南瓜仔@小一大作戰 - 序

攪掂完南瓜妹，又輪到南瓜仔啦，不停既大作戰 .........><

南瓜仔既優勢：
1) 幼稚園係半龍，有90%可升其小學 (可惜唔係心儀)
2) 我既母校 25分 或 hd 母校 20 分(官校)  - 仲未諗清楚揀邊間自行分配

基本上都有 backup，所以壓力唔算大，慶幸上當年幫南瓜仔揀左半龍校，亦慶幸上當年我地既父母俾我地入讀一間不錯既津小 ^^

但我地都俾南瓜仔試下更好既小學，所以報考小學既遊戲都要參予 ><

啱啱過左既家長日，班主任講左兩句評語：
第一句：「佢係讀書既材料」
第二句：「佢係唯一一個，我無野講既學生，佢無論邊方面都好好！」

我亦問班主任，南瓜仔可否原校升小學！？班主任答：「一定得！」

我聽完都好安慰(南瓜仔係細b，全班第二細，班內仲有超大b)，但就不能自滿，始終都係一個4歲多既小朋友，仲有好大既進步空間！

我好清楚明白，呢個只係校內既評語，我亦知「一山還有一山高」，現在既小朋友真係好勁，南瓜仔所讀既學校又不是什麼名校 .........

而且即使校內成績好，唔代表佢面試表現好，最後都係靠南瓜仔本身臨場表現。

現在大概都諗都報乜學校，雖然呢場大作戰好難打(間間都係幾千人爭百多個位)，但都同自己講要「平常心」！

南瓜仔，加油呀！！！

希望南瓜仔同南瓜妹有一樣既運氣 ~~~~~~~~

南瓜仔@升小苦惱

原本我心儀 A 學校，因為夠傳統、升中亦十分亮麗，但唯功課多量多 .......但都覺得適合南瓜仔。

隨著表哥升了小一後 (已考入私小，大抽獎中左第一志願，最後揀左津小)，我既心態就開始轉變。

1) 一天，我問表哥：「你平時有幾多樣功課！？」

表哥：「8樣！」

我：「咁假日呢！？」

表哥：「14樣！」

家姐補充：「14樣入面包埋改正，若無改正咪少1樣功課.......」

2) 颱風當天，家姐傳來whatsapp，係表哥既手冊，手冊上有22樣功課(Crazy！！)

3) 家庭聚會(逢星期日)改了 18:00 - 20:00，因為第二日要晨早 06:30 起床(家姐要05:50起床)，已經係家姐車佢返學 (唔係跨網學校，返 07:40，係少數學校要返咁早)，若搭校車就要 05:45 起床 (06:30 上校巴)，crazy！

4) 不斷有評估/默書，仲有「突擊評估/默書」(家姐話好彩幼稚園時已有默書，否則仲難適應)

5) 功課好深 (我個人覺得)

6) 學校要求「一體一藝」(家姐話已經咁多功課、又要默書/評估，仲要俾時間小朋友學「一體一藝」)

7) 網上功課 / 睇新聞做報告 / 閱讀報告

一個只得六歲既小朋友，放完學已是四點多，仲有做功課/溫書 ........ 仲有要食飯、沖涼，哪來有時間去玩！？去休息呢！？

我深明升小後同幼稚園會有分別，但比我想像更「恐佈」........

我知道係香港讀書係辛苦，所以對於南瓜仔報私小/直資有所改變，希望入到一間口啤不錯，而功課量不多既小學 (係不多，並不代表無)！

而津校，我都係會揀 hd 或 我間母校，而呢兩間學校口啤都不錯，但都係多功課 ><。得「15分」真係無可能到入儀學校，係一個保守既情況下(仲要係龍年)，我真係唔會去博 ......

南瓜仔@K班大作戰(完結)

終於出埋最後成績單了，南瓜仔報左18間，in 左11間 (4 間撞間、 2 間無去 (宣道、金巴倫)、 1 間不安排面試)

結果只得1間offer，其他都係waiting(s) / no offer(s)，無寫求位信，另原校直升到。

面試結果係預計之內(無期望，所以無失望)，最主要原因當然係南瓜仔表現不太理想，連最基本自己既名都唔肯講，其次係我報既學校都較出名，比較難入！

汲取今次經驗，我就知南瓜仔既「小一大作戰」仲難考入直資或私小(但都會試)，唯有寄望「自行分配」，唔得就要「大抽奬」，除非真係入到太勁差學校，否則唔會安排南瓜仔四圍叩門 (暫時咁諗)，我會同南瓜仔講：「媽咪已經搵到最適合既學校俾你，你要俾心機！」

P.S：幾個月後就係南瓜妹既「PN大作戰」，年幾後又黎「K班大作戰」， 兩年後又輪番南瓜仔「小一大作戰」，「大作戰」要戰足5年，仲辛苦過上當年考完會考再考AL .......

南瓜仔@K班大作戰(11) - 香港培正小學幼稚園

29/11/2014 (26M9D) 

我相信呢間係超多家長想入既學校，原因係佢地既小學(一線)同中學(BAND 1)既學校，仲要係100%可直升小學。

報名都係好「考」家長，要寄信俾佢地，再等佢地寄申請表，仲要有指定交表日期同時間，仲有問卷要填，其實有無人睇問卷架？填黎都覺無乜用，但hd都好俾心機埴。

我諗大家經過PN / K1 面試之後都好累，家長既壓力都唔細，由怕無學校收，到怕無心儀學校收 ......

現在小朋友仲細，可能未感到壓力，但到佢地升小時，就知道什麼是面試，壓力就會來，我相信無家長想「玩」呢個遊戲！！

由於上幾次由我陪同下，南瓜仔既表現強差人意，所以HD下令唔再俾我去.....

面試詳情我都不太清楚，只係知道南瓜仔入課室前有少少扭，所以要等第2輪先入課室，入課室同出黎都無喊！

同一時間有6個小朋友入去，hd 話 in 左3分鐘就出左黎，hd  問南瓜仔做過乜！？南瓜仔話玩砌圖同數貼紙！(都唔知係唔係！？)

結果要明年2月先知，雖然我都知係陪跑，但都想早點知結果 .........

南瓜仔@K班大作戰(10) - 香港創價幼稚園

22/11/2014 (26M3D)

呢間係有學券中，教育局評價(外評)好好，位於九龍塘，所以有勁多家長會報讀！！

由於IN之前同呢間有幾個鐘頭時間 (HD 已放工)，所以同南瓜仔去左玩具反斗城，之後佢就午睡， 瞓完去左公園玩一陣，就出發去學校 .......

去到話要等35分鐘，老師就叫我地上3樓玩，帶了南瓜仔上3樓後，玩了一陣，心知不妙，因為佢開始扭.......唯有帶佢返一樓等，但都開始唔耐煩，就俾餅同飲品佢，但都唔係好掂！！

好不容易先到我地，入到去，南瓜仔好醒自己拉椅坐，仲自己玩抓板 .......

可惜好景不常，南瓜仔「發左癲」，佢竟然自己扒係地上，天呀！點解會咁架！？？

我已經馬上抱起佢，但佢勁反抗.....

老師問南瓜仔有乜優點！？

HD話：「 講你(老師)都唔信，佢平時好乖，自己坐定定」

老師苦笑，再問我佢有乜優點！？

我：「佢真係好乖，從來都唔駛我煩，亦唔會自己扒係地下，我都唔知點佢今日佢會咁！？」

老師當然講了一些安撫說話，但都知佢地唔會信南瓜仔係乖既小朋友.....

老師再有問點解揀佢地！？有幾多時間陪小朋友！？

咁就完左啦 ........

點解南瓜仔會咁架！？？係唔係佢唔鐘意面試！？太辛苦！？

後記：原來南瓜仔出左水痘！

南瓜仔@K班大作戰(9) - 啟思幼稚園

22/11/2014 (26M3D)

可升上啟基小學，所以諗住試下.....

hd 要返工，所以由我帶去，我去左又一城食完飯後先出發！

去到等候室有車車玩，都知南瓜仔一玩車就乜都唔記得，但都無法，唔可以收理 ><

等候室同見面室係同一地點......

老師一黎到，就叫南瓜仔收車，南瓜仔當然唔肯啦，咁老師就同佢玩多一陣，最後好好彩南瓜仔都肯俾我收理架車 (唔係佢收，係我收)

之後就俾 LEGO 佢玩，南瓜仔無反應 .......

老師俾香蕉佢，問佢係乜！？南瓜仔唔答！

再俾橙同香蕉佢，問邊個係香蕉！？最初無反應，我就叫南瓜仔俾香蕉我，最後有俾。

老師再問橙同蘋果，叫佢俾橙我，南瓜仔有俾！

老師再拎包同橙，叫佢俾橙我，南瓜仔想拎左包俾我喎，我就話：「橙喎！？」，最後都拎左橙俾我！

之後自己走落到跑左一個圈 (暈左！)，唯有抱住佢坐好.......

最初連書都唔肯睇，老師問佢野，都無反應 (心想：「死硬，半放棄！」)，我當然都有幫手引導佢，好彩當佢見到滑梯時，佢肯講：「滑梯」，老師就問佢：「咁係邊度有！？」南瓜仔：「公園」！(老師應該聽唔到，我講俾老師聽佢答左公園)

老師送貼紙俾佢，都係無講「謝謝！」

自己排完椅就 BYE BYE，走得！！

唉！又係 IN 成咁，都唔知佢想點！？？？

南瓜仔@K班大作戰(8) - 高主教書院幼稚園

15/11/2014 (25M27D)

點解有咁多人已經收到幼稚園既信呢(無論有無OFFER)！？但我一封都未收到！？？間間都話12月先公佈，係唔係我報既學校工作效率太慢！？定係真係超多人報名呢！？？ 如果有間超心儀既學校收左，我咪唔駛再 in 學校囉 ~~~~~~~

可優先升高主教書院小學部，所以十分吸引 .......

佢地係指定時間上網拎表，然後係指定時間交表(星期六)，再俾面試證。

我有諗過唔報呢間，我唔想再要排隊交表，我覺得好麻煩，又未必收喎！

但最後都係決定報讀！！(叫hd去交表 >.<)

呢間in下午，所以in完上午就同南瓜仔食飯再午睡。

都係得一家長陪同……

- 講自己名。無講！
- 老師講顏色，叫南瓜仔拎。做到！
- 有3件物件，拎出2件相同。做到！
- 有本書，指出物件。做到！

hd 話南瓜仔in 呢間表現不錯(雖然都唔肯講自己名，但有同老師講野，但我唔知佢講乜！？)


與藍田靈糧堂幼稚園撞期，點解放棄呢間！？

(1) 設有N班
(2) K1 學位不多
(3) 無直升小/中學

南瓜仔@K班大作戰(7) - 北角衛理堂幼稚園幼兒園

15/11/2014 (25M27D)

有學券既學校，學術同品重都好注重，所以都想試下.......

題外話：
有學券同非學券學校有乜分別！？

- 學費
學券學校可得教育署資助全年 $ 20,010 (2014/2015)，而這些學校全年學費不得高於$30,020 (2014/2015 半日制) ，而 $60,040 (2014/2015 全日制)，而非學券學校全年學費$30,020或以上 (半日制)。

- 學術 / 德育
參加學券學校必須參與，若外評未達標，則會被取消學券資格。

而學券學校，由教育局「外評」監管，所以他們不會學術型 (即催谷)，即不會K1已默書、寫字，但唔代表學既野唔深，只係唔夠非學校券深(k2 要學 P2既野)。但現時要考直資或私小既問題太深，所以部份家長會選擇非學券學校，以便小朋友能考上心儀小學。當然非學券學校並非全部都是學術型，例如 IB / 國際學校。

另一方面，學券學校則著重德育等發展、愉快學習......

針沒有兩頭利，所以家長要睇下小朋友適合哪一類型，若小朋友是活潑型，硬要入「催谷」學校，最後辛苦了家長、亦辛苦了小朋友！

講番正題.....

尋晚南瓜妹微燒，而佢地又寫明只可一家長見，所以由hd去。

hd 話呢間有幾個係超大b，已經3歲(因老師有問佢地幾多歲)，hd 話：「咁點爭呀！？」

若我小朋友係12月尾出世，我想我都會轉去做超大B，可惜南瓜仔係9月出世！

南瓜仔都係唔太合作，唉，都唔知佢想點！？

- 叫乜名。無答！
- 積木叠高。做到！
- 俾個茶壺同杯佢，叫佢做沖茶動作。做到！
- 一大班小朋友一齊唱遊。南瓜仔乜都無做，仲將雙手放後。(個個小朋友都有做 ><)

咁就完成了！

南瓜仔@K班大作戰(6) - 劍鳴幼稚園暨幼兒園

08/11/2014 (25M20D)

又係好難入學校，一來K1 已經少位 (仲要有 PN 班)，二來好多家長選擇。

同一日既上午既第三間 ......

最初無諗過 in (因為覺得無乜機會入)，與上一間只係相差45分鐘，但 in 完啟思附小後，仲有時間，兩間學校相距不遠，hd 話去理 in！！

而我地都早有準備 ...... 就係填定問卷 (雖然估計可能去唔到)，因為我地相信機會係留俾有準備既人！哈！哈！(佢地份問卷都叫容易填，只係可以填一行字，唔似根德園寫明唔可以過2頁紙，即係意味著要「作文」！)

但今次 hd 唔俾我一齊去，佢話：「之前我帶幾間佢都無扭，你唔好去啦！」

之後就抱住南瓜仔走了 ........

我就慢慢去學校，係門口等南瓜仔！！

hd 話南瓜仔都肯做.....

- 問叫乜名，無答
- 玩鎚仔，OK
- 玩推車仔，OK
- 入形狀，OK
- 將積木由一個碗拎去另一個碗，OK
- 指出公仔既五官，OK

 in 完就快快回家，食完飯就午睡一下，再出發去飲宴 (南瓜妹就留係屋企)，最估唔到南瓜仔去到勁開心，仲肯講野 ~~~~ 但，點解 in 學校時唔肯講呢！？


與蘇浙小學校(本地課程)撞期，點解放棄呢間！？

(1) 因前2間都係附近，時間上配合到
(2) 蘇浙 - 未有校巴安排

南瓜仔@K班大作戰(5) - 啟思小學附屬幼稚園

08/11/2014 (25M20D)

題外話：
新聞話有人報左15間幼稚園，我仲報了18間添，係唔係「怪獸」真係見人見智.....

但有人能保證南瓜仔一定有學校收！？若無學校收，邊個會可憐我呢！？我想南瓜仔入好學校，有錯嗎！？

1) 唔係in就收 (仲要有撞期添)
2) 若有幸有幾間係手，我一定唔會hold住學位 (雖然收既機會好微)
3) 唔會「自制」全日制，只會讀一間幼稚園

講番正題：

可以升上啟思小學，但學費都幾貴，不過收左先算啦.......

去完民生就去啟思附幼，我地就打的去，但原來好近咋，仲要早到45分鐘，由於要係門口等先可入去，所以我地就係附近行下，點知就落住雨，我地就係天橋等到時間差不多先去學校！(附近無舖頭)

好明顯，面試大部份係細b，個個同南瓜仔差不多！！ 

去到等候室，南瓜仔就好開心咁玩，因為有佢最鐘意既車嘛！！

入去面試了，好唔好彩，南瓜仔一眼就見到入到巴士，之後就叫住「我要巴士、我要巴士」

老師同佢玩其他玩具佢都唔理，最後老師俾左架巴士佢 .......

點知佢仲要落地下玩，唔肯係枱玩，唉！！

老師：「咁不如等佢自己玩先，同家長傾下計先！」

老師都係問點解揀呢間學校！？點解想轉校！？會否揀下午班！？平時邊個照顧小朋友！？

好不容易先叫到南瓜仔上枱玩，佢都肯玩入形狀，但做砌圖時，佢又話要巴士 .......

老師最後話面試時間到，當我地帶南瓜仔走時，佢就喊住話要巴士！！

唉，in 成咁，我都哂佢無法 ~~~~~

南瓜仔@K班大作戰(4) - 民生書院幼稚園

08/11/2014 (25M20D)

我相信呢間係好多家長都想入，主要原因是一條龍，幼稚園有85%可以直上民小，而民小既口碑亦好好！！

報呢間學校真係要好有心，得2日時間上網報名，再係平日(2日內)指定時間交表同錢，之後上網睇面試時間........

又要填問卷 (其實我同hd覺得無人會睇，成幾千人申請，邊有人會睇你填乜東東！？anyway，hd 都有心去填！)

為左等南瓜仔有更好表現，所以早上俾佢瞓耐少少，打的去面試 ........

原本係 HD 同南瓜仔一齊去 in，佢地仲入埋學校，點知 hd 話佢狂叫「媽媽、媽媽」，咁唯有我帶佢面試啦！！

入到去，南瓜仔都係唔合作，要我抱，我就抱佢 (我唔想佢狂扭、狂喊)，之後就係門口排隊登記，為了安撫佢，所以俾左餅佢食，好彩佢就平靜左(等了5分鐘).....

入到等候室，嘩！佢地啲玩具勁「悶」，都唔知有乜好玩！？？？南瓜仔最初10分鐘都肯坐定定玩，但之後就想落地玩，唯有再俾餅佢食，等佢坐定定 (當時有老師好似評分中)，係等候室等了20分鐘 ......

好不容易等到我既group，原來只係門口外面等面試，外面又勁大風，南瓜仔又唔肯坐，唯有抱住佢睇人打籃球，等呀！等呀！又等左10分鐘以上，終於入到課室......

我地由外藉老師 (幾靚仔！哈！)見......

俾了一幅圖南瓜仔，有一家人打緊波，問南瓜仔男人係乜人！？佢地做緊乜！？男人著乜色衫！？ 再指住A字問識唔識讀，再指1字問南瓜仔識唔識讀，南瓜仔係十問十唔應，仲想逃走 ...... (南瓜仔係可以答到以上問題，但南瓜仔見陌生人就變「啞」左，我都無佢法！)

老師送了八達通套俾佢，佢肯拎，之後就俾我 .....

最後老師同佢講BYE BYE，開心到佢呢，馬上落地，推好自己張椅，就跑係門口同老師講BYE BYE .......

唔駛收信都知結果：等得耐又死得，只係考講野死埋，結論係死硬！！

題外話：hd 話佢係出面等我地時，話有 1/3 家長係講國語，相信呢班人係雙非家長！！

南瓜仔@K班大作戰(3) - 國際英文幼稚園

07/11/2014 (25M19D)

安排星期五面試，所以HD請假去。

又係間好難入既幼稚園，除了同年既bb外，仲有一大班既「超大b」，細b要入真的難過登天，又係個句「無期望，就不會失望」！！

或者你地會問，點解明知唔收都去in！？ 答案係：唔in一定無，試下無所謂！！

我地揀左英文面試......

去到玩下LEGO，南瓜仔好乖咁玩，之後就正式面試......

TEACHER A....
- 問南瓜仔叫乜名！？幾多歲！？南瓜仔無答！
- 拼人面圖既口，南瓜仔併到！

同時間，TEACHER B 就睇下HD填問卷，HD 好快填哂份問卷 (上EK睇好多人都填唔哂)，不過最後老師都話問卷填唔哂無問題，可能只係分家長既心，填唔填都無乜分謂！！

此時，HD 已完成問卷，睇住南瓜仔in.....

- 叫南瓜仔指PIG，南瓜仔指到
- 俾個盒仔南瓜仔開，南瓜仔做了開盒既動作，但個盒可能太實南瓜仔開唔到，老師就幫佢
-  用匙拿珠出來，南瓜仔很快就做到。
- 老師拎2包紙包飲品俾南瓜仔，南瓜仔拿了。
- 做併圖，做了3個，有1個做唔到
- 叫南瓜仔唱歌，南瓜仔講唱 " THE WHEELS"，但都係無唱，之後HD話唱 "TWINKLE TWINLE" 都沒有唱，但有做動作。

咁就完成了！


與學之園幼稚園撞期，點解放棄呢間！？

(1) 有N班
(2) K1只有1XX個學位 (國際有6XX個學位)

南瓜仔@K班大作戰(2) - 浸學大學附屬幼稚園

01/11/2014 (25M13D)

呢間聯繫浸會大學附屬學校王錦輝中小學，但只係優升，不一定可直升。.

下午面試，所以我放工後可陪南瓜仔一齊面試！

登記完就係校舍等，但佢地校舍有戶外滑梯玩，我同hd都心知不妙，因PN面試時，玩完就無心面試……

但無可能唔俾南瓜仔玩架！? 等了20分鐘就安排面試，好彩今次南瓜仔無乜大扭咋。

teacher A 就in家長，而teacher B 就同南瓜仔玩玩具。

teacher A 問點解揀佢地？對小朋友學術上有乜期望？小朋友有乜優點同缺點？

因我地係背向南瓜仔，所以唔知teacher B做乜東東，接南瓜仔走時，老師送貼紙，南瓜仔無講多謝，但有講bye bye。

咁就完成。

之後就去埋浸大既中醫博物館，南瓜仔又掛住玩，唔捨得走......

原本我話直接搭小巴返屋企，點知hd話要再去又一城，我話仲乜唔返屋企！？佢話想去A行又一城喎，聰明既我當然明白佢想點啦 .......


 ↑ 前一天是HD的生日，咁我好識做到送了 iPad mini 3 俾佢！

買緊期間南瓜仔已瞓左，我地買完就食下tea，等南瓜仔醒左就回家了！！

南瓜仔@K班大作戰(1) - 根德園幼稚園

01/11/2014 (25M13D)

上網睇話收細B既機低，而且仲要收好SMART既小朋友......

南瓜仔既發展，只屬正常，不是太快，亦不是太慢，所以都覺得係陪跑，但都試下！！

今朝要返工，所以由HD帶南瓜仔去面試.......

係兩三星期前，寄左封面試信同一份問題卷，問題卷要今日交俾佢地。

有2個老師負責in， teacher A 就同南瓜仔玩，另一個teacher B 就同hd傾計。

teacher A 同南瓜仔玩下積木及砌圖，南瓜仔都順利完成。之後老師叫佢唱歌，南瓜仔無唱(hd同老師講佢黎之前不停唱歌)，最後老師送貼紙，南瓜仔無講多謝，但有bye bye。

teacher B 就問hd平時邊個照顧南瓜仔？戒左片未？點解想入讀呢間學校？

咁就完成面試。

南瓜仔唔出聲我都預左，所以無失望，亦無期望。


與康怡維多利亞幼稚園撞期，點解放棄呢間！？

(1) 有N班 (多數都會揀直升)
(2) K1 只得 3X 個學位 (根德園5XX個學位)
(3) IB 課程

南瓜仔@K班大作戰 - 前夕

踏入11月，就係「K班大作戰」 ~~~~~~

南瓜仔讀緊 PN，學校方面話要等12月家長日先知可否升K！？作為家長一定要準備好，萬一唔收南瓜仔點算呢！？(雖然學校話收番機會好大！) 

明明叫自己唔好報咁多間，不過都報左18間！！(應該會 in 13間)

報既時候都估到撞期：

-  4 間撞期
-  1 間不獲安排面試 (聖保羅堂幼稚園（北角）- 只 in 1000人)

咁撞期都要諗in邊一間先 ......

1) 是否適合南瓜仔
- 南瓜仔比較文靜小朋友，返學坐定定，喜歡睇書，注專力 OK，學習能力 OK，獨立 (返學一次都無喊過)，感覺上，南瓜仔都適合讀傳統學校。

2) 是否直升/聯繫/優先學校
- 收左唔駛煩小/中學，收既機會不高，數幾千人 in 喎！

3) 入到機會有幾大！？
- 有沒有開學前班！？若有，咁即係K位又少左。
- 有幾多學位！？有些收幾十人，有些收幾百人。
- 幾多人報名！？不過間間都多人報名啦......

4) 升小派位情況

5) 配套
- 有沒有校巴！？
- 有沒有全日制！？

做完咁多野，最重要都係睇南瓜仔表現，但講真，我都不抱太大期望，南瓜仔出到街就唔講野，好似「啞」左咁，其次今次搵既幼稚園全部都係出名學校，收南瓜仔機會又不大 (始終都係細B，無論邊一方面都同大B有一段距離)

到時再分享大作戰既結果啦 ~~~~~~~

南瓜仔加油呀！

南瓜仔@K班大作戰 - 序

又要大作戰，啱啱戰完 PN 班，仲未返學，又要開始 ......

今次比上次有計劃：

1) 申請學券 (必做)

2) 搵心儀學校

搵學校原則：

- 幼稚園分HAPPY SCHOOL 同 "谷"既學校，我都報名。

- 學費、雜費、校巴費不一，要睇自己能力。(有學券可能交幾百蚊，私校可以過萬，仲要買佢地既債券，聽聞要幾十萬！！)

- 學校地點。

- 去學校網頁或致電問幾時報名，每間學校報名方法/日期都不一樣，有網上報名、親身交表或郵寄交表，唔好錯失機會。

- 報多幾間，怕學校面試日撞期。

3)  預備物資

- 信封 (平均4個回郵信封，1個公文袋 (入4個回郵信封、申請表、相、影印本)，我唔會理學校寫乜SIZE信封)

- 地址 label (要寫學生名，唔好寫家長名，因學校係用小朋友既名作記綠)

- 郵票 (回郵 ($1.7)、寄去申請學校既文件 ($1.7 x 3) → 因為較重(內含4個回郵信封)，怕郵費不足寄失)

 - ↑ 相片 & 袋

平均4張相(不包申請表貼既相)，出街影太貴，係屋企自己影，可任影數十次，不過真係好難影，未影已想走，最後用iPad。

影完用software整證件相，一張4R相可整8張證件相，之後拎去哂相，勁平，唔駛20蚊就有100張證件相，袋仔係交相俾學校用。

唉，睇下南瓜仔，瘦左幾多 ><


- ↑ 小朋友名原子印

太懶，唔想每張相背後寫名，萬一學校處理文件時，落左張相，都知乜誰人。

我係海盛貿易公司訂，公司同事介紹，同事話佢地既印係貴少少，但最耐用喎，最重要係唔駛親身去拎，寄俾我！！

- 針咭 & 出生紙影印本 (仲要SCAN定，有部份學校網上報名)

- 支票 (交報名費)

4) 面試訓練

我唔會報什麼面試訓練班。

南瓜仔係細B，表現同大B有一定既距離，我唔會迫南瓜仔識，亦迫唔到！

而小朋友既表現唔係我地可以控制，明明屋企做到，出到去未必做到，所以唔好俾咁大壓力俾小朋友同自己。

不過我就會教左先，教左面試未必做，唔教多數唔識做！！

咁會教乜東東！？都係教日常生活接觸既野.......

5) 家長準備

- 假期 (必備，又要親身交表、又要IN，多多假期都唔掂，唉)

南瓜仔@N班大作戰(三)

終於 in 哂所有學校，結果都已出埋，但我相信會有家長放棄學位，即南瓜仔仲有機會俾學校收！

南瓜仔@N班大作戰(一)

南瓜仔@N班大作戰(二)

下年幫南瓜妹報，我就唔再報咁多，因南瓜仔係細b，加上好多人都話報左好多間，結果1間都唔收，所以我先會報咁多間咋，結果唔係我想像咁難搵學校。

共 in 14 間，1間放棄面試，7 offer(s)，5 waiting(s)，2 rejected(s)，雖然成績唔係好好，但對我來說已經滿意。

上回講到約克有個「特別情況」，有個小組會議去到其實係一個講座，講座講了一大堆說話，但成個主題係叫我地報佢地既 playgroup ($6000，30堂)，咁就可能收小朋友讀明年 K1！

$200 一堂 playgroup 唔係貴，但我最後決定唔會報，因我相信南瓜仔 K1時會有更好既 offer！

最後呢幾間都係難入，因都係幾出名學校，大把家長報名，但收生只得好少，所以都係"博"下心態！！

同一日in 3間學校，好彩係時間上係"就"到，不過就要辛苦南瓜仔，一日走3場！！

01/03/2014 (17M10D)

(十二) XXX幼稚園 (選取，為保障南瓜仔私穩，都係不開名)

第一場 ：in 10:30，早左15分鐘到，等5分鐘就到我地，最估唔到10:30已經 in 完 (即係15分鐘)，超快！我最初仲諗住要飛的去北角in下一間學校，咁早 in 完，我地仲可以搭地鐵去添！！

由 HD 帶南瓜仔入去，我就出面等！

入到去就俾小朋友自己玩玩具、Share 下玩具，之後唱下歌、跳下舞，最後係 Clean up 玩具，期間有老師好似俾緊分！？而南瓜仔表現都好好，所有玩具都識玩，又會Share/ Clean up 玩具，唱歌時都有郁郁下跳下舞！

HD同我講，唔覺佢地 in 緊囉，似做戲多啲，可能只收大b

結果：offer


(十三) 香港民生幼稚園暨國際幼兒園 - 全日制

呢間學校一早已經in哂大b，亦出哂所有offer，本來佢地3月頭要大b再交留位費(我估係睇下有無人唔要offer，咁學校就可以俾細b)，但教育局既指引係唔可以早過5月，所以佢地就停收留位費，所以我估細b收到offer既機會不大！

第二場：in 11:50，早左15分鐘到，去到我地見到好多小朋友玩緊遊樂場，根據上幾次經驗，我地絕對唔可以俾南瓜仔落地玩，否則一定衰硬！！

因為平時 11:00 係午餐時間，所以等緊期間就俾南瓜仔食餅，等佢唔駛走去玩........

正當南瓜仔食左十幾分鐘時，就俾佢發現其他小朋友正在玩耍，唯有 hd 抱住佢周圍睇 (唔好俾佢睇到遊樂場)，好彩唔駛5分鐘就到我地！！

又係 hd 帶南瓜仔去 in，都係玩下玩具、唱下歌仔，同埋有老師問下問題，但這些問題全部都係問卷問既野(佢地寄埋問卷，咁填黎做乜！？)，南瓜仔既表現都好好！！

都係似做戲，唔似 in 囉！！

結果：waiting


(十四) 康怡維多利亞幼兒園

心儀學校：第1位

係好多家長心儀學校之一，係超難入，但南瓜仔上緊佢地既 playgroup，南瓜仔既班主任都讚南瓜仔，8個小朋友，總有3-4個周圍走，南瓜仔不但無四圍走，而且仲好專心聽老師既指令，而最特別係南瓜仔係學校會自己用匙食茶點，仲會食哂.....所以我有少少希望會收南瓜仔！

in 完第2間，我地就快快食午餐，之後就出發，去既途中南瓜仔已瞓左，為左南瓜仔舒舒服服瞓1小時，所以我地搵左間 coffee shop 坐，時間真係啱啱好，正當想叫佢起身時，佢自自然然就醒左，真係太好！！

第三場：in 15:00，早左15分鐘到，都係由 hd 負責帶南瓜仔 in，我就出面等，但佢地係既課室係全玻璃，我可以望入去，點知就出事，南瓜仔見到我就跑去我果邊，我就立即坐下，等佢見唔到我！(hd 出左黎之後話我，差點害了南瓜仔，好彩hd引開佢既注意力，繼續 in 咋！)

有廣東話、英文、國語老師一齊 in，都係玩下玩具、唱遊，南瓜仔表現都好好！！

估唔到3間學校都係咁 in，佢地真係 in 緊定係做戲！？係睇小朋友家長背景！？定係只係收大b！？

結果：waiting

22/03/2014 (18M3D)

(十五) 明慧國際幼兒園暨幼稚園 - 全日制

學校話有4000多份申請表，只收百多人，再加上一早in哂大b，亦收埋大b，又係好難入，仲要想入全日制，就難上加難！

佢地係一星期前有個講座，但當天 hd 要返工，我又要帶南瓜仔上 playgroup，所以我安排左安姐代去！

家姐去到要填問卷，家姐唔識填南瓜仔既心儀小一學校，hd讀邊間小學係好正常，但家姐唔記得南瓜仔出生日期，最攪笑係佢寫錯南瓜仔既名……

不過家姐交完表後，諗諗下好似寫錯左名，好勇敢同老師講寫錯名，老師當然話無問題啦。

其實家姐肯花時間去聽講座，我已萬分感謝。

呢日啱啱生完南瓜妹既第二日，所以hd自己一個帶南瓜仔去，晨咁早就去要 in，in 09:20，hd話似做戲，唔似in喎。

結果：offer

南瓜仔@N班大作戰(二)

加埋上次既結果 (現時為止 in 左10 間，1間放棄面試，5 offer(s)，3 waiting(s)，1 rejected，1 待覆)，但南瓜仔越 in 越差，係唔係 in 得太多呢！？仲有5間未 in，5間(其中一間可能無得 in，因為佢地寫明 in 大 b先) 都係心心儀地學校........希望南瓜仔快快回復正常啦！！

16/11/2013 (13M28D)

(七) 德福幼稚園 - 廣東話面試

一早出門口，同南瓜仔食埋午餐，仲俾佢瞓番個午睡，但我地都早到，俾南瓜仔係學校公園玩一陣，南瓜仔不知玩得幾開心，點知臨  in 前抱起佢，佢就勁扭！！

只可1家長陪同，由 HD 陪佢面試，我就出面等 ......

面試內容：拎水果 (唔係拎，仲拋落地)

南瓜仔最後連拍手、BYE BYE、飛吻都唔肯做！

結果：waiting

30/11/2013 (14M11D)

(八) 東華三院香港華都獅子會幼稚園-  廣東話面試

由我一個去，HD要返工，而早上又要帶南瓜仔去銅鑼灣打針，再去 in 學校，南瓜仔全程都無瞓！！

呢一間有帶BB車，但都好唔方便，這天又凍，南瓜仔又著多衫，去到學校門口就要收車，首先要抱起南瓜仔，放係地下先，又要睇住南瓜仔，之後要咩番個背囊 (要收車嘛)，仲要去排隊報到！！

第一部份，老師拎公仔同佢地握手/拍手，但南瓜仔全程無反應，乜都唔係做 ......
第二部份，玩玩具，但都係無反應，期間老師同我傾計，問誰人照顧佢！

in完，一上BB車唔夠3分鐘就瞓左，可能太攰掛，係唔係咁，所以全程無反應呢！？ 

呢個學校雖然唔係名校，但網友們對呢間學校評價十分好，唔好以為"村校"容易入，因為佢地收生不多 (PN班)，只收26人，但申請者超過三百多人，所以都係十幾個小朋友得一個入到，同名校一樣難入！！

結果：waiting

30/12/2013 (15M11D)

(九) 約克國際幼稚園 - 廣東話面試

佢地安排全部都係平日，所以我一共請左2次假，第一次係去聽介簡會！

去到仲早，俾佢係學校公園玩，點知就出事 (無汲取 in 上次德福經驗，應該唔好俾佢玩).......

玩完唔肯入課室，勁扭，HD就抱左佢出課室，安撫完再入，但都係扭，最後我俾左餅餅佢食，佢先安靜！！

第一部份：廣東話，問下南瓜仔日常生活，由我作答，問點解揀呢間學校、南瓜仔最叻既地方，我就覺得答得幾好，因為我係「吹水」能手！！

第二部份：廣東話，我同HD一齊陪同，佢地有六樣測試題目 (波、水果、交通工具、身體、入形狀、疊積木) 俾我地揀，HD 揀左波、水果、指身體，呢3樣南瓜仔一向都做到，可惜 .....

波 - 碌俾媽媽，做到！
水果 -玩玩下咁，都唔係拎 (後轉交通工具，都係唔肯拎，屋企出街都係指！)
指身體 - 完全唔指囉！！

南瓜仔不斷指住塊壁報，都知佢指乜東東！！ > <

最後都有同老師BYE BYE 同飛吻！！

雖然有網友話呢間學校乜學生都收，但我就覺得唔係容易入囉！！

正當係我 ek 睇，一黎收到 N 班，一黎收到 2015年K1時，我收到竟然係「特別情況」.......

「特別情況」：是指在招生面試過程中面試老師認為應該被取錄之學生，但由於小朋友在入學考試中，其表演未能得到真正發揮及未有準確地反映他們真正的智慧和未來的學術表現。(封信係咁寫，我個人覺得似 WAITING囉 ><)

我要2月出席佢地既小組會議先決定收唔收南瓜仔 ..........

結果：待覆

04/01/2014 (15M16D)

(十) 綠茵英文(國際)幼稚園(常寧路) - 英文面試

in 得好早，去到學校仲未開門，經過上幾次經驗，都係唔俾南瓜仔自己走來走去，所以全程都係 HD 抱住直至學校開門！！

第一部份：原本只可1位家長陪同，但佢地見我大住個肚，所以俾哂我地2個一齊入去，首先由一位英文老師唱歌 warm up，但南瓜仔好想逃走，唔坐定定，最後要放佢係我既大脾坐，佢先肯坐，之後就係普通話老師講故事！！

第二部份：可2位家長陪同，入面有三位老師(我估1英文、1普通話、1廣東話)，原本我俾南瓜仔自己揀，但HD示意揀英文老師 .....

面試內容：(英文)入類似形狀既玩具，之後叫南瓜仔俾積木俾媽媽、爸爸、老師，最後係 clean up，全都都做到哂！(都算係好簡單)

之後就問我地南瓜仔日常生活，如：可否自行如厠、可否自行進食、一日幾多時間陪佢玩等問題！

因為佢地既評分表係放我地面前，除左得1格係中間外，全部都係最高分，應該 in得不錯掛！ 

呢間係我住果區，又報左名，又收細B、又幾出名既全日制學校 (我係報左3間(我住果區)全日制，但有另外 2間已 CUT 左全日制，都係收左南瓜仔 PM OFFER)，因為南瓜妹就出世，若南瓜仔可以入全日制的話，咁就工人姐姐就無咁辛苦！(我仲報左 2 間跨區全日制，未 in，但佢地都係收哂大B)

結果：offer

12/01/2014 (15M23D)

(十一) 嶺南幼稚園(小西灣)

呢間係一早就報名，當時我係乜都報，呢地方都無理 ......

但呢間真係太遠，交通唔方便 (唔係港鐵沿線)，無校車，即使收左都無可能讀，而且南瓜仔這天要返 playgroup，都係算了吧，放棄！！

南瓜仔@N班大作戰(一)

南瓜仔係細b，所以一開始就好擔心無學校收，所以見到乜學校(跨區)都報，所以報報下報左16間，所以個個星期都忙住 in 學校！！

係唔係怪獸家長！？我認！我認我係！咁又點！？香港地，係咁喎 ........

我只係想阿囝入到好學校，入到好既 N 班，到時 K1 唔駛咁煩 (當然到時又會報"龍"校，之後15年都唔駛煩！)

我都好滿意暫時既結果 (現時為止 in 左7 間，4 offer(s)，1 waiting，1 rejected，1 間等結果)，當然收到rejected總有點唔開心，但我已覺得南瓜仔好叻叻，始終只係一個未足14既 BB，而且又有咁大既競爭，有 OFFER 已經好好啦！


12/10/2013 (12M23D)

(一) 綠茵英文(國際)幼稚園(將軍澳) - 廣東話面試

第一次面試，講真，我真係無乜期望，一個12個月多既BB，可以做到d乜！？？

同 HD 一齊去面試，因為呢間我係寄去(無排隊)，所以我地係第三輪 (第一輪：排隊大B，第二輪：排隊細B)

第一部份：由我陪同，有個英文老師同一大班BB WARM UP，唱下歌、跳下舞！而HD就係出面填 FORM (用英文)！

第二部份：我同HD一齊陪同，問下平時誰人照顧囝囝、可否自己進食/如廁

面試內容：入形狀、食餅餅、俾水果、疊積木

南瓜仔全部都做到哂，臨走仲同老師BYE BYE 同飛吻！！

結果：waiting

19/10/2013 (13M)

(二) 比華利中英文幼稚園 -  廣東話面試

同 HD 一齊去，去到係一間房等 IN

由我陪同，同老師傾下計，問下阿囝日常生活 .......

面試內容：俾波波俾老師 (其實係枱面有玩具，南瓜仔自己玩，咁啱拎住個波，老師叫佢俾佢，我估唔係面試測試)

臨走時老師仲拖住佢走，南瓜仔又肯俾佢拖！！

結果：offer

19/10/2013 (13M)

(三) 翠茵小宇宙幼稚園(新都城Ｉ) - 英文/廣東話面試

同一日 in 兩間，好彩兩間學校都近，而呢間又俾我遲1小時先 in，我可以俾南瓜仔食完午餐，休息一間！！

我、HD、工人姐姐共排了20小時學校，點解會排！？

1) 「先到先得」，即係你排到隊就一定收
2) 近屋企
3) 係EK睇，係本區四大必選學校，評價好
4) 有國際班

所以我覺得值得排 (因當時唔知有無學校收南瓜仔，要買定保險)，唯一唔好就係無全日制！

南瓜仔反應都OK，基本上都做到8成！

第一部份：我同HD一齊陪同，英文面試 (問下南瓜仔日常生活)

面試內容：玩串珠、指自己身體部份 (頭/口)，最後幾個BB一齊唱歌/跳舞 (南瓜仔無乜反應)

第二部份：我同HD一齊陪同，廣東話面試，又係問下平時誰人照顧囝囝、可否自己進食/如廁

面試內容：入圖形版 (識拎出來，但未識放回)、玩車車、聲音測試 (係南瓜仔耳邊玩沙沙，睇下佢有無反應)

有同老師BYE BYE 同飛吻！！

結果：offer

01/11/2013 (13M13D)

(四) 博士山(香港)國際幼稚園 (將軍澳) - 英文面試

呢間係星期五面試，所以請了半天假帶南瓜仔去........

因為自己一個帶去，用車仔又麻煩，用 HIP SEAT 又唔太方便 (大住個肚)，諗住係地鐵沿線，所以抱住佢去，雖然南瓜仔係瘦B，但我只得90多磅，對我來說抱得好辛苦 (平時我無乜抱，佢又唔係扭抱B)，唯有俾佢自己行，但可能佢啱啱起身，唔想多行，行幾步就停左 .........

去到時，老師 / 工友們主動同南瓜仔傾計，可惜佢無乜反應，好彩我提早去，等佢WARM UP完十幾分鐘，佢就走圍行，同老師 / 工友們打招呼！

而HD就係臨 IN 前十分鐘就到左，佢就填埋問卷 (英文，都係俾佢填)，咁就帶南瓜仔 IN！

南瓜仔表現都好好，基本上完全都做到哂！

面試內容：活動式，一路玩 (叫南瓜仔拎動物) 一路問HD問題(英文)，之後就係一大班BB一齊玩，南瓜仔好主動，樣樣都係第一個做，疊積木咁 (同平時返PLAYGROUP 差不多)

結果：offer

02/11/2013 (13M14D)

(五) 玫瑰崗幼稚園 - 英文面試

嘩！勁遠，係半山，由灣仔港鐵站，仲要搭$4X 的士先到，四周圍乜都無！

又勁多人，我估最少有成千人去面試，而且個個BB已經唔係識行，係識跑、識行樓梯上落，絕大部份都係大B，好明顯南瓜仔同佢地相差好遠！

南瓜仔 IN 得麻麻，因為面試內容對他來說亦深左少許！

面試內容：指爸爸既鼻(做唔到)、插花等等，之後就一班BB做 ROLL ROLL 動作、原地360轉 (南瓜仔做唔到，好多大B都做到)

因為有太多人 IN(估計過千人)，收得百多人，而且呢個又係出名既學校，機會真的好微微，所以打定輸數！ 

佢地係以 email 形式通知，本來我都覺得幾好，但當係EK見到有JM收到結果，自己又收唔到時 (打去學校問，佢地叫我再等)，個心真係忐忑不安，收信就每日派一次，有就有，無就無，但佢地既 email 係24小時，攪到我成日要 check 住 email，仲連續兩日都發夢收 email 添 (可能我太緊張！) ......

結果：reject 

09/11/2013 (13M21D)

(六) 英藝幼稚園暨國際幼兒園 (九龍塘) - 普通話面試

呢間係家姐既囝讀緊，家姐評價都好好，只係學費好貴，所以收左都要諗諗！

係in既前一日，我唔見左張面試信，搵左好耐都搵唔到 (但係2日前俾我搵番出來！)，唯有第二朝早上打去，好彩佢地俾左個編號我，唔係連in都無得in ~~~~

今次好特別，同埋阿妹既囡囡一齊in，仲係同一時間，所以約埋一齊去！

去到已見到好長既龍，我都唔明點解唔俾入定去先，仲要俾太陽哂住，大人就話可以，但bb咁細，咁哂住就唔係太好啦~~~~~

由HD陪同，好彩係HD去咋 (我唔識講普通話，但係EK睇，睇下你既彩數，因為有英文、普通話同廣東話，睇下你咁啱安排左邊個)，而阿囝OK，全部都做到哂！

面試內容：入錢落豬仔錢箱 (10多個，因南瓜仔唔夠高，HD有協助佢起身入)、彩虹圈、用刀切水果 (南瓜仔識得用刀切，但唔夠力切落去，所有 HD有 協助)、用搥仔扑木柱 

結果：offer

心儀既學校仲未 in ，佢地都係收左大B先，我好想南瓜仔讀全日制，因為細B出世後，我怕工人姐姐照顧唔到2個，我都知讀全日制好似好可憐咁，但都無法 ..........但最重要係有無全日制學校收佢！！