南瓜妹@第2次私家疫苗(五合一/輪狀)

26/7/2014 (4M5D)

打第2次私家針，打五合一無細胞疫苗、食輪狀病毒疫苗。

因為食輪狀前要1小時食完奶，所以改左南瓜妹最早支奶，推後左支食奶時間，南瓜妹早上又無喊要食奶喎！

要帶2個咁細既小朋友出街，真係要預多點時間，我地係book左10點打針，但10點先出門口(哈！)，車程仲要30分鐘左右，打私家針姐，遲到無所謂啦！！

今次南瓜妹唔合作，勁喊，喊唔停，仲俾醫生話佢唔乖、好難教.......

我心諗，南瓜妹不知幾乖，平時好少喊，就使喊，一抱上手就好快停，你仲乜話佢喎！？？(我都唔知點解佢無端端扭架！？)

好不容易先食完輪狀 (基本上分左2次食，但每次都係少少咁餵)，再打埋支針。

但一出醫生房門，南瓜妹就嘔........

唉，都唔知佢係唔係嘔哂輪狀出黎！？都唔知點算好！？駛唔駛補食！？

(後記：hd 去左衛生署網睇，話食左1ml 都好足夠保護，唔駛補喎！！)

最奇怪係.......南瓜妹嘔完無喊，仲瞓埋添！？？？？

之後就同南瓜仔出街食埋飯，先返屋企！！

南瓜妹@手模 (打手印)

19/07/2014 (3M30D)

南瓜仔係初生時，有朋友送左手模相架俾我，所以就幫南瓜仔整......

咁南瓜妹呢！？

諗左一陣子買唔買好，因為價錢都唔平，要成四百幾蚊，但我真係好鐘意個相架，真係好靚，所以都係決定買個一模一樣送係南瓜妹！！

南瓜妹好合作，hd 負責打手印，我就負責抱住南瓜妹，整左兩次就成功打好手印，乖女！

↑購自 HALLMARK，靚嗎！？

買左幾日後先幫南瓜妹打手印，打完手印後，又要哂相，但懶到出汁既我，一直都係"拖"，最後 hd 攪掂揀相，不過就係我拎出街哂同cut 相架！！


↑ 呢個係南瓜仔既完成品！！(DAY 109 @ 手模 (打手印) )

期待南瓜妹既完成品！！

南瓜仔@K班大作戰 - 序

又要大作戰，啱啱戰完 PN 班，仲未返學，又要開始 ......

今次比上次有計劃：

1) 申請學券 (必做)

2) 搵心儀學校

搵學校原則：

- 幼稚園分HAPPY SCHOOL 同 "谷"既學校，我都報名。

- 學費、雜費、校巴費不一，要睇自己能力。(有學券可能交幾百蚊，私校可以過萬，仲要買佢地既債券，聽聞要幾十萬！！)

- 學校地點。

- 去學校網頁或致電問幾時報名，每間學校報名方法/日期都不一樣，有網上報名、親身交表或郵寄交表，唔好錯失機會。

- 報多幾間，怕學校面試日撞期。

3)  預備物資

- 信封 (平均4個回郵信封，1個公文袋 (入4個回郵信封、申請表、相、影印本)，我唔會理學校寫乜SIZE信封)

- 地址 label (要寫學生名，唔好寫家長名，因學校係用小朋友既名作記綠)

- 郵票 (回郵 ($1.7)、寄去申請學校既文件 ($1.7 x 3) → 因為較重(內含4個回郵信封)，怕郵費不足寄失)

 - ↑ 相片 & 袋

平均4張相(不包申請表貼既相)，出街影太貴，係屋企自己影，可任影數十次，不過真係好難影，未影已想走，最後用iPad。

影完用software整證件相，一張4R相可整8張證件相，之後拎去哂相，勁平，唔駛20蚊就有100張證件相，袋仔係交相俾學校用。

唉，睇下南瓜仔，瘦左幾多 ><


- ↑ 小朋友名原子印

太懶，唔想每張相背後寫名，萬一學校處理文件時，落左張相，都知乜誰人。

我係海盛貿易公司訂，公司同事介紹，同事話佢地既印係貴少少，但最耐用喎，最重要係唔駛親身去拎，寄俾我！！

- 針咭 & 出生紙影印本 (仲要SCAN定，有部份學校網上報名)

- 支票 (交報名費)

4) 面試訓練

我唔會報什麼面試訓練班。

南瓜仔係細B，表現同大B有一定既距離，我唔會迫南瓜仔識，亦迫唔到！

而小朋友既表現唔係我地可以控制，明明屋企做到，出到去未必做到，所以唔好俾咁大壓力俾小朋友同自己。

不過我就會教左先，教左面試未必做，唔教多數唔識做！！

咁會教乜東東！？都係教日常生活接觸既野.......

5) 家長準備

- 假期 (必備，又要親身交表、又要IN，多多假期都唔掂，唉)

南瓜妹@4個月+健康院

21/07/2014 (4M)

去健康院，一上磅就心知不妙，只得 5.66kg， 重得好慢！

見姑娘，都係講番嘔奶既問題，姑娘話南瓜妹既生長線由50跌至25，所以轉介俾醫生！

見醫生，醫生話好多bb都係咁，去到6個月就會好轉，亦唔排除要食藥，但會有副作用。

因南瓜妹跌出原本既生長線，所以建議轉介去政府醫院兒科排期，hd 千萬個不願意排期，但我覺得排左期先，若去到南瓜妹6個月時先再排期，就會拖得仲耐！ (後記：因要帶住址證明、出世紙，第2日先去排期，結果排到今年11月，南瓜妹已8個月！><)

最後打埋支13價肺炎鏈球菌疫苗，南瓜妹只係喊左幾聲，就無喊啦 ~~~~~

講番呢個月既進展先.......

06:00  奶 (5安)
10:00  奶 (5安) 
14:00  奶 (5安)
18:00  奶 (5安) 
22:00  奶 (5安)

食
無加奶量，因為都係成日嘔奶，都唔知時先唔再嘔奶！？

基本上所有奶佢都食哂，只係嘔番出來，現在亦唔會補奶！

我問hd：「你覺得嘔奶好！？定係厭奶好！？(南瓜仔2個月已經厭奶)」

hd：「咁當然係厭奶，佢厭奶我知道佢食幾多！？嘔奶又唔會佢食幾多！？嘔左幾多！？」

另一個問題係嘔奶既工作多好多，衫一日換幾次(係食完奶個幾兩個鐘先吐，無理由長期用住膠口水肩)，亦試一日嘔濕3張床單，唉！

大便
平均一日 1次。試過幾次兩日1次。

瞓
平均16小時左右。

能力發展

-  識抬頭
(無做過任何"特訓"，如果唔係上次做spa，我都唔知已經識得抬頭，因為太怕佢會嘔奶！！)
-  笑得好甜，真係好甜 (女仔係可愛啲)
-  會發出 "呀！呀！呀！"聲
 
↑ 晚上八點半先記得要買蛋糕慶祝，拿拿淋叫hd落街買，所以已經無乜款，是是但但買左呢個蛋糕！

又係南瓜仔代吹蠟燭，南瓜仔吹完勁開心！！

南瓜仔@22個月

19/07/2014 (22M)

我7月就開始返工，返工第一日我以為南瓜仔會好掛住我，因為佢呢3個月日日起身就見到我，但原來佢無掛住我囉，仲同公公婆婆玩得好開心添！！
公公勁讚南瓜仔 (公公平時照顧表妹，因表妹一家去左旅行，所以黎我屋企幫手)，公公話南瓜仔好乖，又唔喊、又無叫、唔會亂攪野、又自己玩、出街又拖住佢、又自己瞓 (午睡瞓bb床，妹妹就係食奶時間) 、最重要係公公走，佢狂叫公公，開心死公公！！

09:40  早餐 - 奶 (6安)+餅
09:50  遊戲時間
12:00  午餐 + 水果
12:30  遊戲時間
14:00  午睡
16:00  下午茶
16:15  遊戲時間
19:15  晚餐 + 水果
19:50  遊戲時間
21:15  洗白白
21:30  宵夜 - 奶 (6安)
22:30  瞓覺
 
食
屋企食飯已經無乜餵佢，等佢自己食，食到佢唔食時，我會問佢飽未！？仲食唔食！？若佢答左飽同唔再食，我就唔理佢，即使食得一半！！

但若一開始就話唔食，我又有忍唔住餵佢，唉！

大便
一日 2 次！仲未戒片。

瞓
平均瞓 12小時！！

雖然晚上係瞓大人床，但已經係自行入睡，唔駛做任何野、唔好理佢，瞓佢隔離就得！

能力發展
1) 說話/認知：

一個月比一個月進步，南瓜仔講野唔算好叻，但亦唔算差，當然每次聽到佢講某些野時，會好開心，估唔到佢識。不過，南瓜仔一出街就唔肯講野，太怕羞！！

有時南瓜仔會手指指，我地係明佢想點，但我地都會扮唔知，等佢用佢既語言講出來！

而我地主要教唔係講句子，係教"認知"，例如：

- 西瓜/提子有核，佢會指住西瓜核，講：「核！」，之後我會問佢食唔食得！？佢會答：「唔得！」，試過佢食到核，佢識得吐番出來！！

- 問佢有咩野會飛，佢識答：雀、白鴿、蝴蝶、飛機

- 顏色，部份顏色(紅、黃、籃、綠)已識分辦，亦識得講！(但間唔中又講唔啱！？都唔知佢真識定唔識！？)

- 識得分足球同籃球點玩，我問：「足球點玩！？」佢會講：「踢」，我問：「籃球點玩！？」，佢會講：「拍拍！」，之前南瓜仔好鐘意拎籃球踢，現在會拎足球踢，籃球就拎黎拍(但拍唔到！哈！)！

- 識分大小 (係用食物教)，我問佢你要大定細！？佢會講：「大」(仲奸笑)，再自己拎埋食！我再問佢細邊個食，佢答：「媽咪！」

但都要教講野：

- 識得講我叫乜名(英文名)，仲識得講爸爸名(中文全名)

- 講多左好多句子，例如「爸爸,妹妹早抖」、「爸爸,媽媽,妹妹食飯」、「妹妹唔好踢被」、「媽媽抱抱 XX (自己既名)」、「妹妹拎住combi車」、「妹妹唔好嘔」(之前講「妹妹無嘔」)等

- 南瓜仔有時會叫我做「媽咪」、叫hd做「爸b」、「清侵磨教叉燒包」(類似既音)，但我地係無教過佢講，我都唔知佢邊度學！？

2) 主動嘴對嘴錫我同 hd，開心死我地啦！！

3) 自己主動拎書，然後坐低，一頁頁睇。

其他
- 瘦b (20.9磅，無乜重過，唉)
- 16隻牙

 ↑ 22個月，呢件衫係南瓜妹百日宴時買俾佢，諗住呢件做埋in學校既戰衣。