南瓜妹@預祝3歲生日會

原本諗住再下星期攪生日會，但咁啱撞到表哥第二日要考試，所以就提前一星期攪，最緊要係齊人嘛！！^^

今年生日同上年一樣 book 左會所攪，只係約左我邊既屋企人，簡簡單單就算！

南瓜妹揀左minnie做主題！！

不過都係做左個 minnie 既 banner、生日蛋糕、餐具、生日帽、生日衫 (我放工去買衫，點知 hd 講：「你去左邊！？咁遲先回家！？」，真係想 xyz 佢，我都係遲左45分鐘回家，駛唔駛咁呀！？？好彩南瓜妹見到件衫不知幾開心，我先無發火咋！)


12/03/2017 (2Y11M19D)

呢日忙到呢........

一早，就帶南瓜妹去學跳舞，跟住就去維園睇「香港花卉展覽 2017」(我反對，明明要攪生日會，仲要去睇........)

南瓜兄妹又大個左，上兩年黎只係影下相，今年已經開始留意四周，順便講下乜叫「春天」！！

睇完就去食飯，食完飯就回家了，呢兩隻小豬就係車上瞓埋.........

係車上瞓完，就回家一陣，咁就出發去會所攪生日會啦！！

慶幸，南瓜妹有一班表兄弟姐妹(小朋友同小朋友係件開心既事)，呢班小朋友只係會所到跑來跑去已經好開心，只係聲到佢地既笑聲，呢個媽咪都開心埋一份！！

跑來跑去後，就去左埋玩波波池！

攪掂哂所有食物後(所以食物都係自取，所以要等 hd 拎上來，慳錢啲嘛！ )

 ↑ 只係簡簡單單既 pizza、KFC、壽司，仲有公公整既大蝦沙律！！


↑ 食完飯後就係唱生日歌 .......

5個小朋友都無爭吹蠟燭喎，所以南瓜妹好順利自己吹 (最初仲諗住每人吹 1 支添)

最後一個「節目」，就係送禮物，呢個係個個小朋友都鐘意既「節目」(我地安排埋回禮禮物，大家一齊有禮物收，開心啲嘛！)

完哂，就 bye bye (其實都係7點多，無法啦........第二日個個小朋友都要返學)


↑ 今次既生日禮物以書為主，因為屋企既玩具真係太多(其實書都好多)，南瓜妹越大就越鐘意睇(講)書，南瓜妹真係拎住書黎講，當然唔係睇字讀，而係睇住圖畫自己作故事(我覺得南瓜妹幾叻，有咁高既創造力！)

南瓜妹@35個月

21/01/2017 (35M)

食
最近學校教自行進食，若做到就有貼紙 .........

對於南瓜妹黎講，就作用不大，南瓜妹：「媽咪，我唔要貼紙啦，我唔食！」(其實未有學校貼貼紙之前，我都用過「印仔」計劃，但都係失敗)

而且仲差左，因為之前都可以餵食，現在連餵食都唔得，南瓜妹：「本書話要自己食！」(小姐呀！個問題係你唔肯自己食，又唔俾人餵.......你想點呀！？？)

結論係，仲衰過之前 ><

兩星期過去，南瓜妹都係咁(佢真係唔識肚餓)，唯有打俾班主任"求救"，因為再咁落唔係辦法，南瓜妹做唔到自己食，我都希望餵食佢食哂！！！ (小朋友有厭食既媽咪會明白 ><)

瞓
午睡：13:30 - 15:30
晚上： 21:30 - 07:15

雖然仲有叫我陪佢瞓，但我講幾句說話之後，佢又會自己瞓！！
 
發展 
- 數數：1-39, 41-49, 51-59.....91-99 (未識由39之後40，49之後50)，我都唔知點解佢會識數，因為我地無教，學校無教(學校教 1-10)！

- 記性越來越好，幾個月前發生既事，都可以清楚講俾我知 ......... 

- 越來越鐘意睇書。


返學
我去左學校講故事，不過南瓜妹係零反應，呆左！！
最慘係回家後，南瓜妹日日扮我講故事，又要我聽佢講，又要我舉手答問題，但佢唔係講幾次，係講幾十次呀！！！！><


放完假後，我問南瓜妹：「你鐘意返學定係放假！？」
南瓜妹：「放假！」
我心諗 ...... 點解我小朋友不鐘意返學！？佢咁懶！？學校唔開心！？
我：「咁點解！？」
南瓜妹：「我鐘意媽媽、爸爸、哥哥陪我玩嘛！」
突然"叮"一聲 .......
係喎 ......南瓜妹鐘意屋企人多過學校是正常喎！？邊小朋友不是鐘意屋企人多d呢！？(當然，最重要既原因是南瓜妹放假，我同hd都會輪住請假陪佢地，所以日日都有人同佢玩，若果得佢一個自己，或者佢應該鐘意返學多d ^^)

只要南瓜妹不是不鐘意返學就行！！！

其他

-  17隻牙
-  24.2磅(11kg)

2017 情人節

14/02/2017 (4Y5M26D) + (2Y11M24D)

「 情人節快樂！」

今年情人節，都係好簡單咁過 ........

呢間已係第七年黎，仲未"執"真係好叻叻啦！(現在既小店越來越少)

同前幾年一樣，都係提早食飯，六點鐘就去餐廳！(有小朋支會明，因為要返學嘛)

由於 hd 未能準時收工，所以我放工就要立刻回家，再帶南瓜兄妹去餐廳，好彩兩兄妹都合作，去到唔駛等位，yeah！！(我地食完後，出面有好多人等位呢 ......)

- 士多啤利魚沙律
- 刺身盛 (牡丹蝦、池魚、海膽)
- 甜蝦蓉和牛卷
- 脆皮芝士蟹肉卷
- 蒜片和牛粒
- 海鮮魚湯稻庭烏冬
- 飲品
- 甜品

 另外，仲叫左三件厚切魚生、玉子壽司同粟米壽司！！


↑ 食完之後就去左買個士多啤梨蛋糕！！


老土d講，只要有1大2小既情人一齊，天天都係情人節 ~~~~~~


11/02/2017 (4Y5M23D) + (2Y11M21D)

元宵節！！


↑ 對我來說不是什麼既日子， 不過 hd 襯帶南瓜仔去上興趣班時，偷偷地去左尖沙咀買蛋糕仔俾我，雖然不是什麼名貴禮物，但 hd 有心咁做，我已經好滿足 ^^

南瓜仔見到件蛋糕，就兩眼發光，又話想食！

咁我當然同佢「分享」啦 .....

點知，南瓜仔食左第一啖：「嘩！好好味呀 .......」(個樣仲要好滿足咁，我相信係好好味)

南瓜仔一口一口就入口，結果南瓜仔一個人就食哂 ><

其實南瓜仔應該要同我分享，唔可以獨食 (之前，佢地想食乜就俾哂佢地食 .......但現在心態轉變左，就係要佢地明白，不可以獨食，除非對方話唔食(我同hd會照食，只係會食少少，唔好俾佢地覺得，俾佢地食係理所當然)，否則唔可以一個人食哂)

不過，今次見佢咁滿足，就由得佢啦！(加上南瓜妹瞓左)

親子好去處@【2017 農曆新年(初一至初四)】

28/01/2017 (4Y4M9D) + (2Y10M7D) - 初一

首先就係同我地拜個年先......

之後就去6299家，班小朋友尋日先見過，今日又見！！

去完就出發去婆婆家，呢兩個小朋友就係車午睡 ~~~~~


29/01/2017 (4Y4M10D) + (2Y10M8D) - 初二

去左圍村睇，村長好好人，仲派利是俾南瓜兄妹添.......

佢地係隔年去對方條村，舞左個麟等佢地黎

放下爆竹，南瓜仔嚇到喊哂，d 爆竹聲太響！！


30/01/2017 (4Y4M11D) + (2Y10M9D) - 初三

去太婆家！！

晚上就去同事屋企！！


31/01/2017 (4Y4M12D) + (2Y10M10D) - 初四

同表哥、表妹(姐)一齊睇戲「魔海奇緣」 ......

原本只買了 hd 同 南瓜仔戲飛，但 hd 話不如帶埋妹妹睇！？？(吓！唔好玩啦！)

hd 仲不斷問南瓜妹，南瓜妹就話會乖乖咁睇，唔會走來走去 ><

好啦！信佢啦 ~~~~~~

南瓜仔睇睇下話要走，表妹就睇到(驚到)喊.........

呢套戲都係唔太啱太細小朋友睇！！

南瓜妹呢！？都係無專心睇，但就無走來走去，算係叫「進步左」！！


晚上，約了我的舊同學食飯！！

親子好去處@【2017 農曆新年前】

都係 hd 負責買辦年貨.......哈！哈！

22/01/2017 (4Y4M3D) + (2Y10M1D) - 年廿五

南瓜妹學完跳舞就同 hd 去行花巿！！

再公園玩！！

是日，南瓜妹既主題活動係幫手派「福袋」，但南瓜妹派到最後唔肯派，佢仲話d「福袋」係佢既！哈！哈！


25/01/2017 (4Y4M6D) + (2Y10M4D) - 年廿八

南瓜妹要返學，所以 hd 就帶南瓜仔去玩 ......

- 香港公園，當然要玩滑梯啦，南瓜仔最少玩左20次！！

- 搭南港島綫車 (都幾無聊喎)

- 行維園花巿


27/01/2017 (4Y4M8D) + (2Y10M6D) - 年三十

早上，我仲要返工，hd 就帶左小朋友去交通安全城，點知原來唔係踏四輪車，只可以三輪車！(咁都得？？)


下午，我可以早放，所以帶左小朋友去香港大學行下！！


6299 book 左 19:30 枱，但等到 20:25 先可以入座，21:00 先上菜 ><

返到屋企已經23:xx ，攪掂哂佢地，己經係零晨 ><

所以等二朝瞓到九點！！哈！哈！


新既一年，媽咪祝南瓜兄妹：
「身體健康！」
「快高長大！」 
(呢兩個永遠都係放係最高位置！)

加再多一句：「入到心儀學校！」
(做媽咪永遠都係有d貪心！哈！哈！)