29/07/2015 (34M10D) + (16M8D)
目的地：海洋公園
有天，我地經開樓下藥房，啱啱惠氏做緊推廣，買6罐奶粉就送1張海洋公園入場票，咁我地就買左12罐奶粉，一家四口免費去玩！正！
上幾次去都係下午先去，今次我地就晨早去，咁就可以玩全日！！
- 入場 (09:55)
夢幻水都
南瓜仔對
夢幻水都人工湖好有興趣喎.......
-
怡慶坊：LINE 夏日狂熱 (10:00)
- new
只係入去影下相，我地係計劃臨走前先玩！！
↑
香港賽馬會四川奇珍館 (10:15)
睇熊貓是今日既主題之一，但南瓜仔對候子仲有興趣......
南瓜仔：「d 馬騮好大膽，跳來跳去！」
原本佳佳同安安都係休息室，咁啱佢地又出黎喎，咁好機會當然好睇啦，點知南瓜仔睇睇下又返去睇番候子喎 .......
而南瓜妹好大膽，雖然隔住板玻璃，但隻候子突然食住手指跳佢前面，佢都唔驚喎！！
南瓜仔返屋企後，同我講：「馬騮鐘意食手指！」
亞洲動物天地
途經
吉祥物留影站，當然要影下相啦！！
↑
鱷魚潭 / 熊貓山莊 / 大熊貓之旅(10:35)
對於咁細小朋友來說，去海洋公園睇動物是一大賣點！！
我又估唔到南瓜仔對鱷魚有興趣，睇完一次又走番入去睇，睇完出返黎，又入返去睇，而呢個南瓜妹又學哥哥，跟住哥哥去入睇喎！
↑
雀鳥劇場 (10:50) -
表演時間 11:00
我地坐最前排，所以d雀仔飛得我地好近，南瓜兄妹都睇得好入神！
南瓜仔返屋企後，同我講：「棵樹識講野架！」
睇完之後我地就去搭
海洋列車 (11:40)。
冰極天地
↑ 我地就揀左
冰極餐廳 (11:50)
- new 食午餐(hd話網上評價好味d喎)，入到去真係有「嘩」一聲，真係有好多企鵝睇！最攪笑係我地睇緊企鵝游水時，佢突然屙左poo poo，南瓜仔就不斷咁狂笑，仲講：「d 企鵝係水屙poo poo」！！
去到主題公園餐廳食野，都知道都係睇景多於食物質素，但又估唔到佢地既食物又幾好喎！
- 南極奇觀 (13:00)
- new
入到去睇企鵝，凍到呢！？？？真係好鬼凍，好彩係餐廳到影左好多相，所以我地好快就走番出來！！
↑
北極之旅 (13:10)
- new
但我地見唔到北極熊囉 ><
睇完後，南瓜妹應該要午睡，所以就放佢係bb車瞓！！
海洋天地
- 海洋劇場 (13:40) -
表演時間 14:00
南瓜妹就瞓左，咁我同hd就兵分兩路，hd 帶南瓜仔去海洋劇場睇海豚，我就係出面等！！
我係出面等等下，突然我聽到有雷聲 (雷暴警告，纜車停駛)，心知不妙，所以好快搵個橋底等，未到橋底已經落住雨，好彩行得快，仲有位俾我企 ><
而海洋劇場表演，只係睇左10分鐘就就宣佈暫停，南瓜仔就係海洋劇場等雨停 ......
由於係橋底太嘈，南瓜妹咁就醒左，所以我就用hipseat抱住南瓜妹去同南瓜子會合！！
原本都諗住等細雨先行，但天雨唔知幾時停，不如去室內啦，但我地識咁諗，所有人都係咁諗 ><
我用hipset 抱住南瓜妹 + 拎住遮，而南瓜仔就坐bb車 (南瓜仔好耐無坐過bb車了) .......
-
中華鱘館長江足跡 (14:40)
- new
入面既館都好細，停留時間又不長，所以好快就睇完！！
↑
水母萬花筒 (14:50)
- new
迫到呢......連影下相既機會都無乜！
↑
尋鯊探秘 (15:10)
- new
呢度一共有3層，南瓜兄妹對魚真係好有興趣，南瓜妹仲睇到唔想走添！！
(此時，已經停左雨，已纜車都開番)
原來諗住去番海洋劇場睇表演，但開show前5分鐘已經爆滿，所以無得去睇 ><！！(應該上一場既人都好似我地咁等下一場睇)
唯有走人啦，搭
登山纜車 (15:40) 落番去，南瓜仔一落纜車就話要坐bb車，我想佢應該好累，只係幾分鐘路程，南瓜仔瞓左喎，殘忍既hd叫醒左佢，要南瓜仔睇海獅表演 ><
威威天地
-
威威劇場 (16:00) -
表演時間 16:15
今次就早少少去到，同南瓜妹換片 + 南瓜仔去vee vee。
佢地都好專心睇海獅表演，南瓜仔同南瓜妹仲睇到拍哂手掌添！
睇完仲同海獅影相，而我地仲好「罕有」買左相添 ($128)！！
原本一心一意帶南瓜仔去
玩水童樂區玩水，但南瓜仔話唔夠膽玩，咁就算啦，無得迫！！
↑
彈彈屋 (16:55)
佢地係分高度入場坃，佢兩個太矮啦，所以只得佢2個玩，都好既，南瓜妹咁細，少d人玩會安全d！！
入去前，我叫南瓜仔要照顧南瓜妹，但一入到去，南瓜仔就飛奔去玩滑梯，南瓜妹想跟住佢，但跟唔到，好彩南瓜仔玩完一次就去睇下南瓜妹！！
↑
砵砵火車頭 (17:05)
上幾次黎都有玩，見佢地都無玩過機動遊戲，就玩下啦！！
我地再去番入場前想去既地方 .......
夢幻水都
↑
怡慶坊：LINE 夏日狂熱 (17:20)
- new
無帶泳衣，帶定後備衫，南瓜妹一開始就好大膽，已經自己行入去，一被水噴到就飛奔走出來抱住hd，而南瓜仔睇左一陣先夠膽入去 ........
玩左一陣就同佢地換衫啦！！
南瓜仔應該好累，一出來就話要坐bb車，唔肯再行了~~~~~~
↑
海洋奇觀 (17:50)
南瓜仔全程唔肯落車，我諗佢坐得好舒服，連魚都唔去睇，而南瓜妹仲好精神，走來走去睇魚！！
一天行程就完結了(18:15)！！
佢兩個原本係車上仲食緊餅，食食下就瞓左..........
後感：
今次無上幾次咁多人 (可能暑假天氣太熱，無乜人去掛！？或是香港真係少左自由行呢！？)，只係有短暫既雨，但同我地計劃行程差不多！！
今次南瓜仔頭半天都係自己行，都算係咁！！(無左個午睡，仲要平時8點起身，是日7點就起左身！)
佢2個都肯影下相，進步左好多！
new ： 代表南瓜仔第一次去 (計埋今次，南瓜仔去過3次啦！)
