南瓜仔@矮小症！？

由於我同hd都係細小型，所以南瓜仔矮小，但都覺得係遺傳，而且親友們/朋友們都話發育時期做多點運動，食多一點就會高 .......

我既朋友既細仔，出生既高度已跌出生長線，醫生懷疑係矮小症，所以一直keep住去醫院覆診，當時只知道可能要荷爾蒙針 (好似話要打足10年，仲要日日打，咁先可以高多7cm左右)，新年時，當佢既細仔同南瓜仔企埋一齊，南瓜仔只係高少許 ><

回家後，我就擔心，南瓜仔是否過矮呢！？

我就上網搵下資料，再幫南瓜仔度高，發現南瓜仔高度已跌出3% (18個月時，高度係3%)，唔通係矮小症！？？？


23/02/2016 (41M4D)

是日，我就再問朋友 ........

友人：「現在仲係覆診中，下個月入院 check 下荷爾蒙 ........」(仲未開始打針，要check清楚是否矮小症)

友人：「醫生話以佢現時黎睇，將來最高可能 150 cm 左右」 (心就下沉)

友人：「若你想去check下，你去普通科醫生睇下，再轉介你去健康院啦！」

自己又想下又想，又同 hd 商量 .......

hd：「就算真係矮，我都唔會俾打針，日日打喎！？高得幾多！？而且打完一定有負作用........」

要一個小朋友日日打針，除非係"必需"，否則呢d皮肉之苦，邊個鐘意！？？

不過，我最後決定帶南瓜仔睇普通醫生先，睇下醫生點睇先 .......

經醫生驗查後，再幫南瓜仔度高 86.9cm (><)，所以醫生寫左封轉介信俾南瓜仔去健康院！


24/02/2016 (41M5D)

打左去健康院排期，book 左 3月中見姑娘。

點到好，睇左先算，希望我既擔心係多餘！><


咁我地現在可以做乜！？？無理由 "等" 架！？
飲食：
- 日日飲湯 (之前佢唔飲，我地都無迫)
- 早晚飲配方奶
- 暫時無意食「健康副食品」

運動：
- 一星期一次游水 (待天氣回暖，可能轉兩次)
- 多帶南瓜兄妹同陽光玩遊戲！(其實南瓜妹都好矮 ........><)

親子好去處@【2016 農曆新年(年十五)】 元宵綵燈會2016

22/02/2016 (41M3D)

hd 話要去睇綵燈，仲話一年只得一次 ><

天氣又凍又濕，南瓜兄妹第二日又要返學，我唔建議去睇綵燈 (又乜好睇)........

但南瓜仔：「我想去睇花燈！」

既然南瓜仔都話去，咁就 hd 同 南瓜仔去，我就同南瓜妹留係屋企 (又未沖涼、食奶，若一齊出街，十點都未有得瞓)！！

待南瓜仔食完晚飯就出發 ........


目的地：寶翠公園

回家後，hd 評語：「冷清 (當然啦，又凍又濕，邊個會去！？)，仲一d都唔靚 (估到估到啦，花燈又乜好睇喎，浪費時間)！」

↑ 不過都可以俾南瓜仔知乜野叫綵燈 (自我安慰 >< )

親子好去處@東華慈善嘉年華

21/02/2016 (41M3D) + (23M)

雖然氣溫升到 16度，但可惜無陽光！！

不過，見南瓜仔放埋今日假，所以都帶南瓜兄妹去玩！

之前已經知道佢地停車場好 full，所以我地就早點出發 .........

係臨到目的地前數分鐘，南瓜妹突然嘔 ><

南瓜妹全身、我既衫，同仲架車都係南瓜妹既嘔吐物！！

當時我雙手已經"接住"南瓜妹既嘔吐物，沒有手再去清潔，南瓜妹仲不停喊，一喊又再嘔過 .......

好不容易先等到 hd 搵到位泊埋一邊！

好彩我一向都有帶後備衫出街 (但我自己無 ><)，所以南瓜妹都有衫換，再清理架車，見南瓜妹嘔完無乜事，就出發去東華慈善嘉年華！

入場券全免。

我亦知道南瓜仔好多機動遊戲唔夠高玩(大部份要100cm 以上)，所以都無買套票($180)！！

入到去，南瓜仔一見到車就好開心 .......

- Hot wheels (電動車)，$50 (2個圈)，可以由大人搖控架車，但 hd 就俾南瓜仔自己踏"油門"玩，雖然玩得好慢，但全程都係靠自己踏"油門"玩！！

- 交通安全城(車)， $30 (10分鐘)，呢個係唯一南瓜妹可以玩 (40cm以上)，hd 覺得呢個好無聊，不過南瓜兄妹都話玩，咁就俾佢地玩啦！！

- 超級滑梯 New York Super Slide，$40，見可以大人陪同，兩個一齊玩，好似唔太貴。南瓜仔自己一個行上去，期間都有講好攰，不過最後都行足全程！！

玩完就去 mega box 食午餐，再行一陣，就回家了！！

南瓜妹@23個月

21/02/2016 (23M)

時間過得很快，仲有一個月南瓜妹就2歲 ........

07:05  奶 (7安)
07:10  刷牙 + 洗面 + 換片 + 換校服
07:25  早餐 - 包
08:00  落樓 /上校巴
08:25  到校
17:00  放學
17:25  落校巴
17:30  換衫 / 洗手 / 遊戲時間
18:45  晚餐 + 水果
19:30 小休
19:50  洗白白
20:00  遊戲時間
20:30  奶 (7安)
21:00  瞓

食
湯、包都係大愛。

飲奶超快，唔駛2分鐘就 KO 支奶！

如廁
停滯左，一來天氣太凍(著太多褲)，二來買錯普通尿片 (南瓜妹返學，已全轉用學習尿片)，所以無再帶南瓜妹去廁所 vee vee！！

另外，就係南瓜妹每朝醒來，條尿片(merries 普通尿片)過哂底，我已經係臨瞓前再換條新尿片 .......

(1) 係唔係普通尿片無學習尿片無咁有吸力！？
(2) 定係飲得太多野呢(一大碗湯 + 臨瞓前支奶)！？但我已提早45分鐘前俾南瓜妹飲夜奶！？
(3) 係唔係要帶番南瓜妹臨瞓前去廁所 vee vee！？

瞓
晚上放落床無耐就會瞓著！

假期終於可以瞓到八點了 ........(唔讚得！！)

發展 
1) 語言能力：

- 呢個妹妹好識氹人，我問南瓜仔：「你鐘意巴斯光年定媽咪！？」
南瓜仔：「巴斯光年！」
南瓜妹立刻對住我講：「我鐘意媽咪！」

- 南瓜妹都會講學校事俾我知.......
南瓜妹指住上唇：「媽咪，譚XX (同學全名)整親！」(講左30次以上><)
原來譚同學跌倒，流血！

南瓜妹：「謙謙今日無返學！」

南瓜妹係書包拎份單張俾我：「Ms Li 送俾我！」(都唔係"送"，係"派")

2) 體能：
南瓜妹既大肌肉發展真係麻麻 ....... 
- 仲未識雙腳離地跳。
- 只能快行，未會跑。

3) 認知：
其實我唔知南瓜妹真係認得！？定係靠估！？
- 認顏色或物件，有時問佢，佢會全部答得哂，但下次問佢，佢會答：「唔知！」


返學
南瓜妹係無手冊、無進度表、無書(PN以上先有)，所以我係完全唔知學校教乜！？

識字：天
唱歌：南瓜妹識唱好多歌，會唱"打開蚊帳"、"太陽伯伯"等 (雖然咬字唔太清，但都聽到佢歌全首歌)

南瓜妹咁細，俾佢返學並不是想佢學術上有乜大進展，只係希望學好自理能力，加上學校有老師/同學陪佢！

其他

-  16隻牙
-  21.1磅(9.6kg) 


↑ 23個月！！

南瓜兄妹@拆利是 + 屋企附近(單拖)

20/02/2016 (41M1D) + (22M30D)

早上：年十三，利是錢都逗得七七八八，係時候拆利是！！

因為我要 keep 起 d 現鈔 (我唔想排隊去銀行唱 ><)，所以我就係房拆哂 d 錢出來先 .......

南瓜仔、南瓜妹，你放心啦，媽咪會將你地既利是錢入銀行架！！


下午：雖然病病地 (我已經咳左成個月，仲食過2次抗生素，原本都未完全好番(仲有幾聲咳)，但天氣一轉凍，我就咳過，仲要係晚上狂咳，前一天醫生建議我照 X 光，仲開埋類固醇藥俾我，醫生話若再唔好，就要轉去睇專科，希望今次會斷尾啦！！)，但吸服類固醇 + 食了藥，真係咳少左 .........

見天氣都不錯，所以就單拖帶南瓜兄妹出去玩！！

出發前已經同南瓜仔講：「你想自己去會公園玩，定係同埋妹妹去！？」

南瓜仔：「同埋妹妹去！」

我：「咁你要幫手睇住妹妹喎！」

南瓜仔：「好！」

有陽光，當然去樓下公園玩，但真係好多小朋友，而且南瓜妹唔多 like，南瓜仔叫佢玩，妹妹都唔肯玩，所以只係玩左數分鐘就轉去會所玩！

去會所既好處係一個房內，人數亦比較少，南瓜兄妹又會係我視線範圍內，比較安全！

去完會所，就帶南瓜兄妹上天台淋菜，南瓜兄妹真係好鐘意淋菜 ^^

淋完菜就帶南瓜仔上興趣班，之後我就同南瓜妹食下午茶，此時 hd 就做完野回到屋企樓下！

最後，當然一齊接南瓜仔啦！！

南瓜仔@41個月

19/02/2016 (41M)

食
都係唔飲湯、唔食菜 .......

不過起碼全部都係自己食哂 (份量唔多)！

瞓
keep 住有午睡！

晚上，15分鐘內就會瞓著。

發展方面
對話：
最近愛上巴斯光年 ......
可以拎住對鞋(有巴斯光年既頭)，南瓜仔拎其中一隻鞋對住第二隻鞋講：「你唔係真，我先係真！」
再拎第二隻鞋對住第一隻鞋講： 「你唔係真，我先係真！」
只係睇左一次 toy story 2，就上左腦！！！

南瓜仔拎住玩具反斗城既傳單......
南瓜仔：「媽咪，我要買呢個、呢個同呢個！」
我：「你有錢咩！？」
南瓜仔諗左2秒：「我有 red pocket」
我(奸笑)：「 你d red pocket 既錢已經俾媽咪收埋，你無錢架啦！」
南瓜仔(唔開心)：「吓！無哂！？」
我：「係呀！我收左個好安全既地方！」
南瓜仔：「咁妹妹拎唔拎到！？」
我：「妹妹拎唔到！」
南瓜仔：「咁爸爸呢！？」
我：「爸爸都拎唔到！」
南瓜仔就好似放心哂.......

間唔中會打電話俾我......
- 南瓜仔：「媽咪，我屙完 poo poo！」
- 南瓜仔：「媽咪，我想玩車車......」

自己做：
由於南瓜仔呢個農曆新年假太長，hd 就趁呢個機會，放低功課(之前教左佢點做)俾南瓜仔自己做 (無大人陪)......
第一日：
頭1小時唔係做，坐下又走下，又走去梳化坐，最後要工人姐姐叮囑佢，佢先做完。

第二日：我將佢第一日走圍走既相俾佢睇 (係cam度 download d 相)，同佢講：「媽媽知道你無俾心機做功課喎！」，估唔到當天南瓜仔已經乖乖做功課，不過返到屋企睇，佢做得好求其。

第三日：都係乖乖自己做功課。仲打電話俾我：「媽咪，我做完功課啦，我去玩車！」

返學
無乜大分別！

呢個月，我咳了三星期仲未好，前前後後睇左4次醫生，請左3天病假，我就趁呢個機會，我就第一次係學校接佢放學，當南瓜仔見到我去學校接佢，佢不知幾開心，一路拖住我一路跳！！

之後既2次都係接校巴，每次接佢放學，都會帶佢四圍玩，南瓜仔仲講：「媽媽，你可唔可以以後都接我放學呀！？」

情感方面
會同妹妹爭玩具，但當有第三者搶妺妹玩具，南瓜仔就一定「保護」妹妹既玩具，唔俾其他人搶！！

親子好去處@【2016 農曆新年(初八)】中西區海濱長/青衣公園/訊號山

15/02/2016 (40M27D)

是日，南瓜妹要返學，而 hd 仲係放緊假，所以帶南瓜仔去玩 ......

不過，我睇完呢個行程，我就覺得好攰 ><

目的地：中西區海濱長廊 (玫瑰燈海園)

hd 當然帶佢既小情人去啦！！

可能係星期一，而且仲係早上，所以無乜人去 .....

最可惜係唔俾入去 ><


目的地：麥當奴概念店

即係貴價麥當奴，我相信南瓜仔最愛都係薯條！！


目的地：青衣公園

hd 話紅葉好快無，之後又未必有時間，所以一定要去睇 .......

不過去到時己經無乜紅葉 ><

對於南瓜仔來說，遊樂場係最好玩！！


目的地：訊號山 

位於尖沙咀，但去時又無開到 ......


是日行程完結，南瓜仔應該好攰，但係巴上度點到唔肯瞓，最後回到家先瞓！！

2016 情人節@【2016 農曆新年(初七)】

14/02/2016 (40M26D) + (22M24D)

今年情人節 ........

↑  LADY M ，「情人節限定朱古力脆球」。

據聞，要指定日期係網上訂購，仲係15分鐘就訂購哂，呢個細細個既蛋糕仔，仲要成百多元！！


↑ 真係好好好好好味！！

提外話：LADY M 最出名係千層蛋糕 (諗住南瓜妹生日買呢個蛋糕)，hd 順便買2件回家，點知南瓜兄妹一啖都唔肯食 ........

南瓜仔寫字進步左，只要講英文字母俾佢聽，佢就自己寫到啦 (雖然d字唔靚) ！


↑ 除左有蛋糕外，仲有花收添，真係有點意外 (由拍拖到現在，未試過情人節收花！)


有乜情人節既節目！？都係陪小朋友，呢個活動起碼仲有10年........哈！哈！

(1)  淋菜菜

前排太凍，都無安排南瓜兄妹上去屋苑天台淋菜，d 菜已經長得好高 (我仲以為會凍死左添！)，唔知幾時有得食呢！？


↑ 南瓜兄妹對淋菜十分有興趣，為了要淋菜，來回十多次 (因為每次只能入少量既水，佢地先可以拎到水壼去菜圃度)！

(2)  公園

是日天氣太好，一定要去公園！(前排唔係凍就係濕，所以都少左去公園玩！)

每次見到佢兩個手拖手，我就好開心 ......

哥哥一支箭跑上前，南瓜妹就扁咀：「我想拖哥哥！」，而南瓜仔又會跑番黎，拖住妹妹喎！


↑ 兩個小朋友玩得好開心！！

(3)  晚餐

呢間已係第六年黎，除左第五年無叫「情人節餐」外，每年都係叫套餐食！！


- 士多啤利凱撒沙律
- 刺身盛 (左口魚、帆立貝、吞拿魚)
- 海膽花之變壽司
- 香煎鵝肝多士
- 汁燒牛仔骨
- 香草茄汁海鮮意粉
- 飲品
- 甜品

↑ 另外，仲叫左五件厚切魚生、玉子壽司！！


↑ 不得不提佢地既甜品，係桃味雪糕，真係好好味，食到南瓜兄妹停唔到口，南瓜妹仲同職員講：「姐姐，(雪糕)好好味！」

(4) 玩具反斗城

南瓜妹就黎生日，要睇下買乜禮物俾佢先！！

仲遇上南瓜妹既同學仔添！！

親子好去處@【2016 農曆新年(初四至初五)】

11/02/2016 (40M23D) + (22M21D) - 初四

我已經要開工了！！

早上，hd 就帶南瓜仔去游水，點知游池無開........

唯有轉去其他游泳池，都係我呢個媽媽唔細心，無上網 check 下幾時開！！


目的地：Table 18 Bar & Restaurant (apm)

晚上就約左我既舊同學出黎食飯 ！！

我地同學既小朋友已經好大個，所以地既小朋友對南瓜兄妹好有「興趣」，不停地想同佢地玩 .......

但佢地玩到無野玩，其中一個小朋友伸條舌出黎，南瓜仔又學佢，最後佢兩個舌對舌，我見到立刻叫 stop ><！

而我班舊同學仲送有禮物俾我地，但我就無預備 ><



11/02/2016 (40M23D) + (22M21D) - 初五 

目的地：朋友家

晚上，去友人家拜年，其中一個朋友好耐好耐無見，友人仲安排左好多食物添！

小食：椰汁燉雪耳鮮百合、杞子圓肉水、蘿蔔糕
正餐：瑤柱翡翠苗、日式腐皮上湯烏冬、盆菜、壽司、甜蝦刺身

甜品：桂花糕、乳酪

一班小朋友(5個小朋友)當然玩得好開心，特別南瓜仔見到有火車玩，雙眼發哂光！！

臨走前，南瓜仔：「我唔走我！」
我：「我地要返屋企啦！」
南瓜仔：「我唔走我，我要同蔓芝玩！」
我：「傻豬，我地同蔓芝一齊搭車走！」
南瓜仔：「哦，一齊走！？我要同蔓芝一齊坐！」

之後全程拖住蔓芝.......
我：「你鐘意veanna定係蔓芝！？」
南瓜仔：「我鐘意蔓芝！」

係車上，南瓜仔：「姨姨，我尋日去你屋企！？」
姨姨：「明天有人黎我屋企，我約你下次同蔓芝一齊去游水！」
南瓜仔：「好！」

返到屋企， 南瓜仔：「姐姐，我下星期去蔓芝屋企游水！」(無約實 ><)

親子好去處@【2016 農曆新年(初一至初三)】

今年新年，買左對新鞋俾南瓜仔，而南瓜妹係1歲多時都買左對鞋 (終於啱著)，南瓜仔仲不停同人講：「我同妹妹都有新鞋呀！」

而我就無新衫 / 鞋過年，我真的好想買，但真係無時間 .......><

08/02/2016 (40M20D) + (22M18D) - 初一

一早起床，就安排南瓜兄妹換好衫，就同我 + hd 拜年。

第一站(目的地)：教堂

我地係首次帶南瓜兄妹去，雖然佢地仲未識聽神父講既野，但兩兄妹尚算合作，無扭計，都叫算乖乖坐左45分鐘！！


第二站(目的地)：6299 家

又可以同堂哥/堂姐/表姐玩，但今日既南瓜妹又唔肯俾堂姐/表姐喎！？？但點解尋日又肯呢！？？？

臨上去前，已經教了南瓜兄妹講恭賀說話，但南瓜仔點到唔肯講野喎！？？反而南瓜妹就有講恭賀說話！！


第三站(目的地)：中山紀念公園

天氣真係好好，最適合當然去公園啦！！

同表姐們一齊去公園玩，呢個公園真係好靚 / 好大，有兒童遊樂場、海濱長廊、大草地！！

我地去左兒童遊樂場玩先，之後就玩滑板車、單車，呢班小朋友玩得勁開心！！

再返去兒童遊樂場，班小朋友仲將滑梯扮「博物館」(應該表姐帶頭玩)，只係呢度真玩左半小時！！

玩到差不多四點，就回家啦 ........

第四站：屋企

留在家中晚餐，由hd 煎蘿蔔糕 + 煲鮑魚粥！


09/02/2016 (40M21D) + (22M19D) - 初二

瞓到差不多九點！！(好耐無試過瞓咁耐.........)

留係家中玩 ........

之後就去元氣食午餐，食完就返屋企午瞓啦！！


目的地：婆婆家

待佢地瞓醒完，就去婆婆/公公屋企拜年 ........

每年新年，婆婆一定會煎糕點俾我地食，我就最鐘意食年糕！！

而一大班小朋友(六個小朋友)一齊玩，我就可以休息一下啦，見到佢地玩得咁開心，我就開心！！

不過，南瓜仔就拎左一大袋糖/餅返屋企 ........


10/02/2016 (40M22D) + (22M20D) - 初三

目的地：太婆家

約埋表妹(姐)一齊去太婆屋企拜年，太婆已經九十多歲了........

南瓜妹又肯講野， 攪到太婆不知幾高興！！而南瓜兄妹仲不停不停咁食，食開心果、角仔、蘋果、糖冬瓜 .......

去完太婆家，就同表妹(姐)一齊去食午餐，最奇怪係南瓜兄妹，明明係太婆屋企食了好多野，但午餐又食得超好，又係不停食、食、食喎！！

食完飯，就回家午瞓啦！！


是日，係工人姐姐生日 (早前亦已經同佢慶祝左)，所以買左蛋糕同佢慶祝一下！！

↑ 原本諗住買東海堂蛋糕 (一早就知要 $3xx)，不過睇睇下又唔覺得唔抵食，所以轉左去買美心蛋糕 ($98)，哈！南瓜仔仲畫了張生日咭俾工人姐姐！

提外話，我地算好彩，工人姐姐將會續約，即工人姐姐應該會做6年！

朋友：「咁咪要俾長期服務金！？」(心水太清)

我：「係呀！雖然現在果個唔係話好好，但起碼正常，錫小朋友，無偷野、無借錢，係有 d 脾氣，但若請個新返黎，唔好咁咪仲煩.........」

2016 農曆新年

祝大家：「身體健康！」、「心想事成！」


↑ 由 hd 辦年貨： 賀年食物、揮春、桃花、水仙、菊花、桔仔等等......

04/02/2016  (40M16D) + (22M14D) - 年廿六

今日就係我地自己一家食團年飯！！

南瓜妹真好幸福，有4個人 (我、hd、南瓜仔、工人姐姐)一齊接佢放學！！

接完放學就去酒樓食飯！(要照顧佢地食飯，所以無影相！)

食完飯就去行年宵 .......

↑ 分別買汽球俾南瓜兄妹 (南瓜仔揀左woody汽球，南瓜妹揀左企鵝汽球)，不過返到屋企，南瓜仔就"睇中" 妹妹既企鵝汽球 ........明明係佢自己揀woody汽球！！


06/02/2016 (40M18D) + (22M16D) - 年廿八

我就負責最重要既「任務」--- 封利是！！

前幾年，去銀行唱新紙幣好方便，只係打個電話就得，但由上年開始就無得咁方便，所以唯有將南瓜兄妹既利是錢 (新鈔) 儲埋！！

 
↑ 隨著屋企人 / 朋友生bb，我就越派就越多錢，不過都係派得開心既！！


07/02/2016 (40M19D) + (22M17D) - 年廿九

同 6299 一家食團年飯！！

可能酒樓真係好忙，等左好耐先上菜，好彩南瓜兄妹同堂哥/堂姐/表姐玩得好高興，而平時唔俾抱既南瓜妹，竟然主動叫堂姐/表姐抱住佢，仲要指明要堂姐/表姐餵佢食飯添！！


媽媽就祝南瓜兄妹......

「身體健康！」
「快高長大！」
「肥肥白白！」
「學業進步！」

呢個農曆新年，我請唔到假陪南瓜兄妹，初四 (11/2/2016) 就要開工 ><，而 hd 初九(16/02/2016)就返工 ，南瓜妹就初八(15/2/2016)返學，至於南瓜仔去到十五(22/2/2016)先返學添(點解放咁長架！？)！！ 

南瓜仔@GAMES DAY + 元氣壽司

04/02/2015 (40M16D)

目的地：深水埗運動場

之前仲擔心會落雨、太凍 ......

結果，天功造美，不但沒有落雨，仲有好好既陽光！！YEAH ~~~~~

由於 HD 請唔到假，所以由我單拖帶南瓜仔去，好彩南瓜仔同學爸爸順便車埋我地去！！

去到運動場後，學校安排唱校歌、做早操。(上年 PN 仲係一舊飯，今年已跳得有板有眼 ，雖然唔係太跟拍子！！)

學校安排左12個 games，上、下半場各6個 .....


南瓜仔玩得勁開心，仲要加埋佢既好朋友一齊玩，玩到全身都係汗！！

南瓜仔：「媽咪，真係好好玩呀！」

不過我地玩到11點左右 (約埋南瓜仔同學仔)就走人，因為我地要去食元氣壽司 (apm) -- 火車壽司！！


目的地：元氣壽司 (apm)

去到未到12點，唔駛等位！(12點半左右，已經見到超多人等緊位)

當南瓜仔一見架火車，呆左數秒，之後就十分興奮 .........


↑ 除左拎壽司外，就係要按制 (要按左制，架火車先會走！)

由於太好玩，南瓜仔不得不食野，因為佢唔食野就無火車黎！！哈！哈！

我地最初係諗住分開幾次落單，等架火車分幾次黎，原來我地"懶"醒，即使同時落單，佢地都係分幾次黎！！

下次一定要帶埋南瓜妹黎先！^^

食完就返屋企午睡啦！！