聖誕節，學校都會攪下聖誕聯歡會 .......
南瓜仔
18/12/2015 (38M29D)
是日返半天，返埋呢一日就放連續16日假！！
學校安排每位小朋友帶食物回校慶祝 .......
根據上年既經驗，小朋友只會玩，對食物無乜興趣，所以唔駛帶咁多野食，我更不會整食物 (我唔識，更唔想整)！！
原本南瓜仔話要帶聖誕蛋糕，仲去餅店睇定蛋糕....... (吓！唔好玩啦，又要老師或姐姐幫手切，仲可能班小朋友唔食！)， 所以我就"說服"南瓜仔去超巿買小食！！
係前幾天，我帶南瓜仔去超巿買小食，南瓜仔就話要買2包棉花糖 (買糖不是太好)........
到聖誕聯歡會這天，我放了2包棉花糖係南瓜仔書包，南瓜仔就係書包拎番1包出來，話：「帶1包就得，呢1包留係屋企........」(呢個南瓜仔唔肯分享！？但事後有家長分享，講班主任叫小朋友唔好帶咁多食物回校，唔通南瓜仔係聽班主任講！？)
另外， hd 仲安排左每個同學(16個)+老師 (3個)都有
聖誕咭 ......
信封面：寫上對方英文名 (半捉南瓜仔手寫)
咭內：貼上貼紙 + 蓋南瓜仔英文名印 (旁邊協助)
最難係要南瓜仔認得聖誕咭上既英文名 ........
我已經係臨上送南瓜仔上校巴前，叮囑南瓜仔要送聖誕咭 (我估老師會幫手掛！？但點都要南瓜仔識拎出來先得！)，我亦係 whatapps group 講左俾d 家長知 .......
結果點！？
我問南瓜仔有無送聖誕咭俾同學仔！？老師有無幫手！？南瓜仔：「全部都係我自已送，老師無幫手！」
好彩有幾個家長都話收到聖誕咭，同學仔仲識同俾家長講係南瓜仔送，但其他小朋友有無收到！？有無送錯！？我就唔肯定，可能無收或收錯，只係無出聲掛！？
結果.......謎！！
而南瓜仔係學校點慶祝我就唔知(我亦沒有問)，但就帶了
一大堆零食+玩具返屋企！！
南瓜妹
21/12/2015 (21M)
學校是收費，但就唔駛家長帶小食回校 (咁哂我呢d懶家長)，而我最愛就係南瓜妹聖誕假只係放"紅日"，其他日子照常上課，真係一個好好既安排，啱哂我地呢d在職父母！！
都係唔知南瓜妹點慶祝，我只係問佢好唔好玩，南瓜妹：「好玩！」
我：「d 禮物邊個送俾你！？」
南瓜妹：「唔知！」
我：「係唔係 Ms Li！？」
南瓜妹(扮諗一陣)：「係呀！」(我估南瓜妹係亂答！)
又係帶了
零食+玩具返屋企！
↑ 仲有禮物抽中左添，不過見到呢一大堆零食 ，我就好頭痛，點解有咁多架！？
