南瓜仔@18M 健康院

前言

係唔係好奇怪呢！？未夠18個月可以去健康院！？

因為醫生話我隨時早產，所以我就打電話問可否早一點去健康院 .........

姑娘：「我地要足18個月先可以黎架！」

我：「因為我21號可以要催生 (呢日去QE覆診)，但因為胎水多，醫生話我可能隨時生得！」

姑娘：「咁你可以叫你屋企人幫你帶BB黎！」

我：「但佢地答唔到你地問題，佢地都唔知阿囝既發展去到邊、食野食成點！？」

姑娘：「我明白，但佢地要打針，一定要足18個月先可以呀！」

我(叮一聲)：「阿囝係私家打針架，其實我主要係睇佢既發展去到邊咋！」

(佢地真係CHECK下南瓜仔係唔係私家打針)

姑娘：「我見到資料，見到佢係出面打五合一同六合一，咁啦，我幫你再問下啦，睇下可不可以幫到你！」

等呀！等呀！終於等到佢地既電話 ......

姑娘：「唔好意思，咁遲先打俾你，因為今日好忙.......」

我：「唔緊要啦！」

姑娘：「我幫你問左，如果唔駛打針可以早少少黎，咁你想幾時！？」

我：「盡早啦，因為我怕自己早產！」

姑娘：「咁我就幫你 BOOK 13號啦！」

YEAH！可以提早，唔駛我心掛掛！！


13/03/2014 (17M22D)

BOOK左下午，好彩係屋企、公司、健康院都係同一區，所以只係請左下午假都ok！

但去到我先記得自己忘記帶黃色書仔，只係記得帶針咭，正當我諗緊駛唔駛飛的返屋企拎時，登記員姐姐話唔帶都得，好彩咋。

等了一會，就去度高磅重，已經要自己企係度磅重同度高。

體重:9.65kg，高度:73.4cm

姑娘：「南瓜仔未足18個月，今日唔可以打針喎！？」

我：「佢會出去私家打，今日主要返黎係睇佢既發展......」

姑娘：「咁 ok 啦！」

再等一陣見姑娘.....

一入到去，姑娘要南瓜仔再度高 (吓！南瓜仔太矮！？？)

今次再度，就唔係企係度，而係瞓係度，結果高度：75cm (3%，啱啱合格)

雖然南瓜仔體重仲未有10kg，但上次南瓜仔係 3%，今次指標 10-25%，進步左呀！！

我都係講番佢多肯食野 ........

姑娘話佢重都已經得，而且以佢身高同體重做比較，係50%，係最FIT喎，唔駛咁擔！

發展

1) 講野講成點，唔教佢講識唔識講！？ - PASS
答：「識講單字，如 爸爸、媽媽、姐姐、DOG、馬、叻、波、有、BYE BYE、HAVE、知、橙等，或都講阿蒲(APPLE)，而佢睇住圖畫都識講係乜！」

2) 砌3個積木 - PASS
南瓜仔好快就砌好！

3) 俾個BB公仔加杯加匙 - PASS
南瓜仔主動拎匙餵BB飲，姑娘仲話佢想像力好

4) 行成點！？ - PASS
答：「已經自己跑！」

5) 聽野有無問題！？ - PASS
答：「應該無，正常！」

6) 識唔識指身體！？ - PASS
答：「識哂，眼、耳、口、鼻、頭、手、腳、肚腩等全部識哂，仲識指埋我地同公仔既身體部分！」

7) 平時有無扭計！？ - PASS
答：「扭計實有，但我覺得佢比同齡既小朋友比，佢應該算叫乖！」

8) 識唔識指野！？ - PASS
答：「識，佢鐘意佢住啲玩具叫我拎！」

9) 識唔識用匙食野！？- 算PASS掛
答：「因為佢唔鐘意食粥，所以用匙只能用幾下，用叉拮水果食就無問題，佢連蕉都可以拎住成隻食！」

10) 識唔識用杯！？- 算PASS掛
答：「學習杯就無問題，但普通既杯要幫佢，唔係全身都係水！」

姑娘：「佢發展得好好，而且佢坐得好定，下次黎係4歲，做聽力測試！！」

我：「吓！4歲！？」

姑娘：「係呀！因為無針再要打，所以四歲，到時你再約期啦！」

唔駛1小時就完成哂，太好啦！！