親子好去處@西貢游泳池

01/07/2015 (33M11D) + (15M9D)

目的地：西貢游泳池

自從南瓜仔出世後，我地就貪方便只係去樓下會所游水，但點都無不及公眾嬉水泳池咁吸引！！

今次約埋我既屋企人一齊去(一行14人)，為左避開人潮，所以我地就一早就去！！(是日唔太多人，遲d去都ok)

可惜南瓜妹有少少鼻水，所以都係唔俾佢落水坐池邊就算，所以無帶泳衣！！

↑ 嬉水池有3個滑梯 (相片來自官方網頁)：
1. 彩虹滑梯 (適合1.5歲以上)
2. 黃色滑梯(可以大人抱住小朋友，適合3歲以上)
3. 藍/綠色滑梯 (高於110cm).....

母親大人太愛南瓜仔，一去到就要抱住佢滑，但南瓜仔仲未ready，攪到佢喊哂，唔敢再玩滑梯 .......

所以最初只係嬉水池玩，玩完一陣就去學習池游水，玩完一大輪，終於肯自己一個玩彩虹滑梯，到最後都肯俾hd抱住玩黃色滑梯啦！！

南瓜妹呢！？我一直抱住佢係長椅坐，但佢就指池邊，問佢係唔係想落去行下，南瓜妹點頭，咁我咪帶佢池邊行下 .....

嘩！南瓜妹行得勁開心，行左幾次都未夠候添，之後仲越行越深水，攪到個pat pat 點哂埋，仲有越玩越興奮，又用手拍打d水，最後點！？最後咪全身落哂水囉 (我有帶後備衫 ><)，不過我怕南瓜妹著涼，所以一上水就用毛巾包住佢，之後就9秒9帶佢沖身 (攪到我俾屋企人話我唔帶泳衣俾南瓜妹><)，佢地就繼續玩！

地址：西貢惠民路


↑ 泳池入面唔俾影相，唯有出面同南瓜妹影下相！(最攪笑係有救生員開咪叫人唔可以影相，我諗影相既人真係好尷尬囉！)

佢地最後玩到11點就沖涼，攪掂哂就去左九龍灣飲茶，飲完茶就回家了！！

親子好去處@香港動植物公園

28/06/2015 (33M9D) + (15M7D)

目的地：香港動植物公園

早上去左會所玩一陣，之後就回家，待佢地午睡完才出發，因為呢排天氣真係好熱，所以都係黃昏先出去戶外活動 ......

↑ 我地去到就睇美洲紅鸛、丹頂鶴等，估唔到南瓜仔好有興趣喎 (南瓜妹就無乜反應)！！


↑ 之後就去睇猩猩、猴子、猿猴、浣熊等，南瓜仔對猩猩仲有興趣，睇到唔想走 .....

其中2隻猩猩仲玩空中打鞦韆，睇到南瓜仔 O 哂咀！！

我問佢夠唔夠膽咁玩鞦韆，佢答：「唔夠膽，會跌落黎！」


↑ 睇完動物就去公園玩！


↑ 我最鐘意睇到南瓜仔係公園同其他小朋友一齊玩 ^^

玩到六點半就走人！！

但我呢個大頭蝦既媽咪唔記得帶蚊怕水，咬到我呢........係我，我起碼咬左20粒蚊，南瓜妹都中左幾粒，而南瓜仔好彩無事！！

地址：中環雅賓利道
網址：http://www.lcsd.gov.hk/tc/parks/hkzbg/index.html


↑ 之後就去金鐘 Thai Basil 食晚飯.....

可惜南瓜仔超唔合作，明明好鐘意食菠蘿，我地咪叫菠蘿炒飯俾佢，但佢又話菠蘿好辣 (點會辣呀！？？)，唔肯食，只係食左幾啖，都唔知佢想點！？南瓜妹呢！？係咁話要食(已經食左baby food 同提子)，俾慢d就大叫 ........

南瓜妹@15個月

21/06/2015 (15M)

今個月轉左 timetable，之前成日講無乜時間同南瓜妹玩，所以我要坐言起行.....

之前，南瓜妹食完早奶後就俾佢瞓，現在就轉左同佢玩，直至同南瓜仔出門返學(可玩1.25小時)，之後先小睡。唔好睇少咁短時間，呢個多小時，南瓜妹真係好開心，日日都笑住同我玩，雖然頭一星期我真係勁唔夠瞓，但為左可以陪多d南瓜妹，都好值得！！

若果，hd 早放工，咁就南瓜仔 18:30 沖涼 (當時妹妹正左食粥)，咁就南瓜仔與南瓜妹一齊玩既時間就多d。

06:15  奶 (8安) 
06:30  遊戲時間 (原本：小睡)
08:00  小睡 (原本：遊戲時間)
09:30  遊戲時間
10:30  粥
12:00  小睡
14:00  水果糊
14:30  遊戲時間
16:00  小睡
18:30  粥
19:15  食大人飯 + 水果
20:00  洗白白
20:15  遊戲時間
21:15  奶 (8安)
21:30  遊戲時間
22:00  瞓

食
食就一時時，一時食狂食，一時就食得少少，但點都比南瓜仔好， 對於佢兩兄妹既食，我真係投哂降......

可以拎义食哂水果、亦會拎住匙羹食粥 (8成)，不過都係要睇佢心情！！

食奶方面，早上就無乜問題，但晚上有時就食得6安，而配方奶就轉哂3號。

大便
1 -2次。

瞓
晚上瞓得好好，但有幾日零晨五點半就喊醒，唔知係唔係期待同我玩呢！？

午睡就好多時俾南瓜仔嘈醒。

發展 
語言能力：
-  識得講「公公」啦！！
-  指住物件講「靚靚」(咬手指咬到損哂，唯有同佢貼「公主」膠布，幫佢貼完就勁講「靚靚」) 
-  食完包，就講：「食哂！」 或者講「無哂！」
-  見爸爸返工，會講：「爸爸，bye bye」，仲要揮埋手....... (但我返工就狂喊！) 
-  跌左餅係地下，會講：「跌左！」
-  打了我一下，同我講：「sorry！」(唔係好啱音) 
-  食完奶，俾奶樽工人姐姐，講：「姐姐，唔該！」(氹到工人姐姐不知幾開心！)

活動能力：
- 識得自己行 (終於識行啦，感動中 .......)
- 會蹲下來起地上的物件而不會跌倒
- 戒奶樽中，已成功用吸管飲到3安！

認知發展：
- 會示意表達 (晚上係梳化食完奶，就自已落梳化，之後用手指指入房，hd 問佢係唔係要瞓覺，南瓜妹會點頭)

其他
-  7隻牙
-  18.5磅(8.4 KG)
-  間唔中叫佢 tidy up 玩具唔會 tidy up ，仲會拋落地下，惡到死！(南瓜仔係呢個年紀，未試過咁囉！) 
- 勁有主見，好似食野咁，唔食就唔食，一啖都唔食。(南瓜仔呢個年紀，氹下都會食少少)

 ↑ 15個月！！

親子好去處@2015 父親節 (整蛋糕+中環海濱摩天輪)

21/06/2015 (33M2D) + (15M)

佢地未識點同爸爸慶祝 ，咁就由我呢個媽媽幫手啦，我用 Super Daddy 做主題！！

↑ Super Daddy 獎杯/心意咭 (我邊有咁好諗頭，都係copy 巨龍媽 fb / 小寶媽 fb)，咭上印有南瓜仔/妹既腳印架！

一早起身，我就安排南瓜兄妹送禮物，南瓜妹就送獎杯，南瓜仔就送咭，南瓜仔仲講：「超人爸爸，父親節快樂！」，哈！哈！

目的地：冒險樂園 j-plus (油溏)

我地去左整蛋糕，原本諗住成個蛋糕都係自己整，但職員話要1.5小時，我相信南瓜仔應該無咁既耐性，細問之下，佢地有個「簡單版」蛋糕 ($129)，約30分鐘就可以，不過無得預約，只得walk-in ..... 

做法：有三層海綿蛋糕(已備)，每一層同圍邊都係自己加cream(已備)上去 (有職員幫手整得靚d)，之後可以自選4種 (水果、朱古力、棉花糖等)材料上去！
 

↑ 原本我以為只得同南瓜仔一齊整，點知職員又俾我地一家四口一齊整喎！！

所以就變左hd同南瓜仔一齊整，之後就輪到我同南瓜仔整 (其實我想影下相咋)，南瓜妹就自得其樂食蛋糕碎 >.<

↑ 點知 .....有小朋友偷食左粒士多啤梨！？？
 

 ↑ 親子蛋糕 (原本諗住寫 super daddy，但 hd 話好難寫得靚，話整個 bear bear 會靚d，見佢係今日主角，就由佢決定啦！！)

地址：九龍油塘高超道38號3樓301號舖
電話： 2794 0197
網址： http://www.jumpingym.com/big5/jplus_intro.aspx

個蛋糕可以放係舖頭雪櫃度先，臨走先拎走 ......

諗住去食午餐，俾南瓜仔話見到冒險樂園既遊樂場，我都無諗住俾佢玩，hd 話不如俾佢玩一節啦 ($40)，咁我就去俾錢(入去儲值咭度)，俾完錢後先發現「清潔中」，無得玩 .........

咁我地就去食午飯，食完飯南瓜仔仲記得去冒險樂園既遊樂場，咁hd就直接抱佢走，我就返去拎蛋糕，我地唔係唔想俾南瓜仔玩，但已經到午睡時間，再唔瞓佢就會勁扭！！ 

返到屋企，南瓜仔就話要食完蛋糕先午睡，一路食就一路講：「我整架，好好味！」，我見個蛋糕自己整，所以俾左南瓜妹食少少，點知佢食到唔停口....... 

待佢地午睡完，我地就出發去中環 ......


目的地：中環海濱摩天輪

點解會黎！？因為父親節，爸爸免費，未到3歲又係免費，所以一家四口只係$100咋， 好抵！

但是日天氣好差，又落雨、又停下雨，都諗緊去唔去好，但hd話落雨咪仲少人，話哂hd係主角，佢話乜就乜啦 ~~~~~

我地首先去左尖沙咀，再搭船去中環，點解又咁要咁做！？？因為想俾南瓜仔/妹搭船囉.........

係搭船時，仲係落住好大既雨  ><

但我地真係好好彩，天功造美，落左船就停左雨，仲有陽光添！！yeah ~~~~~

可坐約15分鐘 (4個圈)

↑ 我地仲唔駛等就可以上摩天輪，有乜野做！？咪狂影相，不過佢地2個唔多合作囉！

地址：中環海濱
費用：成人$100 , 長者/小童/學生/殘疾人士 $70

下次黎，應該係去荔園，期待中.......

搭完摩天輪，就返去尖沙咀海運大廈食晚飯！！

↑ Maison Eric Kayser，晚餐，味道都不錯，最重要唔駛等好耐位！！

這幾天既活動，成個人都散哂！！><

親子好去處@2015 端午節 (龍舟水 + 大坳門)

20/06/2015 (33M1D + 14M30D)

目的地：會所泳池

端午節，一早就去游龍舟水(泳池)啦 ......


↑ 今次有靜靜雞偷影幾張相，不過唔想又俾救生員發現，做家長要做好榜樣嘛，所以影左幾張就算！！哈！哈！

游完龍舟水就返屋企睇龍舟比賽(電視)，我地無揀出街睇，因為呢個媽媽怕辛苦，好彩我地無去咋，南瓜仔/妹 「0」興趣！

hd 話端午節一定要食糉囉 ，南瓜仔唔多想食，但hd堅持要佢食少少，我都無眼睇(我係一個勁憎食糉既人，我最憎母親大人迫我食) ......

之後就俾佢地午睡，再出發去大拗門！！


目的地：大坳門

今次揀左黃昏去，若中午去一定會中暑！！


↑ 環境好優美，空氣好清新，自然環境係最舒服，最適合黎 BBQ、放風箏、野餐 ........

見到呢度既環境，人都開心d！！

南瓜仔對放風箏好有興趣，更對搖控飛機仲有興趣，追住架飛機走來走去！

我最鐘意南瓜仔係大自然下，跑來跑去 ........ 南瓜妹仲未識跑，期待幾個月後佢兩個一齊跑！

呢度有小食亭，個老板好nice，因為我見到有2個鬼婆話自己跑完步，又唔記得帶錢，又飲哂水，叫老板可否俾水(白開水)佢地飲，老板就俾左1支冰凍既水佢地， 2個鬼婆話唔好，俾白開水佢地就得，但老板話佢得全熱水，話下次佢地再黎先俾錢！(雖然我唔知佢地係唔係常客，但佢既服務真一流！)

玩完就去屋企附近食晚飯，咁又一日啦 ~~~~~~