2016年hd 生日

唔 ...... 由我同hd拍拖至上年，我地都係正日慶祝，但現在有小朋友，小朋友要返學，唯有提早慶祝啦！！(我係一個唔鐘意"提早慶祝"既人，但都要面對現實！><)


30/10/2016 (49M11D) + (31M9D)

我一早就 book 左自助山 lunch buffet  (點解食午餐！？因為小朋友第二日要返學嘛！食晚餐就要趕住回家，而且仲平d添！)，聽聞佢地既自助餐好好食 ..........

自助山，係位於62樓，未去到，南瓜兄妹已經有「驚喜」，就係搭超快既玻璃升降機 (即係可以望到風景)，搭到佢地嘩嘩聲！！

待坐好後，就有第二個 「驚喜」，就係餐廳會「轉」，當我地入座時仲未轉架，但座座下就轉，突然轉既第一下，佢兩個不知幾開心！！哈！哈！

加再上我好早就book，所以坐係窗邊位，仲睇到我地結婚既馬場添，個景真係無敵！！


↑ 而食物既質素亦十分好！

唔怪得咁難 book 啦 ~~~~~~

食食下，南瓜仔突然講：「媽咪，我肚痛！」
我就問佢乜事！？南瓜仔只講：「媽咪，抱抱..........」
咁我就好自然抱佢啦，我再問：「係唔係想屙 poo poo！？」(平時南瓜仔去poo poo 就去 poo poo ，不會講肚痛！)
南瓜仔：「係呀！我要 poo poo！」
但當時 hd 出左去拎食物，我就好心急.........好彩唔夠1分鐘見到 hd，我都顧唔到咁多，就少許大聲同 hd講要帶南瓜仔去洗手間！
好彩南瓜仔去完洗手間就話唔痛！

不過，之後又發生......
正當 hd 出去拎食物時，南瓜妹：「我要 poo poo！」
又黎！？
今次 hd 無咁快出現 (佢既手提電話係枱面)，南瓜妹就等待唔耐煩，開始喊話要去 poo poo.......
當時我諗，點做好呢！？留下南瓜仔！？叫職員幫手睇住南瓜仔！？點算呀！？？？
好彩，我老遠見到 hd，我再次不顧環境，抱住南瓜妹就有少許大聲同 hd 講：「我同妹妹 poo poo！」咁就跑左去洗手間.......
最後都順順利利！！

呢兩個小朋友，點解唔等埋爸爸拎完食物先講去 poo poo 呢！？？


食完就回家休息 .......

晚上，去母親大人屋企食晚飯，現在為左就表哥(啱啱升小一，現在要提早瞓覺，最遲8點就要走人，所以大家一齊提早食飯)，所以食完飯回到家都係八點半左右！

但我既午餐真係好飽，再放唔落任何野了！><


31/10/2016 (49M12D) + (31M10D)

正日生日，雖然己經慶祝左，但我都約左 hd 一齊食 lunch (安排左公公接南瓜妹放學)

↑ 晚上，生日蛋糕是不可少！

而今年既蛋糕係南瓜仔揀，更係南瓜仔自己幫忙落order，同服務員既對話....

南瓜仔：「唔該我要呢個蛋糕 (指住個蛋糕款)！」
服務員： 「咁你幾時要！？」
南瓜仔：「.......」(唔識答，我係耳邊教佢)，「31號，下星期一」
服務員：「 幾多磅！？」
南瓜仔：「1磅！」(我又係南瓜仔耳邊講)
服務員：「貴姓！？」
南瓜仔：「XXX」(串左俾服務員知)
服務員：「幾多號電話！？」
南瓜仔：「9XXXXXXX」(我既電話)

其實以上對話好簡單，但媽咪都覺得佢又大個仔左！


↑ 仲有生日咭！！

南瓜仔又大個左，全張咭都係南瓜仔自己寫/畫，我只係教佢「daddy happy birthday」咁串，其他野就俾佢自由發揮，畫左d乜！？大家估下啦！！

但南瓜仔畫完一面，又話要畫埋後面 ><，我就由得佢！！

攪啱完南瓜仔就諗住輪到南瓜妹，因為南瓜妹一定要我協助，點知南瓜仔又要畫囉！？？明明已畫好生日咭 ........

咁好啦，唯有俾埋南瓜仔畫 ><



↑ 最後，係我送俾 hd 既生日禮物，雖然不貴重，但好過無啦！！(P.S：佢自己揀架！)


題外話：不得不承應，年紀都係大左 ......

- 呢餐自助餐，我足足飽足2日。
- 係一個完全無改善生活模式下，我竟然重左8磅 ><。唯一既原因係我新陳代謝慢左，我係想肥，但唔係肥係肚腩囉 ><

南瓜兄妹@2016 角色日

南瓜仔
2013年(PG)：南瓜仔 
2014年(PN)：超人
2015年(K1)：mickey mouse

南瓜妹
2015(PG)：minnie

扮咩好呢！？ 我就覺得最重要係輕便，上年果套多太配件，我相信去洗手間都唔方便。

又問一問主角想扮乜！？主角(南瓜仔)就話扮巴斯光年，咁就扮佢啦！

另一主角又點！？我地無問佢......哈！哈！最後 hd 幫佢揀左美少女戰士既小兔！

不過今年就唔係同一日扮 ><


27/10/2016 (31M6D)

南瓜妹就扮小兔，呢套衫夠簡單，good！

應該無同人撞衫 .....

南瓜妹學校有老師幫佢地畫面，我仲估佢一定唔肯俾老師畫，點知老公放學時見到塊面畫左喎！？？

我回家後就問妹妹：「邊個幫你畫面！？」
妹妹：「李老師！」
我：「咁你有無喊住話唔畫！？」
妹妹：「緊係無啦！」

突然間，覺得妹妹又大個左！！


28/10/2016 (49M9D)

南瓜仔呢套衫又好簡單，我估好大機會撞衫，哈！哈！

原本我諗住俾支巴斯光年搶帶回學校
南瓜仔：「Mr Benson 話俾帶玩具！？」
我：「 Mr Benson 又無咁講！」
南瓜仔：「咁我唔帶，返學唔學可以帶玩具！」

呢一刻，我又覺得哥哥又大個左！！


雖然佢地既衫都係著過一次咁大把，但都係一個美好回憶 (講緊我)！哈！哈！

南瓜妹@31個月

21/10/2016 (31M)

食
突然進步左！？？可以食到8-9成，點解呢！？我都唔知 ......

南瓜妹，你要繼續努力，你仲有好大進步空間架！(雖然食到8-9成，但我俾佢既份量唔多)

另外，我 cut 左南瓜妹既夜奶，因為佢越飲越少，由7安變左2-3安，加上我又唔覺飲左夜奶會肥 (同南瓜仔都一齊cut，又係越飲越少，飲左4年)，不過早上都 keep 住飲奶，因為早上係可以飲哂，即係仲有需求。

瞓
午睡：13:30 - 15:00
晚上： 21:00 - 07:15
 
發展 
- 我一直覺得南瓜妹大肌肉發展麻麻，咁我就帶多左南瓜妹去公園玩.....

但我發現，南瓜妹做攀爬既動作係無問題，佢既問題係行路、跑步、跳躍等，所以我要對正下藥，我應該同南瓜妹跑多d，而南瓜妹亦開始學跳舞，希望有幫助。

- 之前仲著緊戒片底底(即係厚身底底，萬一瀨wee wee都唔會太濕，但見南瓜妹都無瀨過，咁即係唔駛再著咁厚身啦，係時候換番正常底底，但估唔到南瓜妹著92 碼既底褲仔 (H&M)都跌落黎........ 唯有再四周圍搵底底，原來要搵80碼既底底唔容易，大部份都係100碼起 (aeon, 千色店, 街巿都無)，如要80碼就得包片底底，好不容易先係 mides 先搵到 ><

mides 職員仲笑住講：「嘩！咁細個就戒左片，我地得好少2歲碼(即80碼)既底褲仔(即係入得好少貨)」，職員又解釋，大部份小朋友都會買3歲碼，原因係佢地都會有個肥嘟嘟既肚腩仔，所以著3歲碼會舒服d，可惜 ...... 南瓜妹只有細細既肚腩仔，唯有著2歲碼！！

- 某天，南瓜妹突然同我講：「I want drink water.」...... 
呢句說話係好普通既說話，但南瓜妹基本上唔識英文，但佢係邊度學！？係學校！？定係跟哥哥學！？(唔知點解，南瓜仔有時無啦啦會同妹妹講英文！)定係跟工人姐姐學！？


返學
今個月無收過老師既電話，都唔知南瓜妹既進展係點，應該要等到家長日先知！

好彩，南瓜妹係一個愛分享既小朋友.......

好多時都係南瓜妹主動分享學校事俾我知，雖然唔肯定係真定假 (但我個人覺得應該有d係真，南瓜妹無必要講大話，最多都係將d事情講 d唔講d姐！哈！哈！)

加上南瓜妹有個"醒目"媽媽，每天放學都有媽媽接放學，有d媽媽會影下相分享俾我地睇(其實學校職員話唔俾)，其中一次我見到 C 同學著左街褲，當時我心諗應該係瀨左 wee wee .....

南瓜妹又咁啱同我講：「媽咪，今日 C(同學) 瀨左 wee wee！」，嗱 ...... 我估無錯，無理由無端端著左街褲架！？

而南瓜妹最愛分享邊個無返學，最勁係有一次班上有 1/3 無返學(係whatsapp group 已知)，南瓜妹都能講得出邊個無返，有時會諗點解佢咁 "八"架！？有無專心上堂！？

南瓜妹就無乜講學校學左乜 (唱歌除外)，不過都係 PN，我就不會太緊張，我無跟過佢學校學乜，雖然佢地校長話大部份小朋友都識哂 a-z (sorry，我既女係唔識，哈！哈) 

鐘唔鐘意返學！？

唔.........應該唔係太鐘意，但又唔係抗拒，因為佢從來無講過唔返學，但有天落雨，南瓜妹好開心：「媽咪，落雨呀！唔駛返學！」

但都鐘意同學同班主任，因為佢成日話要約 C 同學、Y 同學同李老師去波波池玩。

其他

-  16隻牙
-  23.1磅(10.5kg)

南瓜仔@高度跟進(3) - 醫院

11/10/2016 (48M23D)

由於覆診既時間係 11:45，所以早上我照安排南瓜仔返學，去到 11:00 就到學校接佢放學(但我10點就要係屋企出發)，然後再去醫院！！

第一次 K2 接南瓜仔放學，第一次見佢成日提既蓮姐(校工ee)，蓮姐仲同我講南瓜仔日日都同佢講早晨 / BYE BYE  ......

雖然一早同南瓜仔講會接佢放學，但南瓜仔見到我時都十分興奮，小朋友就是咁簡單！

************************

之後就去醫院 ......

度高：92.2cm (4個月 + 3.1cm)
體重：13.95kg

06/06/2016 (44M17D)：89.1cm (3個月 + 1.3cm )
15/03/2016 (41M25D)：87.8cm (0.5個月+ 0.9cm)
23/02/2016 (41M04D)：86.9cm

即由02/2016至今，7個月多，高了5.3cm  (**上網睇資料，按年約高 7cm 為正常)

明顯地，南瓜仔最近3個月高得快左，可能食多左飯 + 學跆拳道掛！？或是暑假帶多左佢出街玩呢！？

若果 ，南瓜仔 keep 住咁高，5歲就可以達到 3%，希望可以達標。

都唔駛等好耐就見到醫生 ......

醫生：「雖然都係偏矮，但都係跟住生長線，KEEP 住有高，睇番你同你先生都係唔高既人(我得154cm)，所以暫時都唔睇到有乜大問題，現在可能性有兩個，(1) 遲發育 (2) 遺傳。」

我：「我中四先黎 M 架！」(真係好遲先黎 ><)

醫生：「咁你真係好遲發育喎！」

我：「係呀！所以我中四五都有再高架！」

醫生：「通常都係跟爸爸 (我無問點解！？)，可能佢跟左你啦！」

醫生：「今日安排照下x-ray，照下骨齡，睇下佢係唔係真係遲發育 .......」

我：「咁我幾時知結果！？」

醫生：「都唔急，下次覆診先睇報告！」(下次覆診係下年4月 ><)


睇完醫生就去照 x 光 .......

入到去，醫生A(定係護士！？)想俾照 X 光既袍我，但醫生B就問南瓜仔：「你可唔可以自己一個人照呀！？」

南瓜仔：「可以！」

醫生B：「咁媽咪就係玻璃窗後面望住你啦！」

南瓜仔：「好！」

咁我就去左另一間房睇住南瓜仔照 X 光，見到醫生A教南瓜仔點放手仔係 X 光機上，南瓜仔又乖乖聽醫生指示，之後醫生C就按制照 X 光，一 take 過 ......

呢個媽媽心中就覺得南瓜仔又大個左啦！！


咩叫照骨齡！？當然我唔知係乜，返屋企上網睇資料 ......

簡單黎講，假設1個12歲小朋友，照完骨齡係 10歲，即係佢係遲發育，可以再高。

但由於南瓜仔只有4歲，照出來最多遲幾個月，但不會遲1年以上，所以照骨齡通常係俾10歲左右為最佳。

************************

其實我又唔係好擔心，又或講無得擔心，遺傳就無法，我同hd都係細粒既人，我可以做係叫南瓜仔食多d野，安排佢做d運動(學游水/學跆拳道/周未去公園玩)，將來係 150cm 定 180cm  就要睇佢自己啦 ~~~~~

不得不提，現時衛生署既身高是沿用 n 年前既數據，已經不合時而，只係一直都無去改，隨著小朋友既營養越來越好， 小朋友既高度越來越高，就好似南瓜妹既同學，全班高過佢都不足為奇，但有幾個同學足足高佢一個頭，即係一個2.5歲既小朋友有100cm以上 ........

相關文章： 

南瓜仔@矮小症！？
南瓜仔@高度跟進(1) - 健康院
南瓜仔@高度跟進(2) - 醫院

南瓜妹@K1大作戰 (序)

又黎大作戰啦 ><

有了南瓜仔既經驗，我再不會考10多間，明明收左都唔會讀，但又去報名/面試 ，浪費自己同南瓜仔既時間........

而南瓜妹目標好明確 -- 龍校 (其實都唔係叫"龍校"，間間都唔係100%直升) ><

真心唔想「小學大作戰」 (諗起南瓜仔要大作戰就怕怕，仲有一年時間咋)

針，沒有兩頭利。 

有朋友分享，龍幼教既野較淺 (係較淺，但都唔容易)，若原校唔收，又唔夠競爭力，咁點算！？？ 雖然唔係100%直升，但我就覺得只要小朋友乖巧、跟到學校學習進度，要直升亦非難事(相對考小學，始終每間小學都有唔到準則，要乎合佢地既要求，咪仲難)。

南瓜妹係大b + 女仔 + 能力不錯，但係就永遠唔鐘意面試，每次面試都係不合作 ，呢個問題真的不容易解決 ><

南瓜妹，希望你乖乖地合作，加油呀！！


而南瓜妹入到咩學校，對於南瓜仔就係好大既關鍵........

自行分配
- 南瓜妹入到港島區龍校，南瓜仔就會填 hd 既母校
- 南瓜妹九龍區龍校，南瓜就會填我既母校

若到時真係收左，亦考唔到直資或私小，就會搬家！

統一派位
若自行分配唔中，又無直資收咁點！？咁都係睇下南瓜妹點先，有可能搬去南瓜妹收左既龍校既地區，若無龍校收的話，唯有原區揀 ........

直資/私小
呢個真係好難，考得入已經好叻，仲要就埋南瓜妹更不是易事，所以呢個問題就等南瓜妹真係有龍校收先諗，現在諗乜都無用！哈！哈！

但諗諗下，若搬左就唔方便公公黎照顧南瓜兄妹！？咁點呢！？

我，係唔係諗得太多呢！？？？