南瓜仔@BB BLOG友聚會(二)

29/12/2013 (15M10D)

首先要多謝豬脾媽，安排場地、食物、交換禮物、遊戲，安排活動真係唔容易既事，仲要係安排一大班小BB，勁呀！
 
上次聚會係 30/06/2013 ( BB BLOG友聚會 )，當時南瓜仔、燒腩仔、龍BB仲係爬，事隔6個月，大家已經識行識走，仲食緊大人食物，唔知下次見面時，可能大家已經識得同對方講野呢！？

今次出席既BB(排名不分先後)：
南瓜仔、燒腩仔、龍BB、豬脾、波哥、晉晉、BBB、小寶、肚B、小檬、朗朗
新加入：一仔、一一、蕎B、巨龍、妹豬


↑ 上次南瓜仔仲係一舊飯，可以抱住佢同各BB影相(集郵)，但今時今日要佢坐定定、企定定已經好難，唯有再等佢大少少啦！！

↑ 同肚B真係有緣，本來我地係一大班BB交換禮物，但估唔到我地互相抽到對方禮物，我諗 ..... 肚B註定係南瓜仔！哈！哈！

南瓜仔：「肚B，我錫左蕎B一啖，我諗住做"韋小寶"，不過你放心，你一定係最大！」

 ↑ 傳波波遊戲，雖然輸左 .....

南瓜仔：「燒腩仔，上次爬得慢過你，今次我要行快過你！哈！」
燒腩仔：「啋你都傻，傻仔！」

南瓜仔玩到個半小時 (16:00) 已經無乜電，已經要我抱抱，但又唔肯瞓 ...... 又要玩多一陣，HD 話見佢仲想玩咪俾佢玩，去到四點半，南瓜仔應該係好累，都係快快帶佢回家 (因為6299 黎我家打邊爐，HD又未買餸)，出到會所唔夠3分鐘，佢對眼已經合上，一返到屋企放係床上唔駛10秒已經瞓到死豬咁！(由會所到我屋企唔駛5分鐘)

之前好多媽媽都話南瓜子係乖BB，但南瓜仔越來越唔聽話，佢見人地同佢一齊拎波波，南瓜仔自己拎唔到，佢就打左幾個BB既頭，之前我未見過佢咁，點解今日會咁呢！？佢唔通係一個自私既BB！？越大越惡！？點教佢好呢！？
 

南瓜妹@第5次私家產檢

28/12/2013 (25W3D)

到現在為止，我仲未買任何野俾南瓜妹，真係懶到出汁！！哈！哈！

現在煩緊俾咩床俾南瓜仔瞓！？晚上南瓜仔就話陪我地瞓，咁早午晏呢！？張bb床應該俾左妹妹瞓 ......

方案1：買張兒童床俾南瓜仔 (bb床放係廳)
方案2：南瓜仔瞓網床，放係廳
方案3：換樓 (但機會係零，樓價太貴！)

你地會點安排呢！？

原本係約左上個星期，但HD全日要返工，所以改左今個星期睇！

咁啱今日 Playgroup 唔駛返，所以就 book 左最早時間睇，希望唔駛等咁耐 ~~~~

醫生話南瓜妹係「大隻妹」，胎水亦比較多，可能會係血糖過高，所以安排我做糖水測試，仲叫我小心飲食，唔好食咁多甜既食物，因為血糖過高會影響bb腦部發展！！

其實呢一胎我除左剌身外，其他乜都食，仲特別鐘意食糖果、朱古力、檸檬茶，所以全部都無戒 .......

由於當日我已食左早餐，所以唔可以即日驗，唯有安排下星期，希望 PASS 啦，唔係餘下十多個星期真的好難過！！

南瓜妹
BPD=6.78CM(26W6D)
HC=24.1CM(26W2D)
AC=22.1CM (26W4D)
FL=4.67CM (26W2D)

EFW=905GRAMS

自己
體重：50.6KG (重得勁快！)

南瓜仔@2013 聖誕節 (科學館 + 九龍仔公園)

上年無地方可去，因為南瓜仔太細，無乜事都唔會帶佢出街！！

現在就可以帶佢出多d街，但每次出街總要帶好多野，帶bb車的話就唔駛抱住佢，d 袋又可以放係車 ....... 但係就勁唔方便，特別係無升降機或扶手電梯、上落車時，係唔係叫 HD 出番架車好呢！？

21/12/2013 (15M2D)

HD 要返工，自己一個人帶南瓜仔上playroup，講真，真係幾攞命，大住個肚、背住背囊(南瓜仔書包、校服、手冊、圖書，仲有佢既日常用品尿片、水壺、外套、午餐(包)、濕紙巾等等)，仲要抱住著住羽絨既南瓜仔 (因為地鐵太多人，又要行樓梯(唔可以帶 BB 車，因為要再轉校巴，勁唔方便)，自己又要著住大褸，真係好鬼煩！！我有諗過搭的士，但來回可能要四百蚊，加埋上堂費咪要七百幾蚊！？？？

今日開 X'mas Party，佢地送聖誕帽、又送聖誕禮物，但估唔到南瓜仔勁驚聖誕老人，一見到就喊，仲捉住我唔肯放手 .........

放完學就返屋企休息，我都勁累，可惜南瓜子唔肯瞓，我又要陪住佢，最後佢要無哂電四點鐘先肯瞓，瞓醒後HD啱啱返到屋企，就出發去 6299屋企做冬！！

南瓜仔鐘意係間屋四圍行，行來行去，睇到我眼都花埋 .......

見到堂哥(4歲半多)、堂姐(2歲半多)、2位表姐(4歲半 / 2歲)時，南瓜仔又好想跟住佢地玩， 見佢地玩顏色筆又跟住佢地玩、玩層層疊時又跟住佢地玩，幾攪笑！！

差不多晚上十點先返到屋企，南瓜仔飲完支奶就瞓左啦！！

22/12/2013 (15M3D)

去左科學館睇「巨龍傳奇」，可能係星期日，都幾多人，好彩唔係排左好耐咋！

南瓜仔無論睇動畫或郁得既恐龍都睇得好入神 (但點解佢會驚聖誕老人呢！？恐龍咪仲恐佈！？)，但一睇到骨頭恐龍時就無乜反應！！

 睇完又係返屋企先 (因為要煮粥)，再去母親大人屋企打邊爐！！

是日南瓜仔唔肯食粥，攪到 HD 無得食 ........

24/12/2013 (15M5D)

表妹黎同佢玩，所以 HD 預備左豐富既晚餐來招待賓！！

南瓜仔好鐘意攬住表妹，無端端走過去攬住佢喎，因為表妹仲未識得行，所以我地要牛咁眼望住佢地，唔係佢地兩個會一齊跌！

但晚上我突然唔舒服(肚痛及想嘔)，所以就快快上床休息，但我既肚仲係痛(我心諗唔係早產呀！？？)，半夜仲起身嘔添(我相信我係嘔哂全日既哂出來，HD 問我駛唔駛煮野俾我食！？我都唔好嬲定好笑！！)，全晚都瞓得唔好，好彩第二朝無乜事，可能晚上食得多飽掛！？

25/12/2013 (15M6D)

去左母親大人屋企Party！

明明尋日仲攬住表妹，今日理到唔理表妹，掛住同表哥走來走來、玩捉迷藏，而表哥也樂意同佢玩，見到佢地咁玩，我自己都好開心，因為南瓜仔一定回家好早瞓！哈！哈！ 

除左聖誕食物外，當然仲有聖誕蛋糕啦！！


 ↑ 收到好多聖誕禮物呀 (其實係南瓜仔、表哥、表妹！)


↑ 哈！哈！南瓜仔又有新玩具啦！！

26/12/2013 (15M7D)

見到南瓜仔同表哥玩得咁開心，所以就約埋今日一齊去玩 --- 九龍仔公園！

食完午餐就出發，南瓜仔係車度有點發呆，但一去到公園(滑梯)就不知幾開心，不過南瓜仔太細，四周既小朋友最細應該都有三歲，所以 HD 又要牛咁眼睇住，而我就負責睇仲啲袋！


再轉去左草地同表哥玩踢波，南瓜仔唔係好識踢，踢踢下會用手拎起個波，之後佢地兩個又走來走去 (當然南瓜仔唔夠表哥走(跑)啦)！

表哥仲帶埋單車去玩，可惜南瓜仔唔夠高，有得坐無得玩！

到下午茶啦，今日無帶奶，帶左包果汁 (唔多LIKE) 同蛋糕仔俾佢食，姨丈仲買左支熱既維他奶俾佢飲，南瓜仔又鐘意飲喎 ......

玩多一陣就回家，佢地兩個一上到車就瞓左啦！！

我有時好矛盾，我好想南瓜仔自己行，但又想佢有個習慣拖住我地，我成日我見到啲小朋友唔係俾人拖住，而係俾大人捉住手腕，基本上個小朋友係唔想俾人拖 .......

幸好，暫時南瓜仔都會好主動俾我地拖，但我應該點教佢好呢！？幾時要拖！？幾時可以自己行呢！？

這個聖誕假就完左，現正期待 29/12 與各 bloggers 聚會 ~~~~

1220 結婚4周年

20/12/2013

咁就第4年啦 ~~~~

↑ 多謝老公既 agnes b 花！(明年係星期六，我相信應該無花收.....)、粉紅色 Samsung Galaxy Note 3 (4G)！(其實都幾大部！)

諗住去返結婚擺酒既地方跑馬地馬會，但佢地今年馬會唔俾 book 位，一定要會員先可以 book，職員叫我地 walk-in，咁唯有早點去啦 ......去到時只係18:45到，但已經 full  booking，咁佢地應該一早話無位，唔駛我地浪費時間嘛，所以我決定唔會再去 ><

咁就轉去銅鑼灣搵野食，去左3-4間，一係full 哂、一係要等1小時、一係就俾人book左做私人party，時間一分一秒咁過，南瓜仔又過哂食晚餐時間時，HD 又要抱住南瓜仔、拎背嚢，我又大住個肚，真係好累 .......

最後是但去一間有位食就算 ........LE GRAND POKKA CAFE

好彩佢地既食物質素都唔差，價錢又唔算貴，都 ok 既！！



呢幾次出街，南瓜仔都好鐘意食包，所以現在多數揀西餐廳，而且我地開始俾大人野食佢，南瓜仔又幾鐘意飲佢地既南瓜湯 .........咁南瓜就可以無咁悶，又可以陪我地食！

南瓜仔@15M

19/12/2013 (15M)

15個月，由2次午睡時間(每次1小時)，改為1次(1.5小時) ,,,,,,,,

這樣改一改，我就多好多時間同南瓜仔玩，早上有1小時 (原本瞓左)、下午半小時 (原本餵水果)、17:30 就可以陪佢玩 (原本小睡1小時)，即係一日多左2.5小時同佢玩，但另一個問題係，多左咁多時間，同佢玩乜好呢！？？ 
. 
07:00  早餐 - 奶 (7安)
07:15  遊戲時間
08:30  小睡
10:30  起床
11:00  午餐 - 粥
12:00  遊戲時間 
14:30  下午茶 - 奶 (5安)
14:45  小睡
16:30  遊戲時間
18:30  晚餐 - 粥
18:45  遊戲時間 
20:00  水果 (陪大人一齊食飯)
21:15  洗白白
21:30  消夜 - 奶 (7安)
22:00  瞓覺

食
食野方面，又退步，間唔中又唔肯食粥，唉！無佢辦法 .......

奶全部都食哂，而最成功係由 1 號奶粉轉左 3 號奶粉，差不多轉左 2 個多月先轉成功，因為南瓜仔唔肯食 3 號，成支奶一啖都唔肯飲，打去A+問，佢地話可以 1 安 1 安咁轉，或者長期食 1 號，我又唔想長期食 1 號，所以唯有慢慢咁轉 ......

期間南瓜仔又要打針、又病，就停左轉，因為未轉得成，又要買多一罐 1 號奶俾佢，其實食到一半時，南瓜仔已經係 6 安 3 號、1 安 1 號，可以轉全部 3 號，但無理由浪費 1 號奶粉架！？？所以每一餐都有 1 安 1 號，直至全部 1 號食哂為止！

已經無刻意試食物，都差不多15個月，乜都俾佢試！！哈！哈！

大便
 一日平均 2 次！

瞓
只從去完海洋公園後，南瓜仔晚上唔肯瞓，有時要去到23:30先瞓，所以就決定cut左佢17:30 既午睡，等佢可以早點瞓，試左幾日，有幾日佢就食完奶即瞓，又試過23:00後先瞓 ......... 試多一個月睇下會點先！？？

平均一日瞓12小時左右！

能力發展
1) 行得穩，間中會走(跑！？)
2) 用匙放入口 (上個月學用义，但佢咁唔鐘意食野，所以真的好難教)
3) 用扶手行上樓梯
4) 用杯飲水 (但大部份既水流哂係身囉！)
5) 識指馬、河馬、象、雞、老鼠、馬騮、長頸鹿、兔、蟲、龍、巴士、小巴、的士、警車、直升機、星星、太陽、月亮、杯、碟、义、匙 ......(我覺得南瓜仔特別鐘意動物！)
6) 識指哂眼、耳、口、鼻、面珠、頭、頭髮、腳、 膝頭、肚
7) 識指公公、婆婆、姨媽、姨姨、姨丈、表哥、表妹 (我無諗過佢會識指，係上次同屋企人食飯，我阿妹問佢邊個係婆婆、公公，南瓜仔一指就指中，之後再問埋其他人，南瓜仔又指中，隔了一會，我地再問了幾次，南瓜仔次次都指中，但我無乜點教佢！？佢點會識呢！？而且又唔係成日見，一個月2-3次)

南瓜仔既發展都OK，唯一係仲未識講野，講來講去都係「爸」、「媽」，同一大堆BB話囉，都唔知幾時先識講野！？

其他
- 瘦b (18.6磅，點解仲輕過上個月架！？)
- 6隻牙 (有2隻出得少少，有2隻有白色線)

 

↑15個月既阿囝，阿囝真係好可愛！哈！哈！

到現在為止，我未發覺南瓜仔"黐"工人姐姐，反而我覺得佢越來越"黐"我， 每朝(若未瞓番)或下午當我要離開屋企，我會安排工人姐姐、我同南瓜仔玩一陣先(因為我唔想佢喊，等佢習慣左一陣先)，之後我先會同南瓜仔講：「媽媽返工啦！」，南瓜仔就立刻抱住我，又會好實咁拖住我既手，當我真係離開時，佢會大喊或者叫住我，真係好 Sweet ！！

而當我返工回家，工人姐姐好自然會行開，但南瓜仔無抱住或拖住佢！哈！哈！

作為一個全職媽媽，日日咁早起身、午餐時間回家及返工快快回家係值得！！

南瓜妹@第6次QE產檢

17/12/2013 (23W6D)

已經差不多6個月，時間真係過得好快，而我內心真的有點擔心 ........ 怕照顧2個年幼既小朋友，我會變成點呢！？如何安排佢地既生活習慣呢！？

而南瓜仔我相信係會呷醋既小朋友，因為有一次 HD 抱住表妺，南瓜仔立刻飛去 HD 度，要HD 抱佢，唔俾 HD 抱表妹，咁南瓜妹出世後，南瓜仔會點呢！？？

BOOK 左早上9:00，去到由自己做番「三步曲」-  驗小便、量血壓同磅重，我既體重已去到 48KG 啦！因為同上一胎既體重差不多，所以我估都好正常！！

今次等左差不多2小時，超耐！！原來助產士早上要睇左個急症，遲左先開始，希望下次唔駛等咁耐啦 ~~~~

由於我想快點走人，所以都不想同助產士多談，所以都係快快聽下南瓜妹既心跳就算！！

我連藥都唔拎，我唔想再等，出去買就算！！

因為我想快快回家睇我既心肝寶貝囝嘛，同佢玩完，先返工！！

自己
體重：48KG

2013 MY BIRTHDAY (海洋公園)

07/12/2013 (14M18D)+(22W3D)

咁啱今年生日係星期六，所以一早就諗定去 海洋公園，免費嘛！！

而且南瓜仔現在行得不錯，我又想未生南瓜妹前帶佢去！

因一早要帶南瓜仔上 Playgroup，所以只能下午先去 ..........

我地係金鐘港鐵站買入場券，有九折，折左$290，然後就搭巴士入去！！

南瓜仔只係小睡 20分鐘左右，因為一上巴士就醒左，唔肯再瞓番！！

全程南瓜仔無乜行過，因南瓜仔唔夠高，要抱起佢(HD負責影相/ 推車 /睇袋，我就抱住佢，雖然南瓜仔係輕B，都好抱得有點吃力)，佢先可以見到d動物、魚，而且又好多(自由行)人，佢又咁細粒喎，唔抱唔得！！ 

↑ 影相越來越難，成日望住後面，一係就自己「偷走」！！

第1站：海洋奇觀，南瓜仔好鐘意睇魚魚、水母

第2站：四川奇珍館，南瓜仔一見到熊貓就指住

食奶時間

第3站：金魚寶殿、大熊貓之旅 

第4站：威威天地 - 威威戲場，南瓜仔全程睇住海獅表演，仲要睇得好專心
                           - 砵砵火車頭，南瓜仔無反應囉
                           - 幻彩旋轉馬，我地俾南瓜仔坐馬，我就負責扶住佢，又係無乜反應
                           - 昇空奇遇(摩天輪)，南瓜仔好鐘意望出去，唔係坐係度囉！

第5站：香港老大街

第6站：纜車，當時已經17:20，但HD話去海洋公園無理由唔搭喎，搭完就要返番轉頭，估唔到南瓜仔勁鐘意，全程都掛住望出去，佢應該唔會怕高！哈！哈！

第7站：海洋列車，因為已經閉館，所以要立刻回程，好彩有BB通道，所以唔駛等好耐就上左車，南瓜仔已經瞓左啦！！

唯一可惜係睇唔到海豚表演，下次去要早一點 .......

但一抱起南瓜仔上巴士，佢就醒左，只係瞓左20分鐘左右，好彩上到巴士10分鐘後佢又瞓番，見佢瞓到，我唔忍心叫醒佢，所以一直都抱住佢，見佢瞓左45分鐘，加上已經到食飯時間，所以就叫醒左佢！！



晚上就去左金鐘 Dan Ryan's Chicago Grill 食飯，$800 埋單，食得超飽！！

而南瓜仔可能瞓都好足夠，全程都好開心地食包同玩汽球 (餐廳送)，我地又可以舒舒服服咁就飯，真好！！

我仲諗住南瓜仔玩得咁累應該好早瞓，平時11點前就瞓左，但估唔到佢去到12點先肯瞓，可憐既我已經累到死！！

南瓜仔@Victoria (Playgroup)

07/12/2013 (14M18D)

懷孕左南瓜仔3個月時已經報名，等左20個月，終於等到 Victoria 既 Playgroup！

坊間都傳言，若讀到佢地既 Playgroup，就容易入到佢地既 N 班 (上網睇過，最多係一半同學可以成功入讀)，南瓜仔早前都報左Victoria(3月先有面試)，我相信南瓜仔入到機會係零，現在我估應該高少少，有10%啦，始終係傳統名幼稚園，多數收大B同叻B，所以入唔到我都唔會失望，因為無希望過嘛！！

 

↑ Victoria 書包仔

↑ Victoria 圍裙，另外要自備室內鞋

第一次上堂可以兩個家長陪同，之後就只能一個............

佢地有護士，入課室前要測體溫、檢查手仔、口 (家長及學生)

上堂時間 2小時 ........

第一部份：廣東話上堂，自由活動一會，之後唱歌仔，分組再做手作仔，最後再唱下歌仔

第二部份：自由遊戲時間

第三部份：下午茶時間 (三絲湯米)，南瓜仔當然食唔哂！！

第四部份：英文上堂，唱歌仔、講故事書

南瓜仔無扭計，不過就反應就一般，可能太早起床 (放左學，係BB車就立刻瞓左)，兩位老師就讚南瓜仔好定！！

如無意外，南瓜仔會讀到2歲，希望南瓜仔返學得開開心心！！

南瓜妹@第5次QE產檢(照結構)

02/12/2013(21W5D)

不經不覺已經過了一半孕期，真係好快！！我甚至唔覺自己正在懷孕中，因為我放哂所有時間係南瓜仔身上，我仲會抱佢、追住佢，身邊既人都叫我要小心，但係我真係無乜野喎，對住個囝，乜都唔記得啦 ~~~~~

HD 又無時間陪我去，都係自己單拖去.......

上胎唔識，今胎"醒"左，首先去左E座會計部拎收據 ($0)，之後先去B座照結構！

↑ 去到首先俾左張咭我，再填一份問卷，唔駛等好耐就輪到我，結果 一切正常！

醫生話九成係女，哈！咁加埋私家話係女，咁一定係女啦！！

醫生話南瓜仔妹SIZE啱啱好！YEAH！

因為臨生南瓜仔時發現胎水少，所以我都有問南瓜妹既胎水.....

醫生：「現在胎水正常，但好多時要去到八、九個月先會發現胎少水，到時你再來產檢，我地會睇下你個肚正唔正常！」

其實，睇下個肚就可以知道胎水正唔正常！？咁勁！？都係去私家睇安全D ~~~~~

因為無報告或超聲波相俾我，唯有自己記住南瓜妹既數字啦，不得不讚自己既記性！哈！！

南瓜妹
BPD=5.3CM (22W0D)
HC=19.78CM (22W3D)
AC=17.67CM (22W5D)
FL=3.68CM (22W3D)

自己
體重：47.5KG (又重左啦！)

南瓜仔@打流感針

30/11/2013 (14M11D)

之前收到智匯既email，有得免費打流感針，最初收到仲「十五十六」打唔打好！？有人話打流感針無乜用！

之後南瓜仔就病左好耐，見佢病得咁辛苦，都係打左安心，始終預防勝於治療嘛！

原來3歲以下既bb，第一次打流感針要打2針，上一次係10月打左 (無打blog)，之後要1個月後再打第2針......

一早約好呢一日打，但咁啱前兩日南瓜仔發燒，仲煩緊去唔去打好，而且又遠 (銅鑼灣)，之後又要 in 學校，仲慘係 HD 唔得閒同我一齊去，要自己單拖！！

南瓜仔係前一日退左燒，而且好難再安排時間帶去打針，加上就黎流感高風期，我都唔想再拖，所以都係去打針！！

晨早就帶南瓜仔去打針，咁早叫醒佢，係車仔度又唔肯再瞓番 ~~~~~~~

上到去，等了一陣就到南瓜仔打針，今次南瓜仔喊左成分鐘先停 (上次喊左2聲)，打完針就快快帶佢去面試  (隨後再分享面試經過)，而面試前又要安排佢食野，又唔肯食，唉！！

面完試，唔夠1分鐘就瞓左，我想佢真的好累，我就俾佢係車仔瞓，直至佢醒為止(瞓左1小時)，我就快快回家，之後再餵奶，因為下午又要去上 PLAYGROUP .....

真係忙碌的一天！！