南瓜仔@60個月 + 生日會

19/09/2017 (60M)

時間真係過得好快，南瓜仔5歲啦！！

升左 k3，變左大哥哥，生活上沒有太大分別。

↑ 都係同我屋企人攪小型生日會 (我唔太鐘意攪大型生日會)，簡簡單單就算係樓下會所攪！ (呢個媽咪真係好鬼懶！哈！哈！)


↑ 正日，就係屋企食生日蛋糕！


媽咪祝你「身體健康」、「快高長大」、「開開心心」 ，亦希望你入到一間適合你既小學！！

親子好去處@【2017 暑假】大樹先生

10/08/2017 (4Y10M22D + 3Y4M10D)

好多人已經「朝聖」左，都知道佢地收費貴、食物質素麻麻，但 hd 又 book 到 ........

唔...... 個波波池比我相像中細，不過對南瓜兄妹來說已經好好玩！！

兩個小朋友就好快投入波波池中 ........

玩玩下，南瓜妹就走出去玩「煮飯仔」，而南瓜仔當然係玩「車」啦！！

又偷入去「 0-24個月 遊戲區」，hd 話有職員叫走左1個三歲既小朋友  ....... 但無人叫走南瓜兄妹，可能佢地都係似 24個月以下 =="

對於「沙池」，佢地都無乜興趣，都玩唔夠 3分鐘就話唔玩！！

食午餐啦，有最低消費，而且佢地既食物都唔平，所以只係食2 個主餐都要 $400 ><

食完，兩位小朋友又去玩過。

去完呢一次，應該無下一次，不太值！哈！哈！

費用：$5xx (除左大人有最低消費外，仲要俾小朋友清潔費)

而我，又要返下午工 ......... 不過咁放法，就可以同南瓜兄妹玩多啲，所以我覺得呢個放假安排都不錯！哈！哈！

親子好去處@【2017 暑假】Ryze Hong Kong

09/08/2017 (4Y10M21D + 3Y4M19D)

我又係請半天假陪佢地玩！ yeah ~~~~~

兩個小朋友又係好期待.........

未入去，佢地已雙眼發光 ( hd 正左登記緊，話乜「生死狀」喎)！！

好彩佢地唔係太活躍，所以都安全既！！

妹妹，就好細膽，所以唔係好敢跳落海棉度！

哥哥，就越玩越大膽，所以時時刻刻都要睇實佢，始終都有危險性！

我個人覺得啲海棉好 dirty，所以都唔係好想小朋友玩 .........

玩完就去親子餐廳食野！！




↑ Butcher & Baker HK，有個小朋友免費任食甜品區(爆谷、軟雪糕、糖)，而且仲有個小型遊樂區添！！

食完午餐，我就要返工啦，而南瓜兄妹就回家午睡！

親子好去處@【2017 暑假】生日會 + 海港城

07/08/2017 (4Y10M16D + 3Y4M17D)

等了又等，終於到呢日啦！！

第一場

慶祝婆婆生日，南瓜兄妹整左條手鏈俾婆婆，佢地開頭好投入去做，但整整下就放棄，唯有我同hd整埋落去........

去左 Hyatt Regency Hong Kong 食午餐自助餐，南瓜兄妹最期待就係可以食糖，無錯，係食糖 =.="

揀呢間係六歲以下免費，啱哂我地家族有咁多小朋友！哈！哈！

隨著南瓜兄妹大個左，我同 hd 都可以輕鬆左，起碼都有足夠時間去拎食物，不過南瓜兄妹就不停要去拎食物囉 (都叫佢地拎多少少 ><)

食物質素麻麻，不過價錢都合理，都算值得既！


第二場

南瓜仔同學生日會，南瓜兄妹不知玩得幾開心，又估唔到連南瓜妹都好投入！

不過，正當我同妹妹去完洗手間回來，南瓜仔已抱住 hd，原來佢跌親 .......... 塊面瘀左！！

而南瓜仔仲話最開心係今日，因為可以同同學仔玩！！


第三場


↑ 海港城睇泡泡，話有成千萬既泡泡喎，無小朋友唔鐘意. ........

不過佢地已經玩左大半日，其實都無乜電，加上天氣真的好熱，好彩泡泡都吸引，所以都可以睇完先走人！！


一上車，兩個小朋友斷哂電！

親子好去處@【2017 暑假】J PLUS

02/08/2017 (4Y10M14D + 3Y4M12D)

係 J Plus (冒險樂園) 攪既 Misulo，呢個活動係約左南瓜妹既同學一齊去玩，點知活動前一天，南瓜妹發燒，所以就去唔到 ......

原本諗住俾左既試堂費會無左，點知佢地又俾補堂喎！？太好了 ........

慳住大假既我，就book 左 17:00，hd 就帶佢地去，我就放工飛奔過去！


頭活動30分鐘，只有南瓜兄妹玩(得佢兩個試堂)，大人就要出面等 .......

當我地入去時，南瓜兄妹既面已變成「花面貓」！！！

玩完，我地就出去玩下機動遊戲，一玩，就玩左2小時 ~~~~~~

親子好去處@【2017 暑假】智樂萬象館

02/08/2017 (4Y10M14D + 3Y4M12D)

由於我既大假唔太夠，但有想同小朋友去玩，所以我就請了上半天假 (因南瓜兄妹要午睡，所以佢地瞓緊時，我就返工，慳得就慳)

目的地： 智樂萬象館

南瓜仔一見到繩網就帶埋妹妹衝左上去玩，點知南瓜妹一上到去就喊，最後就由我抱住佢。

南瓜妹就去玩其他野，扮煮野食。

而南瓜仔繼續挑戰個繩網 ..........

過左不久，南瓜仔又叫妹妹玩繩網，妹妹又跟住佢，上到去，南瓜妹又喊過，南瓜仔：「唔駛驚，我拖住你，好好玩！」，就係咁，妹妹就愛上左玩，一玩就唔停！！(有個哥哥真係好！)

佢地玩左 n 咁多次，由跟住佢地玩，到我坐係地上睇住佢地玩！！(都幾爽！哈！)

玩左一輪，再玩其他野 ........ 如畫畫係牆上等！

由於我要返工，所以玩到 11點半左右就要走人！！

費用：$80 (一大一小，平日)

親子好去處@【2017 暑假】佐治五世公園 + 西寶城

【2017暑假】爸爸單拖系列：一

27/07/2017 (4Y10M8D + 3Y4M6D)

hd 自細玩到大，當然公園變化也很大，一場黎到公園，當然係要玩啦！！


山長水遠帶小朋友黎呢度，就係去西寶城睇《Paw Patrol》(南瓜仔俾同學"傳染)，但去到時原來係唔放開，要假日先開放 ><

hd 係一個好堅既人，一個男人帶住兩個小朋友，加埋2個小朋友「渴望既眼神」，我相信不得不溶化職員，職員最後俾小朋友係入面影下幾張相，真係多謝呢位職員，否則小朋友一定好失望！！

親子好去處@【2017 暑假】書展

24/07/2017 (4Y10M5D + 3Y4M3D)

一年一度既書展又黎啦！！

前幾年，hd 都會帶南瓜仔去書展，今年就帶埋南瓜妹，為左避開人潮，所以我就請左星期一假期。

我只是跟住hd行，我不知為何點解咁行去，總之最後係唔駛排隊就入到會場！！

我地只去了「兒童」部(三樓)，但已足夠行2-3小時！！

去書展買練習！？？？幼稚園喎，當然無去買啦！

但，的確有好多家長拎住10本、8本練習係手(聽聞書展係最齊練習) ........... 我不知南瓜兄妹升上小學後會否一樣，現階段不急就這樣做！！right！？

咁我地黎書展做乜！？？

↑ 我地並沒有買書，而係睇「玩」書展上既攤位 ^^

不過，我地都係玩，並沒有買到黎玩，因為真係幾貴，一幅港鐵棋要$298 ><

今年，大熱係《未來兒童》，係獲獎書雜誌 ......... 但 hd 話太深，不太適合南瓜仔，結果訂了《小行星》。

南瓜仔@K2完結

14/07/2016 (4Y9M25D)

K2 完結啦，沒有唔捨得，因為仲有一年讀嘛！哈！哈！

南瓜仔亦沒有任何不捨得，仲話自己升班，唔會掛住K2班主任..........

(隔離班既同學唔捨得老師，係堂上大喊........老師都喊左出黎，之後老師又同番個家長講，個家長又喊，係唔係我「冷血」呢！？)

同上年生活模式一樣，所以都無乜問題。

仲係幼稚園階段，所以一般情況下，一星期會去1-2次公園 .........假日都會有玩樂。

南瓜仔遇上一位好班主任，都係呢句「好老師比好學校更重要」，而好老師係可遇不可求。

老師有沒有將小朋友放係心上，作為家長會見到的。

只係講學期尾，學校已經沒有安排家長日，班主任係 whatsapp group (班主任連電話都俾埋我地) 主動同我地講，會打電話俾我地 (唔係俾張成績表我地就算)，告知小朋友學校生活上、成績上既問題或改善地方，作為家長真係暖在心頭。


學習方面：同上年一樣一年三次考試，只係多左一星期兩次默書。

曾聽閒 K2 課程會較深、多、教得快，而南瓜仔適應到(或都不是傳閒中咁深)，所以都無乜大問題，只係比K2用多左時間溫書/做功課。

考試成績理想，對我來說已超額完成，但我心明考試做得好，唔代表他聰明，只係佢有努力付出。

希望南瓜仔會升上K3後會學業會繼續進步，亦繼續開開心心！！


而最大挑戰就係考小一，都係要平常心，唔會俾太大壓力俾南瓜仔，始終都係一個未足5歲既小朋友，而且深明做細B係比較難考。

2017 父親節

18/06/2017 (4Y8M30D + 3Y2M28D)

今年父親節，我再無幫手俾「驚喜」！

 ↑ 佢地已經唔係BB，已經知道咩叫父親節，唔駛我呢個媽媽幫手，自己既事，自己做嘛，所以禮物都係用番學校做既手工！(其實講咁多野，都係我係懶！哈！哈！)

第一個節目就係去探 hd 朋友既bb，估唔到南瓜兄妹勁鐘意bb，佢地開心到呢........ (佢地幻想我會生多一個 >< )

玩下玩下，就三點多！！

回程返家時，兩隻小南瓜好快瞓左！


↑ 晚上，老公揀左太興食晚飯！？？？佢揀架，佢話佢想去食，咁係父親節，佢想食乜就食乜！！

出奇地，南瓜仔好鐘意食义燒飯喎，差不多全碟飯都食哂，好叻仔！！(若有厭食既小朋友媽咪會明白，佢地肯食，已係超額完成)

食完飯就回家啦！！

南瓜兄妹@【2017 端午節】

30/05/2017(4Y8M11D + 3Y2M9D)

近幾年，我地都去左游龍舟水，所以一早就約左表妹、表弟去 ........

點知前一日，南瓜妹發燒，已經諗住唔去！！

到端午當天，南瓜仔又發埋燒，所以邊度都唔駛去 ><


留在家中有乜做！？咪留係屋企睇龍舟比賽囉！

今年，兩個小朋友互動又多左，佢地一齊估邊隊WIN，又扮划龍舟，十分攪笑！

當然唔少得就係食粽啦，應節嘛！


由於食左藥，所以都有睡意，午睡就睡左2小時！(我都一齊瞓埋)


晚上，見佢兩個都退哂燒，所以到樓下食夜餐，行一陣超巿就回家 ~~~~~~~

南瓜仔@2017 Variety Show

前言：

係3月收到學校通告，問小朋友有沒有興趣個人表演或親子表演！？

親子表演就唔好啦 ><

南瓜仔已學琴1年多，而且從未試過參加任何個人表演，所以希望俾南瓜仔試下 .......

我地就問左鋼琴老師既意見後，就揀左2首歌！ 

4月頭，就係單對單表演俾校長睇，估唔到又入到圍喎！？(其實當時仲未好熟，仲要睇住譜)

之後既日子好忙(去左旅行嘛)，所以都係3-4日練習一次，係臨表演前兩星期就隔日練習，再去表練前一星期，就日日練習！


20/05/2017 (4Y8M1D + 3Y2M29D) 

最初，我諗住著埋班際表演服做個人表演，但原來表演服係泳衣，無理由著住泳衣彈琴架！？

再問班主任安排，原來有足夠時間俾南瓜仔換衫，咁就當然唔著表演服啦！

學校安排好好，安排左特別座俾表演者家長，等我地可以睇得清楚啲！

首先係單人表演，南瓜仔排第四個 ........

↑ 到南瓜仔表演，南瓜仔完全沒有怯場(個禮堂應該有300人以上)，當佢表演完後，我忍唔住上前攬住佢，仲同佢講：「你表演得好好！」

唔好講笑，我真係覺得佢表演得好出色(雖然彈錯了兩個音)，但他只是一個4歲多既小朋友，亦只係學了一年多，係一個陌生環境、自己一個人表演，己經係超額完成。

南瓜仔不是音樂天才，只係佢肯練習，這是他肯付出既成果，不得不令我感動........(做阿媽係咁！哈！哈！)

單人表演後，就係親子表演，再係班際表演。

班際表演己是第六次，所以已經無咁緊張，但都好期待！！

我好欣賞學校既安排，每年都有兩次係台上表演。


↑ 今次班際表演，又進步左，更投入(上次係 hea跳)，表演係「The Little Mermaid - Under the Sea」，扮潛水員！

做父母，只見小朋友有進步就已好滿足，對嗎！？？

最攪笑係南瓜妹：「我仲要睇哥哥表演！」(唔通哥哥成為佢偶像！？)

到最後就係全 K2 + K1(半級)，一齊出演唱歌，咁就完左啦！！


表演完哂，問南瓜仔想食乜午餐，南瓜仔：「麥當奴！」

見佢表演得咁好，就奬勵下佢啦！！

南瓜兄妹@賣旗

20/05/2017 (4Y8M1D + 3Y2M29D) 

南瓜妹學校安排幫「防止虐待兒童會」賣旗，咁有意義既活動，我地當然參加啦 ^^

因為10:30係南瓜仔學校表演，所以我地就晨咁早去賣旗 ........

早上，天氣麻麻，所以我都揀左屋苑樓下有瓦遮頭既地方賣旗！

南瓜妹：

一開始，南瓜妹死攬住啲貼紙(旗)，佢話係老師俾佢，全部貼紙都係佢 ><

好不容易從佢手中拎走一板旗，唔知咩原因，賣賣下南瓜妹又主動貼旗係買旗者身上！？

見到佢主動咁做，已經覺得好叻叻啦！

南瓜仔：

一開始，只係肯貼旗，但又唔知點解，賣賣下又主動叫人賣旗喎！？

南瓜仔：「點解佢地唔買旗！？」

呢個就係我想佢去賣旗既原因之一，呢個世界唔會所有人都會聽佢講野，有些人會扮見唔到佢地。

亦有好心人事，見到小朋友賣旗，會主動買旗。

2017 母親節

17/05/2017 (4Y8M28D + 3Y2M26D) 

又係一年一度既母親節......

小朋友學校當然又安排禮物俾我啦！

南瓜仔送上禮物：「媽咪，送俾你架！」

南瓜妹送上手鏈：「俾媽咪.....」，但隔左幾秒，南瓜妹：「條手鏈係我架，唔係俾你......」之後仲自己帶上自己手 =.=

另外，妹妹既畫班就教佢畫我！


正日，我既鼻敏感又發作，食了藥都係止唔到鼻水，仲攪到我好攰 ><

真心，我只想留在家中 ><

早上，係 hd 安排下，南瓜兄妹送了花俾我，哈！哈！

下午就去左元氣食火車壽司，不過當時既我已經得半條人命，最想係快快回家休息 ><

回家後，就瞓了兩小時 .......

可惜，我既鼻水都係唔停，原本想去婆婆家，最後都係沒有去，唔想傳染俾其他人！！


晚餐，我地只係18:15 到樓下用膳，已人山人海，好不容易搵到一間有位食飯，但咁容易搵位既餐廳，都唔估到唔好食 ><

算啦，好過要等幾小時位，有得食就算！！

回家後，都係快快休息，第二日都無返工 ><

親子遊世界@【2017 復活節】日本東京之旅 - day 7

19/04/2017 (4Y7M + 3Y29D)

最後一日，我地既旅程都係唔 hea！哈！哈！


↑ 今餐早餐可以坐定定咁食！！


皇居及二重橋

黎呢度，係落左車仲要行一大段路，雖然唔係夏天，但都幾曬 ........

↑ 南瓜仔已經行到全身都係汗 ><

都係無香港人，全部都係外國遊客，好明顯呢度唔係香港人會黎 ><


東京消防博物館

我深信無乜香港人會黎 =.=


↑ 黎係試下玩直升機，其實又乜好玩呢！？不過見到南瓜仔玩得開心，都叫值得！！

玩完就搭的士返酒店拎埋行李走人 .........



成田機場

要搭1小時火車，今次買左「指定座」，所以一定有位坐！！

兩隻小南瓜係火車上又瞓左啦！！

去到機場，我終於可以行街啦，雖然只得45分鐘，但好過無啦！！

價錢都無睇，因為點都要買手信，所以都唔理得咁多 ...........

而我都不忘買個手袋俾自己 (連藥房都無買野，買做袋可以令個人平衡啲)

估唔到去到機場係最燒錢！哈！哈！

係飛機上，南瓜仔全程都無瞓，係咁「煲卡通」，我都唔明，明明有人每天最多俾小朋友睇20分鐘卡通，為何係飛機上可以睇300分鐘呢！？？

我就同南瓜妹玩一陣，食埋飛機餐，就係瞓 zzzzzzz

大約瞓左1小時多，我就醒左，我就睇左一陣卡通，南瓜妹又醒埋，不過南瓜妹唔係鐘意睇卡通，攪到我都唔知同佢玩乜好！？好不容易先到香港 ........


香港機場

係香港等行李真係好慢，等呀等呀 ........

再搭的士回家，南瓜仔終於瞓左，而南瓜妹又話肚痛！？但問佢係唔係 poo poo又話唔係！？

回到家已是22:00，南瓜仔應該好攰，因為叫醒左佢沖涼、刷牙後，佢就好快就瞓左！

南瓜妹仲好精神，攪左佢 30分鐘先 ko 佢 ><

唔好以為我可以休息，我仲要執行李、分手信 (好彩啲衫係工人姐姐洗)，攪攪下已經零晨一點，第二日我仲要返工，我真係好攰呀！！

親子遊世界@【2017 復活節】日本東京之旅 - day 6

18/04/2017 (4Y6M30D + 3Y28D)

大人就 06:30 起床，小朋友就 07:00 起床 ......

hd 話 日本既disney land 同香港迪士尼差不多，所以佢揀左 disney sea！

估唔到早上好多人返工，我地要揀1小時火車，再轉另1架火車再搭1小時先到！

第一程無買「指定座」(即係自由座)，大獲啦，無位坐 ><

南瓜兄妹係車上已瞓左，好彩有個日本人女人叫我坐係座位既arm度 (我絕對明白，無理由叫人讓座，1小時喎)，搭左20分鐘，突然有個後生既日本人讓座俾我地，我真係萬分感謝他，我真的無力再抱住南瓜仔，我都好快咁多謝佢讓座俾我，原本hd叫我抱住南瓜仔一齊坐，但我話俾南瓜兄妹一齊座，咁我地四個就最舒服！(好彩南瓜兄妹都細粒，兩個坐一個位都叫ok)

過左呢程車，下程車就有位坐啦 ...........

呢日係最舒服既一日，因為得一個「景點」，而且我地仲租埋bb車俾佢兩個坐 (1000 yen 租)，所以這天.........真。舒。服。


tokyo disney sea

入場券係香港買定 ($1430，兩大一小)，因為怕去到要排隊.......但去到時，根本唔駛排隊買！哈！哈！

我地算好彩，是但唔係太多人，好多野都唔駛點排隊！YEAH ~~~~~

去左woody 拎 fastpass，嘩！我晨早九點幾拎，都拎到 16:55 ><

之後就出發去玩啦 ..........

↑ 玩左唔同既機動遊戲！

午餐：


↑ 佢地園內既食物都唔叫貴，食物味道又不錯！

食完午餐，係時候午睡，佢地瞓左 ........ 就係我行街既時候，雖然最後只得45分鐘，但我已足夠我去買手信！！

又去玩唔到機動遊戲！

南瓜仔要去玩過山車，但南瓜妹唔夠高，所以就陪佢玩轉轉杯，南瓜妹一路玩一路問：「我一陣再同哥哥玩！」，但阿女，你知唔知道你阿媽已經轉到想嘔呀！？？

唔好講笑，玩完我真係要休息一下！

hd 見到我時：「點解你口唇白哂！？」(當然啦，轉到暈嘛)

再同小朋友再玩過 ..........


晚餐：


↑ 都係園內食！！

食完就睇埋煙花，但當時南瓜妹已有睡意，我就推佢去商場，等佢快點瞓 .........

由於食完煙花好多人一齊走，我就係搭了一程火車後，係附近超巿行下，再搭火車返酒店。

都係叫南瓜仔唔好瞓，不停咁同佢傾計，好不容易先返到酒店！！

不過就係咁，佢地返到酒店後又好快咁瞓著！


我又要執行李啦，其實我日日都執行李， hd問：「點解你日日都執！？」

其實點解唔駛呢！？又要分開大人細路既 dirty，我又拎定明天既衫，又要諗下點先可以放多啲野係行李度，執下執下都要30分鐘！

親子遊世界@【2017 復活節】日本東京之旅 - day 5

17/04/2017 (4Y6M29D + 3Y27D)

大人就06:30 起床，小朋友就07:00 起床 ......

原本睇相撲，但最終無得睇，改左去去中央巿場！！


東京都中央巿場

晨咁早就黎，我真係好想試佢地既刺身，但無奈 ....... 拖住兩個小朋友係食唔到 ><

但就食左玉子，又真係幾好味！！

最好味係桃味雪糕，值得推介 ~~~~~~

當然不忘買下手信！(但其實啲野都幾重 ><)


淺草(著和服)

租和服係一早網上book(淺草愛和服)，我就無興趣著和服 (唔好問點解，我真係唔鐘意)

南瓜仔一早就話要著綠色既和服，可惜沒有佢既SIZE，唯有轉著藍色！！

南瓜妹就著粉紅 + 綠色，但呢套唔似傳統和服，傳統和服又係無南瓜妹既SIZE........

沿途，實在有太多人讚美南瓜兄妹，個個人都話佢地可愛，仲要同佢地影相添！哈！哈！

南瓜妹：「媽咪，點解你唔著和服！？」

我：「你有無見過有人著住和服抱小朋友！？」

南瓜妹：「係喎！」

我：「咁你駛唔駛我抱！？」

南瓜妹：「咁你唔好著 ..........」

我 =.=

我地行下淺草，影下相，就去食午餐、食雪糕！


午餐：

文子燒，我就唔多欣賞啦，但老公話要試下喎！！


最後去換和服啦，但最不幸既事發生 ><，就係我同南瓜妹去洗手間時，唔小心夾到佢手指，流哂血 ........

南瓜妹應該好痛、好痛、好痛，因為我話請佢食糖，佢都話唔食 ><

職員俾了膠布我地，但南瓜妹都係不停叫住好痛，啲眼淚未停過，內疚既媽咪：「對唔住，媽咪下次會小心啲，媽咪抱住你，你唔好喊啦！」(一個無力既媽媽就全程抱住佢，直至佢瞓著為止)


日本科學館

原本係係豐田megaweb，但去到時無開，老公就轉去科學館(都係佢做足功課，點解話轉就可以轉！？)


估唔到南瓜仔咁有興趣，特別係迪士尼美術展，雖然全部都係日本，但對南瓜仔來說，有公仔睇就得！！

再轉去下一站，因為落位微雨，所以就搭的士去 ~~~~~~


legoland

可能係平日，基本上無人，所以都唔駛點排隊玩！

我地首先聽3D電影(日文)，原本南瓜妹睇得開心，但睇睇下就驚，之後就係咁攬住我！！

再去上 workshop (教砌 lego)，但都係全程係日文，好彩有埋電視教點砌，唔係南瓜仔應該唔明佢做乜！！哈！哈！

之後又去玩，不幸既事又發生，就係南瓜仔玩玩就跌低左，個咀流血 ><

不過南瓜仔有得玩，好快就忘記痛楚，又好快投入去玩！！

今次就無買任何野，因為價錢同香港差不多，無謂拎餐死，對嗎！？


晚飯：

今餐係南瓜仔話要去食麥當奴 ........ ><


因為有車仔換，南瓜仔已經講左兩日，所以走唔甩！哈！哈！

仲俾我地見到有超巿，都係買左士多啤梨同蘋果汁俾小朋友！


走既時候已經落住雨，好彩我地一家四口都著住有帽既風褸 ~~~~

去到新宿，啲雨無停過，仲越落越大，但我不忘要買膠布俾南瓜妹，買唔到都唔知點算 ><

我用左1分鐘行藥房，就買左膠布就走人 (7日之旅，我只係行左1分鐘藥房，我諗我係唯一一個香港女人去行咁「長」時間)

返到酒店就快快同佢兩個沖涼，再同南瓜妹換膠布，見到南瓜妹既傷口，我肉都赤埋，都係我唔小心，先有咁既意外 ><

親子遊世界@【2017 復活節】日本東京之旅 - day 4

16/04/2017 (4Y6M28D + 3Y26D)

我想無乜人好似 hd 咁編行程，hd 覺得旅行就要認識下當地文化，所以行程唔似一般「親子遊」！哈！哈！

早上，都係去左便利店買早餐食 .........


明治神宮

黎呢度少啲腳力都唔得(南瓜仔已好叻，自己行足全程)，因為落左火車後要行一大段路先到(30分鐘以上)，沿路無香港人，反而外國人都多！！

 ↑ 呢度環境真係好優美。

行左入去，都要行番出黎，又係30分鐘 ><

又搭火車去下一個目的地............


上野動物園

我終於見到日本既小朋友，呢幾日我都無見過！！

見到有BB車租，就問南瓜妹要不要坐！？南瓜妹當然話好啦 ........

南瓜仔聽到，都話要坐，我都估到，所以我一早就決定唔帶 BB車，佢兩個都係爭住坐！！

有 BB車 ，大人細路都都舒服好多！！(起碼我背包可以放係BB車上)


↑ 我唔會推介俾朋友，可能係我地唔好彩，啲動物大全部都無出黎，但唔知佢地想點！？=.=

南瓜仔：「點解隻馬騮唔開心，係唔係啲香蕉俾烏鴉搶走左！？」

我心諗，當然啦 ....... 無自由嘛，所以我真心唔太鐘意動物園，更唔鐘意馬戲團。

其實仲有另一邊既動物園，但我地無去........因為呢一邊都令我地失望！


上野東照宮


↑ 呢度係路過，咁就影下相啦！


上野公園

離開左東照宮，hd 就抱住南瓜妹，而南瓜妹好快就瞓左，南瓜仔好明顯有睡意..........

但我見hd走既方向唔係火車站！？咁佢去邊呢！？我明明見到火車站，但點解hd 問警察路呢！？不過我都估佢係有另一個目的地 ><

hd 行行行 (真係行左好耐)，我就拖住南瓜仔係後面行，又要上幾十級樓梯，終於到啦 ........


↑ 嗱！我唔識佢，我都唔知係乜 ><

唔知大家明唔明白我既心情呢！？？？？？

離開之後就去搭火車 ...........

南瓜兄妹又係火車上瞓！！我就抱住南瓜妹，hd 就抱住南瓜仔 ........ 好不容易先有位坐><


sanrio puroland

南瓜妹至愛既 hello kitty，不過入場費都幾貴，兩大兩小過一萬 YEN ><


↑ 終於可以休息下 (我講緊我)，我地就食埋午餐，靚就好靚，南瓜仔仲揀左藍色咖喱添 ><，味道都不錯，價錢都不貴 .......

入面都好多人，個個都扮哂唔同既卡通人物，我本人就唔係好鐘意 ><


↑ 又玩下火車睇 sanrio 既公仔、睇表演、 入 hello kitty 館，仲見到「真 hello kitty」、買下手信，咁就好快就2小時，若係 sanrio fans 真係不能錯過！！

離開之後，hd 就要打電話去 book 睇相撲喎，佢就走左去商場打電話 (唔知點解我地手提打唔到！？)，我就同南瓜兄妹扭蛋！！


pokemon center mega tokyo

睇完南瓜妹至愛，點少得南瓜仔呢！？？

我係話反對去，但 hd 問南瓜仔去唔去，南瓜仔話要去，所以 hd 就決定黎，但黎呢度，真係可以用千辛萬苦來形容！！

兩個小朋友係火車度已瞓，我地仲要無坐位 ><

我地 19:31 落火車，由火車站去到目的地要行 8分鐘，但閉館係 20:00。

難題一：呢度老公未黎過，唔係火車站上蓋(就好似由灣仔港鐵站去合和中心) ，所以 hd 手拎電話睇地圖，另一路行一路要問人路。(怕行錯路)
難題二：南瓜兄妹都瞓左，我就要叫醒南瓜仔，因為我無法抱住南瓜妹行去目的地！

臨落火車時，我已叫醒南瓜仔，當然叫醒時有點不願意，但我同佢講：「你係唔係要去睇比卡超！？」南瓜仔就變得好精神，我就拖住南瓜仔急步行，期間南瓜仔有問：「仲有幾耐呀！？」

時間一分一秒咁過，已經係 19:42 ....... (其實我有擔心趕唔切)

終於到了目的地商場既樓下，目標在前，南瓜仔就好快好快咁行，見到啦！見到啦！


↑ 南瓜仔無比既高興，此時，抱住南瓜妹都醒左 (其實 hd 最辛苦，仲要抱住南瓜妹行，又要問路，有拎住個電話睇地圖)

睇到南瓜仔咁開心，咁辛苦黎都好值得！！

咁辛苦先黎到，點到買一大袋野啦，唔買都對唔住自己，係唔係！？

 P.S：要放棄其實係好容易，就係因為 hd 既堅持，仲有南瓜仔既努力 (佢唔肯行係去唔到)，最後終於黎到，南瓜仔去到既開心樣，永遠留我在心中 ......... 


晚飯


↑ 都係是但搵一個餐廳，其實我真係好累好餓，食物質素都不錯呀！！

食完之後，又經過超巿，又買下士多啤梨俾小朋友食！


回程時，千叮萬囑叫佢地唔係火車瞓，因為前幾日都係火車瞓左，返到酒店都好精神 .........

結果，今次沖完涼無耐，就好快瞓著，我又可以早點休息！哈！哈！

親子遊世界@【2017 復活節】日本東京之旅 - day 3

15/04/2017 (4Y6M27D + 3Y25D)

可以遲30分鐘！哈！哈！

大人就 06:30 起床，小朋友就 07:00 起床(都係同返時時差不多起床，只係佢地夜瞓左)

我地係便利站買左早餐，一路行一路食，係唔係好爭取時間呢！？

由新宿去富士急，大約2小時車程，兩個小朋友係又火車上補瞓！！


富士急樂園： thomas land

呢度天氣就比較新宿凍 .......

南瓜兄妹就買任玩套票，我都hd 只買入場費 (若要陪玩機動遊戲就要另加 200-300 yen 一次，hd 話咁係平啲喎，唔知係唔係真)，南瓜仔一見到 thomas 已經十分興奮！！


↑ 呢度真係好啱南瓜兄妹既年紀玩(我只係影左少少相 ，其餘都係hd 影，所以無相係手)，因南瓜兄妹未夠高 (要120cm)，所以要成人陪玩，而我 ....... 玩都想嘔 (我真係唔轉得！)，之後陪玩既重任都係交俾hd！！


富士急樂園：午餐


↑ 我地就係園入面食午餐，食物都係麻麻！！(而我只想瞓，所以想食野無乜興趣)

之後南瓜仔就話要玩摩天輪，因為我地無俾錢任玩，所以要另外付錢，都幾貴(唔記得幾錢了)，只係轉左一個圈，不過就望到富士山景囉！

之後搭火車去下一個景點啦！！


富士山河口湖：河口湖櫻花祭

搭完火車，再要轉巴士去！ 

上到巴士無位坐，好彩有個香港人讓座俾我，我就兩手抱住兩個小朋友(可想我既臂力有幾強勁)，因為佢地搭搭下巴士就瞓左！

落左車，佢地仲瞓緊，咁就去左附近餐廳休息下 ........


↑ 甜品都未黎，南瓜仔已經醒左，而南瓜妹就食食下先醒！！ 

呢個行程係老公主打，但可惜去到時櫻花未開，失望當然有 ........  但都無法，起碼都影到富士山！！(hd話，去東京無可能唔睇富士山)


↑見到富士山，當然又係影相啦！！ 
 

富士山河口湖：纜車

去到時都排長龍，好似排左30分鐘！！

兩個小朋友都乖乖等纜車 ......


↑我地上到去影左一陣相，就要搭纜車走人 ..........

兩個小朋友係火車又瞓了！！

其實我未上車前已經好想去 vee vee，但 hd 話要趕火車(只剩下5分鐘，否則就要等1小時)，咁都要上火車 .........

過左1小時後，我問hd幾時落車，佢話仲有1小時，天呀！我真係忍唔到咁耐，突然 hd 講 ：「火車上咪有洗手間囉！」

我就快快搵洗手間.......呢個人，咁遲先同我講！=.=


新宿：晚餐 - 機丸水產

返到新宿差不多 20:00，所以係時候食晚飯 ........



↑ hd 話好出名，嘩！真係幾好味喎，而且價錢仲唔貴添 (仲有一個炒飯俾南瓜兄妹食，無影相)

食完就返酒店，但都要 22:30！！

呢兩個小南瓜，係車瞓都太耐，夜晚又唔瞓 ......... 攪攪下又零晨，但我已經好攰啦！

親子遊世界@【2017 復活節】日本東京之旅 - day 2

14/04/2017 (4Y6M26D + 3Y24D)

大人就5:30 起床，小朋友就06:00 起床 ......

南瓜妹出世至今，未試過叫佢起身佢會喊，今次係第一次 ........ 好明顯係唔夠瞓 ><

同佢地換哂衫、刷牙、去埋洗手間就出發！！

去滑雪場大約要2小時車程，小朋友就可以火車上再瞓下，而我都一齊瞓著，hd 應該無瞓，因為佢叫我地起身！！


Gala 湯澤滑雪場

去到就要租雪鞋、手套、雪橇 (成個行程，我全部費用都唔知，我只係「鴨仔」)，之後就搭纜車上去滑雪 (其實係玩雪橇)！


↑兩個小朋友，一見到雪就笑了出來，兩兄妹仲自整雪球拋向 hd 同我，我已叮囑多次唔好拋向面，但呢兩個小朋友太高興，聽唔入耳 ><

玩雪橇啦 ~~~~ 滑落黎可能10秒，但行上去就唔係10秒，行左兩次我已經無力，唯有 hd 陪啦！！

最後又再玩雪、試下砌雪人，但砌唔到！哈！哈！

留左兩小時左右就走人啦！！(小朋友唔適合玩咁耐)

兩個小朋友係車度又瞓過，而我呢！？我都瞓埋！哈！哈！


大宮：大宮鐵道博物館


↑ 去到當然係楂火車，我就同南瓜妹一齊組，但南瓜妹玩玩下 stop 左個掣，我捉都捉唔切南瓜妹隻手，職員再咪叫唔可以停 ......都幾瘀下！哈！哈！

而南瓜仔呢？ hd 話全程都係南瓜仔自己玩，唔駛人幫 (我都係覺得4歲以上去旅行係最好！)

之後就食午餐，叫左兒童餐俾佢地食，主要係有架火車既餐具！

再去博物館睇下，不過對我來說都無乜特別，但南瓜兄妹就樂在其中，又上火車睇，又跑，又講：「哥哥，呢度呀，你快啲黎睇！」(其實有乜好睇呢！？)

食完就搭小火車，不過架車都幾細， hd 都坐得幾辛苦！哈！哈！

最後就去模擬火車，但就要排隊，南瓜妹就無興趣，四周圍行 ..... 咁就俾南瓜仔玩啦！！(我唔記得問南瓜仔玩成點添！)

走人啦，又搭火車，兩個小朋友又瞓過......


東京：增上寺


又見到櫻花，仲可以影埋東京鐵塔添！

hd 影完又影，再影，影到我都唔想再影，哈！哈！

(hd 講什麼什麼德川將軍家所，我無理佢 ...... 我都唔識佢，更無興趣！)


東京：東京鐵塔

hd 有佢獨立見解，就係去到東京鐵塔，無理由唔上去睇 ........ 地標嘛，無去過點叫做去過東京！？(即係日後問南瓜仔去左日本睇左乜，係想佢答得出東京鐵塔，唔係話去玩波波池)

↑ 上到去，真係無乜好睇，而且仲好多好多人添！

不過佢地可以由搭頂望落搭底(其實有好多塔都係咁睇)，而且黃昏景又真係幾靚既！！


晚餐：

係鐵塔內，是但揀左一間餐廳食，味道太差了，不提也吧！！><


郊區：放煙花

因為要放煙花(唔好問我點買，因為去到酒店時，職員俾左箱野 hd) ，所以要去效區先可以放 ><

黎呢度，真係山長水遠，搭完1小時火車仲要轉的士去！(hd 用佢有限既日文同司機對話，因為司機唔識講英文，我只係車上聽佢地有對話，但我唔知佢地講乜！？司機好似好迷網咁，都唔知明唔明我地想去邊！？唔理得咁多，總之最後都去到目的地！！)

南瓜妹就樹態上身，點都唔肯落地，我想玩都玩唔到 ><


南瓜仔呢！？可能佢怕俾人拉 ( hd 無拉拉講會有警察拉)，又或者怕火花，佢只係肯 hd 陪同下掂下支煙花，但要講：「我唔想玩啦，快啲走啦！」

我諗hd有點失望，咁辛苦先黎到，但兩個都好似唔想玩咁，哈！哈！

所以我地都係逗留左20分鐘意走人，之後就回酒店啦！！

返到酒店又23:00多，攪掂完兩個小朋友，佢地竟然唔瞓，攪到12點多先瞓，佢地既精力係唔係無限架！？