親子好去處@觀塘海濱花園

25/04/2015 (31M6D) + (13M4D)
 
上次經過尖沙咀，南瓜仔就話要去睇船 .......

我問：「咁你坐唔坐船呀！？」
南瓜仔：「我要睇船，唔坐船！」

咁奇！？

目的地：觀塘海濱花園

我地由觀塘港鐵站行過去.......

我又係用呢同一方法叫南瓜仔自己行：「你睇，前面就係，就快到！」

當然行行下又叫我抱，我就話：「抱你就返屋企，自己行就去睇船！咁你揀呢樣！？」

就係咁，南瓜仔就全程自行行去，雖然時間係用耐左 ........

呢個好既地方係睇船安全，有玻璃圍欄圍住，所以放心俾南瓜仔自己企係度睇！！

南瓜仔可能意識唔到有玻璃圍欄，所以當我行過去睇時：「媽咪，危險呀！」

心諗，傻仔，但好SWEET！

我 (我係拍住玻璃)：「你睇，有玻璃架，好安全，唔危險！」

↑ 南瓜仔小心奕奕咁試，試左安全後就開開心心咁睇船 .......

↑ 好不容易先叫南瓜仔坐好，同南瓜妹影相，我地無叫南瓜仔錫妹妹，佢好自然攬住南瓜妹錫！！

↑ 有個200米長的海濱步道，南瓜仔就跑、跑、跑，而hd 就拖住南瓜妹行！

再有個兒童遊樂場，不過就唔係咁啱南瓜仔玩，我諗要六歲以上先啱 .......

去到最後，佢地有個地方(係持色塔樓的附近)每半小時噴水霧一次 (第一次我地唔知，噴完先去到，南瓜仔無得玩，唯有等半小時啦 ><)， 當我正準備拎電話出黎影相，南瓜仔捉住我既手講：「媽咪，唔好影相，同我玩啦！」

我又估唔到佢咁講，咁我就馬上收起電話 (我會覺得同小朋友一齊玩，比同佢影相更重要)，等待水霧噴出來 .........

↑ 嘩！一噴就不得了，開心到佢呢 ......... 一路噴水霧，佢就一路跑，一路大笑！！(忘記左我！)

http://www.lcsd.gov.hk/tc/parks/ktp/index.html