南瓜妹@1歲生日會

21/03/2015 (12M)

呢個懶媽咪，沒有大攪，只係約左自己屋企人慶祝.......

↑ 「求其」既佈置，原本想買新 happy birthday banner，但四周圍都無(女仔款)，所以用番南瓜仔慶祝1歲既banner！><

其實話就話都南瓜妹慶祝，但我地就開餐，南瓜妹自己就係playmat度玩.......><

外賣：Carifornia Pizza Kitchen (小食 / 意粉 / 薄餅)、板長 (壽司)、鹵水鴨
工人姐姐：西蘭花炒蝦球
 
↑ 到食蛋糕啦.......當然唔少得唱生日歌啦，我地唱到一半時，南瓜妹好開心咁拍手掌，當唱完生日歌後，南瓜仔就不急及待吹蠟燭 (我一早同佢講係妹妹吹) ><

↑ 我安排左親子裝一齊影相，最攪笑係南瓜仔，佢話鐘意妹妹果件，唔鐘意自己果件........

我同佢講：「咁你下次著妹妹果件啦！」 (南瓜仔果件太大，妹妹果件先啱佢著)

禮物我係俾南瓜妹自己拆，不過南瓜妹係將的衫亂咁拋.........哈！哈！

↑ 南瓜妹收既禮物全部都係衫！！

唔駛著哥哥既二手衫啦 ~~~~~哈！哈！

南瓜妹@12個月

21/03/2015 (12M)

南瓜妹1歲啦 ~~~~~~ 

陪南瓜妹時間不多(相對南瓜仔)，但唔知係唔係「血濃於水」！？？但南瓜妹都好跟我，一見到我就想我抱，連平時照顧佢既公公抱佢都喊.......

妹妹，媽咪好錫你，我會再分配好時間，等我自己可以有多啲時間同你玩！！信我！

06:15  奶 (8安) 
07:00  小睡
09:00  遊戲時間 
10:30  薯蓉 / 蕃薯蓉
11:00  遊戲時間
12:00  小睡
14:00  水果糊仔
14:30  遊戲時間
16:00  小睡
18:30  粥
19:00  陪大人食飯
19:30  遊戲時間
20:00  洗白白
20:15  遊戲時間
21:45  奶 (8安)
22:15  瞓

食
食野都係咁上下，無佢法！

或者自己耐性已無咁多，1個係咁、2個又係咁 (半放棄)

大便
1 - 2 次。

瞓
晚上瞓得好好，半夜無乜喊。

但其餘時間就越瞓越少，工人姐姐氹唔掂佢瞓 (之前係自己自自然然瞓左)。

能力發展 
-   識得講 banana、食奶奶、哥哥(識講哥哥啦)！
-  由成人牽著手走路 (仲未識自己行路 ><)
-  識點頭/拎頭示意

其他
-  4隻牙(有2隻出緊黎)
-  17磅 (瘦B) 
-  勁鐘意食藥，俾慢啲都大叫.......

↑ 12個月！！

南瓜妹@321一歲生日會

15/03/2015 (11M22D)

目的地：Stage One ( 321一歲生日會)

今次既聚會約左好耐，我仲 book 左 2a1b1c .......

但我竟然忘記hd逢星期日既上午都唔得閒，hd話佢帶埋南瓜仔一齊出去，我就同南瓜妹去party先！

原本計劃都不錯，可惜早上南瓜仔有咳，我唔想帶去佢傳染俾其他小朋友，所以諗過放棄一家人唔去 party，不過hd話呢個係南瓜妹既生日party，無理由南瓜妹無得去........

所以最後決定等hd回家後，我先帶南瓜妹去 party！！

party 時間係11點至2點，但我出門口已是12點3 ........ 唯有打的去！

去到只係12點7左右，南瓜妹仲係的士上瞓了一會，义足電！！

是日服飾：動物服 (我太懶，無買衫，是但著件有動物樣既衫就算！)

↑ 雖然南瓜妹仲細，但佢全程都四圍爬，好開心！(南瓜妹仲未識自己行 ><)

有2個波波池連小型滑梯、細型彈床、車仔、馬仔等玩具.......

場地係包埋到會，但我抱住南瓜妹，只可食左幾粒魚蛋 ><


↑ 多謝各位媽咪搵贊助，同送奶粉俾南瓜妹！

更多謝各位媽咪搵場地、訂蛋糕、諗遊戲、預備禮物等等，我係一個「零」共獻既人！

2點就完，之後就回家，南瓜妹係車好快瞓左！！

呢個場地夠大，設施適合小朋友玩，到會食物質素不錯，職員好NICE，主動幫我手！(個人覺得呢個場適合0-2歲包場玩，因為3歲就鐘意玩大型既設施。)

Stage One
地址：深水埗海壇街235號豐盛大廈1樓A室
電話：6111 4447

南瓜仔、南瓜妹@拆利是

06/03/2015 (29M15D) + (11M13D)

過左十五，係拆利是時候.......

↑ 不過啲內面既錢，俾我前兩日已經拎哂出來，因為我唔想佢地整摷啲紙幣，咁明年就唔駛唱！^^

南瓜仔係出世後第1個新年就開左戶口，南瓜妹一樣有.....

我揀左大新銀行。點解揀大新！？因為公司同屋企附近都有呢間銀行，而且仲有張南瓜妹樣既存款卡(只可入錢)，戶口同樣都係我主理，南瓜妹係拎唔到錢！

↑ 南瓜妹戶口 (存摺簿、存款卡)

↑ 迎新禮品 - 餐盒 (啱哂南瓜仔！)

原本想揀多啦A夢，但就無存款簿 (我想KEEP住睇每一年入幾多錢)，只得銀行月結單(好容易唔見)，咁我又去到銀行，又帶哂所有文件，咁就用Thomas & Friends 啦！(雖然唔多襯女仔！><)

入錢：
- 南瓜仔(東亞銀行)：唔可以入支票/轉數，現金only，無「存錢機」，所以一定要排隊，仲要南瓜仔個戶口一年無郁過，銀行職員又要做一輪行政工作，最後用左30分鐘。(由2013開戶至今，只得$6.13既利息，低得可憐！！)

- 南瓜妹(大新銀行)：可入支票 (支票抬頭要用我既名)，所以唔駛排隊，直接入票箱，唯無得立即打簿。

P.S：我睇番打南瓜仔開戶口既BLOG， 我竟然天真都以為中一先知乜野係利是，呢排睇朋友既fb，係K2已經好清楚乜野係利是錢！！><

同場加映：

仲有，友人真的好客氣，除了送上利是外，仲送禮物給南瓜兄妹！謝謝呀 ~~~~

↑ 朋友送上的禮物

親子好去處@錦田鄉村俱樂部

01/03/2015 (29M10D) + (11M8D)

目的地：錦田鄉村俱樂部

本來係上個月約左表哥同表妹一齊去，但因某些原因去唔成，今次終於去得成啦！

原本仲怕天氣太濕或落雨，但天氣出其咁好，yeah！！

去到時已經差不多1點，所以醫左肚先，我地帶左小食同即場買左魚蛋、燒賣、牛肉球同豆腐花，之後就出發去玩！

↑ 餵羊仔/兔仔，南瓜仔唔敢餵羊，只敢餵兔仔，可能羊太大隻掛！？(飼料 $10/包)

↑ 摘士多啤利 ($100/磅 (韓國品種))

係南瓜仔摘士多啤利時，我就餵南瓜妹食baby food，咁就俾我撞到blogger Little K 媽，真有緣！！(Little K 真係好靚女)

↑ 雖然唔係好甜，但勝左自己摘！

之後就係玩機動遊戲.....

↑ 親子卡通車 ($50 雙人/ 圈) 

↑ 兒童車 ($30/10分鐘)

南瓜仔好鐘意玩車，仲話玩碰碰車，但我怕危險，無俾佢玩！

↑ 玩完就去草地玩踏單車(但未夠腳長，踏唔到 >< )、吹泡泡、跑來跑去！

南瓜仔係遠處見到有彈彈床玩，就話：「我要玩跳彈床！」

好啦，又俾佢同表哥一齊去玩！

↑ 兒童跳彈床  ($25/10分鐘)

呢度好"求其"，要入場玩就即入，有職員寫時間係label紙上，夠鐘就會叫停，原本話南瓜仔太細粒，但講講下又話俾，職員叫表哥睇住南瓜仔！(最後表哥係無睇過南瓜仔，自己玩！)

我問南瓜仔：「你鐘意玩車定跳彈床！？」

南瓜仔：「兩樣都鐘意！」

我相信都放哂南瓜仔既電 ........

時間差不多，我地就去母親大人屋企食晚飯，上到車，南瓜妹就瞓左，而南瓜仔仲好興奮唱歌，突然間，南瓜仔停左，唔夠3秒就合上眼，瞓左！！

http://yl.com.hk/ktcc/index.htm

親子好去處@2015 農曆新年 (初八至十)

新年，係約朋友食飯既日子......

26/02/2015 (29M7D) + (11M5D)- 初八

約了現任同事及舊同事食晚飯 (是拖友)，我一直以為係約今天(初八)，點知......

原來是約了初六 (24/2)，我這兩個朋友初六去到餐廳，話book左位，職員話book左26/2，唔係24/2，之後友人whatspps我，我才知道我記錯日子 (當然也book錯日子啦！)，真的萬分不好意思><

相約九龍灣既南小館，佢地食物質素都不錯喎！！

↑ 南瓜妹食得好開心.........

不過食完飯後，南瓜仔就四圍走，唔肯拖住或抱住，話要：「我要跑跑跑.......」，煩到死，我又話過佢、氹又氹過佢，都係唔聽！？我可以點呢！？？？

話時話，我好期待南瓜仔同南瓜妹做佢地既花仔花女！！

27/02/2015 (29M8D) + (11M6D)- 初九

又係了朋友食飯啦，今次地點係我朋友家 .......

↑ 玩畫板中！今次既朋友仔既小朋友同南瓜仔差不多年齡(最多差2年半)，所以都玩得幾投入！

不過南瓜仔玩玩下就講：「媽媽拖住！」之後就捉住我手指.......

南瓜妹呢！？全程都係笑笑口，但一俾其他人抱就喊！！

28/02/2015 (29M9D) + (11M7D) - 初十

又係約友人Mikiki 既 California Pizza Kitchen 食飯......

呢個係hd既現任同事，亦係hd既舊同學，而佢老公亦是hd既舊同學！

原本佢地既囡囡係大過南瓜妹，但南瓜妹趕住出世 (37W2D)，所以就變左姐姐.....

↑ 雖然係姐姐，但身型就係"妹妹型"，仲要高南瓜妹半個頭！

是日，南瓜仔全日係興奮，四周圍走，唔肯企定定，我要成日捉住佢，煩到死，邊有小朋友咁架！？？？><

親子好去處@2015 農曆新年 (初七) - 嘉道理農場 + 林村

25/02/2015 (29M6D) + (11M4D)- 初七

目的地：嘉道理農場

今日hd約埋表哥去一齊，兩個小朋友一齊去，玩得開心d嘛！！ (我同南瓜妹又無得去 ><)

佢地約左10點九龍塘港鐵站，之後一齊出發！

詳情我不太清楚，只知道佢地行錯路，差點行左去大帽山........


↑ 原本條路好容易行，但因為行錯路既關係，所以條路好不容易行，家姐話唔怕辛苦，係怕阿囝(表哥)碌落山，對於一個4歲半同2歲半既小朋友黎講，真係好大好大挑戰！(事後hd話呢條路係行山既3或4星)！
 
不過佢地最後都去到嘉道理農場睇野豬、貓頭鷹等！！

去完之後，佢地就去林村啦.......

目的地：林村

因為兩個地點好近，所以順便去埋！


↑ 去到當然睇許願樹啦！！

但呢兩個小朋友點夠力拋"寶碟"呢！？

hd 話南瓜仔玩得好開心，仲返到屋企成盒KFC磨菇飯食哂！！

而我呢！？我約了朋友去apm食晚飯，我就帶埋南瓜妹一齊去 (南瓜仔同hd仲未返到屋企，我亦相信佢地要好好休息！)

↑ 之前我book位問有無bb椅，佢地話用，去到先知係咕臣加高，完全唔啱南瓜妹坐，全程變左要手抱 ><
 
↑ Table 18 Bar & Restaurant ，食物質素不錯喎！

親子好去處@2015 農曆新年 (初五至初六) - 阿貓地攤

雖然我要返工，但hd就仲放緊假，直至放到南瓜仔返學！yeah ~~~~~

23/02/2015 (29M4D) + (11M2D)- 初五

約左表哥同表妹去我屋企 (三個都係學校假期中)，佢地食完飯就落街玩！！

↑ 玩具反斗城中.......

當我回家返屋企，南瓜仔分享左今日既事俾我知......

南瓜仔：「今日表妹跑跑跑跑，跌低左！」

我：「咁表妹有無拖住ee呀！？」

南瓜仔：「無呀！」

我：「咁你有無拖住爸爸！？」

南瓜仔笑住講：「無呀！」

南瓜仔：「表哥走，我喊！」

我：「咁你仲乜喊！？」

南瓜仔：「我唔捨得，表哥返屋企！」

我：「哦！咁我下次再約過表哥玩啦！」

我向hd求證，真有其事！！

24/02/2015 (29M5D) + (11M3D)- 初六

目的地：「阿貓地攤」Cats Cafe

啱啱落街，見到舞龍舞獅 (但南瓜仔同我講去左睇恐龍！哈！)，南瓜仔睇到入啱神，之後就出發去銅鑼灣！

↑ 南瓜仔同貓貓玩開開心心，但hd話佢全程都無掂過貓！！

hd 話呢間cafe幾好，不過我個人不太喜歡貓，所以我唔會主動帶南瓜仔去！

http://www.openrice.com/zh/hongkong/restaurant/sr1.htm?chain_id=10000178 

之後我就放工，約埋係港鐵站等就返屋企！

而呢個媽媽都好掛住佢地，係lunch time 時候去買野俾佢地......

↑ 聾貓衫 (黑：hd / 綠：我 / 白：南瓜仔 / 紅：南瓜妹)

原本我諗住買俾自己，但又俾我睇到有童裝，咁咪買埋俾南瓜仔，諗諗下不如買埋俾南瓜妹啦，佢地可以兄妹裝 ...... e！？咁爸爸呢！？咁不如買埋俾hd啦！！(我係唔會一家四口一齊著出街！)

親子好去處@2015 農曆新年 (初一至初四)

同上年一樣，有連續4日既紅日假期，但今次我無拎AL啦！(南瓜仔去K1面試、學校旅行/聖誕PARTY/GAMES DAY/家長日/頭一星期陪上學，而南瓜妹要去健康院/覆診等，真係多多假期都唔夠用！！)

19/02/2015 (29M) + (10M29D) - 初一

今日約埋表哥去太婆屋企(即我嫲嫲)拜年，南瓜仔怕羞又黎，唔肯講野，而南瓜妹仲樹熊上身，唔俾人抱。

↑ 南瓜仔與表哥

之後就上左家姐屋企拜年，再出街食飯(食齋)。

20/02/2015 (29M1D) + (10M30D) - 初二

回娘家食飯。


↑ 南瓜妹與表弟，表弟只得4個月，已經重過南瓜妹11個月 ><


↑ 永遠覺得屋企煮飯最啱自己口味！！

21/02/2015 (29M2D) + (11M) - 初三


↑ 一早就同南瓜妹慶祝11個月。(成日都要錫妹妹！)

↑ 晚上就約了我既舊同學出來食晚飯！

我地上左朋友屋企先，點知南瓜仔全程跟住我，去到出去食飯，就只係掛住同其他小朋友玩，理都唔理我！！

22/02/2015 (29M3D) + (11M1D)- 初四

由於姑仔一家去左旅行，所以初四先去6299家食午飯！

南瓜妹原本中午12點瞓，但去到3點仲未肯瞓，呢個時間又係南瓜仔午睡時間，南瓜妹終於上到巴士(去圓方)後就瞓左，但南瓜仔又唔肯瞓(車程太短，5分鐘左右)，但南瓜仔已經累到死，仲要嘈醒埋妹妹(只係瞓左30分鐘)..........攪左一大輪，佢先肯瞓！！

目的地：奧海城

等埋南瓜仔醒左，就去奧海城睇「功夫熊貓」，我地首先去左食晚飯，不過南瓜仔勁扭，唔肯落地行(可能係瞓唔夠)，最後話買蘋果汁俾佢飲，佢先正常番！！

食完飯，就去影「功夫熊貓」，可惜南瓜仔只係掛住跑，又唔肯影相.......


↑ 唯一企定定既相，南瓜仔不斷講：「我要煮飯！」

影完相就返屋企啦！！


↑ 「重見天日」既腳 (hd 成日話怕妹妹凍，成日包住佢對腳......)

我既一連四日假期咁就結束，但南瓜仔既學校假期仲未完結呢 ~~~~~~~

南瓜妹@11個月

21/02/2015 (11M)

是日年初三，仲有一個月就1歲日啦 ~~~~~~

06:15  奶 (8安) 
07:00  小睡
09:00  遊戲時間 
10:30  薯蓉 / 蕃薯蓉
11:00  遊戲時間
12:00  小睡
14:00  糊仔
14:30  遊戲時間
16:00  小睡
18:30  粥
19:00  陪大人食飯
19:30  遊戲時間
20:00  洗白白
20:15  遊戲時間
21:45  奶 (8安)
22:15  瞓

食
食粥要打到糊狀先肯食.......唉！

點解我既囝囡都係咁！？咁唔鐘意食野架！？？><

大便
1 - 2 次。

瞓
瞓得好好，半夜無乜喊。

能力發展 
-  識得講自己既乳名(單音)、APPLE (AR 浦)，唔識講哥哥！
-  由成人牽著手走路
-  會扶著傢俱從站立至坐下
-  能轉換姿勢，從坐著到爬行 
-  手多多，成日攪地櫃上既野 (南瓜仔叫佢唔攪，佢唔會攪)
-  惡到死，唔鐘意坐BB車，一坐就喊，要抱先停！><

其他
-  4隻牙  (有2隻出緊黎)
-  17磅 (瘦B)

↑ 11個月！！

原本有諗過訂番上次既蛋糕，但因屋企樓下又無聖安娜，又要早2日訂，所以都係放棄左……

南瓜仔話要買朱古力蛋糕，咁就成全佢啦！

南瓜妹@流感針(四價疫苗) - 第二針

18/02/2015 (10M28D)

年三十晚安排打針，我相信都無乜人........

因為上一支流感針打完(16/1/2015)，要1個月後先可再打第2支，但診所要去到2/3先開診，變相就要隔1個半月多，而呢支針又無乜負作用(即唔會發燒)，最重要係現在流感咁勁，都係早點打安全啲 ><

是日HD放假，所以由佢帶南瓜妹去！

結果，正如我所料，去到一個人都無，yeah！！

南瓜妹都係喊左幾聲就無喊，都幾叻女！

打完就快快回家了 ~~~~~~

親子好去處@行年宵+公園

14/02/2015 (28M26D + 10M24D)

目的地:年宵巿場+公園

食完午餐就去行年宵，不過南瓜仔係"零"興趣，一路行就話要去PEAK .......

↑ 由於我地係去屋企附近既年宵巿場比較細，而且又係下午，又啲舖頭仲未開，所以好快就行完。

當然，我地最後都完成南瓜仔心願去公園玩！！

↑ 現在已經唔會再「跟得媽媽」，但都會係附近睇實佢，怕佢唔知走左去邊！！

每次南瓜仔都玩都唔想走，但同佢講下次再玩，佢都會講：「bye bye！」(指公園)，唔會扭住唔走，都算幾乖。

↑ HD買了桃花 ($128)！

親子好去處@生日派對

08/02/2015 (28M20D + 10M18D)

我幾鐘意去小朋友既生日派對，一來可以同其他小朋友一齊玩，二來有人會安排定遊戲節目，GOOD！

由於咁啱撞正南瓜仔同南瓜妹午睡時間，最後遲左1小時先到！><

主人家安排左一些遊戲先，可惜佢兩個都唔識玩！(主角5歲，所以佢啲朋友都係咁上下年紀)


↑ 之後有魔術表演，南瓜仔睇得好入神，魔術師仲搵埋南瓜仔幫手做表演，傻傻既南瓜仔又唔怕醜，仲好啖定添，其中一PART有火，南瓜仔：「火燭呀！！」，佢仲好似好滿意自己既表演添！

不過由於HD有下半場，要同我一齊帶番南瓜仔/南瓜妹回家(我一個人帶2個小朋友回家確有危險)，唯有未睇完魔術表演就要走人！！(遲到仲要早走，差，都無法 >< )

而我本人係無意攪大型生日會(屋企人慶祝就算)，又要請人、又要諗遊戲、又要安排食物/場地，諗起都覺得不容易 (我絕對唔可以做攪手)。

若將來南瓜仔或南瓜妹真係想攪咁點！？到時先算，希望佢地唔鐘意啦！！><

親子好去處@友邦歐陸嘉年華

01/02/2015 (28M13D + 10M11D)

目的地：友邦歐陸嘉年華

上星期日係大爺媽既 fb 睇到有南瓜仔近排最愛既mater車 (不太鐘意mcqueen)，我就俾張相 (大爺係玩緊mcqueen，但都俾我見到佢身後既 mater) 南瓜仔睇：「想唔想玩mater呀！？你乖就帶你去玩！」，南瓜仔：「我乖！」

南瓜仔由星期一起身：「我要玩mater！」，佢係日日都講，仲要無時無刻都講，臨瞓前都講，講足6日！(以後 plan 定去邊度玩，都唔好咁早講 >< )

入場費係成人$125 (入場費$25，10個代幣，每個代幣 $10)，即係有20個代幣！(但唔知點解我有21個喎....)

估唔到估唔到 .......大部份機動遊戲要限制，高 (90cm) + 要4歲以上先可以玩 ( "+" 重點，但點解大家既小朋友都又可以玩呢！？為何南瓜仔就唔可以呢！？佢太矮！？但職員拒絕既原因係未到4歲！！謎？？？？)，所以南瓜仔想玩都玩唔到！><

首站，去玩mater車，當排到我地時，鬼佬同我地講一定要4歲先可以玩，連大人陪都唔得，南瓜仔當然唔開心，hd 同南瓜仔講遲d再來排過，等鬼佬走左先 .......

↑ 咁就帶南瓜子玩吹氣遊樂場(4個代幣)，最初都有點膽心，因為個吹氣滑梯都幾高，原來膽心都係多餘，佢不知玩得幾高興！！(此時南瓜妹已瞓左)

玩完之後，就去玩大人版旋轉木馬(5個代幣)，南瓜仔一上木馬就有點驚，話唔上去，但我話有我陪唔駛驚(我坐佢後面)，佢又無野喎！？？係玩緊期間，仲同爸爸揮手添 .....

見負責mater車既鬼佬走左，轉左鬼婆，我地又排過，結果都係唔俾玩！！ 南瓜仔聽到鬼婆話唔俾，佢想喊，企係度唔想走，當我地唔知點安慰南瓜仔時，南瓜仔突然講：「bye bye，mater！」(hd講，南瓜仔真生性！)，不過hd唔死心，再返去同鬼婆繼續講，鬼婆好好人，話俾南瓜仔上去影相，嘩！太好啦，玩唔到都影番張相啦 ~~~~~~

南瓜仔見到碰碰車，又話想玩，問過職員話唔俾南瓜仔玩，hd 問職員：「可唔可以影張相！」，職員又俾喎！哈！

↑ 再俾南瓜仔玩小童版旋轉木馬(4個代幣)，呢個唔駛我坐佢面，係隔離企就得！

到咖啡杯，竟然都唔俾玩，又係話要4歲，hd 又問職員：「可唔可以影張相！」，職員又俾喎！哈！哈！哈！

↑ 其實無乜可以俾南瓜仔玩，唯有俾波波池+彈床(4個代幣)，玩得好開心！(南瓜妹醒左啦！)

原本想玩燈塔滑梯，但要8 代幣(大人+小朋友)，太貴啦，放棄！！

仲有幾個代幣唔知點用，就俾南瓜仔打保齡同拋波 (亂咁用 ><) ......

玩玩下就玩左差不多4小時，之後就去6299大家食飯！！

P.S：之後南瓜仔再無講要玩mater ......

南瓜妹@再覆診

28/01/2015 (10M7D)

又到覆診時間，其實我都唔多想覆診 (最初係嘔奶，現在係唔食固體)，又要請假，而作用都不大，唉.......

今日公公陪埋我一齊去，今次我無行錯路啦，哈！！

南瓜妹好怕陌生，原來仲開開心心，一去到磅重同度高就狂喊 ，好不容易先完成......

體重：7.59kg(10%)
頭圍：45cm
身長：67.5cm
 
上次醫生叫我減奶，加多D固體俾佢食，我都有照做，不過南瓜妹對於食真係無乜興趣，我都無佢法！！

因為南瓜妹體重係keep住 10% 生長線，所以醫生建議，改2奶3固，要食2餐粥 (南瓜妹對粥係"零"興趣)，醫生話現在係「黃金時期」，若再俾糊的話，南瓜妹去到1歲後就仲難攪，仲唔食嘢......

0600  奶 (8安)
1030  粥
1400  糊仔
1830  粥
2130  奶 (8安)

我又問，點解南瓜妹高得咁慢！？醫生：「唔駛理，好多時度高都唔準！」

我：-_-  (心諗，咁即係點！？？雖然我都覺得唔多準)

點解佢兩個都咁似我咁鐘意食野架！？><

親子好去處@香港鐵路博物館 + 中文大學

每個星期天，因工人姐姐放假，而hd早上亦不在家(10:00 - 12:00)，只有我一個對住佢地2個，但為左佢地11點半前出街，就要早點準備 .....

我要係hd未出門口前，收拾好出街物品 (hd 就負責睇住佢地2個)，奶粉/尿片/水樽/乾糧/水果(洗埋)/餐具/外套/玩具/bb車/濕毛巾/外套等，仲有佢出街既衫，拾拾下就要成個鐘 ><

之後就要整糊仔，餵妹妹食糊仔(hd 出左門)，食完又要洗碗、收拾枱面，同佢地兩個換衫/換片，自己換衫，咁又個半鐘 .......

真的好佩服FTM，特別係無人幫手又要湊2個，佢地簡直係「超人」，雖然我好想日日照顧佢地，但日日如是，我想我會癲！哈！

25/01/2015 (28M6D) +(10M4D)

目的地：香港鐵路博物館

南瓜仔太愛車，就帶佢去鐵路博物館睇火車 ......

一早就同佢講：「我地去睇火車同路軌，好似thomas咁！」 (早上仲睇埋thomas卡通片，咁我先可以專心餵妹妹食糊仔)

南瓜仔一去到，已經飛奔去睇火車！！

↑ 咁走法，都幾難影！><

由於推住bb車不太方便上火車睇，hd 就睇住南瓜仔 .....

↑ 我就睇住南瓜妹，前幾次都影唔到相，今次就帶定星星餅同乳酪餅，結果 -- 成功！yeah！(唔係好靚，但起碼佢2個都影到正面！)

地址：大埔墟崇德道13號

http://www.heritagemuseum.gov.hk/zh_TW/web/hm/museums/railway.html


目的地：中文大學

本身係無計劃去，只係時間尚早，係近大埔，又係 hd 既母校，咁就去左啦 ~~~~~


↑ 此時南瓜妹就瞓左，所以我就帶南瓜仔去到魚池，南瓜仔就好開心咁睇魚，呢度好多家長帶埋小朋友黎，仲帶埋麵包、魚糧黎餵魚，而小朋友們都好樂意分享他們帶來既麵包、魚糧俾南瓜仔餵魚......

可惜南瓜仔好怕醜，唔肯講「多謝」，睇黎要帶佢出多D街先得！

南瓜仔一路餵魚，一路講：「魚魚，食包包呀！」

玩了一會，南瓜妹就醒左，就去行下草地、涼亭、紅葉，hd 又黎同佢2個影相，可惜星星餅同乳酪餅都失效 (可能食得太多 ><)！

影完相就去九龍塘食飯！！(六點前就去食飯，唔想等位！)

↑ 唔知係銷售手法定係佢地真係好可愛！？

售貨員總說:「好可愛。」(指南瓜仔或南瓜妹)，仲會主動送小禮物，如:公仔、貼紙、糖、汽球等(次次都係無買野)，今次行Burberry 就收到曲奇餅同汽球，行Ralph Lauren 就收果汁，行商場都有禮物收，真開心！！