南瓜妹@PN大作戰(2) - 救世軍慶恩幼兒園

救世軍既學校係一拎出世紙就要報，所以南瓜妹一拎出世紙後就報左名！！

南瓜妹是3月b，但排佢前面仲有超大b、1-2月b，不過比起南瓜仔係9月b，南瓜妹算係好彩，起碼有得面試先 ~~~~~

21/11/2015 (20M)

hd 要返工，咁就由我一個人去 in，去到南瓜妹已經唔肯行，唯有抱入去學校 (總好過佢狂喊 ><) ......

佢地無安排"正式"面試，只係睇住小朋友玩，老師就會同家長傾下計同睇小朋友既表現！

1) 聽講座 (講面試流程)


↑ 南瓜妹入到去唔肯坐，喊住要我抱，唯有俾餅佢食，點知佢勁貪心，要成盒餅喎 ><

2) 課室"面試"
入面有3張枱....

- 油填色，南瓜妹好快就油完(只係油左少少)，之後就走去玩下一張枱..... (仲係拎住盒餅，期間我有同南瓜妹傾計)

- 手抓版，好"求其"玩左幾下，就走去玩下一張枱 (仲係拎住盒餅，期間我有同南瓜妹傾計)

- 玩 logo，玩左一陣，南瓜妹唔小心跌左成盒餅.....
老師A就走過來：「d 餅餅跌左落地下，污穢左，唔食得啦！」
南瓜妹含住d眼淚講：「知！」(咁乖！？仲停埋喊！)
老師B：「我聽到你同佢既對話，佢講野幾叻喎！」(咁都聽到！？)
我：「係呀！」
之後老師B又同我傾了幾句計，又同南瓜妹玩一陣，去左另一張枱.......

點知南瓜妹坐坐下跌左落地，又喊過，要我抱住佢 ><

見南瓜妹安靜左 (唔想再抱佢，所以俾d野做)，就叫佢自己拋垃圾 (用完既紙巾)，南瓜妹就自己走去拋，仲自己開埋垃圾蓋拋 ，仲俾老師見到佢做喎！

之後南瓜妹又走去油填色，但枱面無哂紙，我就同南瓜妹講：「你自己問老師拎！」
南瓜妹就走去老師度：「紙呀！」
老師B：「你要(圖畫)紙，我俾你！」
南瓜妹就跟住老師B行去拎(圖畫)紙......
當老師B俾完南瓜妹後，南瓜妹：「唔該！」
之後就走去油填色......

點知油唔夠10秒，老師就話要排隊出去大堂玩，南瓜妹就死都唔肯走 ......

咁有半迫叫南瓜妹走，南瓜妹又喊過！！ (唉，又喊.......)

3) 大堂玩
首先，玩滑梯，入 playmat 前要除鞋，但南瓜妹除完鞋又唔玩，咁唯有著番鞋啦，南瓜妹又要自己著喎 ......

呢個時候，老師B又來到，見到南瓜妹自己著鞋，就問：「佢自己著鞋啦！？」
我：「係呀，佢既自理能力好好，好多野都要自己做！」(當然我又讚美一下南瓜妹啦！)
南瓜妹要協助先可以著到鞋，老師就幫左佢少少，著完之後，我發現南瓜妹對鞋左右調轉左 ........
我：「妹妹，你調轉左黎著喎！」
老師拋：「 唔緊張，我地要俾小朋友多 d 做！」

之後南瓜妹又轉左去玩廚房 ......
南瓜妹玩玩下， 老師B又走黎同佢玩，老師：「我想要杯水！」
南瓜妹就走了拎杯，仲拎埋水煲，仲做埋水煲倒水落杯既動作 (叻女！)
老師又陪南瓜妹玩左一陣，就走左！

4) 送禮物
老師B事前已經講，要講「多謝」，所以當老師送完禮物後，南瓜妹：「多謝！」

咁就完哂啦！！

南瓜妹有喊 、有扭抱、有唔合作 (點解成日都係咁！？) ，但可以做到一些小朋友未必做到既野 (自己著鞋、主動問老師拎野)，唔知呢度會唔會拎到分呢！？

南瓜妺@20個月

21/11/2015 (20M)

07:10  奶 (6安)
07:15  刷牙 + 洗面 + 換片 + 換校服 
08:00  落樓 /上校巴
08:25  到校
17:00  放學
17:25  落校巴
17:30  換衫 / 洗手 / 遊戲時間
18:45  晚餐 + 水果
19:30 小休
19:50  洗白白
20:00  遊戲時間
20:45  奶 (6安)
21:15  瞓

食
湯、包係大愛。

自己可以成碗飯食哂，亦會用杯飲湯，不用任何人幫，但就要睇心情！！

大便
1 -2次。

瞓
間唔中都會半夜會喊醒><

通常六點幾就醒，但有時五點幾就喊醒！！

發展 
語言能力：

1) 對話
- 同南瓜妹睇醫生，南瓜妹一見醫生就喊.....
醫生：「我送張貼紙俾你！」
南瓜妹：「唔要」
醫生：「咁你鐘意乜野呀！？」
南瓜妹：「媽咪！」
之後就成個人貼係我身度！！ (sweet)

- 南瓜妹指住梳化位置：「媽咪，坐呢度！」
我：「我要坐係呢度！？」
南瓜妹：「係呀！」
我就坐落佢，之後南瓜妹就會爬上梳化，又會成個人貼埋我身！(sweet)

- 南瓜妹每天瞓覺時：「媽咪，拖住！」
之後會伸手拖住我手指，然後瞓覺！ (真係幾sweet)

- 每當南瓜妹發現工人姐姐煮完飯，就大叫：「我要食飯！」
之後就會拖住我，南瓜妹：「洗手！」 

- 去會所玩，南瓜妹拖住我手，拎埋我對鞋：「媽咪，著鞋....走！」

- 我：「邊個食餅餅！？」
南瓜妹就會舉手：「我！」
我：「咁媽媽有無份食！？」
南瓜妹：「無！」
我：「咁爸爸啦！？」
南瓜妹：「無！」
我：「咁邊個可以食！？」
南瓜妹：「xx (自己既名)！」
呢個係自私既妹妹 .......

2) 跟南瓜仔唱普通話歌，最愛唱 abc song。

3) 自己數 1-6 (自己將提子一粒粒咁數，無教過佢)

活動能力：
- 出街唔肯行，一定要抱 (懶到出汁，可以點解決！？)
- 愛跳舞，愛唱歌
- 愛推椅
- 自轉 

自理能力：
係女仔！？定係學哥哥！？或是學校教呢！？
- 自己食飯
- 自己著底褲 (做到) / 學習褲 (著到一半) / 長褲 (未成功) / 襪 (未成功)
- 自己除底褲 (做到) / 學習褲 (做到) / 襪 (做到) / 衫(只係做到動作，未成功)
- 自己除鞋
- 自己著鞋 (做到一半)
- 識得漱口 (之前無教過，估唔到一教就識)

我都好欣賞南瓜妹自己做，但問題係南瓜妹仲未做到 ......

好似著長褲咁，著左10分鐘都著唔到，但唔俾我地幫，一幫佢就大叫，煩死！


返學
班主任沒有電話俾我，我諗無乜野掛！？

其他
-  16隻牙 (一次出4隻牙，所以狂流口水)
-  19.8磅(9kg) 
-  好"痴"身，咩到要我，要我同佢沖涼、睇住佢食飯、陪佢入房瞓。
-  貪靚，一朝早就話要「夾夾」，是但拎一個俾佢就會講：「唔啱！」，要拎到佢心水先得！(之前成個髮夾盒俾佢揀，但佢次次都攪到成地髮夾)
-  自己明明有盒餅，但一定走去拎南瓜仔既餅食！ 

↑ 20個月！！

南瓜仔@38個月

19/11/2015 (38M)

食
都係唔飲湯、唔食菜 .......

不過有時會唔駛「三吹四請」就自己食哂飯，所以好睇佢心情！

水果都係佢大愛既食物 (唔計零食)！

瞓
晚上，15分鐘內就會瞓著。

發展方面
可愛既對話 ......
南瓜仔：「媽咪同我沖涼！」
我：「點解要同你沖呀！？」
南瓜仔：「因為媽咪鐘意我囉！」

晚上瞓覺，南瓜仔：「媽咪，可唔可以拖住我手瞓呀！？」
我：「可以呀！」
之後我就拖住佢手仔啦！

晚上瞓覺，我：「我可唔可以拖住你瞓呀！？」
南瓜仔：「好啦，拖一陣咋！」
我 ..........

我叫南瓜妹學哥哥坐係度屙poo poo，我：「哥哥都係自己屙poo poo，唔駛驚！」
南瓜仔：「妹妹pat pat 細個嘛，我大個嘛，佢驚跌，等佢大個先啦！」

南瓜妹同南妹仔搶玩具，之後我同南瓜仔沖澡時，我：「你要好好愛錫妹妹，你得一個妹妹咋，媽咪唔會再生細佬或者妹妹架！」
南瓜仔：「媽咪，我想要細佬喎！」
我：「吓！唔會啦，媽咪唔再生bb架！」(我無諗過南瓜仔會咁回答)
南瓜仔：「但係我真係想要做細佬！」
到了第二日，南瓜仔：「媽咪，我想要細佬呀！」
又提！？我係唔會理南瓜仔！

我銀包無哂錢，我：「媽咪無哂錢！」
南瓜仔 (不知所措既樣)：「咁點呀！？」
我：「唔知！」
南瓜仔：「你問爸爸，爸爸好多錢！」
hd：「爸爸都無錢喎！」
南瓜仔：「唔緊要，媽咪你聽日返工就有錢！」

有天早上，我送南瓜仔返學：「我放工後帶你去會所玩！」
南瓜仔：「好呀！」
結果，因南瓜妹有微燒，所以我放工後就帶南瓜妹去睇醫生，返到屋企已六點多 ......
南瓜仔：「媽咪，你話帶我去會所！」
我：「今日妹妹病，媽咪帶妹妹去睇醫生，現在已好夜，明天先帶你去！」
南瓜仔喊住講：「 媽咪，你應承左我，你呃我 .......我宜家要去呀！」
之後就繼續喊，最後俾左 toy story 佢睇！
第二日，我：「媽咪今日帶你會所玩！」
南瓜仔：「媽咪，你尋日呃我，你今日唔好呃我啦！」(仲記住我呃佢 ><)
我：「放心啦！媽咪今日一定帶你去！」
當然，這天有帶佢去會所玩啦 ~~~~

活動能力：
- 可以快速玩單車同滑板車
- 單腳企
- 單腳跳 (一下咁多！)

自理能力：
-  自己去vee vee
- 著同除短袖衫+褲、拉鏈或扣鈕外套都已經自己做到！
- 自從上個月病左後，現在唔多肯行路返學，又要我抱！

返學
南瓜仔轉左新班主任(之前放緊產假)，新班主任無打過電話俾我，所以我都唔知南瓜仔學校情況係點！？？咁啱學校攪左個嘉年華，所以有機會問下老師 ......

- 自理能力好，能自己完成功課。
- 不愛說話，當表達需要時就無問題(肯主動講)，亦會說英文(老師是NET)。
- 上堂專心，能完全明白指示完成課堂要求。
- 評估表現十分好，很多英文單詞都懂。(即係南瓜仔做評估時有出聲！？？要家長日再問清楚)

期待家長日 .......

情感方面
南瓜仔好少事就會喊，咩到喊一餐，不過正常情況下都係喊1-2分鐘.....
- 妹妹拎左佢d餅食，喊！
- 要既野，唔俾佢，又喊！

南瓜仔@戒片大作戰(下)

南瓜仔係32M已正戒同尿片講 bye bye，但佢一直都要有人協助拎起 JJ >< (老師話南瓜仔 (33M) 已自己去，點解屋企唔肯呢！？？？)

南瓜仔去 poo poo 就會主動同我地講，而 vee vee 呢！？ 基本上都係等南瓜仔主動講，但起身後、沖涼前、去街前、回家後、臨瞓前，我地都要南瓜仔去 vee vee ><

南瓜仔戒片進展：
- 30M 戒日片
- 32M 戒夜片
- 37M  自己去vee vee 啦 ....

有天，南瓜仔話去vee vee，正當我諗住幫佢時，南瓜仔：「 媽咪，得啦，我自己去就得！」

南瓜仔一直都係大人廁所去vee vee(仲未夠高，要企矮凳)....

現在會自己搬矮凳>企上去 >除褲>"掃" JJ>去vee vee>著褲>蓋廁所板>沖廁>搬高凳>洗手>抺手>完成

雖然要去到37個月先自己去vee vee (不過我都有跟住佢！哈！哈！)，但我已經十分開心，下次既挑戰係屙完poo poo 自己抺pat pat，唔知幾時教先好呢！？

自從南瓜仔戒片(33M)後，都有失過手 .....
1) 屋企：試過幾次，都係掛住玩，好急先去vee vee ><
2) 瞓覺：2-3次。
3) 出街：0 次，叻仔。
4) 學校：2次，但我就唔知係瀨 vee vee！？定係屙得唔好整濕左！？

親子好去處@調景嶺圖書館+調景嶺/寶康公園

15/11/2015 (37M27D) + (19M25D)

目的地：調景嶺公共圖書館

自從南瓜兄妹返學後，就少帶佢地去圖書館 (時間上配合唔到，不過 hd 就定時去借書睇)，所以今日就帶佢兩個一齊去 ......

南瓜仔愛睇書，所以去到圖書館會主動叫我地一齊睇圖書！

 
↑ 而南瓜妹對睇書無乜興趣，聽唔夠2頁就走人 ><

調景嶺圖書館既圖書好新淨，不過啱南瓜兄妹睇既書就不多 (長期俾人借哂)，所以一有啱既書就要馬上借，否則唔知幾時有機會再借！

去完圖書館就去公園玩.........


目的地：調景嶺公園  + 寶康公園


調景嶺公園超多人，而且不太啱南瓜兄妹年紀玩，所以都係玩左一陣，就轉去寶康公園，寶康公園勝左夠大，所以人流都分開哂！

南瓜仔有時幾「攪笑」，同南瓜妹玩滑梯，一定要等埋南瓜妹，不過南瓜妹行得慢，南瓜仔就唔俾其他小朋友滑(有2個位既滑梯)，當然我地有教南瓜仔要俾人玩先啦！！

玩完一輪就去食晚飯！！

我就問：「南瓜仔，你想食乜！？」
南瓜仔：「壽司！」
我：「不如去大家樂！」 (我想打邊爐)
南瓜仔：「 食壽司！」
我：「好啦，食壽司.......」

若將來南瓜仔同南瓜妹意見不一，咁點算呢！？hd 話輪住話事.......但佢地肯嗎！？或是唔再問佢地意見！？