南瓜妹@26個月

21/05/2016 (26M)

食
真係好煩、好好煩、好好好煩！

我都唔知可以點，日日食飯都係講「食飯啦！」、「你果口唔郁，點食！？」x  N次

食食下又要我抱住佢食 (即係我抱住佢，佢自己食飯) ，真攞命！

如廁
原本偷懶既我，諗住"放棄"先，等南瓜妹再大少少先......

點知，南瓜妹突然話要去廁所 poo poo (平時係poo 完先講)，咁就成功左去第1次 poo poo，之後幾日，南瓜妹都做到自己講去 poo poo，但 vee vee 暫時都未肯講......

又係呢句「只小朋友 ready，一戒就戒到！」

瞓
晚上放落床無耐就會瞓著！

而南瓜妹身上裝左個「鐘」，不論返學定放假，佢地會準時起床，從不懶床！

發展 
活動能力：
- 大腿肌肉：行快左，但仲係未識跑、落樓梯仲要拖！><
- 識得玩滑板車

說話能力：
可以講到每日發生乜事，特別係學校既事 .......


返學
有天，南瓜妹同我講：「S 推我！」 
我：「咁S推你邊度！？」
南瓜妹：「推呢度囉！」(指手臂)
我：「咁Ms Li 知唔知呀！？」
南瓜妹：「知呀！」
我：「咁 Ms Li 點做！？」
南瓜妹：「鬧 S囉！」
我：「咁 S 知唔知錯！？」
南瓜妹：「S 知錯呀！」
我：「咁 S有無 SAY SORRY！？」
南瓜妹：「有呀 ！」

南瓜妹只係2歲既小朋友，所以我就打去問下班主任。

班主任：「其實唔係推，只係"掂"下，我都同 SS 講，唔可以"掂"同學。」(之後既對話就同南瓜妹講既差不多)

班主任：「你放心，若有事，我地會立刻通知家長！」

既然南瓜妹講得出 Ms Li 有即時處理，而且小朋友有少許動作都正常，所以我都放心！

而作為家長應該信任學校，但都要留意自己小朋友 (特別發生「迦南事件」後

之後我當然問下南瓜妹返學返成點.......

班主任：「佢好有主見，好似食飯咁，基本上都係自己食，但食到最後有老師幫手餵，佢就唔俾，要指明邊個餵.......」
我：「佢指明要你餵！？」
班主任：「可能我平時同佢一齊多啦........」
我：「唉，佢係屋企，指明要哥哥餵食藥，邊個餵都唔俾，喊哂，我最後都係叫哥哥餵佢，佢肯食餵就算 ........我係唔係唔應該咁做呢！？」
班主任：「你應該氹下佢，等佢俾你餵！」(我就係氹左好耐，南瓜妹都唔啋我，係都要南瓜仔餵)

唉，呢個南瓜妹都係煩麻 .......


其他

-  16隻牙
-  21.6磅(9.8kg)