親子遊世界@【2017 復活節】日本東京之旅 - day 3

15/04/2017 (4Y6M27D + 3Y25D)

可以遲30分鐘！哈！哈！

大人就 06:30 起床，小朋友就 07:00 起床(都係同返時時差不多起床，只係佢地夜瞓左)

我地係便利站買左早餐，一路行一路食，係唔係好爭取時間呢！？

由新宿去富士急，大約2小時車程，兩個小朋友係又火車上補瞓！！


富士急樂園： thomas land

呢度天氣就比較新宿凍 .......

南瓜兄妹就買任玩套票，我都hd 只買入場費 (若要陪玩機動遊戲就要另加 200-300 yen 一次，hd 話咁係平啲喎，唔知係唔係真)，南瓜仔一見到 thomas 已經十分興奮！！


↑ 呢度真係好啱南瓜兄妹既年紀玩(我只係影左少少相 ，其餘都係hd 影，所以無相係手)，因南瓜兄妹未夠高 (要120cm)，所以要成人陪玩，而我 ....... 玩都想嘔 (我真係唔轉得！)，之後陪玩既重任都係交俾hd！！


富士急樂園：午餐


↑ 我地就係園入面食午餐，食物都係麻麻！！(而我只想瞓，所以想食野無乜興趣)

之後南瓜仔就話要玩摩天輪，因為我地無俾錢任玩，所以要另外付錢，都幾貴(唔記得幾錢了)，只係轉左一個圈，不過就望到富士山景囉！

之後搭火車去下一個景點啦！！


富士山河口湖：河口湖櫻花祭

搭完火車，再要轉巴士去！ 

上到巴士無位坐，好彩有個香港人讓座俾我，我就兩手抱住兩個小朋友(可想我既臂力有幾強勁)，因為佢地搭搭下巴士就瞓左！

落左車，佢地仲瞓緊，咁就去左附近餐廳休息下 ........


↑ 甜品都未黎，南瓜仔已經醒左，而南瓜妹就食食下先醒！！ 

呢個行程係老公主打，但可惜去到時櫻花未開，失望當然有 ........  但都無法，起碼都影到富士山！！(hd話，去東京無可能唔睇富士山)


↑見到富士山，當然又係影相啦！！ 
 

富士山河口湖：纜車

去到時都排長龍，好似排左30分鐘！！

兩個小朋友都乖乖等纜車 ......


↑我地上到去影左一陣相，就要搭纜車走人 ..........

兩個小朋友係火車又瞓了！！

其實我未上車前已經好想去 vee vee，但 hd 話要趕火車(只剩下5分鐘，否則就要等1小時)，咁都要上火車 .........

過左1小時後，我問hd幾時落車，佢話仲有1小時，天呀！我真係忍唔到咁耐，突然 hd 講 ：「火車上咪有洗手間囉！」

我就快快搵洗手間.......呢個人，咁遲先同我講！=.=


新宿：晚餐 - 機丸水產

返到新宿差不多 20:00，所以係時候食晚飯 ........



↑ hd 話好出名，嘩！真係幾好味喎，而且價錢仲唔貴添 (仲有一個炒飯俾南瓜兄妹食，無影相)

食完就返酒店，但都要 22:30！！

呢兩個小南瓜，係車瞓都太耐，夜晚又唔瞓 ......... 攪攪下又零晨，但我已經好攰啦！

親子遊世界@【2017 復活節】日本東京之旅 - day 2

14/04/2017 (4Y6M26D + 3Y24D)

大人就5:30 起床，小朋友就06:00 起床 ......

南瓜妹出世至今，未試過叫佢起身佢會喊，今次係第一次 ........ 好明顯係唔夠瞓 ><

同佢地換哂衫、刷牙、去埋洗手間就出發！！

去滑雪場大約要2小時車程，小朋友就可以火車上再瞓下，而我都一齊瞓著，hd 應該無瞓，因為佢叫我地起身！！


Gala 湯澤滑雪場

去到就要租雪鞋、手套、雪橇 (成個行程，我全部費用都唔知，我只係「鴨仔」)，之後就搭纜車上去滑雪 (其實係玩雪橇)！


↑兩個小朋友，一見到雪就笑了出來，兩兄妹仲自整雪球拋向 hd 同我，我已叮囑多次唔好拋向面，但呢兩個小朋友太高興，聽唔入耳 ><

玩雪橇啦 ~~~~ 滑落黎可能10秒，但行上去就唔係10秒，行左兩次我已經無力，唯有 hd 陪啦！！

最後又再玩雪、試下砌雪人，但砌唔到！哈！哈！

留左兩小時左右就走人啦！！(小朋友唔適合玩咁耐)

兩個小朋友係車度又瞓過，而我呢！？我都瞓埋！哈！哈！


大宮：大宮鐵道博物館


↑ 去到當然係楂火車，我就同南瓜妹一齊組，但南瓜妹玩玩下 stop 左個掣，我捉都捉唔切南瓜妹隻手，職員再咪叫唔可以停 ......都幾瘀下！哈！哈！

而南瓜仔呢？ hd 話全程都係南瓜仔自己玩，唔駛人幫 (我都係覺得4歲以上去旅行係最好！)

之後就食午餐，叫左兒童餐俾佢地食，主要係有架火車既餐具！

再去博物館睇下，不過對我來說都無乜特別，但南瓜兄妹就樂在其中，又上火車睇，又跑，又講：「哥哥，呢度呀，你快啲黎睇！」(其實有乜好睇呢！？)

食完就搭小火車，不過架車都幾細， hd 都坐得幾辛苦！哈！哈！

最後就去模擬火車，但就要排隊，南瓜妹就無興趣，四周圍行 ..... 咁就俾南瓜仔玩啦！！(我唔記得問南瓜仔玩成點添！)

走人啦，又搭火車，兩個小朋友又瞓過......


東京：增上寺


又見到櫻花，仲可以影埋東京鐵塔添！

hd 影完又影，再影，影到我都唔想再影，哈！哈！

(hd 講什麼什麼德川將軍家所，我無理佢 ...... 我都唔識佢，更無興趣！)


東京：東京鐵塔

hd 有佢獨立見解，就係去到東京鐵塔，無理由唔上去睇 ........ 地標嘛，無去過點叫做去過東京！？(即係日後問南瓜仔去左日本睇左乜，係想佢答得出東京鐵塔，唔係話去玩波波池)

↑ 上到去，真係無乜好睇，而且仲好多好多人添！

不過佢地可以由搭頂望落搭底(其實有好多塔都係咁睇)，而且黃昏景又真係幾靚既！！


晚餐：

係鐵塔內，是但揀左一間餐廳食，味道太差了，不提也吧！！><


郊區：放煙花

因為要放煙花(唔好問我點買，因為去到酒店時，職員俾左箱野 hd) ，所以要去效區先可以放 ><

黎呢度，真係山長水遠，搭完1小時火車仲要轉的士去！(hd 用佢有限既日文同司機對話，因為司機唔識講英文，我只係車上聽佢地有對話，但我唔知佢地講乜！？司機好似好迷網咁，都唔知明唔明我地想去邊！？唔理得咁多，總之最後都去到目的地！！)

南瓜妹就樹態上身，點都唔肯落地，我想玩都玩唔到 ><


南瓜仔呢！？可能佢怕俾人拉 ( hd 無拉拉講會有警察拉)，又或者怕火花，佢只係肯 hd 陪同下掂下支煙花，但要講：「我唔想玩啦，快啲走啦！」

我諗hd有點失望，咁辛苦先黎到，但兩個都好似唔想玩咁，哈！哈！

所以我地都係逗留左20分鐘意走人，之後就回酒店啦！！

返到酒店又23:00多，攪掂完兩個小朋友，佢地竟然唔瞓，攪到12點多先瞓，佢地既精力係唔係無限架！？

親子遊世界@【2017 復活節】日本東京之旅 - day 1

13/04/2017 (4Y6M25D + 3Y23D)

因為知道要晨咁早起床，所以前一天只安排45分鐘午睡，晚上就可以早點瞓，第二朝就可以 06:00 起床！！

照原定時間叫醒佢地，刷牙、洗面、換衫，無食早餐，因為怕佢地食完搭的士去機場會嘔，加上無咁多時間俾佢地食！！

07:15 就到機場啦 ~~~~

攪哂 check in ，影左幾張相就入閘，入左閘就買左個包俾佢地食！！

↑ 上飛機啦，由於我地買機票時已經劃左位，所以佢兩個可以坐窗口位 ........ 不過原來佢地鐘意我地一家四口一齊坐多啲！哈！哈！

起飛不久，兩個小朋友就瞓左啦，我都可以休息一下！

瞓左1小時左右就食飛機餐，食完之後南瓜仔就好投入睇電影，而南瓜妹就同我畫下畫，好快咁就要落機！！

落左機，就去買火車票，就出發去酒店........

hd 揀左新宿站既 hotel gracery，呢間係新酒店，夠哂新淨，不過房間就細左啲，連續6晚都係呢間酒店，因為轉酒店好煩，二拖二，仲要拎埋行李就好煩！！

之後就出發去玩啦 ........

tokyo skytree：晴空塔


↑ 我地去左玩兒童溫泉波波池，兩個小朋友一睇到波波池，雙眼都發哂光，玩得好開心，不停聽到佢地既笑聲。

而我呢！？我就享用按犘椅 .....休息下！

P.S：hd 唔係好主張去波波池玩，佢覺得呢啲香港都有，駛乜搭飛機黎玩喎！？anyway，佢最後都有安排俾小朋友！

tokyo skytree：晚餐


↑ 由兒童溫泉波波池職員介紹，叫乜名就唔記得，但食物都好好味！！

tokyo midtown：睇夜櫻


↑ 睇夜櫻，呢個季節黎日本，睇櫻花係指定動作！！而睇夜櫻係有時限，好似只得10左右，所以 hd 話一定要黎睇，否則就無機會。


去到呢一度，我已經好累 ....... 但咁啱又見到超巿， hd 就話要買定明天既早餐同士多啤梨俾小朋友食。

之後回到酒店已經 23:00 多，我就負責攪行李(因為幾二日要去滑雪，要預備雪褲/頸巾/毛絨等物資)， hd 就同兩個小朋友去洗手間、沖涼同刷牙！

到大人沖完涼，已經係零晨一點，明早仲要 05:30 起床去滑雪添！！

親子遊世界@【2017 復活節】日本東京之旅 - 序

六年啦！六年啦！六年啦！我(地)終於可以飛啦  ~~~~~~~

不過要遷就小朋友(學校)假期，同埋我既大假又所剩無幾，唯有紅日果幾日去，咁都幾"貴"，只係機票連酒店已經要三萬多 ><
 
行程由 hd 負責，我地三隻鴨仔只係跟住 hd 去！哈！哈！(不過我見到老公計劃既行程，真係想暈係度，希望回港仲有半條人命啦！)

行李就由我負責，見到啲野真係唔想去執，日本既天氣溫差又大(9-22度)，我地又要去滑雪喎，雖然已經唔駛帶尿片、奶粉之類既東西，但都係未出發，已九成滿 ........我諗，我去到都唔駛去買野啦，買左都無位放 ><


呢個行程，對我來說係一個好大挑戰！！

- 二拖二
- 無BB車
- 搭火車 (唔係自駕遊)
- 背住一大袋野：外套、後備衫、水等等
- 最早5:30起床，最遲6:30起床
- 最早22:30返到酒店，最遲23:30 (仲幫小朋友沖涼同刷牙後，大人先可沖涼)

只係睇到呢度，係唔係覺得好大挑戰呢！？未算 .......

最大挑戰係小朋友係火車瞓左，我地hd一人抱住一個，因出發地點去到目的地，搭火車係要轉車，唔係行去對面線轉，係要出左閘，行去另一個火車站搭車，唔係行幾分鐘，係行十幾分鐘先到！(最慘係佢,兩個係火車瞓左，但無位坐 >< .........好彩既話都有人讓座，但真係唔多囉)

但由於我體力有限，我無可能長期抱住南瓜妹(要俾hd抱)，所以即使南瓜仔瞓左，我都要叫醒佢(除左要轉火車外)，全程都係要佢自己行(仲要無扭計)，我就拖住佢，有時要趕火車，南瓜仔加快腳步(甚至要跑)。

雖然我地唔係買好多野(但都有買)，部份已經放唔哂入入背包><，唯有手拎啦，hd就抱住南瓜妹(等南瓜妹行，應該天光)，但雙手已經無得拖住南瓜仔，我就叫南瓜仔捉住我背包條繩，跟住我行(當然係室內，又唔多人既時候，過馬路就一定會拖住佢)，睇到呢度，我真心覺得南瓜仔好乖！！

行程：

day 1：香港機場>成田機場>酒店(Hotal Gracery)>晴空塔及兒童溫泉波波池>tokyo midtown 睇夜櫻
day 2：滑雪>railway museum>增上寺>東京鐵塔>放煙花
day 3：富士急 thomas land>富士山河口湖
day 4：明治神宮>上野動物園>上野東照宮>上野公園>sanrio puroland>pokemon center mega tokyo
day 5：東京都中央巿場>淺草(著和服)>日本科學館>legoland
day 6：tokyo disney sea
day 7：皇居及二重橋>東京消防博物館>成田機場(行商場)>香港機場

最勁係乜！？係我無行過任何商場，連藥房都係入過去買膠布 (因南瓜妹手指流血 ><，否則連入去機會都無)

回港後，真係攰到死，但我第二日仲要返工(無法啦，唔係仲有好多大假)！！

南瓜仔@高度跟進(4) - 醫院

11/04/2017 (55M22D)

今次南瓜仔唔駛請假，啱啱係學校假期......

但我就要請全日，因為覆診時間啱啱係中午時段(唉，多多假都唔夠用)

去到醫院都就係度高/磅重 .........

度高：95.5cm (6個月 + 3.3cm)
體重：14.95kg

11/10/2016 (48M23D)：92.2cm (4個月 + 3.1cm )
06/06/2016 (44M17D)：89.1cm (3個月 + 1.3cm )
15/03/2016 (41M25D)：87.8cm (0.5個月+ 0.9cm)
23/02/2016 (41M04D)：86.9cm

雖然高得唔多，亦未到3%，但都係跟住佢生長線 ......

見醫生啦........

醫生都係講南瓜仔都跟得生長線，而上次照完骨齡後，結果同佢實際年齡差不多。

都係叫唔好偏食，仲話偏食唔係天生，係後天既問題 (我覺得係天生，因為我真係唔鐘意食，無得解 >< )

醫生只係話暫時都無野可以做，KEEP住覆診 ..........


呢一年，我已經俾南瓜仔學游水、跆拳道，一有時間就帶佢去公園玩。而食飯方面，雖然係偏食，但基本上食量是足夠(我覺得啦！)，所以我真係唔知仲有乜可以做 ........

朋友們都話健康就得，我都明白(雖然南瓜仔矮小，但身體叫健康) ....... 有些野係迫唔到！

都係同自己講，平常心啦 ~~~~~~

親子好去處@2017 潑水節

09/04/2017 (4Y7M20D + 3M18D)

地點：九龍城

潑水節，係泰國人過新年既活動 ........

11:30  去左金寶食午餐，我記得未生小朋友時，次次去都會食生蝦同醬爆蝦丸，今次都唔例外，因要睇住兩個小朋友，所以無影相！！

12:30  我地去睇左古色仙女巡遊 (但我一個仙女都見唔到！哈！哈！)

睇完就去玩「潑水」，明明話14:00 先開始，但未到 13:30 已經開始左！！

一早就做左準備，帶埋泳衣同水槍，但我地帶既水槍「太弱雞」，所以即場買左兩支水搶俾南瓜兄妹玩！！

我要睇住啲袋，所以就由hd陪同佢地玩，由於大多人 ......... 有時我都唔知南瓜兄妹去左邊！哈！哈！

不過即使我無落場，都俾人潑水 ><

↑ 據hd所講，南瓜兄妹玩得好開心，南瓜仔仲大膽到四圍撩人玩，而妹妹玩玩下就話支水搶重，但都享受玩既過程！！

我同換衫時，南瓜妹：「媽咪，下次再黎過，好好玩呀！」 (啱啱先玩完喎！？)

玩完，南瓜兄妹仲話要去公園玩，點解佢地仲有咁多電！？竟然都玩，就俾佢地再玩多一陣！！

兩隻南瓜，上車無耐就瞓左啦！！！

親子好去處@迪欣湖

02/04/2017 (4Y6M14D + 3Y12D)

目的地：迪欣湖

呢度已經想黎好耐，今次終於黎到啦 .........

去到時，hd 問南瓜仔想唔想玩水上單車，我心諗唔好掛，咁鬼囇 ><

南瓜仔當然話好 ><

我地要等1.5小時先有得玩水上單車 (乜咁多人玩架！？)

↑ 所以就同南瓜兄妹玩等單車同滑板車，玩下足球咁

我地亦帶定野食黎「野餐」，不過因為係一朝早決定，所以都係好求其，哈！哈！(無謂放相，同大家差咁遠 >< )

好快就過左1.5小時，可以去玩水上單車($150，4座位，1小時)

真。係。好。曬。

我最怕係南瓜妹跌落水，所以我長期拖住佢 ........

玩完，佢地真係「斷電」，都係快快回家啦！！

南瓜仔@小一大作戰 - 序

攪掂完南瓜妹，又輪到南瓜仔啦，不停既大作戰 .........><

南瓜仔既優勢：
1) 幼稚園係半龍，有90%可升其小學 (可惜唔係心儀)
2) 我既母校 25分 或 hd 母校 20 分(官校)  - 仲未諗清楚揀邊間自行分配

基本上都有 backup，所以壓力唔算大，慶幸上當年幫南瓜仔揀左半龍校，亦慶幸上當年我地既父母俾我地入讀一間不錯既津小 ^^

但我地都俾南瓜仔試下更好既小學，所以報考小學既遊戲都要參予 ><

啱啱過左既家長日，班主任講左兩句評語：
第一句：「佢係讀書既材料」
第二句：「佢係唯一一個，我無野講既學生，佢無論邊方面都好好！」

我亦問班主任，南瓜仔可否原校升小學！？班主任答：「一定得！」

我聽完都好安慰(南瓜仔係細b，全班第二細，班內仲有超大b)，但就不能自滿，始終都係一個4歲多既小朋友，仲有好大既進步空間！

我好清楚明白，呢個只係校內既評語，我亦知「一山還有一山高」，現在既小朋友真係好勁，南瓜仔所讀既學校又不是什麼名校 .........

而且即使校內成績好，唔代表佢面試表現好，最後都係靠南瓜仔本身臨場表現。

現在大概都諗都報乜學校，雖然呢場大作戰好難打(間間都係幾千人爭百多個位)，但都同自己講要「平常心」！

南瓜仔，加油呀！！！

希望南瓜仔同南瓜妹有一樣既運氣 ~~~~~~~~