南瓜仔@37個月

19/10/2015 (37M)

食
已經習慣左佢食得差，有時佢仲要我抱住食飯，邊有小朋友食野咁煩架！？？

都係唔鐘意飲湯、唔食菜 .......

瞓
有時要hd同我一齊同佢瞓先肯瞓，好彩上床無耐就會瞓左！

發展
要記底既對話 ......
我：「夜晚要熄燈瞓架！」
南瓜仔：「熄左燈我咪睇唔到你！」

有天，南瓜妹又要我抱、南瓜仔又要我同佢沖澡......
我：「你又要我同你沖澡，妹妹又要我抱，咁你想媽媽點做！？」
南瓜仔笑住講：「將媽咪切開一半，咁咪得！」
我：「吓，將媽咪切開！？？」
南瓜仔：「係呀，跟住拎黎食左去！哈！哈！」
咁暴力！？？？

南瓜仔同妹妹講：「妹妹，你係唔係想睇mickey mouse 喎！」
南瓜妹：「係！」 南瓜仔：「媽咪，妹妹話要睇mickey mouse 喎！」
媽媽：「你同妹妹講唔睇呀！」
南瓜仔對妹妹講：「都同你講左唔俾睇啦！」

自理能力：
-  唔駛點抱，正常情況下都會自己行。
-  終於係屋企自己去vee vee 啦 (學校一早就自己去)

返學
學校開始用筆，但班主任打電話俾我，話南瓜仔寫野無力，叫我地多點留意.......(經過hd既教導下，明顯進步了好多！)

而南瓜仔學校都係唔多講野，有時老師問佢野，佢只會簡單回答，黎緊11月就有評核，南瓜仔大部份都識或做到，但若果南瓜仔唔肯唱、唔肯答 (全部都係口試)，就一定唔合格，我都唔知點算！！

有乜方法可以令佢講大膽講野呢！？？

因學校要評核，所以我地都開始要知道南瓜仔識d乜，以前我無刻意留意南瓜仔識d乜！

認中文字：
上、下、人、大、田、木、山、土、天
一、二、三、十
牙、手、口、眼、耳、頭、足
女、男、爸爸、媽媽
水果、 秋天、月亮
貓、狗、魚、羊、兔
瓜、果、苗
吃、子
(仲有自己同南瓜妹既名)

英文方面：
- 可以用完齊句子英文對答。(簡單)
- 認英文子：cat、dog、boy、apple ....... (我地仲未留意佢識睇咩字)

數字方面：
- 用中文及英數到 1- 99 (係佢自己無端端數，你叫佢數佢又啋你)
- 識加數，例如我俾左2塊餅南瓜仔，之後南瓜仔話仲要，我就問佢：「之前俾左2塊，我現在俾多3塊，咁即係俾左幾多塊餅餅！？」南瓜仔(要諗一陣)：「5塊」，我先會俾佢食。

唱歌：
- 學校教既歌全部都唱到。

南瓜兄妹@病倒了

上個星期真係唔易過，兩兄妹一係唔病，一病就兩個一齊發高燒，仲要hd一齊病埋，擔心死我 ~~~~~


南瓜妹

03/10/2015 (18M12D)

南瓜妹有少許鼻水同咳，但就無發燒，所以都照去打 5合1，打完針再去睇醫生。

返到屋企後有微燒，但好快就退左，可能係打完5合1既反應 ......

之前南瓜妹勁鐘意食藥，但今次唔肯食，最後都係迫佢食！！

04/10/2015 (18M13D)

留左家中休息，全日無燒，只係食飯時先有幾聲咳 ......

南瓜妹早上又係唔肯食藥，但去到之後既3餐藥又乖乖食，所以我估南瓜妹要好精神先肯食藥！！

05/10/2015 (18M14D)

見南瓜妹無燒，又無鼻水，咁就照返學！！

但去到中午，班主任打電話俾我，話南瓜妹有鼻涕，仲要係黃色，所以叫我搵人黎接南瓜妹！

所以我就快快請了半天假去接南瓜妹回家，但我一落車就落大雨(因太趕去，所以連遮都無帶)，唯有係大雨中跑去學校啦 ><

我去到時南瓜妹正在午睡，所以等到南瓜妹醒左先帶佢走，而且我都要等 d 雨停左先走得 ......

班主任拖住南瓜妹出來，南瓜妹見到我時個樣不知幾開心 ^^

好彩學校出面啱啱有的士，所以就好快回家！！

返到屋企就食藥後，南瓜妹仲係流住黃色既鼻涕，仲有咳添，不過就無燒  ><

06/10/2015 (18M15D)

半夜，南瓜妹喊醒左，發現佢有點熱，再幫佢探熱，原來係發燒 (37.7度)，就同佢快快食退燒藥！

是日當然無返學啦，留係屋企休息！

中午時，工人姐姐打俾我，話南瓜妹發燒至38度，呢個時間啱啱係我食午膳時間，所以我同hd就快快回家，點知南瓜妹發燒至38.8度，燒得咁高，就快快同佢睇醫生.......

醫生怕南瓜妹情況會再嚴重，所以開左抗生素藥俾南瓜妹！！

07/10/2015 (18M16D)

早上都係有微燒 .......

中午回家餵佢食藥，再無燒，但仲有鼻水未止。

08/10/2015 (18M17D)

無燒啦，但有鼻水，所以都係無返學，加上要連續7日食抗生素，所以都係留在家中！！

**南瓜仔同hd一齊病埋 ><

09/10/2015 (18M18D)

留在家中休息。

南瓜妹好番八八九九，只係仲有鼻水！！


南瓜仔

07/10/2015 (36M18D)

晚上，發現南瓜仔全身有點熱，原來發燒 37.8度，所以快快食退燒藥！

南瓜仔無鼻水、無咳。

08/10/2015 (36M19D)

早上仲係微燒，所以沒有返學，同佢食埋退燒藥。我仲諗住放工先同佢睇醫生 ........

點知去到11點多，公公打俾我：「xx (南瓜仔)，發燒 38.3度！」

我：「我就快回來！」(未到食lunch時間)

但事隔唔夠5分鐘，公公又打來：「 「xx (南瓜仔)，發燒 39度！」

晴天 PIG PIG，點解咁高燒！？？所以就二話不說：「我現在回家！」

再去同老細請假........

我：「我仔發高燒，現在要帶佢去睇醫生，可能要遲D先返到黎！」

老細：「好，但你要記住..........」

我：「 我記得，三點至四點開會嘛！」(我都估到佢係咁 ....xyz$%^&%)

係路上，就打電話去診所，好彩又俾我BOOK到，之後就打俾公公，叫公公帶南瓜仔去診所 .......

去到診所，姑娘同佢探體溫 38.9度 ><

南瓜仔大個左好多，識得講自己口(喉嚨)入面痛！

醫生幫南瓜仔睇手、腳同口，之後同我講：「可能係初期手足口，所以要睇下呢2日有無出疹，要佢真係出左疹先能確實。」

又再次晴天 PIG PIG，吓，手足口 ..........><

南瓜仔因為口入面痛，乜都唔肯食，一食就話痛，好可憐呀！！

晚上都係KEEP住 38.5度 .......

我仲要隔離佢地兩兄妹，但屋企咁細！？？隔離都唔知有無用 ><

09/10/2015 (36M20D)

早上都係38度多，而且有可能係手足口，所以都係留在家中 ........

去到中午，就keep 住微燒！

都係唔肯食野，連奶都唔肯飲，一食野就話痛 ><

手、口、腳都無出現紅疹！

10/10/2015 (36M21D)

無燒啦，雖然原本要學游水，都係請了假。

手、口、腳都無出現紅疹，唔係手足口啦，yeah ~~~~~~

可借都係唔肯食野 ><

南瓜妹@第4次私家疫苗

03/10/2015 (18W12D)

由於早上hd 要南瓜仔要去學游水，所以就自己單拖帶南瓜妹去打針！

今次係去打五合一，打埋呢支針就等到小一先要再打針啦 ~~~~

去到診所等左20分鐘，就打針啦！！

同醫生閒談，當我講南瓜妹返學時，醫生既反應係：「返playgroup咋！？」

我話：「唔係呀，返全日，有校服著，間學校有 PN、K1架，係幼兒園黎！」

醫生個樣好似唔太相信，哈！哈！

南瓜妹一打針就喊，不過都係喊左1陣咁就無喊，都算係叻叻！


↑ 之後就趕返屋企，點解！？因為南瓜妹有鼻水同咳 ><，所以要去睇醫生！！

我臨出發打針前已經幫南瓜妹掛左號，所以去到都唔駛等好耐 ......

醫生見到有膠布：「e...... 頭先打完針！？去健康院！？」

我：「係呀，打完五合一！去私家打！」

醫生：「點解頭先唔去睇埋醫生！？」

我：「個醫生只係打針，唔睇症！」

醫生：「哦...........」(可能佢太奇怪！？)

原本南瓜妹無發燒，但午瞓後，發現係全身有點熱，原來有微燒，可能打完5合1既針！？不過第二日就退哂燒，可惜之後既幾日 ..........

親子好去處@國慶 2015 (踏單車)

01/10/2015 (36M11D) + (18M9D)

目的地：屋苑 (踏單車)

是日節目係 ---- 踏單車(副助轆)，由屋企屋苑踏去另一個屋苑！！

南瓜仔已經踏過數次，現在已經唔係 "龜速"啦 ，估唔到佢咁快就學識，不過佢就唔肯用平衡車，佢話佢會跌喎！！

↑ 去到另一個屋苑，有個大型既水池，池裡有魚同龜，吸引住呢2位小朋友！！

之後再去公園仔玩，不能可能啱啱落完雨勁好多蚊，所以都好快咁走人！！

玩完就去午餐，再去商場行一陣街，就回家休息，晚上就係屋企睇煙花 (電視)，不過呢2個小朋友無乜興趣！！

親子好去處@香港動植物公園

28/09/2015 (36M9D) + (18M7D)

目的地：香港動植物公園

同堂哥、堂姐、表姐們一齊去名都飲早茶，估唔到現在仲有"推車點心"，現在我諗全港都唔超過10間！！

飲完茶就同表姐們去香港動植物公園玩 ........

↑ 巧遇六歲盾臂龜

天氣太熱，小朋友要休息一下，食下雪糕先！！(可憐既我有咳，飲唔到凍飲，熱到想死！)


↑ 睇猴子，今次已是第二次來，南瓜仔都係睇得好入神！！


↑ 去遊樂場玩，南瓜妹真係大個左好多，現在已經自己上樓梯，再自己滑埋樓梯添！！

玩玩下就3點，南瓜妹已無哂電，所以快快走人，抱抱下南瓜妹就瞓左，最慘係由香港動植物公園行返去金鐘港鐵站好遠好遠，抱到我手快斷 (原本 hd 話抱，但我怕南瓜仔唔肯行，抱住南瓜仔仲攞命，而且唔想轉手「嘈醒」南瓜妹 ......)

好不容易行到商場，之後去超巿買野飲，此時南瓜妹就醒左啦.........

到上車無耐，南瓜仔就瞓左，原本諗住佢2個一齊瞓我可以休息一下，最後都係無得休息！

地址：香港中環雅賓利道