南瓜仔@如何處理！？

26/02/2016 (41M7D)

事源，我約了朋友食晚飯，上次帶了南瓜仔，今次就帶南瓜妹！(事前已經同左南瓜仔講，只帶妹妹！)

所以接完南瓜妹放學後，就同佢沖涼，換衫出街！(hd 仲未放工回家！)

係呢段期間，南瓜仔：「媽咪，你做乜未同我沖涼！？」

南瓜仔：「媽咪，你帶埋我同妹妹去啦！」

南瓜仔：「媽咪，我會乖！」


正當出門時，南瓜仔就捉住我(捉得我好實)，唔俾我走，更喊唔停 ....... (記憶之中，南瓜仔未試過咁喊法，我無諗過南瓜仔反應咁大)

南瓜仔：「媽咪，你唔可以唔要我！」

南瓜仔：「我唔俾你走！」


好不容易先出到街，但落到街下收到屋企打來既電話 ......

電話傳來南瓜仔既喊聲：「媽咪，你即刻返黎！」(南瓜仔未諗住咁！)

南瓜仔：「你唔可以唔要我！」

南瓜仔：「點解你唔要我！？」

南瓜仔：「我要你返黎！」

無論我用咩說話，南瓜仔都無聽入耳，不斷咁重覆上面既對話 ........

這一刻，我都無哂辦法，唯有"收線'，因為再講落去，都係一樣！

就拎住心機睇 CAM，見到南瓜仔都係狂喊 ><

再隔了一會再睇，南瓜仔都係狂喊 >< >< >< ><

我可以做既野，就係 whatsapp 俾 hd，叫佢早點回家！！


食完呢餐飯後，我就立刻飛的回家，好似對唔住南瓜仔咁！

啱啱到屋企樓下，hd 就打俾我：「南瓜仔問你，駛唔駛黎接你！？」

我：「我已經到樓下！」

咁就收線 .......

正當我入屋企大堂既升降機時，一開升降機門，就見到南瓜仔！！

我：「仲乜你地會黎接我！？」(我明明已講左係屋企樓下！？)

hd：「南瓜仔一聽到你係樓下，就話要黎接你！」

呢個仔呢 ..........

臨瞓前，我問南瓜仔：「你仲乜今日喊呀！？」

南瓜仔：「我驚媽咪唔要我！」

我：「媽咪同你講左出街食一陣飯，點會唔要你！？」

南瓜仔：「媽咪，你下次帶埋我同妹妹出街，好唔好！？」

我：「好啦！下次一定帶埋你！」


事後

hd：「我做哂野就打電話返屋企，南瓜仔仲喊埋，最後話送 woody (原本係諗住南瓜妹生日送俾佢，)俾佢，佢先停！」

由我出門口，到hd 打電話返屋企，南瓜仔最少喊左20分鐘！


下次，我應該如何處理！？