親子好去處@香港單車館 - 兒童遊戲室(極限運動)

07/05/2016 (43M18D) + (25M16D)

目的地： 香港單車館

原本諗住係出面公園玩，但真係我見到個太陽就 ..........都係去室內玩 -- 兒童遊戲室(極限運動)，但就排 35分鐘，都幾耐 .......

我：「你地想唔想玩！？要排好耐喎！」
南瓜兄妹：「玩！」

但我就講明一齊等，咁佢地兩個又乖乖地等，我覺得明明要自己想玩，無理由我去排隊，佢地就走去其他地方玩！

但 hd 這天沒有著襪，橫掂都無得入去玩，所以我就叫佢去小童群益會交暑期活動班既錢，我就一個睇2個，其實都有點怕(意外既野無人知)，所以就同南瓜仔講 ......

我：「妹妹細個，所以媽咪要睇住妹妹，你大個仔可以自己去玩，但記得唔好走出呢間房，呢度有ee睇住，無壞人會捉左你，但你走出左房，d 壞人就會捉左你去！」

↑ 入到去，南瓜兄妹就周圍玩......

南瓜兄妹有時會一齊玩，但有時又分開玩，所以我對眼就要兩邊都望住 (好彩個遊戲室唔太多，一眼就望得哂！)，而且全場都有軟地蓆！！

南瓜兄妹好鐘意玩滑梯，起碼玩左20次以上，玩得不知幾開心！！

期待幾年後，我只坐埋一邊睇住佢兩兄妹玩！！

2016 母親節(前夕)

南瓜仔：

05/05/2016 (43M16D)

星期四晚，突然心血來潮 (真係唔知點解) 記得母親節，咁即係南瓜仔應該有禮物送俾我啦！(學校整母親節禮物係"常識")

我：「e ....... 就黎母親節，你整左咩送俾我呀！？」
南瓜仔：「有呀，有張咭同戒指，不過戒指係假，唔係真！」

就係南瓜仔臨瞓前，我再問南瓜仔：「 咁除左張咭同戒指外，仲有乜呀！？」
南瓜仔：「Ms Sammi 仲教我唱歌俾你聽！」

之後就高歌一曲 "Mommy, I love you "後，就瞓啦 .........


06/05/2016 (43M17D)

放工返屋企，南瓜仔就送上禮物......

同佢講既野一樣，真係有張咭同戒指，見到隻戒指，唔知點解立劇就帶上手，仲有種甜絲絲既感覺！！

↑ 畫畫既創造力一般，不過我都睇得出佢畫得出佢畫緊「一家四口」！！
(後記：之後係 fb 見到其他同學既咭，我終於明白點解南瓜仔成績表既「創意」得 "B-")


南瓜妹：

05/05/2016 (25M14D)

我：「e ....... 就黎母親節，你整左咩送俾我呀！？」
南瓜妹：「無呀！」

呢個答案，我都估到！哈！


06/05/2016 (25M15D)

係我 lunch time 時，已經見到佢同一辦學團體既小朋友拎住支花，我就估南瓜妹應該有花送俾我！！

去接南瓜妹放學，一眼就見到南瓜妹手上拎住支花！！
我指住支花：「咩黎呀！？」
南瓜妹：「送俾媽咪！」
我：「多謝哂。咁仲有無野送俾媽！？」
南瓜妹：「無啦！」

我當然唔信啦 (學校整母親節禮物係"常識")，就睇下佢書包，見到張咭 .....

我：「呢張係咩黎！？」
妹妹笑住講：「送俾媽咪！」

突然，南瓜妹同我講：「Ms Li 叫我同你講『母親節快樂！』」

南瓜妹係學校真係有聽書！(可能我小驚大怪，但我覺得一個25個月大既小朋友，竟然咁記得老師教既野！)


↑ 咭同鮮花

親子好去處@蒲崗村道單車公園

連續三天假期，不過呢三日都係同表兄弟姊姊玩 ........

第一日：hd 要返工，中午就約左表妹(姐)黎我屋企，表妹(姐)食完飯就回家午睡，不過呢幾個小朋友仲未玩夠，所以晚上我就去妹(姐)家玩，仲叫埋表弟一齊黎添！

第二日： 早上，南瓜仔學游水，游完就回家休息一陣(hd 都係不在家)，再出去食 lunch。黃昏時就帶左南瓜兄妹去圖書館 + 公園玩。晚上就去婆婆屋企，我地六表兄弟姊姊一齊玩 (年齡 5.5-0.5歲)，大人終於休息15分鐘，期待1年後，大人可以休息150分鐘！哈！


02/05/2016 (43M13D)+(25M11D)

唔知你地有無 tango，南瓜兄妹成日同表弟 tango (係表弟成日打俾佢)，南瓜仔每次都話要睇佢地既龜(屋企都有龜，都唔明點解要去人地屋企睇！？)，仲好幾次都要去表弟家 .......

咁就約埋表妹(姐)同公公婆婆一齊去！！


↑ 唔...... 明明話去睇龜，不過睇左唔夠1分鐘，就去玩玩具！哈！

玩完一陣，就去公園玩啦！！


目的地：蒲崗村道單車公園

呢個公園都幾大，環境都不錯！

而且四周都有「滅蚊機」(我好怕有好多蚊既公園)，不過我都幫小朋友塗上蚊怕水！


↑ 對於小朋友黎講，有得玩就得！！

吹下泡泡，去下遊樂場，已經放左佢地好多電啦！！

呢度有個單車公園，仲有單車租 ......

雖然大家都好自律地順時針踏，但部份小朋友/大人都踏得比較快，對於初學者、踏得慢又要家長陪既小朋友就要多加小心！！

放左電1小時多，我地就去飲茶，之後就回家休息！！

南瓜妹@PN大作戰(完結)

PN 大作戰經已完結 ........

南瓜妹已有原校收PN，所以無乜壓力，起碼有書讀先 (最初 in 得唔好，我係有唔開心，不過去到後期，我都半放棄，哈！哈！)

我一共報左10間， in左8間 ，2間不獲面試。(其中1間，係最最最最心儀既學校，不過連面試機會都無 >< )

結果：4 offer(s)、3 waiting(s)、1 reject ，南瓜妹 in 成咁都有offer(s)！？？都叫做好彩 ........


幸運地，南瓜妹入到我最心儀既學校，但就入唔到 hd 最心儀既學校。

當收到我最心儀學校既offer時，我竟然並無特別開心，只係覺得「真係收左！？」(係唔係好冷靜呢！？但係"派彩"前，我都有緊張，仲不停問 hd：「你估收唔收南瓜妹！？會唔會上午班！？咁下午班讀唔讀好！？」，仲四圍問朋友意見，唔知以為我入左添！><)


係我心目中，一早已經有心水次序，但當現實有得俾我揀時，我係有動搖過 ........

因收到呢個offer時，亦收到南瓜仔間學校既offer，自己都幾滿意南瓜仔間學校，但最後決定唔揀南瓜仔間學校既原因.......

當大部份家長都鐘意小朋友讀同一間學校時，我就係唔想佢地讀同一間學校，我好想參與佢地學校既活動(陸運會、旅行)，但我得1個人，真係分身唔到 (平時 hd 又請唔到假)！！

就正正好似宜家咁，南瓜兄妹不同校，放假(南瓜仔間學校好多假)又唔同，我就可以唔駛請假 (我仲未試過南瓜兄妹一齊放假，我或 hd 不在家，我真係未放心工人姐姐，一對二照顧佢兩個，而公公要去表姐家幫手，來年可能幫唔到手。)，所以對我來說，佢地唔同一間學校係較方便。

另一個原因，當然係口啤，既然有咁多家長支持，一定有其好處，對嗎！？


現在既 offer 已經好好，不過真心唔想「小一大作戰」(南瓜仔係龍年，又係細B，真係超頭痛)，在朋友既分享，小學係十分十分十分難考 .....

所以一心諗住試下龍校，點知聽朋友講，讀龍校 (大部份都唔係100% 直升)壓力係由 K1 開始，大家都深怕係被"OUT"既學生，嘩！咁轉去龍校未仲大壓力！？？？

呢個問題再諗諗吧，都係報左先，收左先算！！right！？

親子好去處@blogger 聚會(歡迎 Mrs Wu 回港)

24/04/2016 (43M5D) + (25M3D)

我期待呢一日好耐.......

點知 hd 突然間同我講 --- 我。要。返。工！！

我真係晴天pig pig，叫我一拖二去，我暫時仲未得(只限屋苑會所或樓下商場)，我最怕係佢兩個係車瞓左，我一個人點抱住兩個落車呢！？？？

有諗過叫工人姐姐調假，但前一日 hd 都係要返工，南瓜仔又要學游水 (我要同南瓜仔沖涼，更加唔可以帶南瓜妹一齊去啦！)，唯有放棄 ><

隔左一日，我既腦「突然」清醒喎，不如叫姨媽陪我去啦 .........

收到姨媽 whatsapp，寫住 -- ok，真係好開心呀！！


目的地：小檬媽屋企會所(歡迎 Mrs Wu 回港)

同左南瓜兄妹去麥當奴食午餐先，其實我都有點怕，因為我要出去買野食，怕佢兩個唔肯坐定定，好彩佢兩個都乖乖坐定定 (我對眼無乜離開過佢兩個)。

食完就出發去姨媽家，再去小檬家！！

呢兩個小朋友係車上瞓左啦(我抱住南瓜妹、姨媽抱住南瓜仔)，正當我地要落車時，姨媽就拍醒南瓜仔：「落車啦！」(我 O 左咀，因為我同hd都唔會叫醒佢地，我地會抱佢地落車，等佢地自然醒！)，之後姨媽仲講：「你自己落地行！」南瓜仔又肯自己落地行喎！？？(平時一定會喊住要我抱！)

去到目的地，等了一陣就見到小檬一家，小檬媽就安排我地上去會所先！

之後就陸續各 bloggers 就黎到，而主角就黎埋添！！！(可惜我無同 mrs wu 合照 ><)


最攪笑係，我地好多媽咪都幫小朋友著上「兄妹裝 / 姐妹裝」，呢個可能係每個媽媽既天性，哈！哈！

而另一樣驚訝係.......南瓜妹俾小檬媽抱！？？？？平時hd抱都會喊哂，睇黎小檬媽可以轉行做幼兒教育！哈！哈！

南瓜仔就掛住玩車，而南瓜妹對眼就掛住 d 野食！唔知點解南瓜兄妹去到就不停，食食食 .......... 不過係食零食，唔係正餐 ><


↑ 食完又玩過，再去 playroom 玩，我諗南瓜仔玩左個滑梯起碼20次！

見到一班小朋友一齊玩，做媽咪係最開心！！

多謝姨媽睇住南瓜兄妹，等我可以同其他媽媽傾下計！！

回程去婆婆家時，南瓜兄妹當然又係車上瞓啦，落車時，姨媽都係拍醒南瓜仔 (我沒有阻止姨媽咁做)，又係叫佢自己行！(原來南瓜仔可以咁拍醒佢，之後自己行 ....... 之前我擔心一拖二，係最怕佢兩個係車訓左，我就唔知點落車，原來我擔心是多餘！^^)。

去完婆婆屋企食飯後，南瓜妹同我講：「我好鐘意姨媽！」，睇黎可以次次搵姨媽幫手！！hahahahhahah~~~~~