南瓜妹@K1大作戰 - 完結

有留意我既 blog  就知我係想入龍校 ......

唔好講之前要預備升小既野(如學術)，只係報講座、聽講座、填表格、交表格，已經夠煩 ...... 因為唔只報1間，若沒有任何backup，又沒有信心報既學校一定收，咁報10間8間係基本！！

到面試啦，現在有d學校面試要一面試2次，甚至3次。(若好彩 10 間都有入到首圍，咁可能要 in 20 次)

而面試高峰期係9-11月，可能這幾個月個個星期都去面試，真係唔好講玩 ><

曾經聽朋友分享，面試期間病就慘 ........ 我朋友要小朋友打抗生素針，仲要去面試 (真心覺得好恐佈，不是小朋友健康最重要嗎！？不過我又明既，放棄左就無機會 ..........)

呢d已經唔叫大壓力，最大壓力係等收信，日等夜等 ........有 offer 當然好，但若收 reject 信，做家長心情總會有失落！？

加上小朋友已經識得乜叫面試，佢地都會知自己做得好唔好，即使家長唔俾任何壓力，我都相信小朋友係 feel 到的。

所以可以的話，最好唔係參加呢場「戰爭」，當然入左龍幼，唔代表一定可以直升上小學，甚至中學，但總容易過去考小學。(當然有家長有另外睇法，無論點，大家都係為左小朋友好！)


講完一大輪，講正題吧 ~~~~~~

南瓜妹 in 左 6 間，幸運地有間 2 個 offers ^^

收到第1個 offer 時，我已經好滿意 ...... (南瓜妹面試表現一般！)

呢間係表姐讀緊，口啤好好，而且富人情味，係一間愛心學校。

收到呢個offer前既上午，正正交左讀緊間學校交留位費(咁啱當天帶南瓜妹返學，我諗住親手交埋，點知職員叫我放書包度，我就放在書包度！)

我心諗：「唉 ....... 今朝仲交左添！」

放工，我檢查南瓜妹書包時，發現老師無收到張支票喎！？？連個天都咁幫我，慳左$970！！


到收第2個offer ........

呢間入到既機會好微，但我有抱住一絲希望！！

臨收信前一個星期，我已經有點緊張 (hd 完全無囉，佢覺得我係傻傻地，點會入到喎)

到了收信日........

星期六早上，hd 帶了南瓜仔送興趣班，而我就負責帶南瓜妹上興趣班，我一落樓就去睇信箱，未派信 =.= (其實都知係未派)，之後就送南瓜妹去上堂，我就諗住回家等郵差 (係唔係有點傻！？)

點知一返到去，我已經見到信箱有信，緊張中！

一拆信，真。係。收。左。

我好難唔開心 ...........

第一時間打電話俾 hd，但佢無聽電話 ><

第二件事就係分享俾好友知，但我實在太開心，忍唔住係 fb 分享 (平時我唔會咁做)

hd 回電話俾我，但佢叫我：「你平常心啦.......有乜咁開心！？低調啲 ....... 有乜好慶祝！？」(刪下一大埋我唔想聽既說話，但明明佢最鐘意就係呢間！？)

不過我都好快平伏心情，之後就接番南瓜妹放興趣班！


之後好多朋友都恭喜我，而佢地都問我：「點解會入到！？有乜秘訣！？係唔係有 "關係"！？」

除左幸運，就係幸運，同埋幸運！！(南瓜妹既運氣真的不錯)

沒有任何秘訣，因為面試當日問既問題好簡單，基本上好多小朋友都識答，只係小朋友肯唔肯答。

而事前我沒有做任何「練習」(我學會平常心！)，只係同左南瓜妹講要做番好自己，要有禮貌。

我估........南瓜妹應該做到既野掛！？



有些朋友問我：「點解唔俾兩兄妹一齊同校讀書！？你咪好辛苦囉(指帶返放學、學校活動等)！」

理由好簡單，每個小朋友係獨立，我唔會因為就個大(哥哥)而放棄細(妹妹)，反之亦然，我會選擇適合佢地既學校，而唔係方便帶佢地返學同放學啦，而記住學校活動，呢樣野都唔太難，因為我記性好，乜都放哂入腦(加上有whatsapp，好多時其他家長會提醒)

咁做，係因為我可以帶南瓜兄妹上校巴，接南瓜妹落校巴(午膳時間接) ....... 但就接唔到南瓜仔，因為佢返全日，唯有叫公公幫忙。(若沒有人手幫忙，同一間學校就方便好多)

當然佢地既學校最好唔可以距離太遠啦，所以幫南瓜仔報直資或私小時，都會考慮埋地點。現在就要煩哥哥升小，希望南瓜仔有同樣既運氣！GOOD LUCK ~~~~~~~

南瓜妹@PN 運動日

24/03/2016 (3Y2D)

南瓜妹既運動日係下午，所以我只請下午假 (2個小朋友，多多假都唔夠用 ><)

由於撞正南瓜妹午睡時間，唯有一早就叫醒佢，之後安排11點食午餐，12點瞓 ........ 都唔知得唔得，早了咁多午睡，好彩 ---- 成功！！

一放工就飛奔回家，回家收拾好出街野 .........

呢個時候工人姐姐話要去買餸！？咁都 ok 既，但我唔明點解唔等埋我地出發先去！？

原本我諗住唔食野，但突然記得屋企有杯麵，就快快整黎食，前後只係用左6分鐘，真係不得不佩服自己！哈！哈！

食完，就要叫醒南瓜妹啦 ........

去到，真係人山人海，多人到呢 ~~~~~~

一入到去，職員就分開左我同南瓜妹，又要我除左南瓜妹外套 (但當天真幾大風)，而我係無心理準備分開 (事後南瓜妹同我講佢有喊，最後班主任安慰佢) ><

我就獨自係看台，呢個時候 hd 黎左，但 hd 只係睇左一陣就要走，南瓜妹見到無見到爸爸！！哈！哈！

個個家長都掛住睇自己小朋友，我都唔例外，好彩有霸左一個有利位置！哈！哈！

我仲可以同南瓜妹揮手添！！

佢地講完口號，再做埋早操就開始運動會 .......

雖然真係好多人，但攤位遊戲都唔叫排好耐隊，都可以接受！！

南瓜妹玩左4個攤位，但唔知點解撞唔到佢啲同學，反而撞到 bloggers 喎！！

玩玩下，南瓜妹就唔多想玩，我見時間又啱啱可以接南瓜仔落校巴，咁我就快快走人.......

但南瓜妹實在行得太慢，我唯有抱住南瓜妹 .........條路都幾長，但做阿媽就唔知點解有咁既力量！哈！哈！

去到時，已見到婆婆等緊南瓜仔，而婆婆見到我黎到，就返屋企先，而我就同南瓜妹一齊等南瓜仔！！

南瓜仔見到我兩個，佢開心到呢 ....... 不枉我跑得咁辛苦！！

難得咁高興，妹妹又咁早食午餐，就帶佢兩個一齊去食麥當奴！！

小朋友好簡單就已經好開心，但我呢個媽媽都好簡單，只要見小朋友開心，我就開心！！

南瓜仔@K2 GAMES DAY

22/03/2017 (4Y6M3D)

又係一年一度既 GAMES DAY ......

前2日已經收到班主任既電話，話如果天氣唔好就會取消.......

由於地點距離我屋企好遠，所以一早就要出發，當的士去的一半時，已收到班主任 whatsapp 話要取消！！

唉，唯有回家吧 .........

當然，南瓜仔好失望，落的士時已經眼有淚光，我就俾左 mega box 既 巨型充氣大型彈床佢睇，話同佢去玩，佢就立刻開心哂！(小朋友真簡單)

但，佢地係開 1點，咁早.......去邊！？

當然係送南瓜妹上校巴，當南瓜妹係升降機門口見到我同哥哥，佢不知幾開心！！

之後就去表弟家玩 (平時公公送完南瓜妹，就去照顧表弟)，不過佢地係分開左黎玩！哈！哈！

↑ 玩完就去 mega box ...........

時間仲好早，所以四周行下，去埋 宜家家居既兒童樂園「歡樂波波池」玩 (開10:30)，玩完就去食野！！

再行來行去，等到1點，終於有得玩啦 ~~~~~~

原本只可玩 5 分鐘，但由於無人排隊，所以南瓜仔玩左 15分鐘！！！

之後就回家，已南瓜仔亦係車上瞓左！！

好彩回到家佢仲瞓緊，咁我就可以休息一陣啦 ~~~~~~

去到 15:30，南瓜妹好醒目地黎揀我，妹妹見到我同哥哥，又係好開心 ！！

而我呢個媽咪難得放假，就帶佢兩個去商場行下！

咁就過左我1天既假期啦！

南瓜妹@36個月

21/03/2017 (36M)

不經不覺你已經3歲了！

媽咪遵守兩年前承諾，多左時間陪你， 陪你睇書(哥哥做功課中)、陪你出街玩(哥哥興趣班中)、陪你放學、送你回校(係學校活動，所以變左要陪你返學)，我好珍惜每次同你單獨相處既時間。

每天接你放學，拖住你暖暖的小手仔，分享校園生活俾我知 (雖然有d係亂講，但聽完覺得好好笑)，我一一放在心頭！！

學識扮唔開心 (跟足哥哥)，不過一俾我踢爆就傻笑，哈！哈！

雖然你身型矮小，但就算健健康康，這已令媽咪都好開心，健康是無價。

慶幸，你愛錫你的哥哥，校巴ee對我說：「每次送貼紙俾佢，佢都問可否送多一個俾哥哥！」，而南瓜妹又會待哥哥回家後，會送上貼紙俾佢！

你除左唔願行、唔肯食飯、食手指外，媽咪都好滿意你既成長發展(咁細個，有乜滿唔滿意呀！？)，妹妹呀！！若你改善埋，你真係無敵架，你要加油！！(我係唔係發夢中，哈！哈！)

每次聽到你既說話，都忍唔住笑 .......
去超巿買野，我：「我無錢買！？咁你有無錢！？」
妹妹：「我大個出黎做野就有錢架！」
我：「咁你大個先買！」
真係俾你笑死我！！

食
南瓜妹，你幾時先會愛上食呢！？

瞓
午睡：13:30 - 15:30
晚上： 21:30 - 07:15

緊排要我陪瞓，但你只係床上碌來碌去，你想點！？><
 
發展 
- 識中文字真係好叻，只係教左一次就記得哂！！
- 鐘意做功課(只係一D好簡單既練習)，但每次都係臨瞓前話要做 ....... 其實只係佢唔想瞓覺囉！！ 
- 識得串自己英文名(有次我無意中發現 ........ 點解佢識串！？我都唔知，不過你既英名文又真係好簡單)


返學

觀課日 (07/03/2017)：

當天，我帶南瓜妹搭港鐵回校(之前我每次帶都係搭的士)，足足用左40分鐘時間 (搭校巴只係15分鐘)，不過南瓜妹好叻，全程都係自己行 (若你個小朋友成日叫你抱，今次肯自己行，你就會明白有多開心) .........

最攪笑係南瓜妹無端端講學校運動會口號！？仲要講左 5-6次。當然我信係真，因為無可能佢自己作出來 ...... 之後見到佢地做完早操(南瓜妹無乜做早操，仲由後面排行到前排，都唔知佢做乜 ><)後，學校仲教埋運動會口號喎！？？？？竟然南瓜妹講到9成出來，原來南瓜妹有專心聽書(事後老師話只係教左3-4日)

事前已經同南瓜妹講，要專心上堂，唔好偷望我 ......... 當然最後都有偷望我幾次，但都可接受。雖然佢上當有點呆，但都有舉手回答問題(等老師示意先回答，不會坐係位講答案，都叫大聲回答)，亦做足老師既指示，媽咪都好都滿意啦！！

仲攪笑係出去室內操場玩時，不斷同另一個同學一路玩、一路傻笑，我忍唔住問老師：「佢成日都咁傻笑！？」老師回答：「佢地平時唔係咁，可能因為今日你地係呢度啦！」玩既期間，南瓜妹跌左我前面，但我郁都無郁過，南瓜妹就自己起身，又自己走去玩 ....... 另一家長問我：「你都好忍得手喎！？(我諗佢係指我唔扶南瓜妹起身) 」我：「我平時都唔扶，由得佢 ......佢成日同阿哥屋企跌來跌，除非佢喊住要我抱，否則我都唔理佢！」

最後就後同校長傾下計，填問卷 .......

而我今次做左一個決定，就係等南瓜妹放學 ^^ (我從來無諗住接南瓜放學，因搭校巴 12:08 就到屋企樓下，如果我要搭港鐵回家，最快都要 40 分鐘，又未必有的士搭，無理由咁傻接佢放學架！？？不過，有心就一定諗到方法 --- 就係叫 hd 楂車黎接妹妹放學！哈！哈！)，就係咁 ...... 我就係學校入面呆等1小時。

南瓜妹見到我接放學一刻，開心到佢呢..........不過原來即使 hd 楂車，都唔夠搭校巴快 >< (校巴 11:50 開車，但接放學要 12:05 先接到)，下次都係搭校巴吧！！


故事媽媽 (17/03/2017)：

又係講故事 .......

之前已經同南瓜妹講，可否舉手答問題呀！？南瓜妹當然話會啦，結果.......

0 反應，唔單止南瓜妹無反應，連啲同學都無乜反應，可能我講既故事唔吸引，對他們來說又幾深 (呢本書係妹妹揀！)，所以我都有少少唔開心，早知揀幾二本書啦！！

期待下次再講！！

其他

-  17隻牙
-  24.2磅(11kg) 

↑ 南瓜妹3歲生日當天，我地沒有特別慶祝，只係買左個蛋糕俾佢！！

妹妹，媽咪祝你：
「身體健康！」
「有個快樂既童年！」


P.S：為左南瓜妹既私隱，寫埋今個月後就留待4歲先再寫啦.......

南瓜妹@預祝3歲生日會

原本諗住再下星期攪生日會，但咁啱撞到表哥第二日要考試，所以就提前一星期攪，最緊要係齊人嘛！！^^

今年生日同上年一樣 book 左會所攪，只係約左我邊既屋企人，簡簡單單就算！

南瓜妹揀左minnie做主題！！

不過都係做左個 minnie 既 banner、生日蛋糕、餐具、生日帽、生日衫 (我放工去買衫，點知 hd 講：「你去左邊！？咁遲先回家！？」，真係想 xyz 佢，我都係遲左45分鐘回家，駛唔駛咁呀！？？好彩南瓜妹見到件衫不知幾開心，我先無發火咋！)


12/03/2017 (2Y11M19D)

呢日忙到呢........

一早，就帶南瓜妹去學跳舞，跟住就去維園睇「香港花卉展覽 2017」(我反對，明明要攪生日會，仲要去睇........)

南瓜兄妹又大個左，上兩年黎只係影下相，今年已經開始留意四周，順便講下乜叫「春天」！！

睇完就去食飯，食完飯就回家了，呢兩隻小豬就係車上瞓埋.........

係車上瞓完，就回家一陣，咁就出發去會所攪生日會啦！！

慶幸，南瓜妹有一班表兄弟姐妹(小朋友同小朋友係件開心既事)，呢班小朋友只係會所到跑來跑去已經好開心，只係聲到佢地既笑聲，呢個媽咪都開心埋一份！！

跑來跑去後，就去左埋玩波波池！

攪掂哂所有食物後(所以食物都係自取，所以要等 hd 拎上來，慳錢啲嘛！ )

 ↑ 只係簡簡單單既 pizza、KFC、壽司，仲有公公整既大蝦沙律！！


↑ 食完飯後就係唱生日歌 .......

5個小朋友都無爭吹蠟燭喎，所以南瓜妹好順利自己吹 (最初仲諗住每人吹 1 支添)

最後一個「節目」，就係送禮物，呢個係個個小朋友都鐘意既「節目」(我地安排埋回禮禮物，大家一齊有禮物收，開心啲嘛！)

完哂，就 bye bye (其實都係7點多，無法啦........第二日個個小朋友都要返學)


↑ 今次既生日禮物以書為主，因為屋企既玩具真係太多(其實書都好多)，南瓜妹越大就越鐘意睇(講)書，南瓜妹真係拎住書黎講，當然唔係睇字讀，而係睇住圖畫自己作故事(我覺得南瓜妹幾叻，有咁高既創造力！)