2018 母親節 @ 塔門

13/05/2018 (5Y7M24D + 4Y1M22D)

又到母親節啦！！

我地首先去左西貢松記食車仔麵，之後就搭巴士入黃石碼頭，再搭快艇入塔門 (南瓜兄妹太愛搭快艇，全程笑唔停)

明明又人同我講係「平路」，結果........ 當然唔係啦！><

今次唔同上幾次行山，因為天氣真的好熱、好熱、同好熱 (重要野，要講三次)，所以今次南瓜兄妹係有唔願意行 ><

「吓！仲未到！？」、「要行上山！？」(望住好高既山)、「又要去景點！？」、「我好熱」、「咁咪好攰？」、「出唒汗啦.........」

其實呢啲全部都係我心底話，我堅唔想行 ........ 但為左小朋友，我都要同佢地堅持，最後當然成功完成啦！！

↑ 環境真的好美，而且仲有好多牛 .......屎！=.="

用了 2 小時就行完，真係少啲體力都唔掂 ......

回程時，當然要飲凍冬飲品 同 食菠蘿冰啦！！


原本諗住 18:00 前可到商場，點知遇上塞車 ><，去到商場時已 18:10 ........餐廳都排哂長龍 ><


↑ 我地又好好彩，正想回家食飯時 (我真係唔會等1小時，我攰到想死)，啱啱行過酒樓，又咁啱有人取消 booking，我地唔駛等位啦，最重要係食物質素不錯！！

回到家，就食蛋糕 ........

 ↑ 母親節禮物，全部都同「花」有關！哈！哈！

南瓜妹@ MMRV

12/05/2018 (4Y1M21D)

我係一個「預防勝於治療」既人，所以知道麻疹爆發(日本及台灣)，而我地暑期會去旅行，所以決定帶南瓜妹去打針！！

南瓜仔係打 MMRV(自費)， 所以就打齊2針，唔駛打針！！

南瓜妹就跟健康院，只係打左1針 MMR + 水痘 (因上當年，因為南瓜仔打完 MMRV 發高燒，所以唔多想打 MMRV )，因第二針要小一先打，所以唯有自費去私家打 MMRV！！

上次南瓜妹打流感針喊到九彩，所以我都有定心理準備，點知 .......

南瓜妹喊都無喊，仲要個樣好似無野發生！？？？點解會咁！？真係唔痛！？

姑娘見南瓜妹咁勁，送了好多張貼紙俾佢！！ (之前有個小妹妹都見同一個醫生，只得2張貼紙，所以佢覺得自己好叻！哈！哈！)

事後我再問南瓜妹：「你好叻叻，真係唔痛！？」
南瓜妹：「一啲都唔痛！」
 

南瓜仔@第一次跆拳道比賽

當初報跆拳道，目的只是希望南瓜仔做運動，可以幫助增高，同埋希望在一個無壓力下開開心心地玩，所以即使跆拳道導師叫南瓜仔考帶，hd 都拒絶左！！

拒絶考帶後，教練話有一個比賽，希望南瓜仔可以體驗下比賽既感受 ........

最初 hd 係反對，不過我係想俾南瓜仔玩下，話哂成個幼稚園生活中，他從未比賽喎，咁就參加了！！

比賽前一天，教練一早已同我講，同佢同組比賽既小朋友全部都大佢一年，最重要係感受下大場既經驗！！

當時我都知，第一場就 out，一個無俾心機練習，上堂又玩多，邊可能會入圍！？？不過都下玩下，唔駛咁認真 ....... 原來，我錯了！！


29/04/2018 (5Y7M10D)

比賽日當天，hd 要返工 ><

因為想帶埋南瓜妹去，但又怕南瓜妹要去 vee vee，南瓜仔又要換衫等等，所以就叫埋 e ma 幫手！！

等比賽時間等得好長好長..........

當我見到南瓜仔對手時，天呀！！全部高佢半個頭以上，南瓜仔身型真係輸哂 (仲要無去練習過) ><

臨出場前，南瓜仔有點想「縮沙」，不過最後都跟教練出去比賽 ........

↑ 對手真係幾勁，但我見南瓜仔有盡力去比賽，我覺得已經有交代，所以場比賽一完左，我就攬住佢講「打得好好！」

可惜，南瓜仔雙眼已有淚光 (我從未諗過佢會喊，因為我一心覺得係黎「玩」)

教練見到佢喊，都上前安慰佢，不過南瓜仔當然聽不入耳啦 .......

南瓜仔既淚框既淚水一直 keep 住，直至係車上瞓左！！


晚上，我再同佢傾計，我希望南瓜仔明白幾樣野 .......

(1) 比賽，一定有輸有嬴，不會你嬴哂
(2) 無付出，唔好望有回報，呢個世界無咁多奇蹟


呢個係一個好好既經驗，要嘗試過失敗，才會知道成功既可貴！！

南瓜妹@戒除吮手指

真在太感動，南瓜妹終於「戒毒」(吮手指)成功！！

南瓜妹吮手指既習慣，應該係6個月後開始(南瓜妹出生就無用奶咀，而當時已經6個月，所以就無理，點知........)

當然係唔同時候都試過幫佢「戒毒」，但次次都唔成功.......

直至4歲後，南瓜妹吮手指越來越嚴重，但之前只係睡先吮，到後期就無時無刻都吮，hd 睇唔過眼，而且就黎放復活節假，決定「戒毒大行動」，再用「苦水」(寶寶手指水)！！


「戒毒」第一天 (27/03/2018)

一用，南瓜妹喊到死去活來 ......

晚上，更喊得更嚴重，因為無得吮手指瞓 ，可能喊得太攰，係喊聲中就瞓左 ......

去到第二朝，一早就喊醒，因為佢吮左手指，苦到佢喊鑤！！


「戒毒」第二至四天(28-30/2018)

南瓜妹主動俾我楂苦水！！

呢幾晚，都係喊到死，而南瓜妹仲同我講：「媽咪，我真係好想食手指 .......(喊)」

我只能安慰佢，拖住佢既手仔睡........直至佢瞓著！！

但到第二朝，佢又會喊醒，因為佢又吮手指！！


「戒毒」第五至六天(31/03 - 01/04/2018)

 晚上都係喊住瞓，但第二朝再無喊醒，即係成功在望！！


「戒毒」第七天 (02/04/2018)

自己楂苦水添！哈！哈！

這天，我知道已經成功！！！

 「戒毒」成功，送上佢最想要既禮物 ....... 指甲油！哈！哈！

南瓜兄妹@驗眼

11/04/2018 (5Y6M23D + 4Y21D)

因前幾天同南瓜妹去左健康院驗眼，但結果令我有點擔心，所以都係出去驗下眼 ......

當然，最出名當然係理大既驗眼，但係要排期(我想快點睇)，而我更唔想去到咁遠，最重要係我暫時未覺佢地眼睛有問題(否則應該帶佢地睇眼科醫生)，所以都係搵屋企附近！！

上網搵下資料，竟然搵到南瓜妹同學既相既網頁(Facebook)度！？？原來係南瓜妹同學既爸爸既朋友開  (係開眼鏡店，不過就有驗眼服務) ~~~~~

咁當然問下朋友服務好唔好啦 (其實唔好，我朋友都唔會去啦 ><)，最後就 book 左即日驗眼！！

因為上次南瓜仔驗眼已係年半前，所以都幫南瓜仔驗眼 (隨著南瓜仔越大，睇電子產品亦多左)，驗既過程都知南瓜仔對眼好好，佢差不多問到所有問題 .........

結果，當然眼睛正常，仲有50度遠視！！


到南瓜妹 ........ 南瓜妹既表現都好好，結果都係無事，對眼睛好健康！！

不過驗出來結果同健康院都有分別，健康院 (50度散光 / 150度遠視)，而今次 check 係 (0度散光 / 0度遠視)！？？點解會咁呢！？？

anyway，南瓜妹係 0度遠視，即係佢好容易會有近視，所以我都要好好保護佢既眼睛。

驗乜野！？

1.      屈光檢査

2.      斜視檢查

3.      色覺測試

4.      量度眼壓

5.      眼睛內外檢查

6.      眼底影像

7.      角膜矯形

驗眼：博視專業驗眼中心
費用：$180