南瓜仔@戒片大作戰(前夕)

我未正式同南瓜仔戒片，但見咁啱有幾日紅日假期，所以就同佢開始習慣去洗手間先，待天氣轉暖，先正式屋企唔用尿片！

之前係早上、食晚飯前、沖澡前、臨瞓前帶南瓜仔去vee vee！

呢幾日就隔一段時間就問南瓜仔去唔去vee vee，基本上99%以上都去到........

我：「去完vee vee 點！？」

南瓜仔：「著尿片、著褲」

跟住自己著 (通常都著得唔好，我要幫佢整番好)

我：「之後要做乜！？」

南瓜仔：「洗手！」

19/02/2015 (29M)  - 初一

起身：濕片 (因南瓜仔早醒過我，佢就一定係濕片)

早上、下午(屋企)：poopoo左一半係片度(另一半係馬桶)，其餘乾片！

下午、晚上(出街)：去太婆屋企拜年，再去姨媽屋企拜年，姨媽家有尿兜，成功去埋vee vee ，之後出街食飯，返到屋企都係乾片。

20/02/2015 (29M1D)  - 初二

零晨四點幾叫醒我，同我講：「我要vee vee，我要換片」，我二話不說就帶左佢去洗手間，原來佢已經疴左poopoo同vee vee 係片度。

起身：濕片

早上、下午(屋企)：乾片！

晚上(出街)：去娘家拜年，娘家有尿兜，成功去到vee vee，返到屋企乾片。

21/02/2015 (29M2D)  - 初三

起身：濕片

早上、下午(屋企)：乾片，仲成功去埋poopoo係馬桶度。

晚上(出街)：我無主動問南瓜仔去唔去 vee vee，濕片回家！

22/02/2015 (29M3D) - 初四

起身：濕片

早上(屋企)：乾片。

下午、晚上(出街)：就係我尋日無主動出街帶南瓜仔去vee vee，所以今日去到6299家時，就主動帶佢去，因唔夠高所以俾張椅企住vee vee (6299家無尿兜)，成功去左2次vee vee！

之後就同佢出街食飯，但南瓜仔唔肯去商場洗手間，可能唔夠高去又或者不太乾淨，南瓜仔話：「我無vee vee」，所以無去到，最後返到屋企入到洗水間就vee vee左係尿片度，但全日先得呢一次疴左片度！

23/02/2015 - 01/03/2015 (29M3D - 29M10D) 

四日假期就完左，我叫hd定時定候問南瓜仔去唔去 vee vee，但hd話南瓜仔唔肯去喎，叫我唔好迫佢喎 ，應成功1-2次去vee vee (hd無詳細講)，其餘時間都係濕片！><

我放工返屋企就會接手，全乾片！ 

02/03/2015 - 06/03/2015 (29M11D - 29M15M)

返學啦.......

起身：呢5日都係乾片，叻仔！(因為係我叫醒南瓜仔，所以一早帶佢去vee vee)

早上(學校)：學校有同佢換片，所以應該濕左片，我估計南瓜仔應該未主動同學校ee或老師講去vee vee。(呢度真係比較煩，要等天氣回暖，才與學校夾下)

下午(屋企)：放學返到屋企4次乾片/1次濕片，我會同佢去vee vee，之後我就要返工，而帶南瓜仔去vee vee 既「重任」就放係工人姐姐身上，我叫工人姐姐定時定候帶南瓜仔去vee vee ......

工人姐姐會有1-2次成功帶南瓜仔去vee vee，但由於南瓜仔疴poo poo未肯講，所以會疴係片度，通常都會濕埋片！

晚上(屋企)：待我回家後，我又定時定候問南瓜仔去唔去vee vee，都係全乾片！


雖然現在南瓜仔未主動講去vee vee 或 poo poo (要我問佢)，但都算係好開始，又係果句，天氣回暖先戒片啦！！

親子好去處@錦田鄉村俱樂部

01/03/2015 (29M10D) + (11M8D)

目的地：錦田鄉村俱樂部

本來係上個月約左表哥同表妹一齊去，但因某些原因去唔成，今次終於去得成啦！

原本仲怕天氣太濕或落雨，但天氣出其咁好，yeah！！

去到時已經差不多1點，所以醫左肚先，我地帶左小食同即場買左魚蛋、燒賣、牛肉球同豆腐花，之後就出發去玩！

↑ 餵羊仔/兔仔，南瓜仔唔敢餵羊，只敢餵兔仔，可能羊太大隻掛！？(飼料 $10/包)

↑ 摘士多啤利 ($100/磅 (韓國品種))

係南瓜仔摘士多啤利時，我就餵南瓜妹食baby food，咁就俾我撞到blogger Little K 媽，真有緣！！(Little K 真係好靚女)

↑ 雖然唔係好甜，但勝左自己摘！

之後就係玩機動遊戲.....

↑ 親子卡通車 ($50 雙人/ 圈) 

↑ 兒童車 ($30/10分鐘)

南瓜仔好鐘意玩車，仲話玩碰碰車，但我怕危險，無俾佢玩！

↑ 玩完就去草地玩踏單車(但未夠腳長，踏唔到 >< )、吹泡泡、跑來跑去！

南瓜仔係遠處見到有彈彈床玩，就話：「我要玩跳彈床！」

好啦，又俾佢同表哥一齊去玩！

↑ 兒童跳彈床  ($25/10分鐘)

呢度好"求其"，要入場玩就即入，有職員寫時間係label紙上，夠鐘就會叫停，原本話南瓜仔太細粒，但講講下又話俾，職員叫表哥睇住南瓜仔！(最後表哥係無睇過南瓜仔，自己玩！)

我問南瓜仔：「你鐘意玩車定跳彈床！？」

南瓜仔：「兩樣都鐘意！」

我相信都放哂南瓜仔既電 ........

時間差不多，我地就去母親大人屋企食晚飯，上到車，南瓜妹就瞓左，而南瓜仔仲好興奮唱歌，突然間，南瓜仔停左，唔夠3秒就合上眼，瞓左！！

http://yl.com.hk/ktcc/index.htm

親子好去處@2015 農曆新年 (初八至十)

新年，係約朋友食飯既日子......

26/02/2015 (29M7D) + (11M5D)- 初八

約了現任同事及舊同事食晚飯 (是拖友)，我一直以為係約今天(初八)，點知......

原來是約了初六 (24/2)，我這兩個朋友初六去到餐廳，話book左位，職員話book左26/2，唔係24/2，之後友人whatspps我，我才知道我記錯日子 (當然也book錯日子啦！)，真的萬分不好意思><

相約九龍灣既南小館，佢地食物質素都不錯喎！！

↑ 南瓜妹食得好開心.........

不過食完飯後，南瓜仔就四圍走，唔肯拖住或抱住，話要：「我要跑跑跑.......」，煩到死，我又話過佢、氹又氹過佢，都係唔聽！？我可以點呢！？？？

話時話，我好期待南瓜仔同南瓜妹做佢地既花仔花女！！

27/02/2015 (29M8D) + (11M6D)- 初九

又係了朋友食飯啦，今次地點係我朋友家 .......

↑ 玩畫板中！今次既朋友仔既小朋友同南瓜仔差不多年齡(最多差2年半)，所以都玩得幾投入！

不過南瓜仔玩玩下就講：「媽媽拖住！」之後就捉住我手指.......

南瓜妹呢！？全程都係笑笑口，但一俾其他人抱就喊！！

28/02/2015 (29M9D) + (11M7D) - 初十

又係約友人Mikiki 既 California Pizza Kitchen 食飯......

呢個係hd既現任同事，亦係hd既舊同學，而佢老公亦是hd既舊同學！

原本佢地既囡囡係大過南瓜妹，但南瓜妹趕住出世 (37W2D)，所以就變左姐姐.....

↑ 雖然係姐姐，但身型就係"妹妹型"，仲要高南瓜妹半個頭！

是日，南瓜仔全日係興奮，四周圍走，唔肯企定定，我要成日捉住佢，煩到死，邊有小朋友咁架！？？？><

親子好去處@2015 農曆新年 (初七) - 嘉道理農場 + 林村

25/02/2015 (29M6D) + (11M4D)- 初七

目的地：嘉道理農場

今日hd約埋表哥去一齊，兩個小朋友一齊去，玩得開心d嘛！！ (我同南瓜妹又無得去 ><)

佢地約左10點九龍塘港鐵站，之後一齊出發！

詳情我不太清楚，只知道佢地行錯路，差點行左去大帽山........


↑ 原本條路好容易行，但因為行錯路既關係，所以條路好不容易行，家姐話唔怕辛苦，係怕阿囝(表哥)碌落山，對於一個4歲半同2歲半既小朋友黎講，真係好大好大挑戰！(事後hd話呢條路係行山既3或4星)！
 
不過佢地最後都去到嘉道理農場睇野豬、貓頭鷹等！！

去完之後，佢地就去林村啦.......

目的地：林村

因為兩個地點好近，所以順便去埋！


↑ 去到當然睇許願樹啦！！

但呢兩個小朋友點夠力拋"寶碟"呢！？

hd 話南瓜仔玩得好開心，仲返到屋企成盒KFC磨菇飯食哂！！

而我呢！？我約了朋友去apm食晚飯，我就帶埋南瓜妹一齊去 (南瓜仔同hd仲未返到屋企，我亦相信佢地要好好休息！)

↑ 之前我book位問有無bb椅，佢地話用，去到先知係咕臣加高，完全唔啱南瓜妹坐，全程變左要手抱 ><
 
↑ Table 18 Bar & Restaurant ，食物質素不錯喎！

親子好去處@2015 農曆新年 (初五至初六) - 阿貓地攤

雖然我要返工，但hd就仲放緊假，直至放到南瓜仔返學！yeah ~~~~~

23/02/2015 (29M4D) + (11M2D)- 初五

約左表哥同表妹去我屋企 (三個都係學校假期中)，佢地食完飯就落街玩！！

↑ 玩具反斗城中.......

當我回家返屋企，南瓜仔分享左今日既事俾我知......

南瓜仔：「今日表妹跑跑跑跑，跌低左！」

我：「咁表妹有無拖住ee呀！？」

南瓜仔：「無呀！」

我：「咁你有無拖住爸爸！？」

南瓜仔笑住講：「無呀！」

南瓜仔：「表哥走，我喊！」

我：「咁你仲乜喊！？」

南瓜仔：「我唔捨得，表哥返屋企！」

我：「哦！咁我下次再約過表哥玩啦！」

我向hd求證，真有其事！！

24/02/2015 (29M5D) + (11M3D)- 初六

目的地：「阿貓地攤」Cats Cafe

啱啱落街，見到舞龍舞獅 (但南瓜仔同我講去左睇恐龍！哈！)，南瓜仔睇到入啱神，之後就出發去銅鑼灣！

↑ 南瓜仔同貓貓玩開開心心，但hd話佢全程都無掂過貓！！

hd 話呢間cafe幾好，不過我個人不太喜歡貓，所以我唔會主動帶南瓜仔去！

http://www.openrice.com/zh/hongkong/restaurant/sr1.htm?chain_id=10000178 

之後我就放工，約埋係港鐵站等就返屋企！

而呢個媽媽都好掛住佢地，係lunch time 時候去買野俾佢地......

↑ 聾貓衫 (黑：hd / 綠：我 / 白：南瓜仔 / 紅：南瓜妹)

原本我諗住買俾自己，但又俾我睇到有童裝，咁咪買埋俾南瓜仔，諗諗下不如買埋俾南瓜妹啦，佢地可以兄妹裝 ...... e！？咁爸爸呢！？咁不如買埋俾hd啦！！(我係唔會一家四口一齊著出街！)