親子好去處@香港鐵路博物館 + 中文大學

每個星期天，因工人姐姐放假，而hd早上亦不在家(10:00 - 12:00)，只有我一個對住佢地2個，但為左佢地11點半前出街，就要早點準備 .....

我要係hd未出門口前，收拾好出街物品 (hd 就負責睇住佢地2個)，奶粉/尿片/水樽/乾糧/水果(洗埋)/餐具/外套/玩具/bb車/濕毛巾/外套等，仲有佢出街既衫，拾拾下就要成個鐘 ><

之後就要整糊仔，餵妹妹食糊仔(hd 出左門)，食完又要洗碗、收拾枱面，同佢地兩個換衫/換片，自己換衫，咁又個半鐘 .......

真的好佩服FTM，特別係無人幫手又要湊2個，佢地簡直係「超人」，雖然我好想日日照顧佢地，但日日如是，我想我會癲！哈！

25/01/2015 (28M6D) +(10M4D)

目的地：香港鐵路博物館

南瓜仔太愛車，就帶佢去鐵路博物館睇火車 ......

一早就同佢講：「我地去睇火車同路軌，好似thomas咁！」 (早上仲睇埋thomas卡通片，咁我先可以專心餵妹妹食糊仔)

南瓜仔一去到，已經飛奔去睇火車！！

↑ 咁走法，都幾難影！><

由於推住bb車不太方便上火車睇，hd 就睇住南瓜仔 .....

↑ 我就睇住南瓜妹，前幾次都影唔到相，今次就帶定星星餅同乳酪餅，結果 -- 成功！yeah！(唔係好靚，但起碼佢2個都影到正面！)

地址：大埔墟崇德道13號

http://www.heritagemuseum.gov.hk/zh_TW/web/hm/museums/railway.html


目的地：中文大學

本身係無計劃去，只係時間尚早，係近大埔，又係 hd 既母校，咁就去左啦 ~~~~~


↑ 此時南瓜妹就瞓左，所以我就帶南瓜仔去到魚池，南瓜仔就好開心咁睇魚，呢度好多家長帶埋小朋友黎，仲帶埋麵包、魚糧黎餵魚，而小朋友們都好樂意分享他們帶來既麵包、魚糧俾南瓜仔餵魚......

可惜南瓜仔好怕醜，唔肯講「多謝」，睇黎要帶佢出多D街先得！

南瓜仔一路餵魚，一路講：「魚魚，食包包呀！」

玩了一會，南瓜妹就醒左，就去行下草地、涼亭、紅葉，hd 又黎同佢2個影相，可惜星星餅同乳酪餅都失效 (可能食得太多 ><)！

影完相就去九龍塘食飯！！(六點前就去食飯，唔想等位！)

↑ 唔知係銷售手法定係佢地真係好可愛！？

售貨員總說:「好可愛。」(指南瓜仔或南瓜妹)，仲會主動送小禮物，如:公仔、貼紙、糖、汽球等(次次都係無買野)，今次行Burberry 就收到曲奇餅同汽球，行Ralph Lauren 就收果汁，行商場都有禮物收，真開心！！

南瓜妹@10個月

手多多，俾我del左之前既文章，唯有打番 .......應該打番得7成左右！><

21/01/2015 (10M)

10個月啦.....

06:15  奶 (8安) 
07:00  小睡
09:00  遊戲時間 
10:30  糊仔
11:00  遊戲時間
12:00  小睡
14:00  奶 (6安) 
14:30  遊戲時間
16:00  小睡
18:30  糊仔 / 粥 / baby food
19:00  陪大人食飯
19:30  遊戲時間
20:00  洗白白
20:15  遊戲時間
21:45  奶 (8安)
22:15  瞓

食
食奶無問題，已轉哂正常奶粉。

轉左兩餐固體，但佢食野仲衰過南瓜仔，粥唔肯食，試過俾軟飯，都係唔得，都唔知佢想點！？

大便
1 - 2 次。

瞓
瞓得好好，半夜無乜喊。

能力發展 
-  識得講爸爸、媽媽、姐姐、奶奶、波波、bye，南瓜仔：「妹妹唔叫哥哥！」，仲未識講哥哥！
- 會扶著傢俱自行站起來及步行

其他
- 3隻牙  (有3隻出緊黎)
- 16.5磅 (瘦B) 

  ↑ 10個月！！

這個蛋糕是南瓜仔揀(我上網睇)，明明佢係鐘意elmo，但呢個蛋糕要2日前訂，仲要屋企樓下無聖安娜，但無法啦.......阿囝鐘意嘛！

原本我對聖安娜既蛋糕無期望，估唔到又幾好味喎.......hd話下次再訂過！(但下次係年初三，唔知有無得訂呢！？) 

南瓜仔@28個月

19/01/2015 (28M)

時間真係過得好快，睇住佢一日一日成長，真係有講不出的心聲 ........

食
都係咁上下，都無佢法，上個月已經唔多肯食下菜，今月仲衰，見到菜就唔食，諗住少少少少咁放入飯，佢又「叻」都吐番出黎，有乜辦法可以令佢食菜呢！？ ><

南瓜仔本身細粒，又唔食野，原本係食美贊臣3號，現在試下轉食惠氏金裝膳兒加 PE GLOD( 7+7 偏食兒童營養奶粉)，睇下有無幫助。

↑ 用$19.9 優惠價試食(200g)！

幾個月前我已cut左下午茶既奶，因試下南瓜仔食唔食新奶粉，估唔到佢又肯飲喎 (上次由1號轉3號，轉左成個月，要1安安咁轉)，另外，南瓜仔用杯係完全無問題，但唔知點解佢食奶就要用吸管樽，所以下午茶就轉左杯俾佢，飲就飲，唔飲就算，等佢再習慣下先會轉杯啦。

大/小便
戒片：今個月可能凍左，佢除左沖涼時會vee vee 外，其餘時間都無講，過埋個冬天先正式戒！

瞓
晚上10點前多數就會瞓著！

發展
 - 說話 (sweet sweet 對話) ...

(1) 南瓜仔見到我隻腳損左：「媽媽整親！？」
我：「係呀！」
南瓜仔：「痛唔痛！？」
我：「痛呀！」
南瓜仔：「媽媽睇醫生！」
我：「媽媽無錢睇醫生！」
南瓜子：「xx (自己既名)無錢！」
停左2-3秒 .....
南瓜仔走去玩具架度，拎住玩具錢同我講：「媽媽，我有錢！」
笑死！

(2) 返工回家，買了佢最愛既士多啤梨曲奇餅俾佢.....
南瓜仔：「我唔要曲奇餅，我要媽媽抱！」
咁我好自然咁抱佢，南瓜仔：「媽媽要除褸！」(我回家的習慣)
之後都係痴住我，我問佢：「咁你食唔食曲奇餅呀！？」
南瓜仔(堅定)：「唔食！」(抱實我！)
同佢玩完一輪，南瓜仔再發現曲奇餅，就話：「我要食曲奇餅！」
呢個傻仔.......

(3) LUNCH TIME 接完佢放學後，帶完佢回家，休息一陣就要返工。
南瓜仔：「媽媽唔好走，唔要媽媽返工！」
之後就拖住我手，另一隻手就畢飯食 ......
其實媽媽都唔想返工，但無法啦，要搵錢嘛！

(4) 有天，hd唔記得買麵包俾工人姐姐，便換埋衫落街買，點知 ......
南瓜仔：「唔要爸爸落街買麵包！」
我：「咁姐姐明天食咩呀！？
南瓜仔：「媽媽落街買，爸爸留係屋企同我玩！」
呢個衰仔......hd 聽到之後勁開心！！

(5) 唱歌仔俾我聽：「可愛既媽媽，可愛既媽媽，媽媽真可愛，媽媽真可愛！」(係唱出來)

- 記憶
(1) 返工回家，南瓜仔：「媽媽，我要睇醫生！」
我：「點解要睇醫生！？」
南瓜仔：「公公話我病左，要去睇醫生！」
(公公有打電話俾我話佢有少少鼻水，之前病左食完藥，諗住等佢自然好，唔諗住再帶佢睇醫生)

(2) 無論何時(入房瞓、起床、沖涼、食飯、出街、返學)，總要拎住elmo，有次差點唔記得帶elmo返學，南瓜仔：「我曚查查，唔記得帶elmo返學。」(臨上校巴前，佢就會俾番elmo我！)

- 多左拖住大人前排好多時都唔肯拖住大人，現在都肯拖，但有時都會四圍走！

返學
- 無問老師返學返成點，但南瓜仔應該返學又返得幾開心，因為從來都無講過唔要返學。
- 放完聖誕假，問南瓜仔最掛住邊個，南瓜仔：「uncle wai。」(校巴司機)

其他
- 24磅
- 16隻牙

親子好去處@志蓮淨苑、南蓮園池

18/01/2015 (27M30D)+(9M28D)

目的地：志蓮淨苑、南蓮園池

是日，表弟百日宴，設宴鑽石山，咁就約埋表妹一齊去玩。

由港鐵站去南蓮園池十分近，可惜沿途都好多梯級，我地推住bb不太方便！

雖然志蓮淨苑、南蓮園池並無遊樂場，但環境優美，而且天氣不炎熱(我拍拖時夏天去過，熱到想死！)，人亦不太多，所以南瓜仔同表妹就可以四圍走，佢地特別鐘意睇水池......

而南瓜妹就唔知點解喊！？要抱住先停喊！HD有要抱住佢，又要推住BB車，而我又要睇住南瓜仔，同南瓜仔影相又好難，叫佢企定定根本無可能，所以只係影得幾張相，不過都唔緊要啦，最重要係南瓜仔玩得開心嘛！！


↑ 叫南瓜仔影相越來越難.......有無人可以教我點教南瓜仔企定定呢！？

http://www.discoverhongkong.com/tc/see-do/culture-heritage/chinese-temples/chi-lin-nunnery-and-nan-lian-garden.jsp

親子好去處@佐敦谷公園

17/01/2015 (27M29D)+(9M27D)

目的地：佐敦谷公園

是日上午返工，返到屋企同hd講不如去佐敦谷公園，原本話天氣凍唔好去，我就話出面有太陽，唔凍喎........最後當然成功啦！

由於時間都趕急，我就快快收拾好要帶既野搖控車、足球、吹吹泡、零食、地蓆，仲要同佢兩個換好衫/片，就出發啦！！

我地大約14:30就去到，南瓜仔應該記得有個搖控車場，去到就話要玩搖控車 ......

不過人地既搖控車太勁，連我地架搖控車被佢地控制埋，而傻傻既南瓜仔應該未識，以為自己控制住架車，所以hd就帶左佢去左另一達地方玩，我就餵妹妹食奶 ~~~~~

玩完就去草地，我地是但揀一達地方坐低，hd 就帶南瓜仔玩足球，我就同妹妹玩吹波波。

玩了一陣，就休息一陣，食下餅乾同飲水，我就去附近既紀律部隊宿舍(公園內無小食亭)買三文治 (hd話野餐要食三文治喎！？我就滿足下佢......)、再買多少少小食/飲品。

食完我就同南瓜仔跑下草地，人真係老了，跑一陣已經好累 .......

之後hd就帶南瓜仔去遊樂場玩，我就係草地同妹妹玩足球。

玩到16:00就走人，因為已經係午睡時間，南瓜妹未上車已瞓左，南瓜仔就上左車5分鐘後都瞓埋！！


↑ 現在2帶2出街，真的好難影相！！><

雖然只係玩左短短既個半小時，但南瓜仔記得玩過乜，晚上問番佢，佢都答到哂，佢仲話好鐘意去玩添！！

南瓜妹@流感針(四價疫苗)

16/01/2015 (9M26D)

續南瓜仔打完流感針，就安排南瓜妹打針......

之前係 join 左智匯既 package 打針，所以佢地安排免費四價流感針(2支)俾南瓜妹！

都諗過樓下打，但問過一間，佢地話南瓜妹太細，一定要兒科醫生打，$5XX 一支，打2針(3歲以下，第1次要打2支，之後每年1支就得) 咁咪要成千！？？？

而上次南瓜仔打針既診所，我對佢地姑娘打針既方法有保留，為何要3個姑娘幫手打針！？好似唔太專業喎！？

不過，免費總有限制啦，就係只能安排平日，所以就要請半日假陪南瓜妹打針.......

Book左早上打，所以帶南瓜仔搭校巴時，就要帶埋妹妹一齊出街，但一個人帶2個真係有點危險，所以叫埋公公陪我一齊去！！

好彩去到唔駛點等就安排打針，南瓜妹喊左2聲就無喊，都好叻女！

一個月後再打埋另外1支流感針！！

↑ 打完針影番張相先！ ^^

體重：17.4磅 (連埋衫)

親子好去處@葛量洪號滅火輪展覽館

11/01/2015 (27M23D) +(9M21D)

目的地：葛量洪號滅火輪展覽館

南瓜仔好鐘意車，其中一樣係消防車，車就無，去睇消防船啦 ~~~~

途經鰂魚涌公園，南瓜仔沿路唱：「消防船 ......LA LA LA LA......消防船 ......」

原本唱得好開心，但行行下，佢有點扭抱，應該想瞓！

呢度有兩層，因為有BB車，所以唔方便帶埋南瓜妹上上層，所以只帶南瓜仔上去，南瓜仔一上去就點興奮：「我要救火！我要救火！我要救火！」

南瓜仔：「媽媽，我唔識開！」(佢真的以為可以開水！哈！哈！)

開唔到一個，再去開另一個！哈！哈！

見到佢累死，就放佢去BB車，南瓜仔：「我唔要坐，我要自己行.......」(鬼行，九成九叫我抱)

同佢講完理道都無用，最後唯有唔理佢 ，放佢落BB車，最初都有叫，叫唔夠3分鐘就瞓左 (唉！明明好累，都要繼續玩！) ，此時，南瓜妹都瞓埋！(原本諗住去埋鰂魚涌公園遊樂場玩)

我就同hd就係太古城行一陣，再轉去中環 join 埋 6299 一齊食晚飯！

地址：香港鰂魚涌公園

http://www.lcsd.gov.hk/CE/Museum/History/zh_TW/web/mh/about-us/fireboat-alexander-grantham-exhibition-gallery.html

南瓜仔/南瓜妹@禮物 (2)

上當年南瓜仔收會禮物，我會定時定候寫blog，自從南瓜妹出世後只係寫過1次咁大把.....

-  南瓜妹@禮物
-  南瓜妹@第1份禮物

希望自己無寫漏啦！！哈！
 
現在小朋友真幸福，有咁多禮物收 ........

 ↑ 南瓜仔/南瓜妹：手巾、袋仔

↑ 南瓜仔：前前老細送

↑ 南瓜妹：衫仔

↑ 南瓜妹：玩具 (但南瓜仔都有玩囉！)

↑ 南瓜仔：南瓜仔至愛，日日都要抱住elmo，瞓前一定要帶埋入房，瞓醒第一件事就係搵elmo，有時連出街都要帶埋佢！

↑ 南瓜仔：原本南瓜仔係鐘意薑餅人，好不容易朋友搵到，送左俾佢，但玩左1個星期左右，就變左心，鐘意elmo！

↑ 南瓜仔/南瓜妹：衫

↑ 南瓜仔/南瓜妹：衫、顏色筆、毛巾、紗巾

↑ 南瓜仔：玩具車

↑ 南瓜仔/妹：友人日本既手信！

同場加映：已POST過既禮物......

↑ 南瓜仔：2014聖誕禮物

 ↑ 南瓜妹：2014聖誕禮物

↑ 南瓜妹同南瓜仔：2014聖誕禮物

 ↑ 南瓜仔：2014生日禮物！

南瓜妹@第1次(細b)blogger聚會

04/01/2015 (9M14D)

今次主角係南瓜妹，佢係第1次出席為佢而攪既活動 (細b bloggers 活動)，雖然唔係好多 bloggers 出席，都就勝左容易控制場面，起碼都影到合照，個個都有望鏡頭！哈！

多謝小豆媽安排場地！

↑ book 左戲院 (南瓜妹最乖，乖乖地係地下坐，因為佢未識行，哈！)

而南瓜仔同小豆就四圍走，要去到睇Frozen，佢兩個就立刻坐定 (南瓜仔未睇過)！

↑ club house 玩
- 上圖：小豆、南瓜妹、妹妹豬
- 下圖：南瓜妹、妹妹豬、丫be、O仔
 (雖然大b bloggers 好多都係男仔，但黎緊有好多 bloggers 都係生囡囡，南瓜妹你要加油！而南瓜仔將會多左好多選擇！哈哈！)

由於南瓜仔平時午瞓係兩點半至三點，但我見佢玩得開開心心照俾佢玩，但去到四點時已發覺佢已經無乜電(再唔瞓佢就會發癲)，而南瓜妹平時又係四點午睡，所以唯有提早 bye bye bloggers 們，希望下次可以由頭玩到尾啦 ~~~~~~

不出我所料，佢兩個好快就瞓到死豬咁，我同HD就行下商場，等佢地瞓醒就食晚飯啦！

2014 聖誕節/除夕 + 2015 元旦 (科學園 + 香港科學館 + 商場)

2014 聖誕真係忙，差不多日日都有活動，由於天氣凍既關係，所以都揀戶外活動，都係揀室內活動為主，到復活節天氣無咁凍，先去多d戶外啦 ~~~~~

19/12/2014 (27M)

南瓜仔學校聖誕PARTY，請了半天假陪佢 ......

↑ 學校無安排什麼表演，只係叫佢唱下歌仔，可惜南瓜仔唔肯，拖住我唔肯放手！

同埋就係家長帶食物回校慶祝！

20/12/2014 (27M1D) + (8M29D)

↑ 慶祝結婚5周年，只係食晚飯(其實係食左聖誕餐)就算！！

21/12/2014 (27M2D) + (9M)

去左表妹(姐)2歲生日PARTY。

22/12/2014 (27M3D) + (9M1D)

是日冬至，只係屋企普通食飯，再買了蛋糕補祝南瓜妹9個月(因為前一天去左表妹生日會)

23/12/2014 (27M4D) + (9M2D)

同工人姐姐出街食飯慶祝聖誕。

24/12/2014 (27M5D) + (9M3D)

同屋企人慶祝聖誕。

↑ 聖誕到會

↑ 屋企人送既聖誕禮物！


 ↑ 好友送的禮物！

25/12/2014 (27M6D) + (9M4D)

去左MEGA BOX 同德福。

↑ 薑餅人(MEGA BOX)，南瓜仔無時無刻都要錫妹妹！哈！

26/12/2014 (27M7D) + (9M5D)

去左太古同金鐘！


↑ 小露寶 (太古 - 康怡廣場)！

同妹妹影相真係易好多，起碼望鏡頭同唔會走圍走 ~~~~

之於南瓜仔，叫佢影相真係好難，又唔望鐘頭又四周圍走 .........

27/12/2014 (27M8D) + (9M6D)

上午帶南瓜妹第一次返PLAYGROUP！

↑ 下午就同南瓜仔同南瓜妹去會所玩，但攪笑係南瓜仔，原本自己一個走來走去玩，但玩玩下又要睇下妹妹，睇兩下又再走人，無幾耐又返黎睇下妹妹！

28/12/2014 (27M9D) + (9M7D)

早上十點約了家姐去飲茶，之後就出發去科學園(科學探索行)......

-  綠環館、集成電路展覽廳、高錕教授：光纖通訊之父展覽廳、科技寰宇

有導賞員帶我地去，費用全免。(http://sciencexplorer.hkstp.org/tc/about5.htm)

↑ 南瓜仔同表哥玩到癲哂，而南瓜妹就乖乖係BB車度，我地玩完頭2個館就走人食TEA，因為後面既活動比較適合更大既小朋友。

↑ 之後就出發去6299屋企食晚飯 (是日第日1日通車，人山人海)，食完飯，慶祝埋表姐生日，已是九點半，回到家更是十點半！

攪掂埋南瓜仔/南仔妹沖涼、食奶、刷牙等，仲有自已沖涼，哦！零晨1點了 ~~~~

是日：南瓜妹第一次叫「爸爸」，仲要不停咁叫，hd 勁開心！

29/12/2014 - 30/12/2014

休息中 ........

31/12/2014 (27M12D)

是日提早放工，所以就帶左南瓜仔去科學館 (逢星期三免費入場)！

現在帶佢去，佢都唔識係"乜東東"，只當作遊樂場，不過去下都無乜所謂！哈！

南瓜仔玩得好開心，當去到有模擬車時 .......

南瓜仔：「我要玩！」

我：「要排好耐架，唔好玩啦！」

南瓜仔：「我要玩！」

這對話講左3-4次，都佢都係堅持，所以唯有同佢一齊等！

↑ 而南瓜仔好乖咁排隊等左30分鐘，雖然佢係唔識玩又細粒，連腳踏都用唔到，最後仲企係度，我地都由得佢，都係玩姐，唔駛咁認真，最後成績係 2X分，都比想像中好！哈！

跟住就快快回家，我唔係太想留南瓜妹係屋企，好似好慘咁！

01/01/2015 (27M13D)+(9M11D)

帶南瓜仔同南瓜妹去圓方，主要係睇下火車 .......

↑ 現在同南瓜仔影相真係好鬼難 ><，南瓜妹就易好多 ^^

最煩係南瓜仔唔肯拖，成日自己走左去，或者要坐 hipseat，叫佢坐bb車又唔係肯 (佢要午睡，坐bb車舒服d，而且南瓜妹輕過佢，我地都無咁辛苦)！！

去完圓方就約左舊同學MEGA BOX 食晚飯，hd 就帶南瓜妹回家 (女子團，hd 唔參與)，呢班同學都係早婚，中學畢業無耐就結婚生仔，所以佢地既小朋友已升上小學，而我 ......... 所以早婚有早婚好！

後記：

食完飯，原本諗住搭VAN仔，但太懶，打的回家，但南瓜仔：「我要搭綠色小巴，唔搭的士！」(之前同佢講左搭綠色小巴返屋企)，我：「無綠色小巴呀，搭的士啦！」，之後有綠色小巴經過，南瓜仔：「媽媽，有綠色小巴！」，我：「呢架綠色小巴返唔到屋企架！」，南瓜仔：「點解返唔到屋企！？」，我：「呢間係去彩雲，去唔到屋企架！」......... 好彩好快上到的士，唔係又有排問 .......

上到車，就要企係度睇車，南瓜仔：「媽媽，後面有綠色小巴」、「媽媽，隔離有的士」、「媽媽，有消防車」，仲要不停咁問：「咩黎架！？」，真係答到暈！！

落車前南瓜仔：「我要俾錢！」

咁我就俾錢南瓜仔俾，落車時：「唔該，司機叔叔！」，當司機找錢時，南瓜仔：「我要拎住錢！」，再講：「BYE BYE，司機叔叔！」 

以上並不是重點，而係返到屋企後，南瓜仔同爸爸講：「我有錢！」，hd 就問：「你點解有錢！？」，南瓜仔：「司機叔叔俾錢我！」，HD問南瓜仔：「你搭咩車返屋企！？」，南瓜仔：「的士！」

HD：「你又搭的士 ......」

我：「..........」 ><

是日：南瓜妹叫埋媽媽啦 ^^

這個假期就完結了，南瓜仔下星期一又返學，期待農曆新年、復活節、暑假！！ 

2014 回顧 + 2014 重要生活點滴 + 2015 展望

2014 回顧 

睇番上年既展望…….

1) 身體健康 → 呢年大家都算健健康康，無大病，十分滿足！
2) 搬個大單位→ 再再寄望明年！唉.....
3) 儲錢 → 都有做，只係希望再多點！哈！
4) 南瓜仔、南瓜妹相親相愛 → 南瓜仔應該錫妹妹，南瓜仔出街要等埋妹妹出埋門口，佢先放心。而南瓜妹錫唔錫哥哥，就要再等佢大一點先知道！

2014 重要生活點滴

2月：中左妊娠糖尿
3月：南瓜仔PN大作戰 / 南瓜妹出世
7月：工人姐姐放五星期長假
8月：南瓜妹嘔奶持續，入左院.....
9月：南瓜仔返學了！
11月：南瓜仔K1大作戰......
12月：周圍玩

2015 展望 

1) 身體健康，健康好重要，所以永遠要排第1位！ 

2) 南瓜仔、南瓜妹相親相愛， 呢個要排第2位，親情亦是無野可以代替！
3) 搬個大單位， 希望2015年樓價真係會跌啦，若果真的會搬，就會搬去心儀小學既地區附近，希望將來佢地返學唔駛花咁多時間係交通工具上，D時間用來玩好過啦！！