我：「我放棄，練習都無用，南瓜妹唔係唔識，係唔肯答 .......」
hd (認真 mode)：「你唔可以放棄，知唔知！？」
11/03/2016 (23M19D)
我請左全日假陪佢，我太少時間俾南瓜妹 ........
早上，同南瓜妹「練習」(都係問下佢顏色！哈！)，之後就去食早餐，就出發去學校啦！！
↑ 我地早到左半小時，唯有係學校外面等，好彩南瓜妹書包仔有幾本書，可以"頂"住下！！
登記完就入校舍玩車 (其實我係擔心南瓜妹玩都唔捨得走，但唔俾佢玩，可能都係喊)......
終於等到叫南瓜妹名，好彩南瓜妹無扭計玩 (換左南瓜仔就一定喊爆)
PART 1 (英文)
4個小朋友入去，3個扭計 (一個狂喊、一個趴地、一個攪面試道具)，南瓜妹竟然乖乖坐，我就坐南瓜妹後面 (完全明白這3個家長既無奈).......
首先老師同小朋友 hi five ，南瓜妹有做！
之後老師就叫小朋友將指定水果放入指定公仔(一男一女)餵水果.....
老師拎左橙、蘋果俾南瓜妹，叫南瓜妹拎橙餵俾男仔食，南瓜妹好慢動作，但都揀左橙 (bingo)，餵男仔 (可惜南瓜妹唔肯自己行走去，要我陪)......
最後就係唱遊，南瓜妹呆企 (無喊，算係咁 ><)
PART 2 (中文)
南瓜妹好乖地自己坐椅子，老師：「你好叻喎，自己坐！」
老師指住南瓜妹張相：「呢個係唔係你黎！？」
南瓜妹：「係！」
老師：「咁你叫咩名！？」
南瓜妹呆左 ......
我：「你係唔係叫巴斯 xx 呀！？」(成日屋企同佢咁玩！)
南瓜妹：「唔係，我叫 xxx 」(都叫有答老師！)
老師：「哦，鐘意巴斯光年！」
我：「唔係！係哥哥鐘意......」
老師：「咁你鐘意咩！？」
南瓜妹：「鐘意媽咪！」(好細聲，老師望住我，示意聽唔到！)
我就講俾老師知：「佢講 『鐘意媽咪』」
老師：「嘩！媽媽真係好冧！」(老師知南瓜妹有哥哥，所以就問左南瓜仔既野，邊間讀書、有無 NET等等)
之後老師：「老師講3樣物件，你一陣拎俾我......書、杯、毛巾」(枱面上有6-7種物件)
南瓜妹好快拎左書 (bingo)
停左數秒，拎左杯 (bingo)
老師：「仲有呢！？」
再停左數秒，拎埋毛巾 (bingo)
南瓜妹真係記得老師講乜！
老師：「仲有無呀！？」南瓜妹停左幾秒，拎左個波 (滴汗中)！！
老師：「呢個咩黎！？」
南瓜妹：「波波！」
之後同老師叫南瓜妹拎顏色筆 (一盒12支)，南瓜妹拎左支顏色筆！
老師：「呢支顏色筆係咩色！？」
南瓜妹：「purple，紫色！」
老師：「紫色！！好叻喎！」(bingo！！不過老師應該聽唔到南瓜妹講 purple)
(好彩南瓜妹拎中紫色，南瓜妹識紅、橙、黃、藍、綠、紫、粉紅、白、黑，若拎中啡、灰就 ......><)
老師就叫南瓜妹油顏色，呢樣難唔到南瓜妹，因為平時南瓜妹係屋企就最愛油顏色，南瓜妹仲主動自己拎唔同顏色油添！
我再同老師傾下計，不過南瓜妹開始唔耐煩，想走 .........
最後，老師：「可唔可以拎本書俾我呀！？」(點解要再拎！？？？)
南瓜妹都有拎本書俾老師(bingo)，yeah，in完，走得！
PART 3 (普通話)
填問卷，南瓜妹自己玩......
基本上南瓜妹都自己玩玩具，點知南瓜妹俾其他小朋友搶玩具，所以就"大叫"，雖然個家長叫佢小朋友唔好搶 (好彩俾老師知道係俾人搶玩具，唔好佢搶人玩具，但大叫都唔好啦) ><
之後校長入黎，問我地有無問題，我就無問題問 (我只係想快快走，因為南瓜妹開始扭計)
校長就收問卷，俾禮物 ......
南瓜妹俾完問卷後，再俾埋支筆，之後校長就送禮物 .....
校長叫南瓜妹：「雙手拎！」
南瓜妹又肯雙手拎：「唔該！」(應該講「多謝！」)
南瓜妹無望住校長講 bye bye......
校長：「下次要望住喎！」
南瓜妹返轉頭，望住校長「bye bye」 (我心裡好感動，南瓜妹肯主動回去做)
in 完就去搵 hd 食 lunch ~~~~~
今次係咁多次面試最多野考，反而係南瓜妹表現最好既一間！！
每間學校收生準則不一，做到未必收，唔做可能收 .....
期等4月既結果！
補充：
01/04/2016 (24M11D)
幸運地，南瓜妹有 2 in ......
不過呢次 2 in 係有壓力，因為今次要南瓜妹坐我隔離，真係幾難，因為南瓜妹"痴媽症"都好嚴重 ><
所以唯有之前不斷同南瓜妹要自己坐好，唔可以坐我大脾 ........
為表我地誠意，我兩公婆一齊去 (是日係平日)！！
入到等候室，我 + hd 就同南瓜妹玩桌上既玩具，期間有老師同我地傾下計，呢 part 計唔計分我就唔知。
到我地啦 .......
南瓜妹有少少不合作，想坐我大脾，但我一手就放係椅子上 ........ 好彩，佢乖乖同老師(定係校務處職員！？)玩。
校長就問了幾個問題 .......
之前已經同 hd 溝通好，我地唔好講大話、唔好吹水，校長問乜，我地就照事實講就得，所以唔駛夾口供！
我都唔太記得問乜 ......
1) 點解唔揀哥哥揀幼稚園！？
2) 會考直資/私小！？
3) 已經唔記得哂！哈！哈！
最後問我地有無問題問，我回答：無。
呢個時候南瓜妹就開始想走人 ........
校長就同佢講 bye bye，仲要係將 d 玩具放番好 (配顏色)，好彩南瓜妹配啱哂！
咁就真係 bye bye 啦！！
