親子好去處@Play Academy + 樹屋田莊 + 表哥生日會

28/08/2016 (47M9D)+(29M7D)

是日早上，我同hd分別帶小朋友去唔到地方玩 ........

目的地：Play Academy (遊學園)

我就約左南瓜妹舊同學去玩，點解唔帶南瓜仔！？因這個場都不太適合南瓜仔玩了(呢個場啱南瓜妹既年紀多d，咁當然帶佢去玩佢會照玩)，所以 hd 帶南瓜仔去其他地方啦！！

南瓜妹暫時只講到2個新同學既名，其他都講唔出，相信都要一段長時間先會講到大部份同學名！

而南瓜妹並無忘記舊同學，佢地既全名南瓜妹一一記住 .........

每當1個同學出現 (我地約左入面等)，南瓜妹就好開心，大大聲叫同學既全名！！

見到班小朋友玩得咁開心，自己都開心！！

我地玩到12點就走人，我要安排南瓜妹午睡後，再去表哥生日會！


目的地：樹屋田莊

是日，開放日！

hd 同南瓜仔已經好早出發，但要排2小時以上先玩到樹屋！？？？

hd：「我排得好前，但前面有1個家長幫5個小朋友排，個個都係咁 ........... 無法，得我1個排，唔可以兵分兩路..........」(我都明白，若我一大班人去玩，我都會咁安排)


hd 話南瓜仔完全唔怕玩樹屋，佢仲以為南瓜仔會喊添！！

玩到兩點半就走人啦，南瓜仔就係車上瞓 ........


目的地：表哥生日會

待南瓜妹午睡完後，我就出發去表哥生日會 ......

而南瓜仔同hd 隨後先到！！


表哥6歲，所以黎參加既小朋友應該咁上下年紀，家姐安排左1個大型既吹氣滑梯，嘩 ....... 佢地玩得好癲(我明既，我相信南瓜仔過多2年後都係咁)，南瓜仔仲可以玩 (我係附近睇住)，南瓜妹真係完全唔適合，所以只係襯無乜人時快快玩幾次。

玩完就去食晚餐，就快快回家休息！！

親子好去處@IFC(Harmonic Motion)

24/08/2016 (47M5D)+(29M3D)

目的地：IFC(Harmonic Motion)

我同hd都試過上網 book，但無一次成功 book 到 ><

但突然友人因事未能去，所以就俾左我地！！yeah ~~~~~

不過就只得3個位，咁就由輕巧既我陪玩啦！！

由於book既時間係 17:30 (要早10分鐘到場)，但我放工時間係 17:00，所以 hd 就要飛車去，去到 ifc 時已是 17:27，我就抱住妹妹飛奔去會場，而 hd 就同南瓜仔泊車 .......

我去到時，啱啱係 17:30，yeah (怕遲到，俾左其他人玩！)

南瓜仔最初都話自己玩唔到，咁我就推去 pat pat 上去，之後就爬到上去！

而南瓜妹都係要用力推佢 pat pat，佢先爬到上去 ......

上就比較困難，落就好快，佢地好快就落左地，之後又爬上去，而最辛苦就係我，又要睇住佢地，又要影相！ (hd 仲話我影得唔靚，又咁少相 ><)

之前睇到 blogger 講個網有 d拮，但我就唔覺拮，而係覺得好 "冼"，係非常之"冼"，我完全推唔到妹妹再上高位，因為未上到三分一就"冼"左落黎！？係唔係我有問題呢！？？

玩完之後，南瓜兄妹仲講：「媽咪，我地聽日再黎過！」

唔 ....... 應該唔會再黎玩，咁難book！哈！哈！


P.S：點解朋友會 book 到！？因為佢除左 email 資料外，其他都係亂打 (即姓名打：kjjc)，佢仲講：「認真就會輸！」，唔怪得我唔夠佢地快啦 ~~~~~~

親子好去處@賽馬會創意藝術中心(樹睦人和)

20/08/2016 (47M1D) + (28M30D)

目的地：賽馬會創意藝術中心(樹睦人和)

是日，上午我要返工， hd 就帶埋兩個小朋友接我放工，就去食午餐！！

之後就出發啦！！

呢兩個小朋友就係車上瞓左，等佢地瞓醒左就去玩啦 ~~~~~

南瓜仔一開始就扭計(應該未瞓夠)，又話唔去玩，又話地下 dirty，n 咁多個藉口 ....... 不過當玩左1次後，就不停咁玩！！

期間，有個小朋友大力推南瓜仔，南瓜仔就跌左地上(當然有喊)，hd就同小朋友講：「不可推人架！」

小朋友(好惡既語氣)：「佢阻住我呀！」(其實南瓜仔係無阻住佢)

之後小朋友家長就出現，小朋友家長同小朋友講：「小朋友玩，有碰撞好正常，你 (指小朋友)要小心d，否則 d 人以為你好曳！」(連 sorry 都無講 ><)

當我聽到呢番說話並沒有出聲，作為"外人"都不應去評價點去教小朋友 (個人覺得，無論有意或無意推倒人落地，都係需要講"對不起")，當然若對方作為太惡意行為，而傷害自己小朋友當然會出聲啦 (南瓜仔仲係未夠4歲，作為家長都要俾適當既保護，既然hd之前己出左聲，我都無必要再出聲)！

玩到最後，咁一定要去洗手間啦 ........

而我最怕係去 dirty 既洗手間 (諗起要抺 dirty 既洗手間就 ><)，由於南瓜妹已戒片不可不去 (無得避)，又估唔到佢地既洗手間又幾乾淨！！

親子好去處@冒險樂園

18/08/2016 (46M30D) + (28M28D) 

3號風球，停課一天。

我好少帶佢地去冒險樂園玩，真係好高消費 ，最平都要6個代幣 (1個代幣 $2，咁當然你買得多就優惠越高，即係買$1000，就有1000個代幣，但我唔會買咁多囉) ><

不過見係屋企樓下，又落住雨，去唔到公園玩，就去玩下啦！！

 ↑ 玩保齡球要11個代幣 ><

南瓜妹真係大個女，等 hd 放工後 (事隔6小時)，可以順序講俾 hd 聽玩左 d 乜，最鐘意玩 d 乜！！

親子好去處@Mr. Steak Buffet a la minute

17/08/2016 (28M27D) 

南瓜仔就返全日，南瓜妹只係返1小時 ........

咁就接完南瓜妹放學就去街街啦！！


目的地：銅鑼灣 (Mr. Steak Buffet a la minute)

hd 就帶左我地去呢間餐廳，呢間係頗出名既自助餐，除左牛扒出名外，最重要午餐只係 $208，真係好抵！！

估唔到星期三都咁 full，全場滿座 .......點解咁多人唔駛返工！？或者可以食咁耐既午餐呢！？？

若大家想去，記得電話預約，無得 walk-in 架！！！

食食下，突然收到「心太軟」，上面既寫左 d 字， 估唔到 hd 突然咁有心意！？？？

hd 大讚佢地既牛扒，佢話足足食左5件 ><，所以佢晚餐乜都無食！！

南瓜妹呢！？都係乜都唔食 ....... 好彩唔收錢，收錢的話一定唔帶佢食！

原本諗住去時代廣場影下相，但落住大雨，唯有回家休息！！