南瓜妹係 22M 已經開始試去洗手間，期間因為病、太凍，所以停過帶佢去，又或者佢不太意願去，我都無迫佢，始終要小朋友 ready 先最重要！
經過一段時間，南瓜妹終於係屋企大部份時間都係乾片，亦已經識得自己講去 poo poo 同 vee vee！
再加上同佢出街時，佢唔怕用大人廁所 (有小朋友出街唔肯去，呢個係最麻煩)，最重要識逢呢個假期，係戒(日)片時候了 .......
計劃：一起身就換底褲 (午睡都係著底底)，直至晚上臨瞓前著尿片！
30/07/2016 (28M9D) - day 1
著底褲啦 ......
都係出街前會同佢去 vee vee。
我都係定時定候問下佢，因沒有大量飲水，所以若佢話無，我都無帶佢去！！
是日，出街去左3次！！
結果：無濕過，成功。
31/07/2016 (28M10D) - day 2
屋企同出街都係著底褲 ......
都係出街(去商場)前會同佢去 vee vee。
不過，是日南瓜妹玩在我一次，突然係街話要 vee vee ，當然好快帶佢去啦，去到話：「無喎！」，仲係傻笑 ..........(阿女，可唔可以唔好叫媽咪抺廁所呀！？)
之後，好彩之後都有主動同我講，亦 vee vee 到！！
返到屋企都無去vee就瞓左 (因為臨上車前去左，無理由仲有咁多 vee)，我膽粗粗連尿片都無換，好彩無事發生 ........
晚上去婆婆家，飲左好多湯，亦成功去左2次 vee vee！！
結果：無濕過，成功！
01/08/2016 (28M11D) - day 3
我要返工，hd 又會帶南瓜兄妹出街，hd 就同妹妹著片出街，hd 仲同我講：「出發前已經去左，我唔知帶佢兩個一齊去 vee vee 」(咩道理！？) ><
當我回家問南瓜妹有無濕片時，hd ：「無濕過，都係出去2-3小時，邊有咁多 vee vee 呀！？」
結果：無濕過，成功。
02/08/2016 (28M12D) - day 4
多謝「妮坦」，可以令到我有多半天假！！
由於打風，我當然係留在家中啦 ....... 雖然下午我就要返工，有多半日假，已經好滿足！
南瓜兄妹又黎接我放工，點知南瓜妹臨落車前：「媽咪，我要 poo poo ！」，唯有快快帶佢去商場，點知 ........玩我囉！(又或者佢唔想係商場 poo poo)
晚上，正當 hd 維修坐廁時，突然南瓜妹要去 vee vee ><，就係咁 ........ 南瓜妹就失手添！(可能仲未識得忍vee)
不過都係好事，等南瓜妹知道乜叫 "瀨 vee"！
結果：1次瀨濕。
03/08/2016 (28M13D) - day 5
hd 又帶南瓜兄妹出街，不過唯一唔同係唔係"單拖"，而係約埋母親大人一齊出街.......
結果：濕左1次尿片。(南瓜妹唔肯同母親大人去 vee vee)
04-06/08/2016 (28M14-16D) - day 6-8
去澳門啦！！
我曾經諗過唔著尿片，但最後都係決定用住尿片先，萬一有乜事都唔知去邊度清潔 ><
結果：
04/08/2016 day 6：無濕過，成功 ！
05/08/2016 day 7：早上南瓜妹講去 poo poo，但當時 hd 正在洗手間，結果 poo poo 左尿片，其餘時間 -- 成功！
06/08/2016 day 8：無濕過，成功！
早知咁成功，就唔帶尿片去啦！！
08-11/08/2016 (28M18D-21D) - day 10 -13
返適應班！
肯去學校洗手間，但唔肯跟校工ee ....... 唔知南瓜妹返學會點呢！？？
結果：
08/08/2016 day 10：無濕過，成功。
09/08/2016 day 11：無濕過，成功。
10/08/2016 day 12：無濕過，成功。
11/08/2016 day 13：無濕過，成功。
南瓜妹每次去完 vee vee 都要自己拎紙巾抺 pat pat，但佢唔係拎2格，係拎好多紙巾 >< ，但我就堅持唔係佢自己抺 poo poo 住，再等佢大個 d 先 (其實佢肯自己做，我係唔係應該俾佢做呢！？)
經過13日既觀察，雖然都有失過手 ，但其餘時間都成功，可以返學前戒左日片！yeah ~~~~~
不過返左學，會否倒退呢！？？？？
後記：18/08/2016 (28M30D)
原本諗住遲d先戒夜片，但見南瓜妹兩個星期都無濕過，屋企既尿片又差不多用完，我就決定 --
戒埋夜片，就係咁........ 南瓜妹就同尿片講 bye bye 啦！！
Q&A
問：點樣可以戒夜片！？
答：無心得。南瓜妹臨瞓前30分鐘會飲奶，之後就veevee ，就上床瞓，直至第二朝。我無刻意同佢戒，只係南瓜妹連續兩星期無濕片後，先無同佢著尿片。我諗係天生，亦可能佢瞓得好(一瞓就天光)。都係呢一句.......小朋友 ready 就戒到，唔好迫。
