親子好去處@2015 農曆新年 (初一至初四)

同上年一樣，有連續4日既紅日假期，但今次我無拎AL啦！(南瓜仔去K1面試、學校旅行/聖誕PARTY/GAMES DAY/家長日/頭一星期陪上學，而南瓜妹要去健康院/覆診等，真係多多假期都唔夠用！！)

19/02/2015 (29M) + (10M29D) - 初一

今日約埋表哥去太婆屋企(即我嫲嫲)拜年，南瓜仔怕羞又黎，唔肯講野，而南瓜妹仲樹熊上身，唔俾人抱。

↑ 南瓜仔與表哥

之後就上左家姐屋企拜年，再出街食飯(食齋)。

20/02/2015 (29M1D) + (10M30D) - 初二

回娘家食飯。


↑ 南瓜妹與表弟，表弟只得4個月，已經重過南瓜妹11個月 ><


↑ 永遠覺得屋企煮飯最啱自己口味！！

21/02/2015 (29M2D) + (11M) - 初三


↑ 一早就同南瓜妹慶祝11個月。(成日都要錫妹妹！)

↑ 晚上就約了我既舊同學出來食晚飯！

我地上左朋友屋企先，點知南瓜仔全程跟住我，去到出去食飯，就只係掛住同其他小朋友玩，理都唔理我！！

22/02/2015 (29M3D) + (11M1D)- 初四

由於姑仔一家去左旅行，所以初四先去6299家食午飯！

南瓜妹原本中午12點瞓，但去到3點仲未肯瞓，呢個時間又係南瓜仔午睡時間，南瓜妹終於上到巴士(去圓方)後就瞓左，但南瓜仔又唔肯瞓(車程太短，5分鐘左右)，但南瓜仔已經累到死，仲要嘈醒埋妹妹(只係瞓左30分鐘)..........攪左一大輪，佢先肯瞓！！

目的地：奧海城

等埋南瓜仔醒左，就去奧海城睇「功夫熊貓」，我地首先去左食晚飯，不過南瓜仔勁扭，唔肯落地行(可能係瞓唔夠)，最後話買蘋果汁俾佢飲，佢先正常番！！

食完飯，就去影「功夫熊貓」，可惜南瓜仔只係掛住跑，又唔肯影相.......


↑ 唯一企定定既相，南瓜仔不斷講：「我要煮飯！」

影完相就返屋企啦！！


↑ 「重見天日」既腳 (hd 成日話怕妹妹凍，成日包住佢對腳......)

我既一連四日假期咁就結束，但南瓜仔既學校假期仲未完結呢 ~~~~~~~

南瓜妹@11個月

21/02/2015 (11M)

是日年初三，仲有一個月就1歲日啦 ~~~~~~

06:15  奶 (8安) 
07:00  小睡
09:00  遊戲時間 
10:30  薯蓉 / 蕃薯蓉
11:00  遊戲時間
12:00  小睡
14:00  糊仔
14:30  遊戲時間
16:00  小睡
18:30  粥
19:00  陪大人食飯
19:30  遊戲時間
20:00  洗白白
20:15  遊戲時間
21:45  奶 (8安)
22:15  瞓

食
食粥要打到糊狀先肯食.......唉！

點解我既囝囡都係咁！？咁唔鐘意食野架！？？><

大便
1 - 2 次。

瞓
瞓得好好，半夜無乜喊。

能力發展 
-  識得講自己既乳名(單音)、APPLE (AR 浦)，唔識講哥哥！
-  由成人牽著手走路
-  會扶著傢俱從站立至坐下
-  能轉換姿勢，從坐著到爬行 
-  手多多，成日攪地櫃上既野 (南瓜仔叫佢唔攪，佢唔會攪)
-  惡到死，唔鐘意坐BB車，一坐就喊，要抱先停！><

其他
-  4隻牙  (有2隻出緊黎)
-  17磅 (瘦B)

↑ 11個月！！

原本有諗過訂番上次既蛋糕，但因屋企樓下又無聖安娜，又要早2日訂，所以都係放棄左……

南瓜仔話要買朱古力蛋糕，咁就成全佢啦！

南瓜仔@29個月

19/02/2015 (29M)

是日年初一！

食
上個月唔肯食菜，今個月都肯食少少，原因係有一次同佢澡涼前，佢poo poo左 係戒片度，佢就話好臭 (無開抽氣、窗，只係有開左少少門，d 味走唔到)，我咪同佢講：「你唔食菜，poo poo咪臭囉！」，佢之後幾日都肯食菜，但食左幾日又唔食.....

已全部轉哂惠氏金裝膳兒加(偏食配方)，希望有幫南瓜仔長肉啦(其實我覺得無作用，anyway試下無壞) ~~~~

戒片
多左講去vee vee (但poo poo 就唔講)，自己除褲同著褲去vee vee，我無主動教過佢，係佢主動話要自己除褲同著褲，問過老師話唔係學校教佢(因為天氣仲凍)，可能係學同學仔！？

而南瓜仔好叻叻，試過1次(15/2/2015)全日無濕過片 (這天我同南瓜仔全日係屋企，所以可以定時定候帶佢去洗手間)，每次去完我都勁讚佢！

瞓
平時返學回家後，有時唔肯午睡，可能係校巴瞓左！

晚上九點半左右就會瞓著！(若屋企無午睡，瞓落床唔夠1分鐘就瞓左！)

發展
- 說話
1. 越來越識表達自己，好多bloggers都話小朋友講野無時停，但南瓜仔就無。
2. 識得數1-29 (英文)，但有時會亂咁數。><
3. 間中會同HD / 工人姐姐講英文完整句字，但都係以廣東話為多。

- 用筷子食野 (食小食/水果)

返學
- 老師話佢好乖，跟老師指示做
- 間唔中會講學校事，例如：有同學亂咁走，走左去玩滑梯，老師罵個同學仔 (老師話有此事)

其他
- 24磅
- 16隻牙

南瓜妹@流感針(四價疫苗) - 第二針

18/02/2015 (10M28D)

年三十晚安排打針，我相信都無乜人........

因為上一支流感針打完(16/1/2015)，要1個月後先可再打第2支，但診所要去到2/3先開診，變相就要隔1個半月多，而呢支針又無乜負作用(即唔會發燒)，最重要係現在流感咁勁，都係早點打安全啲 ><

是日HD放假，所以由佢帶南瓜妹去！

結果，正如我所料，去到一個人都無，yeah！！

南瓜妹都係喊左幾聲就無喊，都幾叻女！

打完就快快回家了 ~~~~~~

2015 農曆新年

祝大家：「身體健康！」「恭喜發財！」「心想事成！」

16/02/2015 (28M28D) - 年廿八

今年希望南瓜仔幫手(最後係破壞)，所以我安排佢幫手入利是，點知......

↑ 南瓜仔一開利是封就講：「好臭呀！好臭呀！好臭呀！」一路講按住個鼻！(指利是封，真係有點臭)！

跟住仲推走所有利是封，見到咁，就知道封唔成 ($20)！

↑ 咁唯有封其他利是 ($100 同 $50)，我係叫南瓜仔俾利是封我，我就將錢放入去，最初都好地地，但封封下就破壞，將啲利是封玩來玩去，我唯有一路教一路快快封埋利是.......

我有個習慣，係將一家人利是 (即娘家、6299家) 放左一起，再數清楚有無封漏。

我：「嗱......呢封XX表哥、呢封XX表妹、呢封XX表弟......」

南瓜仔：「咁我呢！？咁我呢！？咁我呢！？」

我：「呢封你架！」(咁先可STOP佢)

封哂 $100 同 $50，我就封 $20，由於南瓜仔話利是封臭，所以我無俾佢，所以叫佢坐埋一邊玩車，點知又唔去玩車.......

南瓜仔：「咁Uncle WAI 同 FUNG Auntie！？」(放學校巴司機同姨姨)

係喎！？我無諗過封利是添！！！但我點俾呢？早上上校巴時間好趕，好似無乜機會俾，放學就容易，因為南瓜仔係最後落車既小朋友 (早上校巴同放學係唔同人)......

南瓜仔係一大封利是封搵(我每年都買利是封，所以有好多唔同款利是封)：「呢個俾Uncle WAI 同 FUNG auntie！」

而南瓜仔係不斷重覆再重覆，叫我封利是俾Uncle WAI 同 FUNG auntie.........

當然我最後都完成佢既"心願"，唔係唔駛收工！！

↑  原本我叫hd唔好買咁多野，屋企都無人黎拜年，但hd話要俾南瓜仔乜叫做"新年"，咁佢又講得啱！！

17/02/2015 (28M29D) + (10M27D) - 年廿九

上個星期五(年廿五)，南瓜仔學校便服日，我一早買左件紅色elmo衫俾佢新年著(南瓜妹就買左紅色外套)，所以無諗過買華服，點知「中伏」左 ......

去到上校巴地點，所有校巴友都係著華服，當上校巴時，我仲發現全架校巴既學生全部都係著華服 ><

我好後悔無買俾佢，所以即日 (年廿五) 係公司同屋企附近(千色點、AEON)搵，點知全部唔啱 ......
 
↑ 係大灰意冷之際，今日(年廿九)細妹同我講觀塘有得賣，我就係LUNCH TIME 時間去買，最後係買到啦！

↑ 一係唔買，一買就買俾佢兩個！哈！哈！

新既一年...

媽媽祝南瓜仔同南瓜妹.......

「身體健康！」
「快高長大！」
「聰明伶俐！」
「食多啲飯！」