南瓜妹@向“嘔奶”SAY NO (4) - 大行動

18/08/2014 (4M28D)

出院回家後，馬上買左美素佳兒 COMFORT，呢隻奶係高稠度，打左美素佳兒問，要用75度水溫既水，所以沖完奶後，要待10分鐘後才能餵奶。

開出來既奶較CREAMY，所以要轉十字(奶樽)奶咀或大一號既(奶樽)奶咀，這會比較容易俾BB吸吮，而我之前用既DR BROWN 可能不合用，所以就用番最初用既CHU CHU，再將原本既奶咀切深少少"十字"。

另外，只能去屈臣氏、萬寧或向他們訂貨，藥房等地方無得買！

亦跟醫生指示，餵奶時間以30分鐘為限，過了時就不再餵！

18:00  無嘔奶
22:00  有嘔奶 (舊奶粉)

19/08/2014 (4M29D)

這天全轉新奶粉，但嘔了3餐！

為何跟進醫生及營養師既指示，都係嘔！？ 

↑ 開始試食糊仔，但南瓜妹仲未坐得好好 (南瓜仔當時已可以自己坐1分鐘)，而食糊既反應都係麻麻！

20/08/2014 (4M30D) 

好開心呀，只係嘔左1餐，仲要嘔左少量！

而且現在每餐只係餵30分鐘，自己/hd 成個人都輕鬆左，之前餵奶+掃風一個要用8-10小時，現在只用5小時！！

若某一餐奶只食60ml或以下，我會一小時後再補奶！

21/8/2014 (5M)

雖然嘔了2餐，都係嘔少量！

試了幾日，嘔奶既情況真的有所改善......

-  由從前1日5餐，到現在只係1-2餐
-  由嘔 30-90ml，到現在只係嘔10-30ml

希望南瓜妹繼續努力，明天覆診！

22/04/2014 (5M1D)

陪妹妹覆診，我同HD都請左假，南瓜仔由母親大人照顧！

雖然約左10:30 見劉醫生，但我地提早到，因為南瓜妹要10點食奶， 餵完掃完就埋埋好！(睇政府醫生預左要等)

見劉醫生啦，都係講番呢幾日既情況，嘔奶情況有所改善，劉醫生都叫我地唔駛咁擔心，所以安排1個月後覆診！

南瓜妹，我地真係好希望你快快唔好再嘔奶，你真係好瘦！！

南瓜妹@5個月

21/08/2014 (5M)

今日個有好大變化，就係嘔奶嚴重左......

帶左南瓜妹去睇私家醫生，再轉介去政府醫院！！

未睇醫生前

06:00  奶 (6安) 
07:30  小睡
10:00  奶 (6安) 
11:30  遊戲時間
12:30  小睡
14:00  奶 (6安) 
15:30  小睡
18:00  奶 (6安)
19:30  遊戲時間 (自己玩)
20:30  洗白白
20:45  遊戲時間 (與南瓜仔玩)
22:00  奶 (6安)
23:30  瞓

睇完醫生後

06:00  奶 (5安) 
07:00  小睡
10:00  奶 (5安) 
11:00  小睡
12:00  遊戲時間
14:00  奶 (5安) 
15:00  小睡
17:00  遊戲時間
18:00  糊仔 (少許)
18:15  奶 (5安)
19:15  遊戲時間 (自己玩)
20:30  洗白白
20:45  遊戲時間 (與南瓜仔玩)
22:00  奶 (5安)
23:00  瞓

食
由於上個月去健康院太輕磅了，所以加左南瓜妹既奶量，由5安加去5.5安半先，再加至6安奶，但都係嘔番1-2安出來，嘔足5餐，所以帶去睇醫生！！

經醫生同營養師指引下，轉了高稠奶 (美素佳兒 COMFORT)，每次餵30分鐘內，食完再抱住佢30分鐘，暫時效果令人滿意，只係嘔1-2餐左右，而且只係嘔少量！

亦可以試食糊仔，只係食少少，南瓜妹好似唔係LIKE囉！

南瓜妹，加油呀！

大便
平均一日 1-2次。

用緊S碼片，唔知幾時先要換M碼片呢！？？？

瞓
平均13-14小時。

能力發展

-  轉身/反身 (因南瓜妹成日嘔奶，所以無同佢TRAIN過！)
-  捉住物件 (係捉得好實，玩成幾分鐘)

↑ 5個月啦！！

影左20張以上，無1張叫靚 ........ 唔係南瓜仔唔望鏡頭，就係妹妹喊！！！

南瓜妹@向"嘔奶" SAY NO (3) - 睇政府劉進源醫生

18/08/2014 (4M28D)

今日我拎了假帶南瓜妹去醫院，HD就返工，母親大人就黎我屋企睇南瓜仔！

我帶埋BB車，所以搭的士唔太方便，所以要搭港鐵去到坑口站，再行路去醫院！

因將軍澳醫院有幾座大樓，路痴既我，去錯了大樓，當我一路推住南瓜妹時，我真的好想喊，我真係覺得好辛苦 ~~~~~

最後我都準時到醫院！！

去到無耐，就見左主診醫生，都係問一大堆問題，問完之後就等見仁安話最好既腸胃科醫生 - 劉進源醫生 (DR DAVID LAU)！！

又到餵奶時間，餵完奶就等劉醫生(顧問醫生)！！

等到十一點幾，劉醫生就見南瓜妹，仲帶住一班醫生........

南瓜妹可能知要睇醫生，係劉醫生斷診時，南瓜妹嘔左兩次！！

劉醫生既斷診：

南瓜妹係生理性嘔奶，唔係病態嘔奶(嘔綠色物，成日忟)，所以唔駛用藥。

- 食高稠奶 (轉介俾營養師)

- 試食糊仔

- 餵20-30分鐘奶，食幾多就食幾多

- 若打直抱佢，個肚唔好曲住，條腰要直。

劉醫生話雖然南瓜妹係重體生長線跌左，但佢既高度與體重係成正比，唔係瘦B .....

南瓜妹出生重，係因為我陀佢時有妊娠糖尿，所以先令致佢出生大隻，睇番我同HD本身都係細小型，而南瓜仔亦係細隻B，所以南瓜妹2個月後就跟番遺傳，所以輕左都叫正常，唔會再跌出生長線！！

睇完劉醫生，再等見營養師 ........

當時差不多1點，我開始肚餓，本我我諗住用BB車推南瓜妹一齊去買野食，但姑娘話唔可以，叫我放係BB床！

↑ 但南瓜妹係病床都唔肯瞓，360度轉身，又反身，又轉番身，仲將隻腳伸出床欄，又唔識自己收埋隻腳，之後就喊，真係傻妹！！

 
↑ 好彩南瓜妹係BB車上肯瞓，但係放南瓜妹係車，我又唔敢行開，最後都係無野食！！

又要餵奶時間，聽劉醫生話只餵30分鐘，南瓜妹只係食左90ml，但都有嘔少少！

等到3點幾，等到營養師，教點調高稠既奶。

↑ (1) 美素佳兒 COMFORT 奶，係高稠奶

(2) 可自己調，用熱水開一匙米糊，再隔(開完當熱水用)，再加入1安奶！(但呢個比較麻煩，因為可以自己調出來既稠度未必啱，另外，因工序越多，有衛生問題)

見完營養師，就打俾HD商量邊樣好，最後都係覺得買現成！！

最後，劉醫生再睇多次南瓜妹，就批準出院，幾日後再覆診。

P.S: 劉醫生真係好好，唔會嚇我，仲講南瓜妹好少事，唔駛食藥，只要跟足佢指示做就夠。

南瓜妹@向"嘔奶" SAY NO (2) - 睇政府醫生

17/08/2014 (4M27D)

好彩有屋企人幫手，家姐同表哥睇住南瓜仔，我就同HD帶南瓜妹去醫院！

首先去急政室，唔夠10分鐘就去到分流站！

初步見完分流站醫生後，就安排入院........

係等醫上病房時，南瓜妹又嘔奶！！><

上到病房後，就安排見醫生......

醫生都係問了一大堆問題，又做了簡單既檢查！

之後醫生就安排抽血同照X光！

當抽血時，醫生叫我地門外等候，期間，不斷傳出南瓜妹既喊聲，未停過！

醫生：「BB 不斷咁喊，令到佢血管收縮，佢既血管又好幼，暫時仲未抽到，不如等照完X光後再抽過！」

見到南瓜妹腳上同手上貼上了3張膠布，真係心痛死！！

之後就去照X光，因只可1家長陪同，我就係門外等候！

照完再上番病房，佢地再安排抽血......

又係傳來南瓜妹既喊聲，好彩今次就抽到血，但妹妹身上又多2張膠布，一共有5張膠布！

↑ 南瓜妹喊到眼到腫埋！！

又到南瓜妹食奶時間，南瓜妹又係嘔奶 ......唉！！

最後既報告.....

1) X光，腸道無任何阻失 (YEAH)

2) 抽血結果，酸鹼度既鹼高了少許 (醫生話應該係嘔了胃酸出來，影響不大)，其他全部正常！

因為今日未能見大醫生，南瓜妹留係醫院都無用，所以我地要求「回家渡家」(即留病位，明早回醫院)

體重：5.72KG (除哂衫同尿片)

南瓜妹@向"嘔奶" SAY NO (1) - 睇私家醫生

16/08/2014 (4M26D)

南瓜妹一直都係嘔奶，去健康院話可能嘔到6個月，亦去政府排期，但排到11月！

我倆諗過帶妹妹去睇私家，但覺得睇私家醫生都無幫助啦，可能都係叫我地「耐心等待」！

這天，放工回家後，HD 同我講：「佢成日嘔奶，帶睇私家啦！」(我個人覺得係嚴重嘔奶)

咁就帶去睇仁安既醫生！！

醫生問一大堆問題，又做了簡單既檢查後......

醫生：「佢輕得太多啦！我寫信轉介信去將軍澳醫院，因為即使嘔奶，都無可能輕得咁多，入院做查檢最好！」

醫生：「我初步睇，應該係腸胃既問題，唔似係腦有問題，我剛剛做了檢查，佢既反應正常，唔駛咁擔心！」

我：「 你地醫院無得安排！？」(我有幫南瓜妹買保險)

醫生：「我唔係唔想收你證，因為將軍澳醫院兒科好全面，我地 (仁安) 無腸胃科醫生，全港有2個，一個係將軍澳醫院，另一個係威院，而將軍澳係師傅級！」

醫生：「我地係想將最好俾BB！」

醫生：「你明天拎住我封轉介信去將軍澳醫院急症，佢地實收你，因今日同明日都係假期，你星期日先入去，咁就星期一就有得睇！」

↑ 最後開了支藥給南瓜妹，但南瓜妹食完都有嘔奶！！

體重：5.84KG (有衫同尿片) 

南瓜仔@23個月

19/08/2014 (23M)

仲有一個月就2歲，好期待呀！！

10:00  早餐 - 奶 (6安)+餅
10:05  遊戲時間
12:00  午餐 + 水果
12:30  遊戲時間
14:30  午睡
16:30  下午茶
16:45  遊戲時間
19:15  晚餐 + 水果
19:50  遊戲時間 (自己玩)
20:15  洗白白
20:20  遊戲時間 (與妹妹玩)
21:30  宵夜 - 奶 (6安)
23:00  瞓覺

工人姐姐放假，我就變左「工人」，我一個月內已經輕左6-7磅，變番 8X 磅，又變人乾，仲要勁甩頭髮！！

每日lunch time 就去買餸/日用品，放工五點半就要返到屋企家務......

洗奶樽、煲水、換片/餵奶 (南瓜妹)、抺PLAYMAT、收衫/摺衫、洗碗、掃地/拖地、洗衫 (因南瓜妹嘔奶，所以小朋友衫要用人手洗左先，再放入洗衣機，一日洗大人衫，另一日就洗小朋友衫)、涼衫、再洗奶樽、再煲水，咁就差不多晚上十二點了，第二朝又要六點起床，換片沖奶 (由HD餵奶，我就瞓多一陣先返工)

這就是我一天既工作，全職媽媽辛苦，但在職媽媽無姐姐，都係好辛苦！！

HD放假中，但佢既工作都好唔得閒，雖然母親大人有黎屋企幫手，但主要都係HD自己做番，餵奶(每次都要餵1小時)、煮飯(午/晚)、洗碗(午)、餵飯(南瓜仔)、沖涼(南瓜仔、南瓜妹)，仲要陪佢2個玩！！

好彩係南瓜仔/南瓜妹，晚上瞓得好，唔係我一定死左！！
 
食
間唔中又唔肯食，都唔知佢想點！？？我真係「零」心機，我都無咁多時間理佢，由hd負責.....

但佢又間唔中肯食哂，仲可以食4隻雞翼添。

最鐘意食水果，特別係藍莓，勁食。

大便
一日 2 次！仲未戒片，完全係「零」心機想同佢戒！哈！

瞓
平均瞓 12小時！！

佢要我地陪佢入房佢先肯瞓，唔係佢就會走出廳，我要等到瞓左，先可以出返廳做家務。

能力發展
1) 說話/認知：

- 講野都係差不多，講詞語為主，而句子比上一個月多左。

- 最鐘意係表哥，日日叫住表哥既名，要 TANGO 同表哥傾計，我問南瓜仔屋企有乜人，南瓜仔答：「爸爸、媽媽、表哥(表哥既名)！」(唔記得細妹 ><)

- 問住係邊(地區)！？幾多樓！？幾多歲！？都識得答，但有其他人就乜都唔答，面試 -- 死硬！！

- 自己數1-20 (英文)

- 識得唱20首歌，咁當然唔係成首歌唱到哂，但都有7-8成。

2) 自從南瓜妹出世後，好多野都俾左妹妹，包括BB床、BB車(由15個月左右，南瓜仔已經無用BB車了)、HIGH CHAIR、玩具，南瓜仔完全無所謂！

但南瓜仔勁鐘意HIP SEAT，平時一見到HIP SEAT 就一定會用，第一次俾妹妹用，南瓜仔就叫住要用，但好彩叫左1分鐘，佢就無再叫用，乖仔！

3) 用腳趾尖行路 (都唔知邊度學！？)

其他
- 瘦b (21.6磅，終於重左0.3KG)
- 16隻牙

↑ 23個月。

南瓜妹@再轉奶粉 (A+ 親舒易消化)

30/07/2014 (4M9D)

南瓜妹嘔奶情況一直都無改善......

最基本既全部都做哂.....

1) 唔好一次餵咁多，分開幾次餵 (我地最多餵60ml 就停，之後就掃風)

2) 餵完抱直30分鐘

3) 南瓜妹食奶前好少喊，應該無乜風

4) 由chu chu 轉左 Dr Brown 奶樽 (話排氣會好一點)

經朋友介紹下，轉左奶粉....

最初食能恩，但無乜便便就轉左惠氏S26，現在轉左美贊臣 A+ 全護系列(親舒易消化)。

↑ 有助嬰兒嘔奶、脹氣、煩躁不安及哭鬧

呢隻奶粉都唔平，400g $186，900g $399，仲要樓下藥房無得賣添！！><

開始轉奶粉，頭1-2日就轉左1餐先，第3日就轉2餐，因南瓜妹好合作，照食，所以第4日就全部轉哂 (1日5餐)。

轉左之後，南瓜妹既小便多左，掃風容易左 (一掃就掃到)，但嘔奶情況無乜改變，都係嘔，但都轉左奶粉，都唔想轉番之前奶粉，希望 KEEP 住食真係好會轉好！！

另，南瓜妹重得唔想理，所以4個月起由5安轉去6安 (但嘔1-2安)，頭4餐嘔左唔會補奶，晚上若嘔得多，就會補奶！！

南瓜妹，你可唔可以唔好再嘔奶呀！？？？？

南瓜妹@第2次私家疫苗(五合一/輪狀)

26/7/2014 (4M5D)

打第2次私家針，打五合一無細胞疫苗、食輪狀病毒疫苗。

因為食輪狀前要1小時食完奶，所以改左南瓜妹最早支奶，推後左支食奶時間，南瓜妹早上又無喊要食奶喎！

要帶2個咁細既小朋友出街，真係要預多點時間，我地係book左10點打針，但10點先出門口(哈！)，車程仲要30分鐘左右，打私家針姐，遲到無所謂啦！！

今次南瓜妹唔合作，勁喊，喊唔停，仲俾醫生話佢唔乖、好難教.......

我心諗，南瓜妹不知幾乖，平時好少喊，就使喊，一抱上手就好快停，你仲乜話佢喎！？？(我都唔知點解佢無端端扭架！？)

好不容易先食完輪狀 (基本上分左2次食，但每次都係少少咁餵)，再打埋支針。

但一出醫生房門，南瓜妹就嘔........

唉，都唔知佢係唔係嘔哂輪狀出黎！？都唔知點算好！？駛唔駛補食！？

(後記：hd 去左衛生署網睇，話食左1ml 都好足夠保護，唔駛補喎！！)

最奇怪係.......南瓜妹嘔完無喊，仲瞓埋添！？？？？

之後就同南瓜仔出街食埋飯，先返屋企！！

南瓜妹@手模 (打手印)

19/07/2014 (3M30D)

南瓜仔係初生時，有朋友送左手模相架俾我，所以就幫南瓜仔整......

咁南瓜妹呢！？

諗左一陣子買唔買好，因為價錢都唔平，要成四百幾蚊，但我真係好鐘意個相架，真係好靚，所以都係決定買個一模一樣送係南瓜妹！！

南瓜妹好合作，hd 負責打手印，我就負責抱住南瓜妹，整左兩次就成功打好手印，乖女！

↑購自 HALLMARK，靚嗎！？

買左幾日後先幫南瓜妹打手印，打完手印後，又要哂相，但懶到出汁既我，一直都係"拖"，最後 hd 攪掂揀相，不過就係我拎出街哂同cut 相架！！


↑ 呢個係南瓜仔既完成品！！(DAY 109 @ 手模 (打手印) )

期待南瓜妹既完成品！！