南瓜妹@向“嘔奶”SAY NO (6) - 見營養師

14/10/2014 (6M23D)

上次因颱風關係，改左今日先有睇....... (浪費了我半天大假！><)

去到就磅重，6.4kg。

等了半小時就見到營養師.......

營養師首先問嘔奶情況，南瓜妹已經無嘔奶啦！YEAH！！

現時體重係10%，比之前跌至3%已進步了好多！(都係輕b)

南瓜妹係食特別配方奶 (美素佳兒 COMFORT)，我就問下幾時先可轉正常奶粉！？

營養師建議暫時唔到轉住，等南瓜妹食2餐固體後，才開始轉番正常奶粉，不過佢都話，若我真的想轉，都可以現在試下，但竟然營養師咁講，我都唔轉住.....

但買呢隻奶粉就不太方便，之前可以去屈臣氏或萬寧買，現在已經無得買(職員話唔入貨喎！)，我只能向美素佳兒直接訂購，我最怕係佢地會停產，因呢隻奶粉需求不大，無普通奶粉咁賺錢！！><

而固體(糊仔)方面，分量正常，繼續keep住食！

睇完就回家，之後就要返工！！

題外話：

我覺得自己對南瓜妹唔好，因為我好多時間都放係南瓜仔身上，每天陪佢玩既時間真的不多，今日陪佢去醫院，我有幾小時可以陪佢，南瓜妹開唔開心我唔知，但我就好開心！！

↑ 可愛既妹妹！

2014 國慶 + 重陽 (冒險樂園 J PLUS)

香港發生咁大件事，我都有帶南瓜仔、南瓜妹去街，但被「佔」既地方我就不會去！

01/10/2014

前一天，我問南瓜仔：「明天同表妹去玩波波池好唔好呀！？」

南瓜仔：「好！」

我：「咁帶唔帶妹妹去！？」

南瓜仔：「妹妹留係屋企！」

我：「咁爸爸呢！？」

南瓜仔：「留係屋企！」

我：「咁媽媽呢！？」

南瓜仔：「留係屋企！」

我：「吓！咁邊個帶你去玩！？」

南瓜仔：「姨媽！」

呢隻仔，咁快唔要爸爸媽媽，但見佢好似好想姨媽去，所以就約埋姨媽一齊去，多個人睇住都好嘛！哈！哈！

約埋表妹去左油塘冒險樂園 J PLUS 玩，但南瓜仔只係掛住玩車，其他野只係玩左一陣！

玩到12點就去午餐，之後就回家休息。(南瓜妹出黎都無玩過，都幾無聊！哈！)

午睡完，啱啱62就黎左我屋企，62走左後，再約表妹去公園玩，之後就黎我家食晚飯。

02/10/2014

帶佢地去圖書館還書，再去公園放一陣電，再回家。

食完午餐後，休息一會兒，就帶左佢地落樓下會所游水......

南瓜妹仲細，所以只係游30分鐘，我就帶佢回家，而HD就繼續同南瓜仔游！

南瓜仔游完水，食了茶點，就午睡！

瞓醒完，就要做功課 ......

唉，其實都唔係南瓜仔做，係家長「幫手」做！>< 

這兩天假期就完了！！

九二八 (歷史博物館 + 九龍公園)

28/09/2014 

我相信呢個係好難忘既日子........

南瓜妹出世至今，都未試過出全日街，(因之前狂嘔奶，所以都係留係屋企)，原本諗住開開心心咁去街，點解就發生左「九二八」事件，作為香港人，見到香港變成咁，真係好心痛！

講番正題先.....

餵完妹妹食完餐奶就出發，去到時差不多12點，所以就去左 i square 入面酒樓食野先(好彩有得訂位)，食完午餐就去左玩具反斗城，南瓜仔玩到唔想走。

差不多2點，就餵埋妹妹食奶先出發歷史博物館！

估唔到南瓜仔對歷史博物館好用興趣，不停咁睇，hd 亦在場解釋 (雖然應該唔明)，而南瓜妹就瞓左！

睇完之後，南瓜仔就9秒9就瞓左.......

咁我地就搵左個地方休息下，食下野！

待南瓜仔醒左就去左九龍公園玩，玩完又到南瓜妹食奶時間 ......

當時差不多6點，啱啱警察放了催淚彈，HD 就開始(手)機不離手，待餵完妹妹後，就快快搵間餐廳食，因為hd要快快回家睇新聞......

南瓜妹@第3次私家疫苗

29/09/2014 (6M8D)

除左南瓜妹打六合一，南瓜仔都要打甲型肝炎疫苗，原本係同HD一齊去，後來話要去開會，陪唔到我地一齊去........

但我一個人，點帶2個出街！？我唔想工人姐姐同我出去，所以叫左家姐陪我！！

去到等打針時，順便幫南瓜妹磅下重，咦，有6.3KG 喎！

打針啦~~~~

南瓜仔同南瓜妹都俾醫生話太瘦，我都無法架！！！

不過，佢兩個好叻，喊左幾聲就無喊！哈！

之後，HD就開完會，就同我地一齊食飯，行下街！

南瓜仔勁鐘意姨媽，不斷狂叫姨媽抱，我同hd抱都唔得....... ><

因為我之後約左人，就帶南瓜仔一齊走，hd就帶妹妹番屋企，姨媽都要走，南瓜仔勁唔捨得姨媽，我話姨媽係前面，佢就跑上前，但跑跑行可能覺得唔對路，南瓜仔跑去反方向搵 姨媽，有無咁掛住呀！？

南瓜妹@健康院(6個月)

22/09/2014 (6M1D)

因前多天先去醫院覆診，所以南瓜妹既體重已經知道左......

體重：6.15 KG (3%-10%線中間)
長度：62.5 CM (為何會矮左1CM呢！？)

雖然比起初生時50%跌了好多，但比起5個月時進步了好多.....

4個月：5.66 KG
5個月：5.7x KG (升得0.1 KG)
6個月：6.15 KG (升左0.4 KG)

都係同健康院姑娘講番南瓜妹既情況，現在希望南瓜妹無嘔後，體重會上升，而最後都係叫我記得去見營養師同醫生。

而姑娘都講，可以我本身瘦，所以南瓜妹基因似我喎........唉！

跟住就睇南瓜妹既發展......

1) 一直都擔心南瓜妹坐唔合格，因為到現時為止都係坐得不太好，要扶住先坐得好。(南瓜仔同期已經唔駛扶坐到5分鐘)

原來南瓜妹咁坐都叫合格，而姑娘仲話比想像中好添！！

2) 企，合格

3) 捉住物件，合格

之後就打13價肺炎鏈球菌疫苗，當時南瓜妹正左熟睡，一打針就喊了幾聲，之後就繼續瞓！！

安排南瓜妹返屋企後我就返工，之後母親大人打俾我，叫南瓜妹好似發燒，我就叫幫佢探燒，點知母親大人同工人姐姐都唔識用.......

最後母親大人去左隔離屋叫人幫南瓜妹探熱，雖然係怪左少少，但母親大人又幾叻喎！！