南瓜妹@PLAYGROUP (PG)

27/12/2014 (9M6D)

係唔係怪獸！？ 我俾南瓜妹返PG主要係想佢多D接觸其他小朋友，並非想「嬴在起跑線」，而且我希望做到公平原則，南瓜仔都係同期(9M10D)上PG，大家都一樣是最好！！^^

係南係妹出世後，我就報左3間 PG，可惜一直都無回覆，所以諗住1月係屋企樓下報PLAYGROUP算，點知係一星期前收到其中一間話有位，太好了！！

呢間PG係幼稚園上堂，不過係外判俾其他公司，未知兩者有無關係！？呢間PG係同事推介，話佢地教得幾得喎，所以咪試下囉！ ><

價錢 $2100，8堂，每堂45分鐘，逢星期六，1位家長陪同！ 

↑ 第1次去早了30分鐘到！(學校唔俾影相，只能係出面門口影)

由本地老師用全英文授教，每8堂的第1堂有禮物包，包音樂光碟、書仔及樂器仔，由美國公司開發。

南瓜妹反應都幾好，老師都讚佢乖，希望妹妹KEEP住啦 ~~~~

P.S：原本想報南瓜仔讀過既維多利亞幼兒園既PG，佢地既老師真係讀得好好，但可借佢地改左上課時間，1歲起就要一星期返2日(其中1日係平日)，除非俾工人姐姐或屋企人帶上PG，但由於路程唔近，所以唯有放棄讀啦。

南瓜妹@9個月

21/12/2014 (9M)

9個月啦.....

06:15  奶 (8安) 
07:00  小睡
09:00  遊戲時間 
10:30  糊仔
11:00  遊戲時間
12:00  小睡
14:00  奶 (6安) 
14:30  遊戲時間
16:00  小睡
18:30  糊仔 / 粥
19:00  陪大人食飯
19:30  遊戲時間
20:00  洗白白
20:15  遊戲時間
21:45  奶 (8安)
22:15  瞓

食
已轉了2固，食野仲衰過南瓜仔，之前都食下糊仔，現在連糊仔都唔鐘意食！唉！唉！唉！唉！唉！唉！

開始轉食1餐正常奶 (因之前嘔奶，係食特別配方奶)，如無意外，應該好快轉哂正常奶。

真係唔同哂，上當年南瓜仔每3日會試唔同既野，但南瓜妹就無啦，乜都俾佢試，仲無試3日添，真係一個懶媽媽！

大便
1 - 2 次。

瞓
瞓得好，只係試過有1-2日半夜喊。

能力發展 
-  能坐穩在地上，並自如地轉動身體，拾取兩旁的物件。
-  能轉換姿勢，從坐著到爬行或俯臥（即趴著） 。
-  會用雙手和膝蓋爬行。
-  扶著傢俱能站立良久。
-  會用食指按壓物件（如電話機上的按鈕等）。
-  會用姆指和食指指尖鉗取細小的物件。
-  會把物件從容器內拿出來或放進去。
-  會有意識地放下手中的物件。
-  在手勢或環境的提示下，會回應簡單的指示，例如：「請請」等。
-  會牙牙學語，發出一連串像說話的聲音，像「太空話」般，別人難以聽懂。
-  很容易便找到藏起來的玩具。
-  明白「不」的意思。
-  會用種種方式把玩物件，例如：搖動、大力敲打、投擲、扔掉等。
-  會用手拿食物放進嘴裡。
-  面對陌生人會害羞或焦慮，父母離開時會感到不安。

發展相對比南瓜仔慢，同期南瓜仔已經識得扶住行、由瞓轉坐/爬，但妹妹仲未得 .......

其他
- 2隻牙 
- 15.5磅 (瘦B)

 ↑ 9個月！！

1220 結婚5周年

20/12/2014 (27M1D)+(8M29D)

不經不覺咁就五年，時間真係過得很快......

由於天氣太凍，所以午睡完先出街 (其實係自己懶，天寒地凍，最好係 -- 瞓) ~~~~~

本來諗住去跑馬地馬會 (婚宴地點)，但佢地只做(馬會)會員同恆生白金咭既持咭者 (HD已12月頭申請，但要申請三個星期，最後都係趕唔切)，唯有下年啦......

↑ 咁就去左銅鑼灣， Amaroni's Little Italy 晚飯，勁唔抵食，要成 $13XX。

再同佢地去左皇室堡行陣街，咁就快快回家！！

↑ 多謝老公既禮物！！

↑ 最開心永遠都係有南瓜仔同南瓜妹陪住！

南瓜妹好奇怪，一出街就唔肯瞓，之後半夜就喊醒 (但已無乜瞓，應該好好瞓架！？)

南瓜仔@27個月

19/12/2014 (27M)
 
食
無改善，都係唔鐘意食，真攞命！

大/小便
戒片：同上個月差不多，都係每日 2-3次 vee vee，距離戒片仲有一段時間！哈！

瞓
夜上就10點前多數就會瞓著！

次次都係熄左燈就話去 vee vee！

發展
1) 說話：
- 成日問：「咩黎架！？」答完佢，佢又再問，我又再答！
由屋企出發去搭校車 .....(1) 指住聖誕花，問咩黎！？(2) 指住舖頭落左閘，有問咩黎！？ (3) 指住商場公仔 (我真係唔知乜公仔)， 又問咩黎！？(4) 指住泥頭車，又問咩黎！？

一日至少問20次「咩黎！？」，現在先係開始 ...... 有排答！！

- 識得正確用"你"字，英文未識用 "you"！

- 越來越多英文完齊句子對答！

2) 越來越曳
- 唔聽指令，叫佢唔好咁做，佢仲刻意做，之前就話出水痘，現在真係唔聽話 .......
- 唔肯行，若肯自己行就亂咁走！><

3) 大膽左
- 之前(1) 叫佢舉手叫埋單，舉完手唔敢講。 (2) 問佢要蘋果汁定橙汁，講左橙汁，之後服務員黎左又唔夠膽講。

今個月進步左， (1) 舉手叫服務生送個汽球俾佢，講：「我要波波，妹妹拎左我波波！唔該！」。(2) 同服務員：「唔該，我要士多啤梨蛋糕！)。(3) 買蛋糕仔俾佢，佢會同服務員講：「我要藍莓(味)！」(當然有我呢個翻譯員，但我係聽得明！)

- 搭完車會bye bye 司機 (無論係咩交通功具，連巴士咁遠司機位都要講bye bye)，搭完的士，講：「我要俾錢！」

- 但學校聖誕party唔肯表演，死都要拖位我 .......(有待進步)

4) 記憶力
- 問佢今日有無同 Jadis 同學玩 (班主任話佢成日同佢玩)，佢話：「Jadis 無返學！」，後來同家長證實，小朋友真係無返學。

- 沖涼時發現對腳損左，佢同我講：「係公園跌到！好痛！」

5) elmo
- 勁鐘意elmo，所以hd係淘寶買了好多碟俾佢睇，elmo world 既英文比較簡單，啱哂佢呢個年紀睇，不過始終係卡通片，都係少睇為妙！

返學
今日個有家長日，南瓜仔順利升番原校，老師評語：
- 最初只會聽老師指令，現已自動自覺做好，然後自己坐好
- 會同同學講野，但好少同老師傾計

其他
- 24磅
- 16隻牙(可能出緊牙，因為佢呢排成日放手指入口，但又大唔開佢既口睇！><)

南瓜仔@流感針(四價疫苗)

11/12/2014 (26M22D)

為怕南瓜仔病 (預防勝於治療)，所以同上年一樣打流感針 .......

揀左四價疫苗：包括甲型「加利福利亞型（H1N1）」、「德克薩斯型（H3N2）」、乙型「麻薩諸塞型」及乙型「布里斯班型」。

去私家打要帶齊：出世紙、幼稚園手冊，咁先有政府資助，每針資助$160！(我地都要俾$130，點解都咁貴！？)

因為南瓜仔只得26個月，所以只係打半支制量就得.......

不過等打針等了好耐，南瓜仔已經唔耐煩，所以一入去打針就狂喊，話：「我唔要打針！」

↑ 姑娘為怕有危險，所以有3個姑娘幫手，仲要HD 抱住南瓜仔，真係好誇張！(我就負責影相！哈！)

希望南瓜仔唔好病啦！！

南瓜妹@覆診

10/12/2014 (8M19D)

之前提過南瓜妹嘔奶，現在已經無哂呢個情況，諗住唔去覆診......

但南瓜妹唔肯食野， 食得幾啖就吐番出來，真係好苦腦 (南瓜仔又係咁，佢又係咁，佢仲嚴重過南瓜仔添！唉！)

所以都帶去睇下醫生......

體重：7.06kg (10%)
頭圍：43.5cm
身長：66.7cm
 
醫生既方法都係減奶，加多D固體俾佢食， 所以唯有改一改南瓜妹既餐單！

06:00  8安奶 (不變)
10:00  糊仔 (改 10:30)
14:00  8安奶 (轉6安奶)
18:00  糊仔/粥 (改18:30)
21:45  8安奶 (不變)

睇下改完會否好一點！唉！唉！唉！唉！唉！唉！唉！唉！唉！

↑ 等待睇醫生中！(帶定玩具俾佢玩！)

P.S：本來安排睇營養師，但我估佢講既野都係一樣，所以無去啦 ~~~~
 

2014 My Birthday (海洋公園)

07/12/2014 (26M18D)+(8M16D)

今年生日又去 海洋公園，1大2細都係免費嘛，而且又做埋港人8折優惠，只係 $256 (成人價)，一家四口去，勁抵！！

不過hd早上要返工，所以我一個人就推住南瓜妹，用hipseat抱住南瓜仔去公司附近等hd，咁就可以快點到香港公園！

會合左之後，我地買完少少食物，就係銅鑼灣搭的士，但去到已差不多2點了！！><

第1站：纜車 (14:00)

等了15分鐘就上到車，南瓜仔最初有點怕，要拖住我，之後就無咁怕，仲周圍望！

第2站：海洋劇場 (14:30)

上年去唔到，所以今年一定要去，而且我幾日前已經話帶南瓜仔去睇海豚，所以南瓜仔好期待！

15:30 先有得睇，但為左確保有好既位置同埋要南瓜妹要食奶/南瓜仔要午膳，所以一早就坐定定了！
 
首先係海獅表演，之後就係海豚表演，南瓜仔睇得好入神！！

第3站：海洋列車 (16:00)

行去時，南瓜仔本來有睡意，點知又唔係肯瞓喎 ........ (平時要午睡1-2小時)

南瓜妹平時 12:00 - 14:00 小睡，今日去到16:00 先瞓！！

第4站：威威天地 (16:15)

因為南瓜妹瞓左，所以無得玩，只有南瓜仔玩

- 砵砵火車頭，南瓜仔坐得好開心
- 幻彩旋轉馬，南瓜仔唔肯坐馬，話要係椅度......
                         
第5站：雀鳥劇場 (17:00)

南瓜妹仲未醒，又唔俾推車入去，所以唯有hd帶南瓜仔入去睇，我就同南瓜妹出面等，但佢地入去唔夠5分鐘，南瓜妹就醒左 (瞓左1小時咋)

hd 話南瓜仔睇得好開心！

↑ 我就同南瓜妹影下相 ...... (集郵成功)

第6站：威威天地 (again) - 17:20

- 威威天地遊樂場

- 彈彈屋，原本hd話唔俾南瓜仔玩，話危險喎！但南瓜仔拖住我，話要玩，所以我靜靜雞帶佢去 (hd 睇緊南瓜妹)，係等緊期間俾hd發現在添！哈！哈！

佢地係分高度，所以南瓜仔係同差不多高度既小朋友玩，所以都好安全 ......

南瓜仔入到去勁開心，周圍跳，見到佢玩得咁開心，我就覺得我無帶錯佢去玩！

第7站：走人 (18:00)

佢地係19:00閉館，因為唔想同人迫走，所以都係快快走人！！

呢一日唔算好多人，所以都唔駛點排隊 ....... 但都係有好多「自由行」囉，佢地好似好趕時間咁，完全無視我推緊bb車！！><

係搭車途中，佢兩個終於瞓左啦！！

↑ 去左鑼銅灣 Amaroni's Little Italy 晚飯，$9xx 埋單，食得超飽！！

叫埋個蛋糕，仲有南瓜仔唱生日歌添！(都係由南瓜仔吹蠟燭)

食完飯就去左希慎出面影雪球 ( $50 入場費，有同事幫我地用自己手機影相)，點知南瓜仔一入去就喊，話怕，無乜望鏡頭.......><

之後返到屋企已10點，仲要同佢地沖涼/食奶，但我累到死了！！

南瓜仔@K班大作戰(11) - 香港培正小學幼稚園

29/11/2014 (26M9D) 

我相信呢間係超多家長想入既學校，原因係佢地既小學(一線)同中學(BAND 1)既學校，仲要係100%可直升小學。

報名都係好「考」家長，要寄信俾佢地，再等佢地寄申請表，仲要有指定交表日期同時間，仲有問卷要填，其實有無人睇問卷架？填黎都覺無乜用，但hd都好俾心機埴。

我諗大家經過PN / K1 面試之後都好累，家長既壓力都唔細，由怕無學校收，到怕無心儀學校收 ......

現在小朋友仲細，可能未感到壓力，但到佢地升小時，就知道什麼是面試，壓力就會來，我相信無家長想「玩」呢個遊戲！！

由於上幾次由我陪同下，南瓜仔既表現強差人意，所以HD下令唔再俾我去.....

面試詳情我都不太清楚，只係知道南瓜仔入課室前有少少扭，所以要等第2輪先入課室，入課室同出黎都無喊！

同一時間有6個小朋友入去，hd 話 in 左3分鐘就出左黎，hd  問南瓜仔做過乜！？南瓜仔話玩砌圖同數貼紙！(都唔知係唔係！？)

結果要明年2月先知，雖然我都知係陪跑，但都想早點知結果 .........

南瓜仔@出水痘

18/11/2014

得知南瓜仔同學出水痘，當時心諗，好彩打哂兩支MMRV ..... (當時係怕學校會傳染，所以早點打哂！)

21/11/2014 (26M2D)

HD 同南瓜仔沖涼，發現背脊有紅色一粒粒，仲問我會不會出水痘，我仲話打左針，有9X%唔會出，唔駛咁擔心啦 ......

雖然係咁，我都上網睇下資料......

22/11/2014 (26M3D)

面試超唔合作，仲扒左落地下，返到屋企，我就訓話南瓜仔，罰佢唔准玩玩具，仲罰埋企 ......

到晚飯時，南瓜仔仲唔係食飯，HD 已經有了好多方法，佢都唔食，最後罰佢坐係 HIGH CHAIR(但坐坐下，無端端瞓左喎，我地仲叫醒佢，唔俾佢瞓)，唔俾佢落地，仲唔俾夜奶佢飲 .......

23/11/2014 (26M4D)

早上，都無俾奶佢飲，仲同佢講唔同佢出街，只帶妹妹出街，南瓜仔當然狂喊.....

我：「妹妹同哥哥講BYE BYE！」

南瓜仔：「唔要同哥哥講 BYE BYE！」

我：「咁你以後扒唔扒地！？出街駛唔駛抱！？食唔食飯！？」

南瓜仔全部都應承，但出了街又係要我抱！><

這天回到家後，同佢沖完涼，就話要食奶 (當時只係八點多)，但佢平時唔會叫食奶，所以就俾佢食，南瓜仔食完之後， HD 行開左一陣，只係短短1分鐘，南瓜仔已瞓左係地蓆 (南瓜仔未試過咁瞓著)，心想，有沒有咁累呀！？

24/11/2014 (26M5D)

到星期一，見佢有鼻水，咁就無返學，等HD 下午帶佢睇醫生，點知 .......

南瓜仔出水痘！晴天PIG PIG ~~~~

醫生話打左針都會出，只係病情唔會咁嚴重！(唉！)

回家後就要隔離南瓜仔同南瓜妹，但佢地倆個日日一齊玩，點解好！？

1:49 漂白水清潔南瓜仔用過既野

↑ 仲要食藥，係食足5日，每日4次，而另一支後塗身，早晚各1次！

25-28/11/2014 (26M6D - 26M9D)

請了一星期病假，日日留在家休息，無得出街，但由於出得唔多，又唔痕 (我有問南仔瓜痕唔痕，佢話唔痕)，而且紅點好快"謝"哂，所以都無乜事，只係唔可以同南瓜妹玩......

而南瓜妹都好慘，無得係地蓆玩，都幾悶架！！

29/11/2014 (26M10D)

因為學校要求有醫生證明無事先可回校，所以要帶南瓜仔覆診.......

最後當然無哂事啦！！

我再問醫生：「將來係唔係有機會『生蛇』！？」

醫生話打了水痘針同出左水痘會『生蛇』機會差不多，所以叫我唔駛咁擔心喎！！

我要記要提南瓜仔50歲後一定要打針預防先！！(希望我仲未死啦！哈！)

南瓜仔@K班大作戰(10) - 香港創價幼稚園

22/11/2014 (26M3D)

呢間係有學券中，教育局評價(外評)好好，位於九龍塘，所以有勁多家長會報讀！！

由於IN之前同呢間有幾個鐘頭時間 (HD 已放工)，所以同南瓜仔去左玩具反斗城，之後佢就午睡， 瞓完去左公園玩一陣，就出發去學校 .......

去到話要等35分鐘，老師就叫我地上3樓玩，帶了南瓜仔上3樓後，玩了一陣，心知不妙，因為佢開始扭.......唯有帶佢返一樓等，但都開始唔耐煩，就俾餅同飲品佢，但都唔係好掂！！

好不容易先到我地，入到去，南瓜仔好醒自己拉椅坐，仲自己玩抓板 .......

可惜好景不常，南瓜仔「發左癲」，佢竟然自己扒係地上，天呀！點解會咁架！？？

我已經馬上抱起佢，但佢勁反抗.....

老師問南瓜仔有乜優點！？

HD話：「 講你(老師)都唔信，佢平時好乖，自己坐定定」

老師苦笑，再問我佢有乜優點！？

我：「佢真係好乖，從來都唔駛我煩，亦唔會自己扒係地下，我都唔知點佢今日佢會咁！？」

老師當然講了一些安撫說話，但都知佢地唔會信南瓜仔係乖既小朋友.....

老師再有問點解揀佢地！？有幾多時間陪小朋友！？

咁就完左啦 ........

點解南瓜仔會咁架！？？係唔係佢唔鐘意面試！？太辛苦！？

後記：原來南瓜仔出左水痘！