呢一日行程好豐富！！
早上，南瓜仔就去學游水，之後就去商場行街 + 食午餐，就回家午睡。
臨瞓前，南瓜仔同hd 講想去放風箏，hd 話天氣好先可以去玩！(原本前一日話去，但突然落大雨，所以取消左)
hd 見天氣麻麻就計劃去香港體育學院既「2016 香港殘奧日」，就同南瓜仔唔去放風箏，南瓜仔就雙眼有淚光同我講：「爸爸話唔去放風箏，我好想去！」(呢個小朋友，唔知點解開始唔狂喊，只係雙眼有淚光.....其實係好事定唔好事呢！？)
我：「咁你同爸爸講，你真係好想去放風箏啦！」
南瓜仔(雙眼仲有淚光)：「爸爸，我真係好想去放風箏......」(其實仲有黑雲，但又見到有太陽)
hd 心軟，就話去放風箏，南瓜仔開心到呢 ~~~~~
目的地：大拗門
南瓜妹突然轉性，全程都係自己行 (係我衰，成日做慈母，佢叫我抱就抱佢，攪到佢勁懶)！
南瓜妹就鐘情吹泡泡 .......
hd 就將風箏放上天後，就同南瓜仔一齊玩！
個風箏越飛越高，高到睇唔到個風箏，南瓜仔就無興趣 ><
由於飛得太高，hd 要收回個風箏要一段時間，我就叫南瓜仔同爸爸一齊，我就帶南瓜妹慢慢行返出口位，點知南瓜仔講：「我幫左爸爸好耐！」(完全無幫過hd)
咁我就帶南瓜兄妹慢慢行啦，南瓜妹就全程要南瓜仔拖住行，而南瓜仔都好乖咁拖住妹妹，見住佢兩兄妹拖住，比什麼乜更甜！！
南瓜兄妹玩下又行下，為左鼓勵南瓜兄妹行，我就講：「我地行去小食亭買雪糕！」
南瓜仔：「但爸爸唔俾 ....... 不過呢度無 cam，爸爸睇唔到我地！！」
我：「但我地都要誠實同爸爸講架，唔可以唔同爸爸講！」
行到終點時，hd 亦到黎到，我都買左雪糕俾佢地食 (我就中暑，要買水飲)，但我只買了一支 甜筒....... 呢兩個小朋友都爭住要拎 (點解唔買兩支！？因為我唔想佢地食咁多囉！)，最後都輪住拎10秒，佢地就係車食，無左要照顧佢地，最後我連水都無飲到 ><
咁我就出發去香港體育學院啦 ~~~~
目的地：香港體育學院 (2016 香港殘奧日)
呢個活動係兩年一次 .....
南瓜妹就龜速咁行，我見時間無多就話抱佢，南瓜妹：「我乖，我自己行，唔駛抱！」><
當然南瓜妹肯自己行係好事，但佢真係好慢......行下又停下，我仲被蚊狂咬 ><
由於我地去時已經差不多閂門，所以只係玩左其中一個活動 -- 盲人門球！
首先義工將南瓜仔對眼遮住，叫小朋友用耳朵聽聲音，之後就用手指出聲音方向......
之後就試玩盲人門球，不過南瓜仔就偷望囉！！(之後我就教育南瓜仔，叫佢要小心保護對眼)
玩完呢個後，就四周影下相，因為呢度平時不會開放，下次可能要2年後了 ~~~~~
晚飯時間啦，沙田新城巿人多到呢 (一田大減價中)........
間間餐廳都爆滿，有間仲同我講要等2小時，最後我決定去大快活就算，起碼唔駛等咁耐！！
食完飯行左一陣，就回家 ........
P.S：「最佳防蚊產品」係邊款！？
答案係 --- 我！！！！
南瓜兄妹同我都係搽同一款蚊膏、同一款蚊貼，但南瓜兄妹一粒蚊都無，但我就有10多粒，而 hd 用都無用，但都無事，都唔明點解只咬我，唔咬 hd ><
