寄包裹/郵包往澳洲(物品)

講下我寄左乜去澳洲，我只寄過兩次 ..... 兩次都係揀香港郵政 (EMS)，點解揀佢地！？因為郵局近我！！

我係用香港郵政既紙盒，因為一定啱用，價錢唔貴，唯一唔好就係得指定郵局先有得買 =.=

郵用文具： https://www.hongkongpost.hk/tc/sending_mail/stationery/index.html

佢地有分萬用箱、便利箱、郵用紙匣等，問過職員，無乜大分別，只係 SIZE 唔同 (咁點解要用唔到名呢！？有人話用萬用箱寄係平啲........)。而我自己就係買左箱先，再買要寄既野，我甚至帶埋個箱去超巿買野！因為寄俾人，而且又要俾郵費，當然係放滿去啦！哈！哈！

個人意見，去開郵局買箱，順便拎埋 EMS Form，係屋企填定哂的資料先。

另外，去郵局寄件前，最好用膠紙封好郵包，原因：

-  郵局係不會提供膠紙 (買就$5 一卷)

-  郵局人山人海，要排隊你先可以買到膠紙，買完仲要企埋一邊封左箱先，後面啲人又等緊，不如搞掂哂先。

-  封好個底，開口位唔駛封咁多膠紙 (但都要封好)，因為海關都可能會開黎睇。

不可投寄的危險品：鋰電池、包有鋰電池產品、易燃液體、壓縮器 ( https://www.hongkongpost.hk/tc/sending_mail/no_posting_da/index.html )

這些產品連香港海關都過唔到，所以千萬唔好寄，一來根本寄唔到，二來寄已付出既郵費係唔會俾番你！

↑ 其次，記得要寫「內載物品詳情」，要寫清楚有乜，唔好簡簡單單寫 FOOD (網上啲人講，所以照跟，跟左無死！哈！)，但數量我就無填，所以可以不理。

第一次：

因為第一次寄，所以試下寄啲無咁貴重既野先。

↑ 其中一部份口罩 (澳洲都有得買口罩，只係啲款式無咁多，而且價錢比香港貴，我買埋聖誕口罩款，寄到去，應該啱啱好)  + 文具(只係覺得香港啲文具多啲款)

香港郵政職員話口罩無限寄幾多，不過我都係寄左少量，口罩都係不宜存放太耐。

不過要注意澳幣1000蚊以上係要打稅的。(網上睇，可以寄理啲收據，證明啲野既價錢，如果低過，就不會額外俾稅)

香港郵政：1.156kg，$312.00(每500g計)

13/11/2021 寄出，24/11/2021 收到

第二次：

就係寫錯地址既一次 >.<

上澳洲官方網站睇，有一堆野係唔可以寄，所以寄之前都做足功課，「懷疑」違禁品都唔敢寄 ( https://www.abf.gov.au/entering-and-leaving-australia/can-you-bring-it-in/overview )，所以都係買的大路野^^

↑ 海味，瑤柱、螺片 (記得要用英文寫清楚係乜東東，因為澳洲海關係唔識睇中文，否則佢地唔知係乜，有機會扣左你啲野，咪好慘........記得要密封裝，唔好買禮盒裝)、冬菇、淮山(如果包裝上有用英文寫係乜，就唔駛另外再寫)

我去安記買，啲職員會幫你即時封口，但又未去到真空。

↑ 零食一堆 (都係買啲熱浪、卡樂B、明治橡皮糖、金莎等零食，其實澳洲都有得買，哈！) +  即食麵(因為澳洲疫情爆緊，諗住如果不出街，都有啲食糧)

↑ 文具(純自己鐘意)

香港郵政：6.822kg，$1,064.00 (每500g計)

當然寄足500g就最好，但除非磅住咁買，否則都幾難控制到啱啱好。

20/12/2021 寄出，09/01/2022 收到 (如果寫錯地址，我估可能 31/12/2021 收到)

寄包裹/郵包往澳洲(寫錯地址)

好久好久沒有寫 BLOG 了.......

點解今次「突然」寫？因為我好想分享寄郵包去澳洲「低級錯誤」既事 -- 寫錯地址！！！

臨寄前，我已再三睇自己有無寫錯 (你無睇錯，我係有 CHECK，唔好問我點解，我都好想知 >.< )

我寫錯不是國家或城巿名，而係漏左街號.........(我上網見人寫錯國家)

我做錯既件事：

1. 沒有寫對方既電話號碼係郵包上 (我覺得係私穩，所以無寫)，原來寫了對方電話，澳洲郵政會打電話俾對方，再送俾佢地，所以呢個係十分重要！！

2. 應該揾人再對地址

我係用香港郵政 (EMS) 寄，聽聞 DHL 一定要寫對方電話先俾寄，但香港郵政無提我。

↑ 最最重要係 KEEP 好個編號，因為咁先可以追縱！

↑ 原本諗住可以新年前收到郵包，點知 31/12/2021 CHECK 香港郵政網- 郵件追查( https://webapp.hongkongpost.hk/tc/mail_tracking/index.html )寫住「未能成功派遞」 (送達處理中心 (目的地互換局))

↑ 大鑊了，寄唔到......再去澳洲郵政( https://auspost.com.au/ ) CHECK， 寫住「Incorrect address on item」

可以做就係快點補救，我真係唔想彈回郵件 >.<

我做了幾件事：

1. 立刻寫 email 俾澳洲郵政，寫了對方聯絡電話、對方正確地址和我既 email (怕會彈回港，希望截住)

2. Fax 文件俾香港郵政 (包括：填妥「Form - Pos 28B」、投寄證明書、收據 ) FAX : 2868 4723 

Pos 28B： https://www.hongkongpost.hk/tc/about_us/forms/pos_28b/index.html

 ***記得要 KEEP 好「投寄證明書」、收據 ***  (對方收到件先掉)

3. 電話俾香港郵政 (TEL：2921 2211) 再按 1 2 2 2  (用左15-20分鐘先有人接聽)

之後唯有「等」.......... (因為澳洲 1/1/2022 - 3/1/2022 都係紅日，應該無人辦工)

31/12/2021：做了 1,2,3

04/01/2022：再做 3，話已收到我的文件，再幫跟進

05/01/2022：收到香港郵政 EMAIL 話處理中 (*因係人為錯誤，不會作出任何承諾)

06/01/2022：收到澳洲郵政 EMAIL (一大篇文字，刪下幾百字係(一啲好無謂既開場白)，總之話係電子化，如有發現郵包，會幫我處理，但無承諾可以成功投寄)

07/01/2022：澳洲郵政網頁上，睇到幫我寄中

09/01/2022 ：對方終於收到郵包 (當天是星期日，點解澳洲郵政都工作！？)

我都好滿意今次安排，始終都係我做錯，佢地亦無另收我費用，而且仲星期日送埋件 (其實我都未明點解佢地星期日仲有派件，明明佢地係「慢活」既人......)

我最驚係彈回頭，一來要俾多次寄費，二來又要花多個多月先寄到俾對方，所以大家寄郵件時，記得CHECK 清楚地址 + 寫上對方電話號碼。

當然最好就定時去「追蹤」郵件，萬一有乜事，都可以補救！！

*下次再寫下寄左啲乜東東去澳洲

2019 回顧 + 2019 重要生活點滴 + 2020 展望

上一篇己是一年前了，這一年發生太多太多事，我相信是每個香港人都不能忘記既一年........

曾經不能睡著、曾經流過淚、曾經想過「呢度是否香港？」

去感恩祭、生日的願望，已不是為自己既親人 ，而是為整個社會！

呢一年，有太多太多野諗：
- 讀津校，慳番啲錢去外國讀書？
- 幾時送他們去外國讀書？小學？中學？兩兄妹一齊去？我是否一齊去？
- 哪一個國家？
- 使費多少？

但，我捨不得呢個土生土長既香港，放棄香港去另一個地方，真的不易 ><

2020 只有一個願望.........

2020 展望(願望)

世界和平 


2019 回顧 

睇番上年既展望…….

1) 全家人都身體健康！ 
感恩，呢一年全家人都健健康康。
我相信要有良好飲食習慣、早睡早起、運動等，都係好重要。

2) 南瓜兄妹相親相愛！
對住呢兩位小朋友，我已經不求「相親相愛」，只求「和平共處」，每當南瓜仔返半天的日子，我總會收到 1X- 2X 個電話 ...........

例如：
- 南瓜仔會話「點解妹妹無野要溫？我要溫書？」(現在是你考試，不是妹妹考試 =.=)
- 南瓜仔考完試，無功課，南瓜妹又會話：「點解我要做功課？哥哥又唔駛？唔平公？」(哥哥無功課，又關你乜事？你要做好你既功課)

我返緊工，你地有無諗下我架？？？？？

當然，他們也有「溫馨的時光」，他們會一起玩、互相幫助，只是時間太短了，可否長一點呀？

3) 南瓜妹能順利直升原校、南瓜仔能快快適應小學生活！
- 南瓜妹順利升原校啦！！！
感恩，不用「小一大作戰」，當初選擇龍校就只希望不用出「公海」，我只報了5 間學校，但是報了神校都沒有去，哈！哈！原因只係撞正南瓜妹上課的日子，而且我都相信去了只是「到此一遊」，不如返學吧！！

- 南瓜仔能快快適應小學生活
經過一年小一的生活，他已經習慣了，做「伴讀」既書僮都習慣了！哈！哈！

4) 南瓜仔能快高長大！
- 南瓜仔雖然仲係好細粒，但跟住生長線成長。醫生們都說要等到發育，才能迅速增高 .........= ="


2018 重要生活點滴

南瓜仔：

小二了，但他的樣子/高度，仲好似一個幼稚園生！哈！哈！

小二上學期成績已經知道，不過不失，我同 HD 都不是要求好高，只希望佢盡力去做，不論最後結果係點。

但南瓜仔對自己既成績「終於」緊張了，小一時他只說不考第尾就得。今年，佢會緊張自己既分數(但都係不是高要求)，見到他有緊張，我自己都好緊張，我不是緊張他的分數，而要緊張他的情緒。

我同佢講：「只要你盡了力就得，書你已溫了，結果已成事實，如果真係考得唔好，咪下次再努力過！」

升左小二後，8-9成功課都係學校做哂，手冊亦抄得好齊 (只係啲字醜樣左少少囉)，進步了！

功課方面，我亦有幫手，之前全部由 HD 負責，由小一下學期開始，我就「接管」部份，點解？因為一個人教，除左大人外，小朋友既壓力太大 .........分兩個人去教，對大人同小朋友都會舒服一點。(其實對住佢地溫書，真係好易「發火」)


南瓜妹：

感恩！感恩！感恩！

對於「小一大作戰」，我地既預備係 「零」，但我地就好重視幼稚園每件事，因我地目標只有一個，所以最重要係做好幼稚園既野。

但只有我有壓力，HD 仲同我講：「乜你對你既女無信心？我對佢好有信心喎！」，始於不是 100% 直升，我亦唔知小學部收生準則，個個小朋友都好好，從呢班小朋友揀 70+%出來喎？女人，就是多野諗 或是 男人，無危機感？

收到信既一刻，當然無幼稚園 K1 時咁激動，可能我在這幼稚園2年都付出不少，這只是努力的回報！！哈！哈！

仲有，妹妹俾我剪短她的長髮，其實我由 k2 已經叫佢剪短，但當時佢唔肯 .........但有天，突然話想做「小丸子」，我無立刻同佢剪，我俾時間佢諗清楚，最後佢堅決剪！！

點解要剪短？？我好記得我見身邊既親人/朋友，去到某一時間就會剪短頭髮，我唔明架！？點解唔俾留長髮？女仔不是長髮才靚？我唔怕煩，日日吹頭、朝朝紮辮架！

佢地回答：「俾頭髮休息」(意思係唔好長期紥辮)........現在我終於明了，咁就現在剪左先，去到小一時就長番，起碼俾頭髮「休息」半年。

南瓜妹可能係第二個，有得跟南瓜仔「學習」，所以對相比南瓜仔更早有自理能力。
1.  K2下學期已經學會自己沖澡、洗頭。
2.  自己做功課 (雖然是學校簡單既功課，但起碼不會要我回家先做)
3.  學會踏兩輪單車 (之前已踏平衡車)。


HD：

特別提一提佢，今年.........佢拎了一個奬，一個對佢工作認同既獎，拎呢個獎要曾過一輪面試、睇好多文件等等，當他們黎睇 HD 時，正正係我工人走左路既日子(我地每天都要買餸、煮飯、做家務)。

我都有問 HD：「你使唔使回公司打點下？」(明明呢幾日就黎(農曆新年期間)，佢仲留在家中照顧家中南瓜兄妹)， HD回答：「他們黎睇既野不是用 1-2個月去做，而係我呢幾年已做左既野，所有野已經一早預備好，我不用回公司再打點！」

所以 HD 對小朋友都是一樣，教育 ------ 是一條好漫長既路，現在南瓜兄妹只是起步，所以HD一向都不"催谷"他們，但是要為學習他們打好基礎。


我：

呢一年發生好多事，有兩個同事們分別患病，請了長期假，公司又無請人填空，啲工作唯有分係不同同事身上，工作上唔多唔少多左啲壓力。

最慘係年頭工人走路，呢100日都係家人幫手睇住小朋友，但家務(煮飯、洗碗、洗衫、晾衫、燙衫、掃地、抹地等等)，仲有南瓜兄妹功課，南瓜仔測驗/黙書，真係無時間做咁多野.........當小朋友瞓左，我才有時間做家務，呢100日都不易過。

之後新工人黎左，都係慘，她不回家瞓、遲回家、借錢、落街無鎖門、家務亂做............呢期時間正正啱啱開學，我真係人都癲。

不得不讚我地兩公婆，係咁亂既情況下，仲可以攪得掂南瓜兄妹既功課，真的好佩服自己！！哈！哈！

2018 回顧 + 2018 重要生活點滴 + 2019 展望

2018 回顧 

睇番上年既展望…….

1) 全家人都身體健康

感恩，呢一年我地全家人都健健康康，我真係我最想既願望，無野比健康更重要。


2) 南瓜兄妹相親相愛

手足之情好重要，但無奈呢兩個小朋友好鬼煩，一時就「老友鬼鬼」、一時就「火星撞地球」。

南瓜仔返半天既日子，我就好頭痛，我就會收到 N 次電話，大家互相投訴，唔係唔想理佢地，但我返緊工，真係幫唔到太多 ...........


3) 可以買樓！！(呢個講左 n 咁多年 >.<)

都係仲未買到！哈！哈！
係香港生活真的不太易！！


2018 重要生活點滴

南瓜仔：

K3 生活完結了，做左小學雞，更加發現「大細B」既差距，不是指學術上，而係「自理能力」.......

老師既評語，就係佢太 BB，即係有些同學不用老師再提，佢地都會自動自覺做好，而南瓜仔仲要老師提，但呢樣真係不易幫他，唯有等佢自己慢慢長大，再不斷既提醒！！

學術上，中文對佢黎講真的不易，真係要再下功夫。

一直希望南瓜仔能夠入童軍，點知學校既童軍係不易入(要甄選！？)，南瓜仔又好好彩，俾佢入到，我地希望佢能學會「團結」既精神！！

我呢個媽媽成日化身做「家長義工」，只為了他們「想要」我做，我明白當佢再大一點時，未必想我再做「義工」。

每天，我都會送南瓜仔上校巴，其實每朝我都好想瞓，每天都問「幾時唔駛咁早起床？」，但我知道，總有一天，他會長大，不想我再送。

有天，我係街度同南瓜仔講：「媽咪想抱下你！」
南瓜仔：「媽咪，我好重喎！」(知自己超重)
我：「就係你越來越重，所以媽咪想再抱你，你再重啲，我真係抱唔起你！」
南瓜仔好開心俾我抱住！！
雖然抱得佢唔耐，但我真係好想抱住佢...........

南瓜仔對於自己身高有要求了，真係大個仔，知道自己個子矮小，所以佢好努力食飯、拉筋、跳高(無論佢點攰，臨瞓前一定會做，亦不會hea 做)，只係我地倆公婆基因太強，唯有靠佢自己後天努力！


南瓜妹：

學校評語都不錯，希望南瓜妹繼續KEEP住，最令我放心係佢願意分享學校既事情，做得不好地方會叫我地再教佢，呢一樣野哥哥從未做過！！

南瓜妹係讀 happy school ，所以都有「外補」幫下佢，但我地無「加強進補」，始於都係一個 K2 學生，我都係希望佢能快樂地學習！！(只望佢原校升上)

佢既小姐脾氣都係重點改善(好彩學校無)，懂得「做戲」 ........

南瓜妹亦好好彩，入到小蜜蜂，因為係由幾十人中抽20人，而南瓜妹又好幸運抽中！！
我都係希望佢學會「團結」，記住小蜜蜂既誓詞！！



2019 展望

1) 全家人都身體健康！ 

2) 南瓜兄妹相親相愛！

3) 南瓜妹能順利直升原校、南瓜仔能快快適應小學生活！

4) 南瓜仔能快高長大！

南瓜仔@學生健康服務

19/12/2018(6Y3M)

學校安排左試後活動去(試後活動只返半天)。

咁我就請了全日假，去左學校接佢放學，南瓜仔超開心，因為有我接佢放學。

咁啱佢有個同學仔都係同一日、同一時段去做檢查，就約埋佢地(佢仲有個哥哥)一齊去！！

南瓜仔變左多啦A夢迷，所以襯平日無乜人去奧海城「多啦A夢秘密道具研究所」，就快快去影下相！！

南瓜仔見到多啦A夢，當然開心到不得了，平時不愛影相既佢，不斷叫我幫佢影相！！

影完相，食埋飯，就去做檢查！！


學生健康服務

是日無乜人，所以好快就安排驗眼、驗耳，原來南瓜仔對眼真係好好，咁細好細粒既字都睇得好清楚，當然最後全 PASS 啦！！

之後就見醫生 .........

身高：105.4cm
體重：20kg

南瓜仔又高得好慢，但醫生話佢高度有3%( 104.8cm 就合格)，醫生話唔同醫院把尺都有唔同(不能作準喎)，叫我唔好咁緊張，反而就係體重超標！！！！

我都覺南瓜仔有肉，只係無諗過佢會超標，醫生都話不是要佢減肥，但要注意不要食太多甜既食物，唔好只肥不高 =.=

我好想講，南瓜仔真係想高，所以先食多左飯，而佢日日都有屋企跳高、拉筋，亦每星期有游水、跆拳道！！