南瓜仔@N班大作戰(一)

南瓜仔係細b，所以一開始就好擔心無學校收，所以見到乜學校(跨區)都報，所以報報下報左16間，所以個個星期都忙住 in 學校！！

係唔係怪獸家長！？我認！我認我係！咁又點！？香港地，係咁喎 ........

我只係想阿囝入到好學校，入到好既 N 班，到時 K1 唔駛咁煩 (當然到時又會報"龍"校，之後15年都唔駛煩！)

我都好滿意暫時既結果 (現時為止 in 左7 間，4 offer(s)，1 waiting，1 rejected，1 間等結果)，當然收到rejected總有點唔開心，但我已覺得南瓜仔好叻叻，始終只係一個未足14既 BB，而且又有咁大既競爭，有 OFFER 已經好好啦！


12/10/2013 (12M23D)

(一) 綠茵英文(國際)幼稚園(將軍澳) - 廣東話面試

第一次面試，講真，我真係無乜期望，一個12個月多既BB，可以做到d乜！？？

同 HD 一齊去面試，因為呢間我係寄去(無排隊)，所以我地係第三輪 (第一輪：排隊大B，第二輪：排隊細B)

第一部份：由我陪同，有個英文老師同一大班BB WARM UP，唱下歌、跳下舞！而HD就係出面填 FORM (用英文)！

第二部份：我同HD一齊陪同，問下平時誰人照顧囝囝、可否自己進食/如廁

面試內容：入形狀、食餅餅、俾水果、疊積木

南瓜仔全部都做到哂，臨走仲同老師BYE BYE 同飛吻！！

結果：waiting

19/10/2013 (13M)

(二) 比華利中英文幼稚園 -  廣東話面試

同 HD 一齊去，去到係一間房等 IN

由我陪同，同老師傾下計，問下阿囝日常生活 .......

面試內容：俾波波俾老師 (其實係枱面有玩具，南瓜仔自己玩，咁啱拎住個波，老師叫佢俾佢，我估唔係面試測試)

臨走時老師仲拖住佢走，南瓜仔又肯俾佢拖！！

結果：offer

19/10/2013 (13M)

(三) 翠茵小宇宙幼稚園(新都城Ｉ) - 英文/廣東話面試

同一日 in 兩間，好彩兩間學校都近，而呢間又俾我遲1小時先 in，我可以俾南瓜仔食完午餐，休息一間！！

我、HD、工人姐姐共排了20小時學校，點解會排！？

1) 「先到先得」，即係你排到隊就一定收
2) 近屋企
3) 係EK睇，係本區四大必選學校，評價好
4) 有國際班

所以我覺得值得排 (因當時唔知有無學校收南瓜仔，要買定保險)，唯一唔好就係無全日制！

南瓜仔反應都OK，基本上都做到8成！

第一部份：我同HD一齊陪同，英文面試 (問下南瓜仔日常生活)

面試內容：玩串珠、指自己身體部份 (頭/口)，最後幾個BB一齊唱歌/跳舞 (南瓜仔無乜反應)

第二部份：我同HD一齊陪同，廣東話面試，又係問下平時誰人照顧囝囝、可否自己進食/如廁

面試內容：入圖形版 (識拎出來，但未識放回)、玩車車、聲音測試 (係南瓜仔耳邊玩沙沙，睇下佢有無反應)

有同老師BYE BYE 同飛吻！！

結果：offer

01/11/2013 (13M13D)

(四) 博士山(香港)國際幼稚園 (將軍澳) - 英文面試

呢間係星期五面試，所以請了半天假帶南瓜仔去........

因為自己一個帶去，用車仔又麻煩，用 HIP SEAT 又唔太方便 (大住個肚)，諗住係地鐵沿線，所以抱住佢去，雖然南瓜仔係瘦B，但我只得90多磅，對我來說抱得好辛苦 (平時我無乜抱，佢又唔係扭抱B)，唯有俾佢自己行，但可能佢啱啱起身，唔想多行，行幾步就停左 .........

去到時，老師 / 工友們主動同南瓜仔傾計，可惜佢無乜反應，好彩我提早去，等佢WARM UP完十幾分鐘，佢就走圍行，同老師 / 工友們打招呼！

而HD就係臨 IN 前十分鐘就到左，佢就填埋問卷 (英文，都係俾佢填)，咁就帶南瓜仔 IN！

南瓜仔表現都好好，基本上完全都做到哂！

面試內容：活動式，一路玩 (叫南瓜仔拎動物) 一路問HD問題(英文)，之後就係一大班BB一齊玩，南瓜仔好主動，樣樣都係第一個做，疊積木咁 (同平時返PLAYGROUP 差不多)

結果：offer

02/11/2013 (13M14D)

(五) 玫瑰崗幼稚園 - 英文面試

嘩！勁遠，係半山，由灣仔港鐵站，仲要搭$4X 的士先到，四周圍乜都無！

又勁多人，我估最少有成千人去面試，而且個個BB已經唔係識行，係識跑、識行樓梯上落，絕大部份都係大B，好明顯南瓜仔同佢地相差好遠！

南瓜仔 IN 得麻麻，因為面試內容對他來說亦深左少許！

面試內容：指爸爸既鼻(做唔到)、插花等等，之後就一班BB做 ROLL ROLL 動作、原地360轉 (南瓜仔做唔到，好多大B都做到)

因為有太多人 IN(估計過千人)，收得百多人，而且呢個又係出名既學校，機會真的好微微，所以打定輸數！ 

佢地係以 email 形式通知，本來我都覺得幾好，但當係EK見到有JM收到結果，自己又收唔到時 (打去學校問，佢地叫我再等)，個心真係忐忑不安，收信就每日派一次，有就有，無就無，但佢地既 email 係24小時，攪到我成日要 check 住 email，仲連續兩日都發夢收 email 添 (可能我太緊張！) ......

結果：reject 

09/11/2013 (13M21D)

(六) 英藝幼稚園暨國際幼兒園 (九龍塘) - 普通話面試

呢間係家姐既囝讀緊，家姐評價都好好，只係學費好貴，所以收左都要諗諗！

係in既前一日，我唔見左張面試信，搵左好耐都搵唔到 (但係2日前俾我搵番出來！)，唯有第二朝早上打去，好彩佢地俾左個編號我，唔係連in都無得in ~~~~

今次好特別，同埋阿妹既囡囡一齊in，仲係同一時間，所以約埋一齊去！

去到已見到好長既龍，我都唔明點解唔俾入定去先，仲要俾太陽哂住，大人就話可以，但bb咁細，咁哂住就唔係太好啦~~~~~

由HD陪同，好彩係HD去咋 (我唔識講普通話，但係EK睇，睇下你既彩數，因為有英文、普通話同廣東話，睇下你咁啱安排左邊個)，而阿囝OK，全部都做到哂！

面試內容：入錢落豬仔錢箱 (10多個，因南瓜仔唔夠高，HD有協助佢起身入)、彩虹圈、用刀切水果 (南瓜仔識得用刀切，但唔夠力切落去，所有 HD有 協助)、用搥仔扑木柱 

結果：offer

心儀既學校仲未 in ，佢地都係收左大B先，我好想南瓜仔讀全日制，因為細B出世後，我怕工人姐姐照顧唔到2個，我都知讀全日制好似好可憐咁，但都無法 ..........但最重要係有無全日制學校收佢！！

南瓜妹

05/08/2013 (4W6D) – 初次發現

經期遲左一星期，心諗，唔會真係有左呀！？

真係有左！！！！！

當我見到兩條紅線時，第一個反應「唔係呀！？咁快中！！！」

而當我俾HD睇支棒時 (佢當時同緊南瓜仔玩)，佢個樣笑得不知幾開心，仲不斷同南瓜仔講：「你做哥哥啦！」

我無諗過咁快就有左，但唔係意外...........

我同HD都想有兩個小朋友，等佢地成長得快樂一點，上網睇，最好係生完後9個月再懷孕比較好，所以南瓜仔6個月時我已經食葉酸！！

到了南瓜仔9個月，可以「計劃」時，我有點想打「退當鼓」，怕自己照顧不來，又擔心好多野，邊個帶南瓜仔上學呢！？南瓜妹邊個照顧！？工人姐姐會不會唔做！？ (但HD覺得一定攪得掂)

所以同上次有好大分別，就係無計任何排卵期，亦無勤力「開工」，諗住順其自然，但估唔到一開始就中左，真係天意！！

係呢個月，我仲食左2次自助餐(長腳蟹、生蠔、刺身、雪糕、西瓜)、勁食生冷食物(起碼食過5以壽司)、勁飲檸檬茶、咖啡，仲有食過藥添！！

開始又要戒口，唔戒口得唔得呀！？唉！！

P.S：我好慶幸HD係一個好爸爸，雖然工作忙，但回家前一定會買齊南瓜仔/大人既餸、點忙都會同南瓜仔玩1小時以上，又會煮粥 / 餵粥 / 餵奶 / 換片，而HD 放假時，一定自己照顧番南瓜仔，即使南瓜仔食粥食得哪麼差，都唔會推俾工人姐姐餵！！

南瓜仔，你要記得你有個好爸爸，不過更加記得你有個超好既媽媽呀！！


06/08/2013 (5W) – 診所確認

去左私家診所再驗，因為要拎醫生證明嘛！！

確實真係有左！


07/08/2013 (5W1D) – BOOK QE

QE實左太好啦，現在唔駛親身登記，FAX (2958 6140)資料 (醫生證明、住址證明、身份證，寫埋個聯絡電話) 俾佢地，下午就收到佢地既電話確實，7/9/2013 第一次見助產士！

17/08/2013 (6W4D) – 第1次私家產檢

去番上次個私家醫生 ........

醫生見到南瓜仔：「嘩！大個仔喎！」

我：「但佢唔鐘意食野呢！！」

醫生：「唔係喎，都有肉呀！？」

之後就問番生南瓜仔既野，例如出生幾重咁啦！！

雖然係第二次懷孕，但心情都一樣緊張........

因為仲係細，所以要照陰超，醫生見到時：「嘩！都好快高長大喎！」

聽了呢個說話，個心都定了下來，但都不忘問：「有無心跳！？」

醫生：「有好明顯既心跳呀！」

醫生：「呢胎係女的話，咪一個「好」字囉！」

我：「我老公想仔，連名都改埋......」

醫生：「連名都改埋！？」(笑)

我：「但我想係女喎.......」

我對住南瓜仔講：「你見唔見到你細妹呀！？」

我想醫生真的可能覺得我係傻！哈！哈！

BB
CRL(頭臀長度) = 0.4cm (但上次我係515mm，點解會細咁多！？不過有心跳就得！！)

自己
體重：40.8KG


07/09/2013 (9W4D) – 第1次QE產檢

由於前一天HD通宵幫南瓜仔排學校，本來HD話陪我一齊去，但今日去QE都無得照超聲波，只係見下助產士同抽血，而且南瓜仔又病，所以最後叫HD唔好陪我去！！

可能星期六，真係無乜人 .......

去到時候就要係大門口做登記，之後係大堂睇唐氏既片，無幾耐就入左去聽助產士講解黎緊佢地既安排！！

聽完就係大堂等叫名！！

入到去，姑娘都係問番基本資料，有無吸煙、有無糖尿咁，之後我好好彩，安排到唐氏同結構俾我！YEAH ~~~~~

最後就安排抽血 .......

今次又唔係我第一次抽血，當姑娘幫我抽血時，佢話我啲血唔出，停左係度，要我不停手做動力，等啲血出，但最後只係抽到3支血 (要抽5支)，唯有抽埋另一隻手，但原本無孕婦排抽血，到眼見已有3個等緊我，我亦睇到已抽了15分鐘，心，只想快一點！！
當抽到最後1支時，我對姑娘說：「我有點暈！」
之後我有醒左時，我已左地上，我真係暈倒了！！

姑娘們就快快幫我，扶我上床休息，休息了一會，但都係好唔舒服，我就帶上勁暈既身軀，自己一人搵的士！

但係的士上仲係好唔舒服，唯有打電話俾HD係的士站接我，回到家後，我連飯都唔食，快快上床休息！！

到了下午，見南瓜仔仲未病好，自己又好轉，就帶南瓜仔睇醫生！唉 ..........

08/09/2013 (9W8D)

仲係好唔舒服，去睇醫生，醫生話我血壓低，要多點休息同飲多啲水！！

最慘係我既鼻水同咳越來越嚴重，又要照顧南瓜仔，又怕傳染俾佢，又怕食藥影響肚內既BB，但唔食又唔好，煩煩煩煩煩！！

P.S：南瓜仔病左18日，我真係好辛苦，自己又病埋又好累，公司又多野要做，又要照顧南瓜仔 (佢病日子扭計左)，真係好想喊！！

 

14/09/2013 (10W4D -->10W3D) – 第2次私家產檢

南瓜仔仲病緊，本來唔諗住帶南瓜仔一齊去睇醫生，但HD好想一齊去睇，我又見南瓜仔好似又OK，而佢都成好多日無出過街，咁就帶埋佢去！

BB 大左好多，心都定左，因為前排真係無時間休息，我覺得有點對不住BB，媽媽真係好無用！！

又係好自然問男定女，醫生好似照到D野 (即JJ)，但唔能確定，HD就認為一定係囝了！！

政府同私家既預產期相差一日，咁我以私家為準！！

24/09/2013 (11W6D) – 第2次QE產檢

上次都係自己一個去做唐氏，今日又係自己一個人去！

無上次咁緊張，不過當我見到BB郁時，心，真的好開心！！哈！哈！

但我都不忘係螢幕睇數字！！

我又問男定女，姑娘話咁早，睇唔清楚，遲d先睇！ (我都估到佢既答案！)

BB
頸皮：1.62mm (合格)
CRL：57.3mm (12W2D) - e.......大左喎！

自己
體重：40.9KG (無乜重過，睇黎我要加油增肥！)

又要再抽血，所以我一坐就同姑娘講我上次暈過！

姑娘：「你就係星期六暈左果個，你放心啦，我唔會抽到你暈架！」

我：「你上次都係呢度！？」

今次抽得好快，無暈，YEAH！！

 

09/10/2013 (14W) – 第3次QE產檢 – 見醫生

去到首先驗小便、量血壓、磅重，等了一會，就係見姑娘先，姑娘話紅血球指數低，之後又話第一次生南瓜仔無事，所以唔駛擔心！

之後見醫生，醫生又講番紅血球指數低，所以要長期食維他命丸，食到生為止，點解會咁架！？？

再上床聽心跳，聽完就去拎藥，但一等就等左個半小時，超耐！！

自己
體重：41.9KG 

12/10/2013 (14W3D) – 第3次私家產檢

今次就要睇下囝囝定囡囡，醫生一照就話：「應該係囡囡喎！」

我就忍唔住笑了出來，唔係我想要囡囡而係HD覺得係囝，而名都改埋！！哈！哈！

最後我再問醫生有幾成係囡！？醫生話：「九成，不過要做埋結構先肯定！」

咁即係要等到20周先肯定啦！(上次南瓜仔12W就100%肯定，不過囝應該係好容易照到！)

南瓜妹
CRL：9.1CM

自己
體重：42.8KG 

20/11/2013 (20W) – 第4次QE產檢 – 助產士

見番生南瓜仔跟我既助產士，但我地傾南瓜仔既事多D喎！

傾完計，就上床聽下心跳，一切正常！

因為要長期食維他命丸，但我唔想去拎(上次等左個半小時)，助產士話可能去藥房買到，我一心諗住出街買就算，但助產士堅持叫我去拎，唯有聽聽話話去藥房拎藥，好彩今次只係等左30分鐘！

自己
體重：44.9KG

 
23/11/2013 (20W3D) – 第4次私家產檢

距離上次做超聲波已六個星期，我記得南瓜仔四個星期一次，我已覺得等了好久，但可能每個星期又要帶南瓜仔IN學校又返PLAYGROUP (太忙了)，加上今次既胎動比上次早，所以無上次咁緊張.......

今次做做結構，其實QE都俾左期我做結構，但我都想做多一次........

一切都正常，仲100%確實係囡囡，YEAH！

南瓜妹！！南瓜妹！

南瓜妹
BPD=4.94CM (20W5D)
HC=17.7CM (20W4D)
AC=15.5CM (20W4D)
FL=3.11CM (20W1D)
HUM=3.25CM (20W6D)

EFW=340GM

自己
體重：46KG

南瓜仔@14M

19/11/2013 (14M)

南瓜仔咁就14個月啦，時間真係過得好快呀 ~~~~~
. 
07:00  奶 (7安)
07:15  小睡
10:30  遊戲時間
11:00  粥
12:00  遊戲時間
12:30  水果蓉
13:00  遊戲時間
14:00  小睡
15:00  食奶 (5安)
15:15  遊戲時間
17:30  小睡
18:45  粥
19:45  遊戲時間 (陪大人一齊食飯)
21:15  洗白白
21:30  食奶 (7安)
22:30  瞓覺


食
食野方面，進步左好多，奶全部都食哂(10分鐘內完成)，而食粥亦比之前好好好好多，最快20分鐘食完(但有時都要1小時)，而且大部份時間都食得哂！！YEAH！

上個月開始已經用手拎生果食，呢個月就教佢就用义食 (但自已拮唔到囉！)，我亦有教佢用匙食粥，但效果麻麻，唔係好得！

南瓜仔試過既食物 (按試食次序)：

4個月：蘋果、紅糙米糊
5個月：香蕉、啤梨、菠菜
6個月：紅蘿蔔、燕麥、節瓜、南瓜、菜心、蕃薯、冬瓜、薯仔、大麥、粟米、青豆
7個月：木瓜、西蘭花、牛油果、粥、豬肉、豆腐、蕃茄、雞肉、三文魚、芝士、青瓜
8個月：大眼雞、淮山、翠玉瓜、蛋黃、紅菜頭、小棠菜、ABC粉、火龍果、紫菜、洋蔥、士多啤梨
9個月：西瓜、雪梨、椰菜、佛手瓜、鯇魚、生菜、藍莓、哈蜜瓜、紅腰豆、白菜、葡萄
10個月：乳酪、紅杉魚、烏冬、蜜桃、麵包、西芹、奇異果、牛肉、椰菜花、車厘子、瑤柱、芒果
11個月：全蛋、橙、金菇、紅豆、菠蘿、矮瓜、芋頭、粟子 
12-13個月：蓮藕、羊肉、蝦、墨魚、芥蘭、鮑魚、青蘋果、豬肝、杮、魷魚、青椒、白蘿蔔、青蘿蔔

大便
 一日平均 2 次！

瞓
全日瞓12-13小時

能力發展
1)  自己行
2) 識得指自己耳、頭、鼻
3) 識得八爪魚、熊貓、狗、豬、魚、貓、龜、恐龍、足球、籃球、BB公仔等等
4) 識得指爸爸、媽媽、工人姐姐
5) 會蹲下來起地上的物件而不會跌倒
6) 會踢足球(踢兩、三下)
7) 會一頁頁翻書
8) 會用顏色筆塗鴉
9) 能把小柱子塞進孔內 

其他
- 瘦b (20.6磅)
- 4隻牙 (有2隻出得少少)