南瓜妹@4個月+健康院

21/07/2014 (4M)

去健康院，一上磅就心知不妙，只得 5.66kg， 重得好慢！

見姑娘，都係講番嘔奶既問題，姑娘話南瓜妹既生長線由50跌至25，所以轉介俾醫生！

見醫生，醫生話好多bb都係咁，去到6個月就會好轉，亦唔排除要食藥，但會有副作用。

因南瓜妹跌出原本既生長線，所以建議轉介去政府醫院兒科排期，hd 千萬個不願意排期，但我覺得排左期先，若去到南瓜妹6個月時先再排期，就會拖得仲耐！ (後記：因要帶住址證明、出世紙，第2日先去排期，結果排到今年11月，南瓜妹已8個月！><)

最後打埋支13價肺炎鏈球菌疫苗，南瓜妹只係喊左幾聲，就無喊啦 ~~~~~

講番呢個月既進展先.......

06:00  奶 (5安)
10:00  奶 (5安) 
14:00  奶 (5安)
18:00  奶 (5安) 
22:00  奶 (5安)

食
無加奶量，因為都係成日嘔奶，都唔知時先唔再嘔奶！？

基本上所有奶佢都食哂，只係嘔番出來，現在亦唔會補奶！

我問hd：「你覺得嘔奶好！？定係厭奶好！？(南瓜仔2個月已經厭奶)」

hd：「咁當然係厭奶，佢厭奶我知道佢食幾多！？嘔奶又唔會佢食幾多！？嘔左幾多！？」

另一個問題係嘔奶既工作多好多，衫一日換幾次(係食完奶個幾兩個鐘先吐，無理由長期用住膠口水肩)，亦試一日嘔濕3張床單，唉！

大便
平均一日 1次。試過幾次兩日1次。

瞓
平均16小時左右。

能力發展

-  識抬頭
(無做過任何"特訓"，如果唔係上次做spa，我都唔知已經識得抬頭，因為太怕佢會嘔奶！！)
-  笑得好甜，真係好甜 (女仔係可愛啲)
-  會發出 "呀！呀！呀！"聲
 
↑ 晚上八點半先記得要買蛋糕慶祝，拿拿淋叫hd落街買，所以已經無乜款，是是但但買左呢個蛋糕！

又係南瓜仔代吹蠟燭，南瓜仔吹完勁開心！！

南瓜仔@22個月

19/07/2014 (22M)

我7月就開始返工，返工第一日我以為南瓜仔會好掛住我，因為佢呢3個月日日起身就見到我，但原來佢無掛住我囉，仲同公公婆婆玩得好開心添！！
公公勁讚南瓜仔 (公公平時照顧表妹，因表妹一家去左旅行，所以黎我屋企幫手)，公公話南瓜仔好乖，又唔喊、又無叫、唔會亂攪野、又自己玩、出街又拖住佢、又自己瞓 (午睡瞓bb床，妹妹就係食奶時間) 、最重要係公公走，佢狂叫公公，開心死公公！！

09:40  早餐 - 奶 (6安)+餅
09:50  遊戲時間
12:00  午餐 + 水果
12:30  遊戲時間
14:00  午睡
16:00  下午茶
16:15  遊戲時間
19:15  晚餐 + 水果
19:50  遊戲時間
21:15  洗白白
21:30  宵夜 - 奶 (6安)
22:30  瞓覺
 
食
屋企食飯已經無乜餵佢，等佢自己食，食到佢唔食時，我會問佢飽未！？仲食唔食！？若佢答左飽同唔再食，我就唔理佢，即使食得一半！！

但若一開始就話唔食，我又有忍唔住餵佢，唉！

大便
一日 2 次！仲未戒片。

瞓
平均瞓 12小時！！

雖然晚上係瞓大人床，但已經係自行入睡，唔駛做任何野、唔好理佢，瞓佢隔離就得！

能力發展
1) 說話/認知：

一個月比一個月進步，南瓜仔講野唔算好叻，但亦唔算差，當然每次聽到佢講某些野時，會好開心，估唔到佢識。不過，南瓜仔一出街就唔肯講野，太怕羞！！

有時南瓜仔會手指指，我地係明佢想點，但我地都會扮唔知，等佢用佢既語言講出來！

而我地主要教唔係講句子，係教"認知"，例如：

- 西瓜/提子有核，佢會指住西瓜核，講：「核！」，之後我會問佢食唔食得！？佢會答：「唔得！」，試過佢食到核，佢識得吐番出來！！

- 問佢有咩野會飛，佢識答：雀、白鴿、蝴蝶、飛機

- 顏色，部份顏色(紅、黃、籃、綠)已識分辦，亦識得講！(但間唔中又講唔啱！？都唔知佢真識定唔識！？)

- 識得分足球同籃球點玩，我問：「足球點玩！？」佢會講：「踢」，我問：「籃球點玩！？」，佢會講：「拍拍！」，之前南瓜仔好鐘意拎籃球踢，現在會拎足球踢，籃球就拎黎拍(但拍唔到！哈！)！

- 識分大小 (係用食物教)，我問佢你要大定細！？佢會講：「大」(仲奸笑)，再自己拎埋食！我再問佢細邊個食，佢答：「媽咪！」

但都要教講野：

- 識得講我叫乜名(英文名)，仲識得講爸爸名(中文全名)

- 講多左好多句子，例如「爸爸,妹妹早抖」、「爸爸,媽媽,妹妹食飯」、「妹妹唔好踢被」、「媽媽抱抱 XX (自己既名)」、「妹妹拎住combi車」、「妹妹唔好嘔」(之前講「妹妹無嘔」)等

- 南瓜仔有時會叫我做「媽咪」、叫hd做「爸b」、「清侵磨教叉燒包」(類似既音)，但我地係無教過佢講，我都唔知佢邊度學！？

2) 主動嘴對嘴錫我同 hd，開心死我地啦！！

3) 自己主動拎書，然後坐低，一頁頁睇。

其他
- 瘦b (20.9磅，無乜重過，唉)
- 16隻牙

 ↑ 22個月，呢件衫係南瓜妹百日宴時買俾佢，諗住呢件做埋in學校既戰衣。

將沒有姐姐的日子

19/07/2014

我地係上年12月開始問工人姐姐會否續約 ，工人加至$4,500，但工人姐姐都係話唔會續約。(由入職第一日，佢都話只會做兩年)

去到今年2月時，我地又再問佢續唔續約，答案都係"NO"。

所以我地就開始搵新工人姐姐，但搵新工人姐姐不容易，因為2個小朋友仲係細，唔係好多工人姐姐肯做！

直至3月時，原本搵到一個新工人姐姐，仲約埋簽約添，點知舊工人姐姐話肯續約，咁當然用番佢啦 ~~~~

舊工人姐姐係唔係做得好好！？當然唔係最好，但呢個世界上無可能有人係完美 (除梁振英外)， 而且我地已相處差不多2年，再搵個新工人姐姐又要由頭適應過，而且又未必一定比佢好！！

不過，佢唯一既要求係放長假，原本佢想放6-8星期，但真的無可能，最後決定放佢 5星期假，呢5星期我會同hd輪流放假 (主力係hd放假)，又會叫埋母親大人黎幫手(只係睇頭睇尾)！

唔知呢5星期會點過，又要做家務(煮飯、洗衫、洗碗、掃地拖地、做一般清潔、買餸)、又要餵奶(南瓜妹仲係成日嘔奶)、睇南瓜仔食飯、沖涼，唉，要照顧2個小朋友真的不容易！！

老公加油呀！！！

戰友變陌路人

呢篇係我2009年既文章......

生南瓜仔時，他再重返「戰地」，亦變成我上上上司。

重返了2年，今日我可以肯定(之前已經覺得)，他已不是我的「戰友」而是「陌路人」！

好不容易建立既信任，真的可以話無就無！！

當然現在既我有唔開心，但工作只是我一部份，而且只是上司........

南瓜仔/南瓜妹/hd才是我的全部，我要好好珍惜他們，我不希望他們將我變成「陌路人」。

南瓜仔@PG 畢業禮

12/7/2014 (21M23D)

南瓜仔係9個月開始上Playgroup，去到14個月時就轉左 維多利亞(康怡)幼兒園 Victoria Bee Bee Kids Playgroup，不經不覺就上左差不多8個月了！！

讀PG，係希望南瓜仔同多啲小朋友玩，學下群體生活。

其次係想有機會入佢地K1，雖然最後入唔到。><

佢地既老師們好有愛心，除左課堂學既野外，仲教左我好多教小朋友既方法。


↑ 今日PG畢業啦！(估唔到一星期上一次既PG都有畢業禮！哈！哈！)

↑ 上堂情況！ (茶點、 勞作、唱遊、玩吹泡泡、講故事)

↑ 南瓜仔同hd一齊整的心意咭，送給老師！

南瓜仔會係9月份開始返PN，要自己搭校車、自己一個上堂，又要晨咁早起身(現在九點半起床)，南瓜仔習唔習慣我唔知，但我一定好掛心佢！！