南瓜妹@接妹妹放學

06/06/2016 (44M17D)+(26M15D)

因南瓜仔同我都請了全日假，見天氣好好，無落雨 (早上仲黃雨添)，就諗住自己去學校接妹妹放學 ......

點知3點多，南瓜仔自然醒左喎！！！

(南瓜妹全日制，下午4時就可以接放學，若搭校巴就5點上校巴)

我：「你留係屋企，媽咪去接妹妹放學！」

南瓜仔：「我又要去！」

我：「我好快返，你留係屋企啦.......」

南瓜仔：「我要接妹妹呀！」

我：「好啦，咁你快快換衫、去veevee」(其實內心係想佢一齊去！)


我就帶南瓜仔搭小巴去學校接妹妹放學........

係小巴上，我：「唔知妹妹見到我地，佢會點！？」

南瓜仔：「好開心囉！」

我：「你又知！？」

南瓜仔：「因為你去學校接我，我就最開心！」

我：「咁媽咪接過你幾多次！？」

南瓜仔立即答：「3次」

我停左數秒，我自己諗一諗，真係3次喎，原來南瓜仔一直都放係心度！><

(第一次：我請左病假，見自己精神幾好，就去接佢放學，俾個驚喜佢！
第二次：下午要去睇醫生，一早通知左會接佢！
第三次：南瓜仔知我請病假(我係咳到嘔，得半條人命，仲要送南瓜仔上校巴)，南瓜仔叫我去學校接佢，當時我答接佢我只能接校巴放學，之後南瓜仔扁住咀同我講想我去學校接佢放學........但最後都去左學校接佢，係唔係好傻！？？好無聊！？？病到半條人命仲要去接佢放學，仲要來回搭的士用左 $260，但見到南瓜仔扁住咀講，都係唔忍心，可能我真係傻！哈！)

↑ 南瓜仔一見到妹妹，開心到跑上前接南瓜妹，仲鍚妹妹......

南瓜妹反而無乜開心，好平靜！！不過一離開學校門口就要拖住南瓜仔，佢兩個仲一路行一路傾計添！！

之後我就再搭小巴回家！！！


我呢個行為，分別俾公公同hd話，佢地覺得我好無聊、好危險 (全程都係馬路)，點解有校巴唔搭 (因為我地無下場，只係回家)，仲要一拖二搭小巴 .......

但作為在職媽媽，我只能上午送南瓜仔上校車，放工接南瓜妹放學 (好彩我都做到上午送一個、放工接一個)，但送返學校、係學校接放學真係無乜機會，所以一有機會我就會去做！！