親子好去處@香港花卉展2015 (維園)

29/03/2015 (30M10D) + (12M8D)

我地去到銅鑼灣就去左皇室堡 Dr Kong (買2對，減$100) 買鞋俾南瓜妹，雖然南瓜妹現在只能單手拖住行，距離自己行仲有一段時間，但都買定俾佢，等佢習慣下啦！！

而南瓜仔勁煩，係舖頭度四圍走，真係頂佢唔順，最後我就同佢講：「你問下(職員)姐姐，呢度好多壞人，一陣捉左你去，咁你以後就見唔到媽媽！」職員：「係呀！呢度好多壞人架！」，之後南瓜仔就乖乖坐係度(一陣咁大把)，出到舖頭門口又走過，唉！都唔知點教佢好！！

之後就出發去花卉展........

目的地：香港花卉展

主題花：跳舞花
日期：2015年3月20日至29日 (9:00-21:00)
地點：維多利亞公園
入場費：$14 / $7

入場好方便，用八達通"嘟'入場，唔駛排隊買飛，good！

去到最後一日先去，諗住唔駛同「龍友」一齊迫，點知都係人山人海 ........

好不容易先同南瓜妹影到相(出動星星餅)，始終南瓜妹仲未識行、企又企唔穩，又人多喎，最煩係南瓜仔四圍走(又要睇住佢，當然係影唔到相啦)， 我想其他人會覺得我地唔識帶小朋友囉！！><

↑ 好彩都影到幾張相！！

↑ 南瓜仔呢！？叫佢同南瓜妹影，一啲都唔合作(南瓜仔主動俾星星餅俾妹妹食，但佢自己就食完走左去)，仲扮我地：「妹妹，呢度呀！望呢度呀！」，仲要拍埋手引南瓜妹添，都唔知好嬲定好笑！？

五點就出發去娘家，佢倆個仲未午睡，南瓜妹末上車已瞓，南瓜仔就上到車唔夠5分鐘就瞓埋！！

南瓜妹@健康院(12個月)

23/03/2015 (12M2D)

BOOK左早上去健康院，公公陪埋我一齊去，我就先帶南瓜仔上校車，公公就係港鐵站內面等我，之後就再一齊去！！

南瓜妹唔食野，所以都有心理準備佢既體重唔理想.....

體重：7.8kg (生長線10%)

都預左！><

健康院姑娘都無乜建議，都係叫我嘗試唔同食物，睇佢鐘意食乜囉！

測試方面，只係俾左支匙羮南瓜妹，睇下南瓜妹會不會拎住 (pass)，其餘都係口問我，例如識唔識扶住行、識唔識指野、單字發音........ (pass)

↑ 未知道打針既南瓜妹！

見完姑娘就打針，今次係打3針 (水痘疫苗 / 麻疹、流行性腮腺炎和風疹混合疫苗 / 13價肺炎球菌疫苗)，南瓜妹一見到支針就喊，打完1支左脾，再打2支右脾，打完5分鐘先停止喊，我諗真係幾痛！><

返到屋企，當天晚上就發燒(37.8度)，到了第二朝早上仲係微燒，好彩之後再無燒啦！

南瓜妹@1歲生日會

21/03/2015 (12M)

呢個懶媽咪，沒有大攪，只係約左自己屋企人慶祝.......

↑ 「求其」既佈置，原本想買新 happy birthday banner，但四周圍都無(女仔款)，所以用番南瓜仔慶祝1歲既banner！><

其實話就話都南瓜妹慶祝，但我地就開餐，南瓜妹自己就係playmat度玩.......><

外賣：Carifornia Pizza Kitchen (小食 / 意粉 / 薄餅)、板長 (壽司)、鹵水鴨
工人姐姐：西蘭花炒蝦球
 
↑ 到食蛋糕啦.......當然唔少得唱生日歌啦，我地唱到一半時，南瓜妹好開心咁拍手掌，當唱完生日歌後，南瓜仔就不急及待吹蠟燭 (我一早同佢講係妹妹吹) ><

↑ 我安排左親子裝一齊影相，最攪笑係南瓜仔，佢話鐘意妹妹果件，唔鐘意自己果件........

我同佢講：「咁你下次著妹妹果件啦！」 (南瓜仔果件太大，妹妹果件先啱佢著)

禮物我係俾南瓜妹自己拆，不過南瓜妹係將的衫亂咁拋.........哈！哈！

↑ 南瓜妹收既禮物全部都係衫！！

唔駛著哥哥既二手衫啦 ~~~~~哈！哈！

南瓜妹@12個月

21/03/2015 (12M)

南瓜妹1歲啦 ~~~~~~ 

陪南瓜妹時間不多(相對南瓜仔)，但唔知係唔係「血濃於水」！？？但南瓜妹都好跟我，一見到我就想我抱，連平時照顧佢既公公抱佢都喊.......

妹妹，媽咪好錫你，我會再分配好時間，等我自己可以有多啲時間同你玩！！信我！

06:15  奶 (8安) 
07:00  小睡
09:00  遊戲時間 
10:30  薯蓉 / 蕃薯蓉
11:00  遊戲時間
12:00  小睡
14:00  水果糊仔
14:30  遊戲時間
16:00  小睡
18:30  粥
19:00  陪大人食飯
19:30  遊戲時間
20:00  洗白白
20:15  遊戲時間
21:45  奶 (8安)
22:15  瞓

食
食野都係咁上下，無佢法！

或者自己耐性已無咁多，1個係咁、2個又係咁 (半放棄)

大便
1 - 2 次。

瞓
晚上瞓得好好，半夜無乜喊。

但其餘時間就越瞓越少，工人姐姐氹唔掂佢瞓 (之前係自己自自然然瞓左)。

能力發展 
-   識得講 banana、食奶奶、哥哥(識講哥哥啦)！
-  由成人牽著手走路 (仲未識自己行路 ><)
-  識點頭/拎頭示意

其他
-  4隻牙(有2隻出緊黎)
-  17磅 (瘦B) 
-  勁鐘意食藥，俾慢啲都大叫.......

↑ 12個月！！

南瓜仔@30個月

19/03/2015 (30M)

2歲半啦 ........

食
都係唔肯食菜，食飯都係慢吞吞，都唔知佢想點！？？

仲要前幾日咳，飯都唔肯食，食兩啖就話飽.........頂佢唔順！！

戒片
起身全部乾片。(晚上有同佢vee vee ，瞓醒又帶佢去 vee vee)

平日在家會主動帶南瓜仔去vee vee，好多大部份時間都係乾片，可惜南瓜仔未主動講vee vee，所以唔叫戒片成功！(我怕係忍住唔去vee vee)

瞓
平時返學回家後，有時唔肯午睡，可能係校巴瞓左！

晚上九點半左右就會瞓著！(若屋企無午睡，瞓落床唔夠1分鐘就瞓左！)

發展
1) 說話
- 唔多鐘意普通話，hd一講佢普通話，就唔俾hd講，所以現在試下俾巧虎佢睇，等佢容易接受！

- 問佢唔見左媽媽點！？佢答：「搵警察叔叔！」
我：「咁你識唔識講住係邊！？」南瓜仔答：「XXX(邊區)、XXX2期 (屋苑，奇就奇我無教過佢2期，點解佢會講到呢！？ hd 又話無教？？？)、XX (幾多樓)」
我：「啱喎，唔.....咁你出街拖住媽咪，咁咪唔會唔見左你囉！傻豬！」

2) 自己除拉鏈外套

返學
- 老師話佢講多左好多野 (調左位同多野既同學仔坐)

其他
- 24磅
- 16隻牙
- 勁唔鐘意食藥，一食藥就用手按住自己既嘴，每次都要用15分鐘以上時間先攪得佢掂！