2018 回顧 + 2018 重要生活點滴 + 2019 展望

2018 回顧 

睇番上年既展望…….

1) 全家人都身體健康

感恩，呢一年我地全家人都健健康康，我真係我最想既願望，無野比健康更重要。


2) 南瓜兄妹相親相愛

手足之情好重要，但無奈呢兩個小朋友好鬼煩，一時就「老友鬼鬼」、一時就「火星撞地球」。

南瓜仔返半天既日子，我就好頭痛，我就會收到 N 次電話，大家互相投訴，唔係唔想理佢地，但我返緊工，真係幫唔到太多 ...........


3) 可以買樓！！(呢個講左 n 咁多年 >.<)

都係仲未買到！哈！哈！
係香港生活真的不太易！！


2018 重要生活點滴

南瓜仔：

K3 生活完結了，做左小學雞，更加發現「大細B」既差距，不是指學術上，而係「自理能力」.......

老師既評語，就係佢太 BB，即係有些同學不用老師再提，佢地都會自動自覺做好，而南瓜仔仲要老師提，但呢樣真係不易幫他，唯有等佢自己慢慢長大，再不斷既提醒！！

學術上，中文對佢黎講真的不易，真係要再下功夫。

一直希望南瓜仔能夠入童軍，點知學校既童軍係不易入(要甄選！？)，南瓜仔又好好彩，俾佢入到，我地希望佢能學會「團結」既精神！！

我呢個媽媽成日化身做「家長義工」，只為了他們「想要」我做，我明白當佢再大一點時，未必想我再做「義工」。

每天，我都會送南瓜仔上校巴，其實每朝我都好想瞓，每天都問「幾時唔駛咁早起床？」，但我知道，總有一天，他會長大，不想我再送。

有天，我係街度同南瓜仔講：「媽咪想抱下你！」
南瓜仔：「媽咪，我好重喎！」(知自己超重)
我：「就係你越來越重，所以媽咪想再抱你，你再重啲，我真係抱唔起你！」
南瓜仔好開心俾我抱住！！
雖然抱得佢唔耐，但我真係好想抱住佢...........

南瓜仔對於自己身高有要求了，真係大個仔，知道自己個子矮小，所以佢好努力食飯、拉筋、跳高(無論佢點攰，臨瞓前一定會做，亦不會hea 做)，只係我地倆公婆基因太強，唯有靠佢自己後天努力！


南瓜妹：

學校評語都不錯，希望南瓜妹繼續KEEP住，最令我放心係佢願意分享學校既事情，做得不好地方會叫我地再教佢，呢一樣野哥哥從未做過！！

南瓜妹係讀 happy school ，所以都有「外補」幫下佢，但我地無「加強進補」，始於都係一個 K2 學生，我都係希望佢能快樂地學習！！(只望佢原校升上)

佢既小姐脾氣都係重點改善(好彩學校無)，懂得「做戲」 ........

南瓜妹亦好好彩，入到小蜜蜂，因為係由幾十人中抽20人，而南瓜妹又好幸運抽中！！
我都係希望佢學會「團結」，記住小蜜蜂既誓詞！！



2019 展望

1) 全家人都身體健康！ 

2) 南瓜兄妹相親相愛！

3) 南瓜妹能順利直升原校、南瓜仔能快快適應小學生活！

4) 南瓜仔能快高長大！

南瓜仔@學生健康服務

19/12/2018(6Y3M)

學校安排左試後活動去(試後活動只返半天)。

咁我就請了全日假，去左學校接佢放學，南瓜仔超開心，因為有我接佢放學。

咁啱佢有個同學仔都係同一日、同一時段去做檢查，就約埋佢地(佢仲有個哥哥)一齊去！！

南瓜仔變左多啦A夢迷，所以襯平日無乜人去奧海城「多啦A夢秘密道具研究所」，就快快去影下相！！

南瓜仔見到多啦A夢，當然開心到不得了，平時不愛影相既佢，不斷叫我幫佢影相！！

影完相，食埋飯，就去做檢查！！


學生健康服務

是日無乜人，所以好快就安排驗眼、驗耳，原來南瓜仔對眼真係好好，咁細好細粒既字都睇得好清楚，當然最後全 PASS 啦！！

之後就見醫生 .........

身高：105.4cm
體重：20kg

南瓜仔又高得好慢，但醫生話佢高度有3%( 104.8cm 就合格)，醫生話唔同醫院把尺都有唔同(不能作準喎)，叫我唔好咁緊張，反而就係體重超標！！！！

我都覺南瓜仔有肉，只係無諗過佢會超標，醫生都話不是要佢減肥，但要注意不要食太多甜既食物，唔好只肥不高 =.=

我好想講，南瓜仔真係想高，所以先食多左飯，而佢日日都有屋企跳高、拉筋，亦每星期有游水、跆拳道！！

南瓜仔@高度跟進(7) - 醫院

11/09/2018 (5Y11M23D)

檢查係早上，而南瓜仔仲係返半天，所以今次就無得返學啦！！

去到醫院都就係度高/磅重，呢幾個月，我差不多日日check 住佢既高度，所以都估到佢幾高！

度高：105.2cm (6個月 + 4cm)
體重：18kg

27/03/2018 (5Y6M8D) ：101.2cm (6個月 +1.7cm)
10/10/2017 (5Y22D)     ：99.5cm (6個月 +4cm)
11/04/2017 (4Y7M22D)：95.5cm (6個月 +3.3cm)
11/10/2016 (4Y23D)     ：92.2cm (4個月 + 3.1cm )
06/06/2016 (4Y8M17D)：89.1cm (3個月 + 1.3cm )
15/03/2016 (3Y5M25D)：87.8cm (0.5個月+ 0.9cm)
23/02/2016 (3Y5M04D)：86.9cm

今次高得不錯呀 ^^

見醫生啦........

醫生都係講「嗰啲野」， 醫生都話南瓜仔高度係3% KEEP 住係生長線(終於掂到生長線啦)，而且今次生長都不錯(1年高左5.7cm，合格水平)，所以唔駛抽血驗，yeah！！(我日日同南瓜仔講，你唔夠高就要打針，所以佢一見醫生就話唔打針！哈！哈！)

南瓜仔靠自己努力，食多啲野、做多啲運動、瞓多啲，呢半年努力無白費！！

不過，我再睇南瓜仔既生長，佢出生得 46cm，一出世就已經係細小型(未達3%) ........

一般生長(從網上睇資料)：
0-1歲：20-25cm
2-3 歲：10cm
3歲：4-7cm

計一計
1)  以最高標準計：
46cm +25cm (1歲)+ 10cm (2歲) + 10cm(3歲) + 7cm(4歲) + 7cm(5歲) + 7cm(6歲) = 112cm

2) 以最低標準計：
46cm +20cm (1歲)+ 10cm (2歲) + 10cm(3歲) + 4cm(4歲) + 4cm(5歲) + 4cm(6歲) = 98cm

即係南瓜仔一定要努力才能升上去3%！！

我又計一計，若南瓜仔只 KEEP 住最低既標準，每年高 5cm，去到中一時就只有 135cm + 發育 25-30cm = 160-165cm。
若每年高 7cm，去到中一時就有 147cm+ 發育 30cm = 172 - 177cm。

我會以每年高7cm 為目標，希望南瓜仔會加油！！

2018 父親節

南瓜妹係一個好聽老師話既小朋友，學校係星期五派回父親節禮物.......
南瓜妹一落校巴就同我講：「老師話要放係枕頭底，唔好俾爸爸知道，父親節先送！」

回家後，衫都未換，就係書包拎份禮物俾我，叫我放係枕頭底.......

我笑住講：「放係枕頭底會整摷，不如我幫你收埋去啦！」


晚上，南瓜妹見爸爸沖涼，靜雞雞拎出黎睇，點知俾哥哥知道左......(哥哥份禮物未到父親節已經拎左俾爸爸睇了)

哥哥就好衰地拎出黎，諗住俾爸爸睇，妹妹就大叫：「老師話父親節先可以俾架！」

我唯有快快幫妹妹 (呢個哥哥 .........=.=)


第二天(星期六)，hd 帶南瓜仔去學跆拳道時，我就叫妹妹畫咭送俾爸爸 .........

女仔，寫字真係靚啲，所有字都係妹妹寫，我無拎住佢隻手！！


17/06/2018 (5Y8M29D + 4Y2M27D)

到了父親節當天，妹妹/哥哥一起床就送了禮物俾爸爸............

不過，呢個懶媽咪乜都無安排！哈！哈！

我相信爸爸不會介意的！呵！呵！

晚上，約左公公全家人一齊食晚飯 ~~~~~~~

南瓜仔@2018 Variety Show

又係 Variety Show 啦！！

今年都有份入圍個人 solo ，都係希望南瓜仔試下 ......

因為有上年既經驗，而且彈琴亦比上一年進步不少，仲係揀首佢一早已彈好既歌，所以無上年咁勤力去練琴！(是不是藉口呢！？)哈！哈！

19/05/2018 (5Y8M + 3Y2M28D) 

首先係單人表演，南瓜仔排第二個 ........

到南瓜仔表演，比上一年更好，仲拎了第三名！！哈！哈！

班際表演啦，真係又進步左好多！！

最後就係 K3+K1 大合唱，南瓜仔又係企係有利位置，影得好清楚！YEAH！！


計一計，南瓜仔已經係第8次踏上舞台，而幼稚園最後一次踏上舞台係「畢業禮」，期待這一天！！