2018 回顧 + 2018 重要生活點滴 + 2019 展望

2018 回顧 

睇番上年既展望…….

1) 全家人都身體健康

感恩，呢一年我地全家人都健健康康，我真係我最想既願望，無野比健康更重要。


2) 南瓜兄妹相親相愛

手足之情好重要，但無奈呢兩個小朋友好鬼煩，一時就「老友鬼鬼」、一時就「火星撞地球」。

南瓜仔返半天既日子，我就好頭痛，我就會收到 N 次電話，大家互相投訴，唔係唔想理佢地，但我返緊工，真係幫唔到太多 ...........


3) 可以買樓！！(呢個講左 n 咁多年 >.<)

都係仲未買到！哈！哈！
係香港生活真的不太易！！


2018 重要生活點滴

南瓜仔：

K3 生活完結了，做左小學雞，更加發現「大細B」既差距，不是指學術上，而係「自理能力」.......

老師既評語，就係佢太 BB，即係有些同學不用老師再提，佢地都會自動自覺做好，而南瓜仔仲要老師提，但呢樣真係不易幫他，唯有等佢自己慢慢長大，再不斷既提醒！！

學術上，中文對佢黎講真的不易，真係要再下功夫。

一直希望南瓜仔能夠入童軍，點知學校既童軍係不易入(要甄選！？)，南瓜仔又好好彩，俾佢入到，我地希望佢能學會「團結」既精神！！

我呢個媽媽成日化身做「家長義工」，只為了他們「想要」我做，我明白當佢再大一點時，未必想我再做「義工」。

每天，我都會送南瓜仔上校巴，其實每朝我都好想瞓，每天都問「幾時唔駛咁早起床？」，但我知道，總有一天，他會長大，不想我再送。

有天，我係街度同南瓜仔講：「媽咪想抱下你！」
南瓜仔：「媽咪，我好重喎！」(知自己超重)
我：「就係你越來越重，所以媽咪想再抱你，你再重啲，我真係抱唔起你！」
南瓜仔好開心俾我抱住！！
雖然抱得佢唔耐，但我真係好想抱住佢...........

南瓜仔對於自己身高有要求了，真係大個仔，知道自己個子矮小，所以佢好努力食飯、拉筋、跳高(無論佢點攰，臨瞓前一定會做，亦不會hea 做)，只係我地倆公婆基因太強，唯有靠佢自己後天努力！


南瓜妹：

學校評語都不錯，希望南瓜妹繼續KEEP住，最令我放心係佢願意分享學校既事情，做得不好地方會叫我地再教佢，呢一樣野哥哥從未做過！！

南瓜妹係讀 happy school ，所以都有「外補」幫下佢，但我地無「加強進補」，始於都係一個 K2 學生，我都係希望佢能快樂地學習！！(只望佢原校升上)

佢既小姐脾氣都係重點改善(好彩學校無)，懂得「做戲」 ........

南瓜妹亦好好彩，入到小蜜蜂，因為係由幾十人中抽20人，而南瓜妹又好幸運抽中！！
我都係希望佢學會「團結」，記住小蜜蜂既誓詞！！



2019 展望

1) 全家人都身體健康！ 

2) 南瓜兄妹相親相愛！

3) 南瓜妹能順利直升原校、南瓜仔能快快適應小學生活！

4) 南瓜仔能快高長大！

2018 母親節 @ 塔門

13/05/2018 (5Y7M24D + 4Y1M22D)

又到母親節啦！！

我地首先去左西貢松記食車仔麵，之後就搭巴士入黃石碼頭，再搭快艇入塔門 (南瓜兄妹太愛搭快艇，全程笑唔停)

明明又人同我講係「平路」，結果........ 當然唔係啦！><

今次唔同上幾次行山，因為天氣真的好熱、好熱、同好熱 (重要野，要講三次)，所以今次南瓜兄妹係有唔願意行 ><

「吓！仲未到！？」、「要行上山！？」(望住好高既山)、「又要去景點！？」、「我好熱」、「咁咪好攰？」、「出唒汗啦.........」

其實呢啲全部都係我心底話，我堅唔想行 ........ 但為左小朋友，我都要同佢地堅持，最後當然成功完成啦！！

↑ 環境真的好美，而且仲有好多牛 .......屎！=.="

用了 2 小時就行完，真係少啲體力都唔掂 ......

回程時，當然要飲凍冬飲品 同 食菠蘿冰啦！！


原本諗住 18:00 前可到商場，點知遇上塞車 ><，去到商場時已 18:10 ........餐廳都排哂長龍 ><


↑ 我地又好好彩，正想回家食飯時 (我真係唔會等1小時，我攰到想死)，啱啱行過酒樓，又咁啱有人取消 booking，我地唔駛等位啦，最重要係食物質素不錯！！

回到家，就食蛋糕 ........

 ↑ 母親節禮物，全部都同「花」有關！哈！哈！

南瓜妹@ MMRV

12/05/2018 (4Y1M21D)

我係一個「預防勝於治療」既人，所以知道麻疹爆發(日本及台灣)，而我地暑期會去旅行，所以決定帶南瓜妹去打針！！

南瓜仔係打 MMRV(自費)， 所以就打齊2針，唔駛打針！！

南瓜妹就跟健康院，只係打左1針 MMR + 水痘 (因上當年，因為南瓜仔打完 MMRV 發高燒，所以唔多想打 MMRV )，因第二針要小一先打，所以唯有自費去私家打 MMRV！！

上次南瓜妹打流感針喊到九彩，所以我都有定心理準備，點知 .......

南瓜妹喊都無喊，仲要個樣好似無野發生！？？？點解會咁！？真係唔痛！？

姑娘見南瓜妹咁勁，送了好多張貼紙俾佢！！ (之前有個小妹妹都見同一個醫生，只得2張貼紙，所以佢覺得自己好叻！哈！哈！)

事後我再問南瓜妹：「你好叻叻，真係唔痛！？」
南瓜妹：「一啲都唔痛！」
 

南瓜妹@戒除吮手指

真在太感動，南瓜妹終於「戒毒」(吮手指)成功！！

南瓜妹吮手指既習慣，應該係6個月後開始(南瓜妹出生就無用奶咀，而當時已經6個月，所以就無理，點知........)

當然係唔同時候都試過幫佢「戒毒」，但次次都唔成功.......

直至4歲後，南瓜妹吮手指越來越嚴重，但之前只係睡先吮，到後期就無時無刻都吮，hd 睇唔過眼，而且就黎放復活節假，決定「戒毒大行動」，再用「苦水」(寶寶手指水)！！


「戒毒」第一天 (27/03/2018)

一用，南瓜妹喊到死去活來 ......

晚上，更喊得更嚴重，因為無得吮手指瞓 ，可能喊得太攰，係喊聲中就瞓左 ......

去到第二朝，一早就喊醒，因為佢吮左手指，苦到佢喊鑤！！


「戒毒」第二至四天(28-30/2018)

南瓜妹主動俾我楂苦水！！

呢幾晚，都係喊到死，而南瓜妹仲同我講：「媽咪，我真係好想食手指 .......(喊)」

我只能安慰佢，拖住佢既手仔睡........直至佢瞓著！！

但到第二朝，佢又會喊醒，因為佢又吮手指！！


「戒毒」第五至六天(31/03 - 01/04/2018)

 晚上都係喊住瞓，但第二朝再無喊醒，即係成功在望！！


「戒毒」第七天 (02/04/2018)

自己楂苦水添！哈！哈！

這天，我知道已經成功！！！

 「戒毒」成功，送上佢最想要既禮物 ....... 指甲油！哈！哈！

南瓜兄妹@驗眼

11/04/2018 (5Y6M23D + 4Y21D)

因前幾天同南瓜妹去左健康院驗眼，但結果令我有點擔心，所以都係出去驗下眼 ......

當然，最出名當然係理大既驗眼，但係要排期(我想快點睇)，而我更唔想去到咁遠，最重要係我暫時未覺佢地眼睛有問題(否則應該帶佢地睇眼科醫生)，所以都係搵屋企附近！！

上網搵下資料，竟然搵到南瓜妹同學既相既網頁(Facebook)度！？？原來係南瓜妹同學既爸爸既朋友開  (係開眼鏡店，不過就有驗眼服務) ~~~~~

咁當然問下朋友服務好唔好啦 (其實唔好，我朋友都唔會去啦 ><)，最後就 book 左即日驗眼！！

因為上次南瓜仔驗眼已係年半前，所以都幫南瓜仔驗眼 (隨著南瓜仔越大，睇電子產品亦多左)，驗既過程都知南瓜仔對眼好好，佢差不多問到所有問題 .........

結果，當然眼睛正常，仲有50度遠視！！


到南瓜妹 ........ 南瓜妹既表現都好好，結果都係無事，對眼睛好健康！！

不過驗出來結果同健康院都有分別，健康院 (50度散光 / 150度遠視)，而今次 check 係 (0度散光 / 0度遠視)！？？點解會咁呢！？？

anyway，南瓜妹係 0度遠視，即係佢好容易會有近視，所以我都要好好保護佢既眼睛。

驗乜野！？

1.      屈光檢査

2.      斜視檢查

3.      色覺測試

4.      量度眼壓

5.      眼睛內外檢查

6.      眼底影像

7.      角膜矯形

驗眼：博視專業驗眼中心
費用：$180

南瓜妹@健康院(4歲驗眼)

09/04/2018 (4Y19D)

我 BOOK 左下午，咁就唔駛幫南瓜妹請假 .......

驗眼前就去度高、磅重 .......唉！！

高度：92.9cm
體重：13.5kg

唉.........欠 0.1cm，所以見完視光師就要見姑娘 ><


入到去，視光師就問下南瓜妹叫乜名、幾多歲，不過南瓜妹全程表現麻麻 ......

1) 問英文字母 (共4張，每張有4個英文字母)，首先南瓜仔戴上眼鏡，其中一隻眼用黑色鏡片遮住。南瓜仔驗完左眼就右眼，兩隻眼好順利地講到頭2張，第3張就讀唔到 ><

視光師解釋：第1張(英文字母最大隻)係小學用，睇到就合格；第2張係4歲用，睇到就合格(南瓜仔就合格)；第3張睇到就超額完成；而第4張(英文字母最細隻)係大人用，睇到先合格，所以南瓜妹都叫合格，但唔叫好好囉！

視光師仲話，第1張 (英文字母最大隻)，去到小一時，超過四成人睇唔到 ><

2) 關燈，用著一個七彩色既球 (好似 disco 咁)，一路叫南瓜仔講顏色，又用d 野同南瓜仔check 眼。

3) 用好似電筒既野 check 眼

最後視光師話南瓜仔對眼有125分 遠視、50度散光，無近視、無斜視、無色盲，唉 .......

有100度遠視(初生若有300度遠視)，視光師補充，若遠視用完就會變近視，所以要好好保護雙眼！

不過，我都係有點擔心，所以都係出去睇多次視光師，買做安心！！


驗完眼就去見姑娘 .......

姑娘話女孩子的話，南瓜妹係有 3% ，都叫合格，只係細粒少少！！

都係講要食多啲野，唔好迫佢，等佢自己食，其實道路我明，但做唔做到又係另一回事！唉 ........

親子好去處@【2018 復活節】香港單車館

05/04/2018 (5Y6M17D + 4Y15D)

今次就係約左南瓜妹既同學.......

目的地：香港單車館

陽光實左太好........

南瓜妹讀左大半年，我都係接過佢一次放學咁大把，所以無乜機會同其他家長傾下計，今次就有機會啦 ~~~~~

睇住南瓜兄妹既就由 hd 負責啦！！

我地每人就各有食物，而我呢個「懶」媽咪就揀左飲品，hd 話我超 hea ....... 我唔理啦，我最鐘意係簡單！哈！哈！

一玩就玩左 2.5小時，小朋友既電力真係好強勁！！

親子好去處@【2018 復活節】老鼠洲兒童遊樂場+屯門高爾夫球場+康樂體育中心+中山公園紅樓

02/04/2018 (5Y6M14D + 4Y12D)

睇黎 ...... 我返工先可休息！！

目的地：老鼠洲兒童遊樂場

hd 話呢度好出名喎！？

↑ 其實對於小朋友來說，什麼公園都好玩！哈！哈！


目的地：屯門高爾夫球場

食完午餐，就出發黎呢度玩！！


原本我地只 book 左一個場，後來有個叔叔話佢有事要走，仲有一小時既場仲未用，問我地要唔要，咁當然要啦 ....... 佢兩個可以一齊玩嘛！！

南瓜仔又打得幾好，南瓜妹就要再努力啦！！



目的地：康樂體育中心

玩完，再黎呢度 .........其實我已好累！！


目的地：中山公園紅樓


hd 堅持要黎！！

仲要搭一個站既輕鐵，我記憶之中南瓜妹好以未搭過 .........

去到，原來已經封左，無得入去睇 ><

最攪笑南瓜仔以為係公園(遊樂場)，黎到先知不是佢「心目中」既公園！哈！哈！

親子好去處@【2018 復活節】沙田馬場

31/03/2018 (5Y6M12D + 4Y10D)

目的地：沙田馬場(同心同步同樂日)

今次，係第二次黎，上次已經係兩年多既事.........

一早就黎到，玩到完場，又係一次體力既「大考驗」！！

我地去左室外先 ........

1. 馬匹護理示範

職員話南瓜仔係唯一一個睇足全程既小朋友，唔好講笑....... 係咁陽光普照、又無得坐、全程無哂人，我都想走人，但我又唔知點解南瓜仔又咁認真睇，最估唔到係職員送左個「馬甲」俾佢！！

2. 馬術越野賽特別示範

估唔到南瓜兄妹又有興趣睇

3. 復活蛋獵人

南瓜兄妹一齊搵金色復活蛋 ......

4. 彈彈馬兒賽

南瓜仔對腳唔夠長，所以跳得好慢.......... 職員叫左 n 次叫我地幫佢(可能太慢)，老公對職員講：「咁我抱佢過去咪得， 唔駛玩！」

職員好尷尬地走左！！

5. 氣墊動物園

早知，就玩室內 ...... 呢個又細又熱！！

6. 馬術盛裝舞步示範

南瓜兄妹都睇得好入神

7. 滾滾草地蛋

滾下滾下，咁就無左4張飛($10@1張飛)

8. 與雪特蘭小馬合照

一場黎到，無理由唔影相架！！


之後就食午餐，再戰室內！！

不過去到下午，人流就越來越多，所以排隊時間亦長左好多 ..........

1. 同做 DIY

南瓜仔：八大行星

南瓜妹：繽粉結他

2. 同慶復活節

- 飽飽復活兔，呢個足足排左45分鐘！
- 趕走食蛋獸

3. 同畫造型

南瓜妹：明明上幾個月唔鐘意(畫面，今次就堅持要畫，仲要畫完之後狂叫我影相，佢真係以為自己好靚！哈！哈！

南瓜仔：由卡通人像師畫南瓜仔，其實......都畫得唔太似！

4. 同心同拍太鼓樂

睇完表演後，仲可以試下玩太鼓添！！

5.氣墊動物園

南瓜兄妹已經夠高度，只係玩氣墊 ........ 玩左3個，每次2分鐘，咁就要 $180！！ 


由早上十點，玩到黃昏六點，南瓜兄妹攰唔攰！？我估佢地唔多攰囉，明明連午睡都無左，點解晚上都唔快點瞓著呢！？？

親子好去處@【2018 復活節】道風山基督教叢林 + 沙田公園

30/03/2018 (5Y6M11D + 4Y9D)

目的地：道風山基督教叢林

係耶穌受難既紀念日，我地就去左道風山(香港二級歷史建築)靜思 .......

兩個小朋友都係天主教學校，佢地兩個都一齊學「耶穌被釘在十字架上」！！

事前，hd 同我講只係行10分鐘，經過咁多次行山，我知道「佢既10分鐘」同「我既10分鐘」定義係不同，所以我好醒目地帶定帽、做好防曬/防蚊、著埋運動裝去......

天氣已熱，我都同南瓜兄妹著長衫、長褲，一來係防蚊、二來係防曬！！

南瓜妹，真係越來越叻，行上山已經無難道 .........

↑ 環境真的好清優，值得一去！

之後我地就落山去食 lunch，南瓜兄妹應該好肚餓，佢地食左好多野！！

目的地：沙田公園 + 龍華酒店

行完山，就算！？當然唔會啦 (我太了解 hd)

之後就去左沙田公園玩，南瓜妹就越來越大膽，同前一年真係差好遠........

玩完就龍華酒店食乳鴿 (靜靜話你地知，我係第一次黎咋！)

↑ 味道都不錯，但價錢略貴！！