南瓜仔@高度跟進(6) - 醫院

27/03/2018 (5Y6M8D)

今次由 hd 帶去 .....

去到醫院都就係度高/磅重，南瓜仔高得慢左好多呀！！(心碎中........)

度高：101.2cm (6個月 + 1.7cm)
體重：17kg

10/10/2017 (60M22D)：99.5cm (6個月 +4cm)
11/04/2017 (55M22D)：95.5cm (6個月 +3.3cm)
11/10/2016 (48M23D)：92.2cm (4個月 + 3.1cm )
06/06/2016 (44M17D)：89.1cm (3個月 + 1.3cm )
15/03/2016 (41M25D)：87.8cm (0.5個月+ 0.9cm)
23/02/2016 (41M04D)：86.9cm

今次高得好慢，但明明呢半年都之前生活習慣差不多，點解會高得咁慢！？

見醫生啦........

醫生都係講「嗰啲野」， 醫生都話唔似荷爾蒙有問題(有呢個問題先會安排打「生長激素針」)，原本醫生話幫南瓜仔抽血驗下，但 hd 拒絕左，佢同醫生講下次覆診再決定！！

我問點解拒絕！？hd話：「佢打針都怕，你仲叫佢抽血！？而且佢都唔似荷爾蒙有問題，做乜要抽血呢！？」

既然 hd 都咁講，我都無反對 .......

只希望南瓜仔靠自己努力，食多啲野、做多啲運動、瞓多啲，真係可以令佢增高啦！！！

南瓜仔@K3 GAMES DAY

22/03/2018 (5Y6M3D)

上年，因天雨關係就取消左.......

今年，天氣好到不得了！！yeah ~~~~~~

南瓜仔已經再不是 BB，PN 同 K1 都係跟住我，今年 ...... 佢完全忘記左我 =.=

一開始，就係唱校歌 (SORRY，到現在我仲未識唱)、做早操！！

之後就玩攤位.......

學校安排左10個攤位！！

呢個仔，有了朋友就忘了我，我有我幫佢排隊(其實我係同其他家長"吹水")，佢有佢同同學仔四圍玩，仲要跑到老遠 ><

好彩中間有個 Break .......... (我可以休息一下)

靜靜雞講，PN 同 K1 我都係玩到中途就走左，但今年就無........ 因為南瓜仔參加左「接力比賽」(係完哂攤位先開始)，我之前望左通告 N 次，睇得好清楚係小朋友參加，不是「親子」，真的太好了，唔駛我跑！哈！哈！

見到南瓜仔跑接力，同同學仔一齊合作去比賽，真的覺得佢又大個仔了！！

不過，第二天，我覺得自己骨頭都散左！！

南瓜妹@48個月

21/03/2018 (36M)

不經不覺你已經4歲了！

隨著你越來越大，你和哥哥相處時間就越來越多，有時可以為了一件好少既事就嘈亂巴閉，見到都心煩 .......

但有時亦為了一件少事，你地又會玩得好開心，最攪笑係你扮馬俾哥哥玩！！

妹妹，我希望你知道你只有一位哥哥，我好希望你地能夠相親相愛！！

食
唉！都係無乜進步！！

妹妹，你可唔可以食多啲野呀！？？

瞓
都係 keep 住有午睡，晚上9點前就瞓。

仲係好愛我，晚晚都要我陪佢瞓！哈！哈！
 
發展 
語言發展比哥哥更快，可能係女仔，加上有哥哥每天同佢傾計！

我已經無乜抱佢了，仲可以自己行山2小時，呢樣真係要讚下佢！！

記性同哥哥一樣咁好，所以應承左佢地既野，唔可以唔做！！



返學
現在可以朝朝帶佢上校巴，放學就我同 hd 輪住接！！

班主任不會任何野都出 MEMO /通告/ 手冊通知小朋友要帶乜返學，要小朋友回家自己講，若果當天南瓜妹「發夢」，佢就唔識同我地講 .......

好彩係南瓜妹算專心上堂(因為佢識回家同我地講)，所以佢叫我帶乜我就帶乜，而且現在有 whatsapp group 所以就更加加強我對南瓜妹既信心。

有次，班主同我講，見南瓜妹眼腫腫，老師問佢乜事(證明老師真係好細心)，南瓜妹竟然將爸爸尋晚罵佢既事講出來，仲要講得好清楚.........事後我同hd講，「你唔好蝦妹妹，妹妹會報串！哈！哈！」

過去兩次家長日，班主任俾南瓜妹既評價都正面，希望妹妹繼續 keep 住！！

媽咪只望你能原校升小學，媽媽真係唔想「小學大作戰」，妹妹，你要學校乖乖呀！

其他

-  14kg

↑ 南瓜妹4歲生日當天，我地沒有特別慶祝，只係買左個蛋糕俾佢！！

妹妹，媽咪祝你：
「身體健康！」
「有個快樂既童年！」

南瓜妹@預祝4歲生日會

今次生日會，原本有諗過取消........最後都開得成！！

因為前一天，南瓜妹突然發燒，仲有咳 ><

醫生話唔係流感，只係普通感冒 ...... 好彩食完一次退燒藥後，就無再燒，而咳都係星期日減少左好多，最後都決定如期進行！！

18/03/2018 (3Y11M25D)

我都係只邀請屋企人黎，簡簡單單慶祝就算 (太多人，要做好多野)

由於屋企太細，所以都係會所搞！！

 ↑ 年年都係食 PIZZA，今年就改左去太興買炒野食就算 ........

而今次生日主題係 Melody，所以蛋糕都買埋  Melody！！

↑ 生日禮物及夾糖機，妹妹仲玩得好投入，仲成功夾到3粒糖！！