親子好去處@觀塘海濱花園

25/04/2015 (31M6D) + (13M4D)
 
上次經過尖沙咀，南瓜仔就話要去睇船 .......

我問：「咁你坐唔坐船呀！？」
南瓜仔：「我要睇船，唔坐船！」

咁奇！？

目的地：觀塘海濱花園

我地由觀塘港鐵站行過去.......

我又係用呢同一方法叫南瓜仔自己行：「你睇，前面就係，就快到！」

當然行行下又叫我抱，我就話：「抱你就返屋企，自己行就去睇船！咁你揀呢樣！？」

就係咁，南瓜仔就全程自行行去，雖然時間係用耐左 ........

呢個好既地方係睇船安全，有玻璃圍欄圍住，所以放心俾南瓜仔自己企係度睇！！

南瓜仔可能意識唔到有玻璃圍欄，所以當我行過去睇時：「媽咪，危險呀！」

心諗，傻仔，但好SWEET！

我 (我係拍住玻璃)：「你睇，有玻璃架，好安全，唔危險！」

↑ 南瓜仔小心奕奕咁試，試左安全後就開開心心咁睇船 .......

↑ 好不容易先叫南瓜仔坐好，同南瓜妹影相，我地無叫南瓜仔錫妹妹，佢好自然攬住南瓜妹錫！！

↑ 有個200米長的海濱步道，南瓜仔就跑、跑、跑，而hd 就拖住南瓜妹行！

再有個兒童遊樂場，不過就唔係咁啱南瓜仔玩，我諗要六歲以上先啱 .......

去到最後，佢地有個地方(係持色塔樓的附近)每半小時噴水霧一次 (第一次我地唔知，噴完先去到，南瓜仔無得玩，唯有等半小時啦 ><)， 當我正準備拎電話出黎影相，南瓜仔捉住我既手講：「媽咪，唔好影相，同我玩啦！」

我又估唔到佢咁講，咁我就馬上收起電話 (我會覺得同小朋友一齊玩，比同佢影相更重要)，等待水霧噴出來 .........

↑ 嘩！一噴就不得了，開心到佢呢 ......... 一路噴水霧，佢就一路跑，一路大笑！！(忘記左我！)

http://www.lcsd.gov.hk/tc/parks/ktp/index.html

南瓜仔@第N次剪髮

前言

我都唔記得南瓜仔剪左幾多次髮！？除了NB同第1次帶佢出街剪髮外，無論係屋企或出街髮，次次南瓜仔都喊爆！

即使路經髮型屋，南瓜仔：「媽咪，我唔要剪頭髮！」

間唔中同佢洗頭，我同會問佢：「去剪頭髮好唔好！」
南瓜仔：「唔好！」
我：「點解唔剪，你頭髮好長！」(成日俾人叫妹妹 ><)
南瓜仔：「我唔鐘意剪！」

24/04/2015 (31M4D)

前一天，正當幫南瓜仔洗頭時，南瓜仔：「媽咪，我頭剪髮唔喊！」
我好驚訝，為何突然咁講！？？而我回應：「你咁叻呀！咁明天帶你去剪髮，剪完髮媽媽同你買車車！」
南瓜仔：「好呀！」

跟原定計劃帶佢去剪髮，我：「我地去剪髮，剪完髮媽媽同你買車車！」
南瓜仔：「好呀！」

沿路南瓜仔無講唔去剪髮 .......

臨入去髮型屋前，我去7仔買了提子糖俾佢食 (內心係怕佢會喊！)

南瓜仔入到髮型屋出奇地無喊(次次一入去就喊)，我問佢想自己坐定係媽咪抱，佢就話要抱，咁我當然抱住佢啦！

未剪前，俾了糖佢食 .........

開始剪，無喊喎！？？？

髮型師讚南瓜仔：「嘩，好叻喎！」

我：「上幾次都喊爆呢 .......」

髮型師：「我記得，上次喊唔停！」

我(扮驚訝)：「原來你記得佢，但我唔記得邊個同佢剪過！」

南瓜仔就咁，好順利咁剪完髮，但就食左4粒糖 ><

我當然剪完髮帶佢去買車車啦，但入到舖頭，佢無話要買，我亦無主動叫佢揀車，咁就算了，慳番！！哈！哈！

南瓜妹@13個月

21/04/2015 (13M)

06:15  奶 (8安) 
07:00  小睡
09:00  遊戲時間 
10:30  粥
11:00  遊戲時間
12:00  小睡
14:00  水果糊仔
14:30  遊戲時間
16:00  小睡
18:30  粥
19:00  陪大人食飯 (食大人飯)
19:30  遊戲時間
20:00  洗白白
20:15  遊戲時間
21:45  奶 (8安)
22:15  瞓

食
再無用攪伴機整成糊狀俾南瓜妹食，都一歲，唔可以長期咁食！！

食野都係咁上下，鐘意就肯食(可以成粒提子連皮食)，唔鐘意就點到唔食(粥)！

晚飯會俾大人飯俾佢食，會叫住要食，但食得唔多。

鐘意飲湯/水。

大便
1 次。

瞓
晚上瞓得好好，半夜無乜喊。

南瓜仔放復活節假，日日都嘈醒南瓜妹，好醒瞓........(都唔知暑假點算！？？)

能力發展 
- 說話：俾你、馬騮、驚驚、兔兔、唔要、媽媽抱抱、bye bye、Dinosaur、Dog ......
- 未識自己行/企

其他
-  6隻牙 (2隻牙出左少少)
-  17磅 (瘦B) 

↑ 13個月！！

親子好去處@車展 (Toyota)

19/04/2015 (31M) + (12M29D)

目的地：尖沙咀海運中心 (車展 - Toyota)

車迷既南瓜仔，最鐘意.......

hd 12點先回家，所以我要係回家前攪掂哂所有野，咁就佢一返黎就可以出門口........

係車上，佢兩個都瞓左，落左車仲瞓緊，咁我唯有抱住南瓜仔啦 (hd 就用hipseat 抱住南瓜妹)，去到餐廳都係瞓緊，到d食物送上來，我先叫醒南瓜仔！！

我地食到一半，就叫醒南瓜妹食baby food，食完後就出發啦.......

自從南瓜仔戒左片，出街去洗手間搵"指定"動作，所以會揀d大型商場，最好就有埋「小童坐廁」(呢d先夠高企)，如果唔係就要用"遮袋"！

去左 i square 既 mother care ！

南瓜仔一見到車就要玩，見舖頭唔係咁多人，就俾佢玩啦，但玩完一陣就唔想走，我就同佢講：「我地宜家去搵大車車，你再唔走就無得玩！」

沿途南瓜仔係半行半抱，其實我既背痛仲未改善，所以抱唔到佢太耐........

去到海運中心，我就同南瓜仔講：「前面有車玩啦，要自己行呀！」

最初南瓜仔都好開心咁行，行左一大段路仲未見到，就叫我抱，我又講：「前面就係啦！」

如是者，南瓜仔又自己行，仲未見到，我又講：「前面就係啦！行多20步就到！」

南瓜仔快數：「1, 2, 3 ......20」

我：「係行20步，唔係數20聲！」><

好彩唔夠幾秒，就見到車，南瓜仔一見到就飛奔走過去！><

今次車展有10多架車，南瓜仔勁勁勁開心，差不多部部車都試坐，最攪笑係佢坐係司機位後：「媽媽快d坐我格離」，當我坐佢格離後，佢就扮開車..........

↑ 南瓜仔鐘情白色既五人車，坐完又坐 (要讓俾真正想買車既人先)，好不容易先帶到佢走！

再轉戰玩具反斗城，又係見到車就要玩 ........

我見南瓜仔都累透了，所以就快快帶返屋企，行去車站時，遇見雪糕車，就買俾佢食啦！估唔到南瓜仔勁鐘意！！

係車上，佢兩個都好快瞓了，其實我都好累，我都想瞓！！

親子好去處@香港單車館公園

18/04/2015 (30M30D) + (12M28D)

呢日，我上午要做物理治療，之後就趕返屋企 ........

原本諗住我返到屋企後就帶佢地出街 (13:00)，點知南瓜仔「睡魔急 CALL」......

最後遲到1小時！！><

目的地：香港單車館公園

今次係約左我班舊同學，呢班同學既小朋友與南瓜仔年紀相若，所以好啱玩！！

呢度既草地雖然不大，但人流比較少，有得租單車，有室入室外遊樂場，而且又鄰近港鐵站，所以我都幾鐘意呢度！

↑ 友人們都帶了波(足球、籃球)、吹波波、食物

南瓜仔好簡單，有一個大草地跑、跑、跑已經好滿足 .....

而南瓜妹我就拖住佢行(仲未識自己行)，希望佢快的識行啦！！

我與友人們就傾「大事」(小朋友揀小學)，我只能講做香港家長真不易........


http://www.lcsd.gov.hk/tc/parks/ktp/index.html