南瓜仔@16M

19/01/2013 (16M)

16個月啦，時間過得好快，睇住佢一日一日咁大，真係好開心！！
. 
07:00  早餐 - 奶 (7安)
07:15  遊戲時間
08:30  小睡
10:30  起床
11:00  午餐 - 粥
12:00  遊戲時間 
14:30  下午茶 - 奶 (5安) 或 包
14:45  遊戲時間
15:30  小睡
17:30  遊戲時間
18:30  晚餐 - 粥
19:30  小休 
19:45  水果 (陪大人一齊食飯)
20:15  遊戲時間
21:15  洗白白
21:30  消夜 - 奶 (6安)
21:45  閱讀時間
22:30  瞓覺

食
食野方面，都係唔鐘意食，真係無哂佢辦法 .......

好既時候可以半小時食完粥，唔好既時候要用1小時先食得半碗 (大人碗)，但絕大部份時間都係唔食囉！！

試過食稀飯、烏冬、意粉、通粉，通常頭15分鐘就肯食，之後就唔多願意食囉 .....

包佢就肯食，但我地通常都係同佢出街(唔再帶奶)既下午茶先俾包佢食！

原本夜奶食7安，但我見南瓜仔晚上餐與餐密左少少，食完粥又食水果之後食奶，所以減左1安俾佢！！
 
大便
平均一日 2 -3次！我都唔明，佢都唔係勁食野，但點解有咁多便便！？？

終於轉左大碼尿片，真係細碼B，哈！哈！

瞓
南瓜仔係假日時，佢要無哂電先肯瞓，唔通佢想爸爸媽媽陪佢多啲！？

晚上我地已經無氹佢瞓，佢見我地瞓 (扮)，佢就自自然然就瞓左(或者已經好累)！！

平均瞓 12-13小時！！

能力發展
1) 開始有其他單字發音，除左爸爸、媽媽外，仲識講波波、姐姐、謝謝、BYE BYE、阿PO (APPLE)、FI (FISH)，CAR等 ........當然仲有一大堆bb話！
2) 識得扭蓋 (頭一下要幫佢扭左先)
3) 叫佢合埋對眼，識得用手按住自己對眼
4) 識得玩收藏遊戲 (即收埋玩具係房，之後叫佢入房自己搵出來)
5) 識得向上拋波
6) 識得沿地360度轉身
7) 扮跳(即係對腳微曲，之後企直)

其他
- 瘦b (20.4磅)
- 7隻牙 (有2隻出得少少)

↑ 是日，帶南瓜仔去公園，佢好鐘意玩鞦韆同滑梯，見佢玩得開心，自己都好開心！

↑ 晚上同屋企人食團年飯，表妹食粥食得好好，可以食2大碗(半小時)，而南瓜仔呢！？用左個半小時先食得1碗仔，所以好明顯表妹係大隻過南瓜仔好多......

↑ 食完飯，帶佢兩個行下，兩個都好奇四周既野！！

有一天，hd 要晚上十點幾先返，我問南瓜仔：「你鐘唔鐘意同熊貓(公仔)玩！？ 」

南瓜仔扭頭 ......

我再問：「咁你鐘唔鐘意同媽媽玩！？」

南瓜仔再次扭頭 (我成日問佢掛唔掛住媽媽，佢次次都係扭頭！ ><)

我再再問：「咁你鐘意同邊個玩！？」

南瓜仔：「爸爸！」

我再問多一次：「 咁你鐘意同邊個玩！？」

南瓜仔再次答：「爸爸！！」

激死我啦！！！