再忍口啦！！

我生完一定要勁食朱古力、糖果、飲檸檬茶！！

南瓜妹
BPD(頭骨橫徑)=35W5D
HC(頭圍)=35W4D
AC(腹圍)=35W2D
FL(大腿骨長度)= 34W5D

EFW(體重)=約2.4KG (南瓜仔38W2出生，都係2.85KG)

 
↑ 每次經過QE都有一大班人叫我登記媽媽會，但都有原因(落雨、太凍或我太趕時間)登記唔到，今次終於登記左啦！！

南瓜仔@2014 拆利是

16/02/2014 (16M28D)

又係拆利是既時候啦.......

雖然南瓜妹未出生，但都有唔少親友俾埋佢，最估唔到係南瓜妹既利是仲多過HD！哈！哈！

上年已經幫南瓜仔開左個戶口，所以都將佢既利是錢俾番佢，等佢將來大個用，而快手快腳既我，係第二日已經幫佢入埋銀行，入完後，真係發覺銀行既利息真係好少囉！！

而南瓜妹呢！？因為未有出生紙，未開得戶口，所以啲錢會KEEP住我度，我唔會"落隔"架！！


↑睇下南瓜仔個樣，勁唔想影 ........

將左利是外，仲有送俾南瓜仔同南瓜妹既禮物，真係好多謝呢班朋友！


↑ C先生，W小姐，南瓜仔一定會做你花仔架！(右：南瓜妹，左：南瓜仔禮物)

↑ 多謝L小姐既禮物！(右：南瓜妹，左：南瓜仔禮物)

你地唔用既利是封會點用！？當癈紙！？拎去回收！？留番出年用！？

有時我不得不佩服 HD， HD將唔用既利是封俾南瓜仔做「配對」，將10多個唔到款既利是封(有個係同款唔同大細) 放係地下，然後再將另一個利是封俾南瓜仔做配對 ......

最估唔到係南瓜仔可以全部正確地配對哂！

南瓜妹@第7次私家產檢

15/02/2014 (32W3D)

戒口3個星期，希望胎水真的會減少 ......

所以今次去產檢，真的忐忑不安，我真的唔想南瓜妹未足月就出世，亦唔想南瓜妹有乜事！！

今朝南瓜仔要返 PLAYGROUP，所以 BOOK 左下午先去產檢！

胎水減少左，上次係23.3，今次22.5 (合格8-24)，雖然只係減左少少，但我已覺得放心左少少，起碼無增加嘛......

我：「咁我仲KEEP住胎水多，咁駛唔駛催生！？」

醫生：「唔駛，胎水多唔駛催生架！」

醫生叫我唔駛咁擔心，只要KEEP住戒口就得！

咁我就放心好多，因為我唔想佢未足月就出生！

而南瓜妹真係大隻妹，佢比南瓜仔同期重300g .......

醫生仲講，BB大隻都會比較遲出世添！！

而最放心係南瓜妹臍帶無纏頸、頭仔亦轉左，仲有好多頭髮添！哈！

南瓜妹
BPD(頭骨橫徑)=8.79CM(35W3D)
HC(頭圍)=30.8CM(35W1D)
FL(大腿骨長度)=6.17CM (33W5D)

EFW(體重)=2147GRAMS(約2.1KG)

自己
體重：52.6KG (+12.6KG)
肚圍：38吋

南瓜妹@第8次QE產檢

11/02/2014 (31W6D)

去到由自己做番「三步曲」-  驗小便、量血壓同磅重，我既體重已去到 52.2KG ！！

今次竟然撞到 blogger Amy，真係有緣，不過我地只係傾得幾句，因為我好快就到我，而我出黎之後就到佢 (P.S：第二日係 FACEBOOK 見到佢已生左囡囡，真係恭喜哂！)

同助產士講番南瓜妹既胎水 23.3同俾番私家既超聲波相同血糖報告俾助產士！

助產士知道我胎水多，就安排我下星期去做超聲波，再下下星期見醫生，睇下胎水情況去到邊，若太嚴重就要催生 ......

我：「咁係唔係37周後就 催生！？」

助產士：「睇情況，若bb 36周有6磅幾，你又胎水多，咁就會提早催生！」

之後都係度肚、聽心跳、按肚，助產士話南瓜妹已經調左頭！

現在我無乜好做，只能戒食澱粉質同甜既食物，希望胎水唔好再多啦，我唔想未足月就催生呀！！

南瓜妹，你要乖乖足月先好出世，胎水要減少，但又唔好太少呀，媽媽仲未執好走佬袋 (當日拿拿臨買左尿片、網褲同孕婦衛生巾，但仲未買奶樽呀)！！

自己
體重：52.2kg (+8.2kg)

南瓜妹@第6次私家產檢

25/01/2014 (29W3D)

都係懶到出汁，乜都未買，走佬袋更加未執，希望新年假有時間去處理啦！

唯一有安排既事，就係萬一工人姐姐放左假 (星期日或紅日)，我又突然要生南瓜妹 .......

咁hd無由理唔陪我生南瓜妹架！？所以會安排我屋企人幫手睇住南瓜仔，但我又怕南瓜仔見唔到爸爸、媽媽、工人姐姐會唔習慣，所以我會俾試下幾個星期六、日叫屋企人單獨睇住南瓜仔，等佢習慣一下！

我初步諗，萬一見紅或穿羊水都唔駛 hd 陪我入院，hd就留左家中等我屋企人黎，真係等到我生得先去醫院！！

南瓜妹，希望妳係平日早上出世，咁爸爸又可以見到你出世，晚上又可以陪你哥哥，而工人姐姐就可以平時咁陪住妳哥哥！！



我上午要返工，而南瓜仔又要上 playgroup(由hd帶去)，所以約左下午先做產檢 ......

睇番上次血糖報告，合格，無問題，但 .....

1) 南瓜妹既胎水過多，指數去到23.3，醫生話24就係超標！(南瓜仔當時係胎水少，只得5.3，點解相差咁遠！？)

醫生話胎水多無乜原因，現在我可以做只係戒澱粉質同甜既食物......

2) 南瓜妹既生長指標去到 90%，係大隻妹！(南瓜仔當時 25%，又點解相差咁遠！？)，但醫生話我盤骨細最好出世係 6.5磅，但現時咁生長到 38周可能有 7磅 .......

最後，都係叫我戒澱粉質同甜既食物......

唯一安心既暫時臍帶無纏頸，而頭仔亦轉左！

之後返到屋企午睡時 (與南瓜仔一齊午睡)，全個夢都係發緊我胎水多，對南瓜妹既影響，攪到我睡得勁差，好似無睡過咁！！

南瓜妹，媽媽會努力戒食物，妳要平平安安出世呀！！

P.S：但妳阿爸唔合作囉，仲係我面見飲檸檬茶，超衰！！！！

南瓜妹
BPD(頭骨橫徑)=7.25CM(30W3D)
HC(頭圍)=28CM(30W2D)
FL(大腿骨長度)=5.26CM (29W2D)

EFW(體重)=1495GRAMS

自己
體重：51.4KG ( +11.4KG 重得勁快！)
肚圍：37.5吋 (上胎臨生南瓜仔前 (38W) 都係37.5吋，現在.....唉！)

南瓜妹@第7次QE產檢

14/01/2014 (27W6D)

去到由自己做番「三步曲」-  驗小便、量血壓同磅重，我既體重已去到 50.6KG 啦，比上一胎重多左！！

今次唔駛等好耐就有得見助產士 .......

去到當然講番南瓜妹大左一周 (私家既超聲波相)、血糖報告(口頭講)！

現時南瓜妹生長指數係75-90%，係大B，但我身型細小，若要順產就會好困難，而助產士講明除非真係超超大B，否則一定要自己試順產，真係順唔到先會開刀！

最後結論係要 戒口！！(即係要少糖少鹽少油，即係乜都無得食，連我最愛既檸檬茶都要 CUT！！ )，睇下會不會落番50%指數 .........

仲有12周，唉，咁都要戒！！

之後都係度肚、聽心跳、按肚，助產士話南瓜妹已經調左頭！

南瓜妹，你要乖乖，唔好玩臍帶，足月出世呀！！

自己
體重：50.6kg

南瓜妹@第1份禮物

9/1/2014 (27W1D)

估唔到南瓜妹咁快收到第1份禮物 ......

呢個朋友(舊同事)真係唔話得，離職已1年多，每次去旅行 (1年去幾次) 都會買手信俾我、HD同南瓜仔！！

S生，到時你結婚，南瓜仔會舉手做你既花仔，而南瓜妹會做你花女，我會快快教南瓜妹識行！！ 

 

↑ 好可愛既口水肩同手套仔！！

 

↑ 呢份係我，「安產御守」

↑當然唔少得南瓜仔，可愛既畫簿！！