親子好去處@【2018 復活節】香港單車館

05/04/2018 (5Y6M17D + 4Y15D)

今次就係約左南瓜妹既同學.......

目的地：香港單車館

陽光實左太好........

南瓜妹讀左大半年，我都係接過佢一次放學咁大把，所以無乜機會同其他家長傾下計，今次就有機會啦 ~~~~~

睇住南瓜兄妹既就由 hd 負責啦！！

我地每人就各有食物，而我呢個「懶」媽咪就揀左飲品，hd 話我超 hea ....... 我唔理啦，我最鐘意係簡單！哈！哈！

一玩就玩左 2.5小時，小朋友既電力真係好強勁！！

親子好去處@【2018 復活節】老鼠洲兒童遊樂場+屯門高爾夫球場+康樂體育中心+中山公園紅樓

02/04/2018 (5Y6M14D + 4Y12D)

睇黎 ...... 我返工先可休息！！

目的地：老鼠洲兒童遊樂場

hd 話呢度好出名喎！？

↑ 其實對於小朋友來說，什麼公園都好玩！哈！哈！


目的地：屯門高爾夫球場

食完午餐，就出發黎呢度玩！！


原本我地只 book 左一個場，後來有個叔叔話佢有事要走，仲有一小時既場仲未用，問我地要唔要，咁當然要啦 ....... 佢兩個可以一齊玩嘛！！

南瓜仔又打得幾好，南瓜妹就要再努力啦！！



目的地：康樂體育中心

玩完，再黎呢度 .........其實我已好累！！


目的地：中山公園紅樓


hd 堅持要黎！！

仲要搭一個站既輕鐵，我記憶之中南瓜妹好以未搭過 .........

去到，原來已經封左，無得入去睇 ><

最攪笑南瓜仔以為係公園(遊樂場)，黎到先知不是佢「心目中」既公園！哈！哈！

親子好去處@【2018 復活節】白鷺湖 + 中文大學

01/04/2018 (5Y6M13D + 4Y11D)

早上，我地就去感恩祭，食完午餐就出發.......

目的地：白鷺湖

水上單車，越來越少地方有得玩，今次就係白鷺湖 .......

呢個最好係水山單車有蓋，唔會太曬，正！！

↑ 地方好優美，仲有一個草地，啱哂小朋友玩！！

如果一班人黎，仲可以一齊 BBQ，收費好似$170 (成人價) .......

玩完又再中大食 tea！！


目的地：中文大學

hd 堅持要黎食下午茶！！

其實，我已攰到得半條人命 ~~~~~~~~

親子好去處@【2018 復活節】沙田馬場

31/03/2018 (5Y6M12D + 4Y10D)

目的地：沙田馬場(同心同步同樂日)

今次，係第二次黎，上次已經係兩年多既事.........

一早就黎到，玩到完場，又係一次體力既「大考驗」！！

我地去左室外先 ........

1. 馬匹護理示範

職員話南瓜仔係唯一一個睇足全程既小朋友，唔好講笑....... 係咁陽光普照、又無得坐、全程無哂人，我都想走人，但我又唔知點解南瓜仔又咁認真睇，最估唔到係職員送左個「馬甲」俾佢！！

2. 馬術越野賽特別示範

估唔到南瓜兄妹又有興趣睇

3. 復活蛋獵人

南瓜兄妹一齊搵金色復活蛋 ......

4. 彈彈馬兒賽

南瓜仔對腳唔夠長，所以跳得好慢.......... 職員叫左 n 次叫我地幫佢(可能太慢)，老公對職員講：「咁我抱佢過去咪得， 唔駛玩！」

職員好尷尬地走左！！

5. 氣墊動物園

早知，就玩室內 ...... 呢個又細又熱！！

6. 馬術盛裝舞步示範

南瓜兄妹都睇得好入神

7. 滾滾草地蛋

滾下滾下，咁就無左4張飛($10@1張飛)

8. 與雪特蘭小馬合照

一場黎到，無理由唔影相架！！


之後就食午餐，再戰室內！！

不過去到下午，人流就越來越多，所以排隊時間亦長左好多 ..........

1. 同做 DIY

南瓜仔：八大行星

南瓜妹：繽粉結他

2. 同慶復活節

- 飽飽復活兔，呢個足足排左45分鐘！
- 趕走食蛋獸

3. 同畫造型

南瓜妹：明明上幾個月唔鐘意(畫面，今次就堅持要畫，仲要畫完之後狂叫我影相，佢真係以為自己好靚！哈！哈！

南瓜仔：由卡通人像師畫南瓜仔，其實......都畫得唔太似！

4. 同心同拍太鼓樂

睇完表演後，仲可以試下玩太鼓添！！

5.氣墊動物園

南瓜兄妹已經夠高度，只係玩氣墊 ........ 玩左3個，每次2分鐘，咁就要 $180！！ 


由早上十點，玩到黃昏六點，南瓜兄妹攰唔攰！？我估佢地唔多攰囉，明明連午睡都無左，點解晚上都唔快點瞓著呢！？？

親子好去處@【2018 復活節】道風山基督教叢林 + 沙田公園

30/03/2018 (5Y6M11D + 4Y9D)

目的地：道風山基督教叢林

係耶穌受難既紀念日，我地就去左道風山(香港二級歷史建築)靜思 .......

兩個小朋友都係天主教學校，佢地兩個都一齊學「耶穌被釘在十字架上」！！

事前，hd 同我講只係行10分鐘，經過咁多次行山，我知道「佢既10分鐘」同「我既10分鐘」定義係不同，所以我好醒目地帶定帽、做好防曬/防蚊、著埋運動裝去......

天氣已熱，我都同南瓜兄妹著長衫、長褲，一來係防蚊、二來係防曬！！

南瓜妹，真係越來越叻，行上山已經無難道 .........

↑ 環境真的好清優，值得一去！

之後我地就落山去食 lunch，南瓜兄妹應該好肚餓，佢地食左好多野！！

目的地：沙田公園 + 龍華酒店

行完山，就算！？當然唔會啦 (我太了解 hd)

之後就去左沙田公園玩，南瓜妹就越來越大膽，同前一年真係差好遠........

玩完就龍華酒店食乳鴿 (靜靜話你地知，我係第一次黎咋！)

↑ 味道都不錯，但價錢略貴！！

親子好去處@【2018 農曆新年(初五至初十)】

20/02/2018 (初五) (5Y5M1D + 3Y4M30D)

是日，我就要返工啦！！

晚上就帶埋南瓜兄妹同我啲朋友仔食晚食！！

去左黃埔既「香港海賊王餐廳」，去到都唔駛等位就有得食 (食完呢次，不會有下一次，你地明啦！！)

 

21/02/2018 (初六) (5Y5M2D + 3Y5M)

hd 帶左南瓜兄妹行魔鬼山炮台。



兩位小朋友都好叻，自己行足全程 .......

特別係南瓜妹，佢真的大個女啦，唔駛再抱佢啦！！




22/02/2018 (初七) (5Y5M3D + 3Y5M1D)

約左朋友仔食晚飯！！

感謝友人們咁愛鍚南瓜兄妹，送上厚禮 ......... 其實大家聚下舊，下次希望係去你地既婚宴啦！！


23/02/2018 (初八) (5Y5M4D + 3Y5M2D)

hd 帶左南瓜兄妹去 Hong Kong Observation Wheel .......

無人去，所以可以包廂咁，只有佢地三個！！

之後就去左維港，鬥快搵南瓜.......結果南瓜仔勝出！

左去 Espuma QRE 食下午茶，終於可以食棉花糖啦 ~~~~~ 不過都沒有下次 (你地明啦！)

精力無限既三人，再去埋藍屋、玉虛宮、玩具街等 .......



24/02/2018 (初九) (5Y5M5D + 3Y5M3D)

主日學既新春團拜，因南瓜仔去上跆拳道，所以只帶了南瓜妹去 .......

雖然平時佢地兩個成日「互蝦」，但南瓜妹內心係愛鍚哥哥，妹妹叫我拎定啲食物俾哥哥，等哥哥學完跆拳道後有得食！！

南瓜妹仲中埋獎，真開心！！


25/02/2018 (初十) (5Y5M6D + 3Y5M4D)

堂區既新春團拜.......

除有有午餐外，仲有表演節目，而南瓜兄妹對神父跳舞留下心刻記憶！！

之後就去挑戰鴨仔山 (係我挑戰)，明明 hd 只話行 30 分鐘，但點解行咁耐仲未到！？

對於一個長期無運動既人黎講，真係  .........

hd 仲不停講：「妹妹仲叻過你.........」

親子好去處@南瓜妹第一次公開表演

11/02/2018(5Y4M23D + 3Y10M21D)

記得南瓜妹 PN 學校表演時，全班只得佢一個坐係地上，郁都無郁過，而且眼框內有仲淚水 ......

愉景新城 

今次，係第一次正式「公開」表演，但今次我對南瓜妹信心十足，點解！？因為當佢知道要表演時，係屋企跳次幾百次，無誇張 ........ 南瓜妹真係一日跳數十次！！

表演當天，見到南瓜妹台上「滿足」既笑容，就知道佢真係鐘意跳舞！！

當然順利跳足全程(雖然只得1分鐘)，我好私心地覺得佢係跳得最好。

我有無喊！？當然無喊啦 (有乜好喊！？哈！哈！)

原本我好擔心天氣會好凍，好彩是日天氣唔叫凍，而且係商場內，而佢地只係臨出場前先會除外套，所以都叫 ok


鯨魚花園

去到愉景新城，又點可以唔去出名既鯨魚公園呢！？正當南瓜妹入去預備時，我地就帶去南瓜仔去玩！！

雖然南瓜仔細細粒，但佢已經可以自己爬上去！！
 

親子好去處@2018明愛義賣樂繽FUN

27/01/2018(5Y4M8D + 3Y10M6D)

目的地：2018明愛義賣樂繽FUN (明愛專上學院 / 明愛白英奇專業學校)

是日，我要返工，所以由 hd 單拖帶小朋友去玩！！

估唔到入面有咁多野玩，仲嬴左好多獎品(每個攤位$10-$20)同買左好平既玩具($10-20)添，只係用左 $2xx！真係好抵玩呀，仲可以做慈善 (活動收益用作支持明愛服務及發展天主教大學之用)，真係好有意義！！

有乜玩！？遊戲攤位、DIY工作坊、美食攤位、兒童樂園、舞台表演及電視欣賞。


P.S：每次當我要返工，hd whatsapps 既相時，我內心都好欣賞 hd，一個願意單拖帶住兩個小朋友去玩、跟小朋友功課/溫書 (我無跟過！哈！哈！) 、半夜會去睇小朋友無有踢被(有著睡袋，但都有加張被俾佢地)，呢啲爸爸可以去邊度搵！！

南瓜兄妹，你長大後要好好愛錫你既爸爸呀！！

親子好去處@MTR Gallery + 空中花園公眾休憩公園

21/01/2018(5Y4M2D + 3Y10M)

目的地：MTR Gallery

睇到【漫柑遊】既blog，知道原來已經係好容易 book，我就快快手book去參觀！！

南瓜兄妹不是「港鐵迷」，但都book左去睇！！

要早 5分鐘係門口等 (佢地既入口都唔似入口，職員開門時，仲嚇了南瓜兄妹一跳添)

 雖然入面唔算大，有職員導賞講解(但南瓜兄妹應該唔係好明、模擬楂 MTR (用滑鼠)，都值得一去！！


目的地：空中花園公眾休憩公園

黎到香港站，當然是去下公園啦 ........

講好玩既好公園，除左寶康公園、坪石遊樂場外，呢個都係好吸引公園之一！

若不是新聞講，仲以為係私人住宅既公園，原來係公眾可以去玩既公園黎。

上次黎，已經係3年前了 ........


今次，南瓜仔已經向「高難度」挑戰，而南瓜妹仲係玩「低難度」，所以佢地各有各玩 ........

親子好去處@大拗門

14/01/2018(5Y3M26D + 3Y9M24D)

目的地：大拗門

天氣好，最好當然去郊遊，吸收下新鮮空氣啦！！(是日，我咳到半死！)


↑ 今次只係睇好多「風箏垃圾」， 原來係印度人社團既風箏節，破壞了環境 >< 我都唔明點解唔清走垃圾呢！？

另外就係見到大野豬 (真係有啲驚)！！！

除了踢波外，我仲第一次同南瓜兄妹玩「狐狸先生幾多點」，兩個小朋友爭住做「狐狸」，好攪笑 ..........

而見到南瓜妹已經不怕辛苦，自己行上山都覺長大了不少，見住南瓜兄妹行上山既背影，真係好大既感觸 (當然我沒有喊啦！)

親子好去處@香港歷史博物館 + 香港科學館

07/01/2018 (5Y3M19D + 3Y9M17D)

目的地： 香港歷史博物館

「綿瓦萬里 - 世界遺產絲綢之路」，你地覺得 3.5歲 同 5歲 既小朋友會識幾多呢！？

仲遇上 hd 大學同學(又係同一類人)，同學講：「呢度啱中一以上睇喎，最多咪小五、六！？」

我自己都笑了出來，咁都唔明白，佢目的係乜！？咪佢自己想睇囉！哈！哈！

不過，hd 都「捉住」一個小朋友黎講 (嗱，南瓜妹就醒，知道爸爸會抱住黎講，佢就叫爸爸陪佢，妹妹聽左幾多，我估 0 囉！哈！哈！)

睇完，就去埋隔離既香港科學館......


目的地：香港科學館

「生物多樣性展廳」，佢地明幾多我就唔知，但好明顯佢地好有興趣........

↑ 學習不一定係書本，佢地今次黎未必識到啲乜，但我相信到佢地再大一點，佢地會更明白！！

親子好去處@溜冰

03/01/2018 (5Y3M15D)

是日，妹妹已經要返學........hd 就帶南瓜仔去溜冰！！

我一直都無俾南瓜兄妹去玩溜冰，因為有朋友(小一)試過因溜冰而受傷，仲要傷得好嚴重，係要停學半年，之後可能對寫字 / 彈琴 等有深遠影響，仲要係右手！！

在我不知情下，hd 就左南瓜仔去玩！？？？(明明佢話唔好帶去玩)

hd話係單對單，而且早上人流亦好少，所以可以俾南瓜仔一試喎 =.="

↑ 我又不是好抗拒，只要係安全情況下都可以玩 (但我見唔到南瓜仔帶手套囉 >.< )

不過都去左玩了.........

南瓜仔又話幾好玩，不過我估下次都有排！哈！哈！

親子好去處@【2017 元旦】we 嘩！恐龍遊樂園 + 朗屏士多啤梨園

01/01/2018 (5Y3M13D + 3Y9M11D)

其實無諗過黎，但最後都黎左「we 嘩！恐龍遊樂園 」！！

目的地：青衣體育會足球場

買了套票 $180 有4遊戲 + 2個攤位！！

最少 90cm，南瓜妹又可以玩啦！哈！哈！

原本有個 100cm (充氣大恐龍) 南瓜仔可以玩，但南瓜仔話想陪妹妹一齊玩，所以就揀左個啱佢地兩個都玩到，又唔太「低能」既充氣遊戲！

之後南瓜仔「敵」不過電動車(兒童森林越野車)既吸引，放低左妹妹........

咁，妹妹再玩多個充氣遊戲啦！！

佢兩個仲俾小食吸引住 .....=.="


玩完，去左青衣城食午餐，再去朗屏士多啤梨園........

↑ 點知，無哂靚靚士多啤利=.=" (職員話要等多一個星期先可以摘)

山長水遠黎到，唯有食超甜粟米吧！
 

親子好去處@【2017 除夕】香港仔水塘

31/12/2017 (5Y3M12D + 3Y9M10D)

早上，照返聖堂 ......... 再食埋午餐就出發！！

目的地：香港仔水塘

↑ 是日天氣好好，所以好適合行山，而且呢度唔難行，理論上行30分鐘就到，雖然南瓜妹行得比較慢，仲要行百多級樓梯 (唔緊要，媽咪/爸爸/哥哥會陪住你 ^.^)

而南瓜仔呢！？又進步左，背住好重既背包(入面除玩具外，仲有支好重既水樽)，亦沒有叫我地幫手拎...........


行完就回程去婆婆家啦，有我最鐘意既打邊爐！！

↑ 除夕夜，南瓜仔仲睇埋煙花先瞓 (係屋企睇咋！)，而南瓜妹就早早就瞓了！！

親子好去處@【2017 聖誕】D2 PLACE + 龍蝦灣 + 玩轉極樂園

29/12/2017 (5Y3M10D + 3Y9M8D)

我要返工，就由 hd 帶兩隻南瓜仔去玩 ......

目的地：D2 PLACE

去睇 igloo，不過未去睇就知係假！哈！哈！


目的地：龍蝦灣

據 hd 所講，南瓜妺再無叫佢抱了，真的好開心 .........

呢度係我同 hd 拍拖時行過既山，可惜我無得去！！！


目的地：戲院 (玩轉極樂園)

hd 帶埋小朋友黎接我放工，一齊去睇戲！

睇frozen時，南瓜兄妹都無乜野，南瓜仔仲笑得好大聲添！！

但到睇「玩轉極樂園」既骷髏骨頭人時，南瓜妹就喊爆，為左唔好影響人，我就帶南瓜妹出去，安撫一輪後，買埋支檸檬茶俾佢，再入戲院......(其實我自己想睇，不過就去番原位，坐係門口位，萬一南瓜妹再喊，我可以立刻走人)

之後南瓜妹全程都係背住個螢幕，不過我就可以順利睇埋套戲！！

完場後，我問 hd ：「南瓜仔有無睇！？」

hd：「佢有睇，不過有時用手遮住對眼，但又係手指縫「偷睇」」！

事後，我再問南瓜仔，南瓜仔就話唔鐘意睇喎 .........

↑ 晚餐，就去食韓國燒烤.........我真食好耐啦！！

親子好去處@【2017 聖誕】聖誕親子活力派對 + 睇燈飾

26/12/2017 (5Y3M7D + 3Y9M5D)

今次係第一年黎，真係又幾好玩喎！

有免費既攤位遊戲，仲有禮物添 ...........

 ↑ 仲有神父唱歌，唔知點解南瓜兄妹咁鐘意呢位神父！？佢一唱歌，就走埋去！


↑ 玩完，就去食雪糕火鍋 ......

上年，南瓜仔無乜食，今年就不停咁食，不過點快，都唔夠大人快！哈！哈！



聖誕節，當然要去睇燈飾啦(雖然唔多靚)

↑ 去左食壽司，南瓜仔最愛，一人可食7-8件 (一個一向細食既小朋友)

對於燈飾，小朋友就無乜特別鐘意，不過就帶佢地感受下氣氛罷了！！

親子好去處@【2017 聖誕】2017 友邦歐陸嘉年華 + 聖誕派對

25/12/2017 (5Y3M6D + 3Y9M4D)

呢度已經係第4年黎，hd 不是太想黎，但我就堅持要去！哈！哈！

價錢都係大人 $130 (包10個代幣)，小童 $90 (包7個代幣)

南瓜妹又大個女，而且已夠 90cm，有部份機動遊戲已經可以自己玩，而南瓜妹又好大膽，玩既時候只係聽到佢既笑聲！！

↑ 南瓜仔又對妹妹好好，當玩完火車後，立刻去搵妹妹，仲幫妹妹開埋門 ，工作人員都大讚南瓜仔細心！！

南瓜妹同我一樣，都好鐘意食爆谷($30，都唔平)........ 仲要話全部都係佢，要佢分俾我食 =.="

佢地玩左幾個機動遊戲 (火車、mcqueen 車、碰碰車、直昇機)、仲有免費既 AIA REAL LIFE ZONE 扮去動物園。

玩完就走人啦！！


↑ 仲有時間行下 IFC！不過部份已經壞左了 =.="


玩完，就去婆婆家開聖誕派對........

我地今次無叫 pizza hut 啦，買了壽司 + 炒飯/麵，仲加埋婆婆整既小食！！

南瓜兄妹好好彩，有一大班表哥/表姐(妹)/表弟，見地佢地玩 ，就知道有同輩一齊玩，係一件好快樂既事！！

今次係就每人買自己小朋友份禮物 (咁就唔會唔啱心水)，繼續由 hd 扮聖誕老人，班小朋友一眼就知邊個扮，呃唔到佢地添！哈！哈！

親子好去處@【2017 聖誕】同學生日會 + 6299 聖誕派對

24/12/2017 (5Y3M5D + 3Y9M3D)

又係南瓜仔同學生日會，一年去左 n 個！哈！哈！

呢個生日會足足玩左4小時，只係有一個大型波波池，已經滿足一大班小朋友，真係超級放電！哈！哈！

 ↑連南瓜妹都玩得好開心！


玩完再去6299 家，仲有堂哥/姐、表姐(妹)，6個小朋友一齊玩，咩都玩一餐！哈！哈！

雖然佢地不是同年，最大已是小三，最細就係南瓜妹，但佢地一齊玩得好開心！！

不過最開心唔係班小朋友，係 6299 ..........


↑ 晚餐

我地今日再無每人買禮物一份禮物，變左一個小朋友買一份 (我絕對同意，小朋友太多禮物係唔會珍惜，但又想「應下節」)，之後就抽獎 ........

可惜，南瓜仔抽中一份「女仔禮物」，抽中後 ........ 眼中有淚水，我地都明白抽獎未必一定抽中心水，不過都要俾佢知道無野一定係「如意」，等佢自己慢慢接受一下！

而南瓜妹就抽中 frozen，佢當然好開心啦！！

抽完獎都十點了，所以就快快回家！！

親子好去處@【2017 聖誕】文化博物館 + 新城巿廣場

22/12/2017 (5Y3M3D + 3Y1D)

是日，我同 hd 都放早 (做冬)，所以就帶佢地出街玩！！

一早就想去睇 Sadness，南瓜妹至愛...........(我地估呢日唔會有咁多人)

南瓜妹一見到，就雙眼發光 (其實我唔明點解會鐘意！？)

↑ 去睇左「彼思動畫30年」，順道睇埋「國際海報展」！

再去埋新城巿廣場睇「粉紅夢樂園」，呢度又真係幾靚，仲有4個搖搖板俾小朋友玩，南瓜兄妹玩都唔捨得走添！！

之後就回家食晚飯啦！！

1220 結婚8周年

20/12/2017 (5Y3M1D) + (3Y8M30D)

不經不覺又一年了！！


↑ 多謝老公既花！！

1) 南瓜妹 - 學校聖誕派對 (不是親子，只係送係學校門口)

係我第一次送南瓜妹返學 (因學校提早要回校，校巴又未能配合)

一去到學校門口，南瓜妹就同佢既同學仔手拖手，就知道佢地係好朋友，希望佢地友情長存！！

亦慶幸遇上好班主任，因為南瓜妹有「恐懼聖誕老人症」(上年，pn 時見到聖誕老人後，當時只係等南瓜妹慢慢「淡化」，但事實上，係南瓜妹深處仲係恐懼)

所以我係三日前已同班主任講，但有經驗既班主任，叫我地不是「淡化」聖誕老人，而係令南瓜妹不再害怕，當然我地做家長要配合 .........

結果，南瓜妹不再害怕聖誕老人，感恩遇上一位有經驗既老師！

因，要送南瓜妹返學，當我送佢南瓜妹入門口後，我就立刻「飛」回公司，估唔到 ........ 我無遲到喎，做了阿媽，真係乜都做到！哈！哈！


2) 聖堂 - 聖誕派對

沒有特別慶祝，啱啱遇上聖堂攪既聖誕派對，所以就黎參加，對於我地來說，只要大家一齊，就已足夠，去邊度慶祝都是一樣的！！

 ↑ hd 就整左煙三文魚法包 ........ (好彩唔駛我整！哈！)

我地食完野，就係小朋友玩遊戲，仲有神父同小朋友一齊唱歌，估唔到 ....... 南瓜兄妹咁鐘意神父唱歌，仲做了小 fans 添！哈！哈！