南瓜仔@第5次剪頭髮

06/01/2014 (15M18D)

南瓜仔頭髮長得好快，本來諗住天氣凍，唔好剪住，但可能真係太長，南瓜仔好似好痕咁，而且快快到新年，都係要剪頭髮！！

頭三次都係屋企幫佢剪，但因為要 in 學校，唔想剪得太核突，上次(09/2013)都係帶南瓜仔出街剪，南瓜仔仲好定咁俾哥哥同佢剪添 ......

但上次剪既髮型屋已倒閉，唯有找過另一間，點知今次南瓜仔喊到九彩，全程無停過喊，俾星星餅、俾玩具、睇短片全部都唔得，最後唯有「喊住剪」！！

HD全程抱住佢剪頭髮，但當南瓜仔剪完後，南瓜仔唔肯俾爸爸抱，直至返到屋企都唔理爸爸，南瓜仔仲追住我，要我抱，彩到唔彩爸爸 ......

HD：「你睇吓，剪得唔靚(南瓜仔勁反抗)，我都話係屋企剪，你睇下阿囝喊成咁，又花錢，又唔好 ........」(刪下一大埋話我既說話)

到食粥既時候，都係勁喊，我好不容易先氹到佢唔喊，點知 HD 一再出現，南瓜仔又喊過 ......

HD 不知幾心痛，仲同我講：「你現在開心啦，阿囝唔理我啦！」

我：........... (關我乜事呀！？？？？)

好彩南瓜仔食完粥就唔記得左之前既事，仲主動同番 HD 一齊玩  ......

小朋友真係變得快！！

↑ 剪完，爽哂！哈！哈！

返到屋企勁多頭髮係件褲度，好彩有個除塵轆，好快就洗理哂所有頭髮，仲可以當玩具俾佢玩添！！