南瓜妹@血併AEON

22/02/2014 (33W3D)

終於買南瓜妹既野啦......

AEON做緊BB展，又係感謝日(原本逢2、20)，最重要係有送貨服務，唔駛自己拎！！

南瓜妹都係用番南瓜仔既野，如衫、包被等，只係要買奶樽同床單(最後友人俾左張bb床我，所以會放南瓜妹係廳瞓！)

仲有一些耗用品，如BB洗衣液、BB洗奶樽液要買定多少少，因為坐月期間唔放便去買！！

南瓜妹就用 CHU CHU 奶樽 (南瓜仔用 AVENT)，因為屋企得一部蒸奶機，因為現在我仲用緊 STEAM 機 STEAM 南瓜仔奶樽，而AVENT係"肥奶樽"，怕唔夠位 STEAM 南瓜妹既奶樽，唯有轉用"瘦奶樽"啦，我希望我坐月其間可以教到南瓜仔戒奶樽啦！！

 ↑ 奶樽 (3個5安、4個8安)、BB洗衣液、BB洗奶樽液、棉花球、尿墊 (舊既尿墊已經爛爛地)、三角枕 (之前果個係家姐俾，但已經用到凹哂)、奶樽刷、防夾門膠、毛巾仔、網褲，仲有送俾朋友 COMBI 餐具，埋單 $1,911.70。

仲有床單未買，上次買俾南瓜仔同一套只係 $599 (未折)，現在已升價 $799(未折)，駛唔駛升得咁快呀！？要再格下價先 ~~~~~

懶懶行既我，終於肯拎番南瓜仔既初生衫出來啦 (南瓜仔真係好多初生衫，起碼有30件以上)！

洗衫都要睇天氣，上天文台既apps睇，話呢幾日有太陽，之後會潮濕，咁咪安排工人姐姐洗，點知早上洗完下午就落雨，第二日仲潮濕，唯有開抽濕機整乾去......... ><

待工人姐姐洗埋出院用既衫、包被、手套等，咁就可以完成走佬袋！！

↑ 母親大人已安排薑醋同洗涼洗頭既薑皮啦！！

南瓜妹@祝健健康康、平平安安出生

24/02/2014 (33W5D)

陀南瓜妹真係一波多折......

1) 12W：紅血球少，要食鐵丸，食到生為止
2) 26W：胎水多，私家建議驗血糖，結果合格 (空腹 4.3, 糖水後2小時 5.8)
3) 28W：胎水多、太大隻，已戒甜同澱粉質
4) 33W：胎水多、 太大隻，QE再安排驗血糖，結果不合格，中左妊娠糖尿(空腹 4.4, 糖水後2小時 7.9 (高過7.8為不合格)

我都唔明點解我會中妊娠糖尿，又唔係高齡、又無家族遺傳、又咁瘦，點解會咁！？？

但現在無得諗點解，我只希望南瓜妹平平安安，健健康康出生！！

PIXTURE@家庭照

23/02/2014

南瓜仔：17M4D
南瓜妹：33W4D

我一直都好想影大肚照/全家福，但HD就覺得無乜需要，所以我都無迫佢.......

今次係家姐介紹下，亦係約埋表哥同表妹一齊影，所以HD無反對！！

呢間公司係自助式，無攝影師、無化粧、無執相，佢地只係提供場地、道具 (自行設計)、相機 (有個搖控器，自行拍攝)，最好既地方係所有相都會俾番我地！

雖然唔係"正式"大肚照，但都好過無.......

唯獨南瓜仔無乜笑囉，點引佢佢都無乜笑(肯望鏡頭已經算係咁)！


↑ 好不容易先影到！

↑ 可愛既BEAR BEAR！

 ↑ 幾型喎！

 

↑ 我幾鐘意呢一張！

↑ 個肚係唔係唔係好似唔大呢！？已經38吋腰啦 ....

↑ 扮 SWEET！

↑ 南瓜仔想"逃走"！

因家姐識人有優惠，$300，唔限人數，所以我地book左2節！

最後拎番5XX張相，其中15X張係有南瓜仔既樣，10X張就係全家福，單人相只得幾張 (因為根本佢唔係定定咁影)，若影得靚都有3X張，不過有部份係同一背景！(影婚紗相要影一日先得3X張靚，都算係咁啦！)

若以玩票性質影，真係好OK，佢地又玩左2小時 (影完好快就訓左)，仲有全部相拎走，價錢又唔貴！

點解無佢地3個既合照！？因為係完全影唔到，各有各"走佬"，所以最後都放棄影佢地3個合照，由大人"捉"住佢地影算數！

公司：PIXTURE
地址：灣仔軒尼詩道場99號30樓
電話：25277077
費用：$300(每節50分鐘) - 包3人，隨後$100@1人

P.S：佢地有4間房，當天計埋我有3個大肚媽媽，我估佢地都係影大肚照！！

南瓜妹@第10次QE產檢(驗血糖)

22/02/2014 (33W3D)

QE 真係好，除左安排早期唐氏、結構俾我，當知道我既胎水多時又安排我做超聲波，照完發覺南瓜妹太大，又安排我驗血糖，最重要係一蚊都無收，真係好好服務！！

講開又講，已是第10次QE產檢，HD只係陪過我去一次咁大把，今次因為南瓜仔要返 PLAYGROUP，我無理由晨早叫醒南瓜仔/HD陪我一齊去架！？之後又要趕去返學，而且陪黎都無乜用，唯有自己去啦！

之前成日唔覺南瓜妹存在，因為同平時差不多，無任何不適，但去到前幾天，我再開始有抽筋、腰痛、肚脹同埋夜尿 (都係1次，唔算太多)，行路都開始有點吃力，抱多一陣南瓜仔都好辛苦！！

講番正題，我都係怕自己無食早餐，又要抽血會暈，所以前一晚要食啲野，上次食杯麵，今次當然唔敢食啦，澱粉質勁高.......最後都係飲左杯奶同小量果仁就算！

今日安排左9:00去驗血糖，又係要去會計部(E2)，再去B3！

都係填完問卷，之後等一陣就抽血，抽完血就飲糖水！

 ↑ 嘩！好大碗！飲完，真係有少少想嘔，但我知自己唔可以嘔，唔係又要黎多一次！

抽血完都係無四圍走，一來怕自己暈，二來去得邊！？乜舖頭都無開，唯有玩手機打發時間！

好不容易先等到兩小時，咁就抽埋第二次血！
 
↑ 估唔到抽完血，有鈣思寶同餅食，太好啦！！

食完就走人，落到去先記得自己未拎到症紙，好彩早記得咋......

再去血併AEON買南瓜妹既物品(去到33周先買，都唔叫太遲既)，再接南瓜仔放學，勁 FIT！

雖然我估我血糖報告應該無事，但都希望唔好收到電話啦！！

後記：係今天 (24/02/2014)醫院打左電話俾我，我真係中左妊娠糖尿，要安排我入醫院，點解會咁架！！

上次驗完(飲完糖水後)只得5.8，但今次係7.9，我真係唔想入院呀！！！

南瓜仔@17個月

19/02/2013 (17M)

17個月啦，好快就歲半啦，時間表同上個月一樣！！
. 
07:00  早餐 - 奶 (7安)
07:15  遊戲時間
08:30  小睡
10:30  起床
11:00  午餐 - 粥
12:00  遊戲時間 
14:30  下午茶 - 奶 (5安) 或 包/蛋糕仔
14:45  遊戲時間
15:30  小睡
17:30  遊戲時間
18:30  晚餐 - 粥
19:30  小休 
19:45  水果 (陪大人一齊食飯)
20:15  遊戲時間 或 去樓下行下 (去超巿 / 玩具反斗城 / 商場) 或 唱遊
21:15  洗白白
21:30  消夜 - 奶 (6安)
21:45  閱讀時間 (睇書 / 玩砌圖 )
22:30  瞓覺

食
食野方面，都係唔鐘意食，無哂佢辦法 .......

有時佢仲會流哂眼淚水、鼻水，我都唔明點解佢食得咁慘！？我可以點呢！？

現在南瓜仔已經可以自己拎住全隻蕉自己食，而切粒既生果 (車厘子、啤梨、橙) 就會切粒，佢自己會拎住支义桔黎食，唔駛我地餵，因為佢自己鐘意食嘛 (但我唔想俾太多，怕糖粉高，所以都係一日一個)

而食粥既匙呢！？頭幾啖就會自己"畢"，之後當然連我地餵佢食都唔肯啦！><
 
大便
平均一日 2 -3次！有時會5次，但每次都唔係得少少，而且便便時間起碼相隔1時以上，我都唔明，點解佢都唔食野都有咁多便便！？

瞓
平均瞓 12-13小時！！天氣凍佢仲好瞓添 ~~~~

能力發展
1) 識聽大人說話
- 我同佢講：「要收左之前玩玩具先，先會拎新玩具！」。佢真係會收左之前既玩具，再拎另新玩具出來玩！
2) 識點頭 (雖然未識講野，但溝通容易左)
- 我問係唔係睇呢本書！？佢會扭頭！(我會拎係面前)再問，你係唔係想睇呢本書 (另一本書)，佢會點頭！(我會拎佢面前)，佢主動拎住睇！
3) 會示意去完便便 (會按住尿片，之後會講 bb 話 (試過講 pupu)，之後我地問係唔係便便左，佢會點頭，但佢未識便便前同我地講囉)
4) 示意下識得砌圖
- 切圖框有士多啤梨邊，我地就叫佢搵左張士多啤利砌圖，然後放落去，如是者佢就會砌完)
5) 識得配對
- 將唔用既利是封，一封放係地下，另一張俾佢，叫佢放埋一齊，佢又識分！
6) PLAY DVD
- 自己揀碟 (平時我會收埋，佢叫先俾)，之後自己開 POWER制，再OPEN 碟機，仲會自己 PLAY 埋，之後走去梳化邊坐 (但佢自己開唔到電視(勁高)，所以就算佢識得 PLAY 都無用！哈！哈！)
7) 聽音樂(歌)跟住做動作
- 指上、指下、自轉、BYE BYE、HELLO、SIT DOWN、STAND UP、指眼耳口鼻等動作

其他
- 瘦b (20.4磅)
- 8隻牙 (出左少少大牙啦！)

↑ 好多bloggers都叫自己小朋友做 happy face，我都有教呀！！

南瓜妹@第9次QE產檢(超聲波)

17/02/2014 (32W5D)

上次產檢QE知道我胎水多，所以安排左我照超聲波.......

因為BOOK左10:45，所以時間上都好鬆動，不過我都係要晨咁早起床，因為要餵南瓜仔食奶！

首先去到E2會計部，再去B3，上次去做結構時唔覺得條路咁長，但今次唔知點解覺得好似好遠咁 .......

去到時醫生仲未到(早左到)，我仲要排第5，心諗，有排等添，但估唔到11:00左右就到我，呢個醫生應該好快手.......

姑娘過鞋都唔駛我除，醫生唔駛5分鐘就同我照完，雖然快，但都照哂應該要照既野！

胎水再減少左，指數係 21(第1次：23.3，第2次：22.5)

醫生話都係合格指標(合格 8-24)內，都係叫我放心，我當然問我有乜可以做，可以令胎水減少啦......

醫生回答：「無！」，唯一做係「觀測」！(心諗，你地都應該唔會再安排超聲波俾我，我都係去私家睇啦！)

我再問：「胎水多有乜影響！？」

醫生：「胎水多最怕係當一穿左，可能連臍帶都衝埋出黎，咁bb就可能缺氧！」(私家醫生都係講番同一番說話)

而醫生話南瓜妹好大隻，要我驗血糖，1月頭先去私家驗完，現在又再驗，唉！！

上次私家仲話我血糖有少少偏低，再驗可能係一樣，但醫生話上次CHECK 已是6星期既事，所以一定再驗！！

我當然不忘記住南瓜妹超聲波既數字啦，佢真係好大隻，比預產期多3周，但我已經食少左好多澱粉質同甜既食物.......唯有再忍口啦！！

我生完一定要勁食朱古力、糖果、飲檸檬茶！！

南瓜妹
BPD(頭骨橫徑)=35W5D
HC(頭圍)=35W4D
AC(腹圍)=35W2D
FL(大腿骨長度)= 34W5D

EFW(體重)=約2.4KG (南瓜仔38W2出生，都係2.85KG)

 
↑ 每次經過QE都有一大班人叫我登記媽媽會，但都有原因(落雨、太凍或我太趕時間)登記唔到，今次終於登記左啦！！

南瓜仔@2014 拆利是

16/02/2014 (16M28D)

又係拆利是既時候啦.......

雖然南瓜妹未出生，但都有唔少親友俾埋佢，最估唔到係南瓜妹既利是仲多過HD！哈！哈！

上年已經幫南瓜仔開左個戶口，所以都將佢既利是錢俾番佢，等佢將來大個用，而快手快腳既我，係第二日已經幫佢入埋銀行，入完後，真係發覺銀行既利息真係好少囉！！

而南瓜妹呢！？因為未有出生紙，未開得戶口，所以啲錢會KEEP住我度，我唔會"落隔"架！！


↑睇下南瓜仔個樣，勁唔想影 ........

將左利是外，仲有送俾南瓜仔同南瓜妹既禮物，真係好多謝呢班朋友！


↑ C先生，W小姐，南瓜仔一定會做你花仔架！(右：南瓜妹，左：南瓜仔禮物)

↑ 多謝L小姐既禮物！(右：南瓜妹，左：南瓜仔禮物)

你地唔用既利是封會點用！？當癈紙！？拎去回收！？留番出年用！？

有時我不得不佩服 HD， HD將唔用既利是封俾南瓜仔做「配對」，將10多個唔到款既利是封(有個係同款唔同大細) 放係地下，然後再將另一個利是封俾南瓜仔做配對 ......

最估唔到係南瓜仔可以全部正確地配對哂！

南瓜妹@第7次私家產檢

15/02/2014 (32W3D)

戒口3個星期，希望胎水真的會減少 ......

所以今次去產檢，真的忐忑不安，我真的唔想南瓜妹未足月就出世，亦唔想南瓜妹有乜事！！

今朝南瓜仔要返 PLAYGROUP，所以 BOOK 左下午先去產檢！

胎水減少左，上次係23.3，今次22.5 (合格8-24)，雖然只係減左少少，但我已覺得放心左少少，起碼無增加嘛......

我：「咁我仲KEEP住胎水多，咁駛唔駛催生！？」

醫生：「唔駛，胎水多唔駛催生架！」

醫生叫我唔駛咁擔心，只要KEEP住戒口就得！

咁我就放心好多，因為我唔想佢未足月就出生！

而南瓜妹真係大隻妹，佢比南瓜仔同期重300g .......

醫生仲講，BB大隻都會比較遲出世添！！

而最放心係南瓜妹臍帶無纏頸、頭仔亦轉左，仲有好多頭髮添！哈！

南瓜妹
BPD(頭骨橫徑)=8.79CM(35W3D)
HC(頭圍)=30.8CM(35W1D)
FL(大腿骨長度)=6.17CM (33W5D)

EFW(體重)=2147GRAMS(約2.1KG)

自己
體重：52.6KG (+12.6KG)
肚圍：38吋

2014 情人節 + 元宵

14/02/2014 (32W2D)

祝：「情人節快樂！」

今年最特係情人節同元宵係同一日，但對我來說都無乜分別 ~~~~~

2008年既情人節 HD 送上求婚介指，雖然佢求得好"求其"，但我仲記得當時既過程.......原來已經過左6年了！！

今次係第四年去同一間餐廳食飯啦，唔駛煩嘛！

第一年 - 2010：無乜特別
第二年 - 2011 ：啱啱有左南瓜仔，無得食魚生
第三年 - 2012：yeah！有得食魚生
第四年 - 2013：有左南瓜妹，不過已經32周，都可以食少少刺身既！哈！

因為唔想等位，所以六點鐘就要到餐廳！


- 芝士碎伴芒果肉鬆蟹籽沙律
- 刺身盛 (三文魚腩、牡丹蝦、吞拿魚)
- 海鰻魚天龍卷
- 網燒安格斯牛扒
- 珍寶老虎蝦天婦羅
- 野菜立魚稻庭烏冬
- 飯品、甜品

前幾年都係買朱古力俾 HD，但屋企仲有好多好多朱古力，所以改送 agnes b mini cake，我係早一日 order 定，怕當天無貨，原本職員唔多想留係我 (order太少)，但我同佢講因為我唔食得甜既食物，所以只能買細細個既 Mini Cake，好彩職員最後都係我 order 定！！

↑ agnes b -  Coeur de chempagne (Mini Cake)，情人節限定版，唔知好唔好味呢！？再加埋我自整左張咭俾 hd，雖然唔太靚，但都算有心思！哈！

南瓜妹@第8次QE產檢

11/02/2014 (31W6D)

去到由自己做番「三步曲」-  驗小便、量血壓同磅重，我既體重已去到 52.2KG ！！

今次竟然撞到 blogger Amy，真係有緣，不過我地只係傾得幾句，因為我好快就到我，而我出黎之後就到佢 (P.S：第二日係 FACEBOOK 見到佢已生左囡囡，真係恭喜哂！)

同助產士講番南瓜妹既胎水 23.3同俾番私家既超聲波相同血糖報告俾助產士！

助產士知道我胎水多，就安排我下星期去做超聲波，再下下星期見醫生，睇下胎水情況去到邊，若太嚴重就要催生 ......

我：「咁係唔係37周後就 催生！？」

助產士：「睇情況，若bb 36周有6磅幾，你又胎水多，咁就會提早催生！」

之後都係度肚、聽心跳、按肚，助產士話南瓜妹已經調左頭！

現在我無乜好做，只能戒食澱粉質同甜既食物，希望胎水唔好再多啦，我唔想未足月就催生呀！！

南瓜妹，你要乖乖足月先好出世，胎水要減少，但又唔好太少呀，媽媽仲未執好走佬袋 (當日拿拿臨買左尿片、網褲同孕婦衛生巾，但仲未買奶樽呀)！！

自己
體重：52.2kg (+8.2kg)

南瓜仔@摘士多啤利

08/02/2014 (16M20D)

一早PLAN左同表哥一齊摘士多啤利，雖然都知道可能會落雨，但黎緊天氣又轉凍，再過多2星期可能又無太靚既士多啤利，所以都照原定計劃去！

好彩都係落住好微雨，南瓜仔又肯帶帽，如果唔係都唔知點摘好！！

呢度有遊戲車、餵兔仔、餵羊、摘士多啤梨、燒烤等！

南瓜仔太細，佢無敢餵小動物食野，只係隔離睇住表哥餵！


↑ 帶住帽既南瓜仔好可愛！！

↑ 南瓜仔跟住表哥，仲係"零"收獲，而表哥就好專心揀士多啤利！

↑ HD 就負責揀士多啤梨，揀完就俾南瓜仔自己入籃！

↑ 終於有士多啤利啦！

 

↑ 摘完士多啤利啦，佢地兩個都好 cute！

摘完，南瓜仔下半身都係泥，好多有帶都後備衫褲、襪！(由南瓜仔出世至今，我每次出街都會帶定後備衫，但咁耐都係試過用一次，本來我都諗住唔駛再帶 (減輕袋既重量)，但最後都係覺得帶定，好彩無放棄帶咋！)

本來我地諗住俾佢地係草地(好多片既草地)玩下足球同跑下，但天氣不太好，所以都係逗留1小時左右就走人，之後就去左表哥屋企打邊爐！

當然要食埋摘完既士多啤利 ($70/磅) 啦，大部份士多啤利都甜，理論上應該去超級巿場買更"化算" ，不過我都地主要係想俾小朋友試下摘士多啤梨！

有關資料

地點：新界錦田水頭村，684地段109約 (錦田鄉村俱樂部)

費用：摘士多啤梨 ($70/磅)

網址：http://www.yl.hk/ktcc/index.htm

南瓜仔@2014 農曆新年

一連4日既紅日假期完結，我再拎多2日假期陪南瓜仔 .........
 
不過呢個假期我竟然失眠 (自從南瓜仔出世後，我好似無試過！)，可能係日晏瞓得多左，南瓜仔十點醒我先醒 (七點照叫佢起身食奶，但食完再瞓)，可憐既我眼光光到零晨五點，唉！！

31/01/2014 (16M12D) - 初一

今日唔駛去拜年，又唔想留係屋企，所以食完午餐帶左南瓜仔去銅鑼灣 .....

呢幾年香港既新年已經唔係我年幼時咁，以前乜舖頭都唔開，現在起碼有8成既舖頭開門做生意，所以唔似以前咁悶！！

現在下午茶出街再沒有帶奶，會去買麵包舖買麵包俾南瓜仔食，方便好多！！^^

同HD去左食下午茶，因為要俾南瓜仔食下午茶嘛！而我，就因為要戒口，所以好多野都係食得少少，就係咁 ....... 我成日好餓，餓又要食野，又唔知食乜好，真係好慘！！

食完再行下，行行下經過 Haagen-dazs，突然醒起仲有張coupon未用，雖然我唔食得，但都要快快用左去，唔係過左期就太浪費！！


↑ Haagen-dazs，我決定生完南瓜妹去食雪糕火鍋！！

食完南瓜仔就瞓左，咁我地就行左一陣宜家傢俬，就回家啦 ~~~~

01/02/2014 (16M13D) - 初二

超忙既一天！

南瓜仔提早食午餐，之後就去 6299 屋企 (車程要個多小時)！


 ↑ 去到同表姐們畫下畫！

見到呢班小朋友，全部都掛住玩，唔肯食野，d 大人又要顧住餵佢地，做人父母就係咁！


 ↑ 同堂姐/表姐們影張相，影左好耐呢張叫 "最好"，要佢地乖乖合照，仲難過中六合彩！！

坐坐下就四點幾，又要快快去娘家拜年 (車程要個半小時)，南瓜仔就係車上瞓左啦！

由於今日煮唔切粥，所以就叫細妹煮埋粥俾南瓜仔食，但南瓜仔勁唔like，唔肯食，而表妹呢！？佢就食得好快，唉 .........

食完野就同表哥玩，玩得不知幾開心，仲周圍走，雖然表妹已識行識走，但佢地好似唔多鐘意同表妹玩咁，唔通佢地唔鐘意同女仔玩！？

02/02/2014 (16M14D) - 初三

下午就去了太婆(即我嫲嫲)家！

南瓜仔今日表現十分好，因為我地無乜野做，所以集中力放哂係南瓜仔身上......

叫南瓜仔係籃度一個個橙拎俾我地 (要拎俾指定既人爸爸、媽媽、太婆、姨丈、姨姨)，俾完我地又要放番個籃度，來回 3-4次，南瓜仔次次都去中指定人物度，叻仔！

之後臨走叫佢自己拎自己對鞋，佢又好醒目自己拎喎，太婆勁讚佢！(其實都係好普通指令)

去完太婆家，南瓜仔又要午睡，我就同阿妹/妹夫去左食 tea，hd就抱到南瓜仔完全瞓著，先join番我地，仲要全程都要抱住南瓜仔！

03/02/2014 (16M15D) - 初四

約了朋友出來 tea，呢排朋友好早婚，20歲出頭就結婚之後就生仔，所以佢地既小朋友全部都好大個(讀緊小學)，真的有點羨慕佢地，我仲有排先等到南瓜仔/南瓜妹大個！


 ↑ 南瓜仔變左 "玩具"！哈！

食到三點半，南瓜仔開始想瞓，所以HD就帶左南瓜仔出去氹佢瞓，而我班女人們就開始大談 湊仔經啦，最令我驚訝係其中一個朋友，佢話佢地兩個小朋友六歲先戒奶樽！！

P.S：我問過好多朋友，可以提早戒奶樽既BB，通常係佢地已經唔肯食奶，所以直接 CUT 左支奶去，所以先成功戒奶樽！

聽完之後，我又無咁大壓力，我成日覺得要18個月前一定要戒奶樽，不過我會努力再去試下！(我地試過幾次，南瓜仔都係狂喊，要奶樽先肯食！)

04/02/2014 (16M16D) - 初五

下午見得閒，帶左南瓜仔去遊樂場玩，南瓜仔一去到遊樂場不知幾開心，四周圍走，我就坐埋一邊，hd就睇住佢，但玩到45分鐘南瓜仔應該好累，就要我地抱下佢！

玩完1小時，我地就去食下午茶 (無錯，我又肚餓，但又唔可以食得多！)，食完行左唔夠5分鐘南瓜仔就瞓左 (明明未到午瞓時間，但佢連下午茶既奶都未食，只係食左少少餅)，所以都快快回家，南瓜仔一瞓就2小時！(平時我地係屋企，佢多數瞓個半小時)

晚上，約了另一班朋友出食晚餐，呢排朋友全部都好遲婚，甚至未結婚，呢班朋友最大既小朋友都係讀緊 K1！

.
 ↑ 南瓜仔好主動同姐姐玩 (2歲半)，姐姐都好樂意拖住佢！

05/02/2014 (16M17D) - 初六

最後一天假期，約左母親大人、父親大人、家姐同表哥一齊飲茶！

 

↑ 兩個一齊玩火車！

飲完茶就上左我家坐下，大約到南瓜仔食奶時間，佢地就走左啦！！

咁就完哂我6日既假期啦，不過親我仲未生南瓜妹前，我會安排好多活動俾佢！

↑ 上年成舊飯，今年就係坐唔定，影左二三十張先影到幾張好！

  上年件衫就太長，今年就短左少少，連底衫都show埋出來，所以要著紅色衫打底，無咁覺眼嗎！哈！哈！ 

不過最明顯係佢瘦左好多！>< 

最後要為 HD 拍掌......

1) 全個假期我地都無推車，只係用 HIP SEAT，雖然南瓜仔已識行識走，但總要午睡同扭抱，全程都係 HD 抱住佢，講真，要抱住一個20磅既BB成個鐘 (午睡中)，又怕佢醒，都幾"攞命"！

不過，我地又唔想南瓜仔成日坐車，我出街成日見到有些4-5歲仲坐緊車，我見到都覺得唔係太好，仲乜咁大個人仲要坐車呢！？

2) 煮飯/粥 (大人同南瓜仔)同洗碗，最重要係餵埋南瓜仔食粥，因為工人姐姐都連續放左4日假，而我呢！？我當然係偷懶啦 ~~~~ 哈！哈！