南瓜妹@34個月

21/01/2017 (34M)

食
都係咁上下.......算了吧(其實無得唔算 ><)！！

瞓
午睡：13:30 - 15:30
晚上： 21:30 - 07:15

晚上有時會扭我陪佢瞓。
 
發展 
大膽左可以由梳化跳落地(蓆)。

越來就越懶，行都唔想行，所以跑同行都係麻麻地 >< 


南瓜妹跟得哥哥多，識得 1+1=2，2+2=4，3+3=6 .........而南瓜妹應該係「死記」，佢應該唔識乜野係加數！！


返學
啱啱放左個長假期，同南瓜妹講要返學，南瓜妹：「點解我要返學！？」(因為哥哥仲放緊假)

又問：「聖誕老人返左芬蘭！？」(因上次學校安排左聖誕老人，佢仲驚緊......)

同佢講左聖誕老人返左芬蘭，佢先放心返學！哈！哈！


其中一天，去了南瓜妹學校......仲睇埋佢做早操！

雖然南瓜妹不斷咁愉望我，但佢都有跳，不過佢原本企係後排，唔知點解佢會越跳越前！？(上次去睇，係完全無郁過，哈！)


學校亦將佢地上堂既唱歌+做動作放上網，南瓜妹真係做得不錯，完全跟到哂，唔怪得老師係上次家長日讚佢做啦！！

其他

-  17隻牙
-  24.2磅(11kg)

親子好去處@香港太空館

08/01/2017 (4Y3M19D) + (2Y9M17D)

臨到(南瓜仔)假期既尾聲 (南瓜仔 09/01/2017 先返學 =.=)，其實我唔多想帶佢地出街，想佢收拾心情返學，但 hd 堅持要去太空館睇「奇幻冰極」......

今次，我再沒有帶南瓜妹去睇，因為佢一定坐唔定(大空館係唔俾3歲以下小朋友入場，所以想帶就帶唔到！哈！)

咁就由 hd 同南瓜仔去睇，我就同妹妹係尖沙咀行街街 ........

妹妹懶到呢 ...... 行都唔想行，仲同我講：「你係唔係女孩子！？女孩子就要抱我！」(呢個係乜道理！？)

行左一陣，我同妹妹就去接哥哥.......

妹妹一直等哥哥出黎，等左好耐都未出：「點解哥哥仲未出黎！？」

終於見到哥哥，南瓜妹一支箭飛去接哥哥，而哥哥見到妹妹亦都飛奔過去 (做媽咪，見到佢地咁，做心都笑埋出黎！)

接完南瓜仔，咁我地就回家啦 ~~~~~

親子好去處@坪洲 + 2016 友邦歐陸嘉年華

02/01/2017 (4Y2M14D) + (2Y9M12D)

目的地：坪洲

前一天，突然收到姑姐既 whatsapp 問我地去唔去玩，咁啱我地無節目，所以就約埋一齊去！！

我地約左係中環碼頭集合，沿途又經過 「友邦歐陸嘉年華」，南瓜仔指住講：「媽咪，我想玩！」

我：「下次先啦！」

南瓜仔：「你上次講左話下次啦，你講大話既........」 (前幾日去長洲時，我又真係講過「下次」玩！)

由於我地要趕船(約左搭11:05)，所以我就好順口講：「一陣回程先玩啦！」

↑ 有2個大d 既表姐照顧，我真係輕鬆左好多 ......


↑ 食下美食！！

四周行下，咁就回程啦 .........

呢段時間係午睡時間，我仲諗住佢地係船瞓一陣，但南瓜仔掛住同表姐們玩，無瞓。而南瓜妹就瞓左 ........

落船後，我地就諗住回家，點知南瓜仔仲記得去 「友邦歐陸嘉年華」，我仲"博"佢會唔記得 ><

其實我唔多想去，因為真係不太「值」，咁之前又應承左佢 (身教好重要) ，唯有去玩啦 ~~~~~


目的地： 友邦歐陸嘉年華

呢次係第三次黎，頭兩年南瓜妹乜都唔識，所以無玩過 ........

好多遊戲都要 120cm 以上，南瓜仔都係未有得玩，只能玩 90cm 以上 (+ 家長陪同)

- mcqueen 車 (3 + 3 代幣)，呢個都係至愛，但都係要我陪玩。

- 火車(3 代幣)，可以自己一個玩，南瓜仔係車上不知幾開心。

此時，南瓜妹扁住咀同我講：「我又要玩！」

我：「你未夠高喎！」

南瓜妹：「但哥哥玩左2個，我無玩過，我又要玩.........」(都係避唔到！哈！哈！)

唉 ....... 咁就揀個俾南瓜妹玩，好不容易先搵到木馬(3 + 3 代幣)可以俾南瓜妹玩！！

南瓜仔：「我又要玩！」

hd：「今次到妹妹啦！」

妹妹上到木馬，不知幾開心，仲不停咁揮手 ~~~~~~

 - 轉轉船 (3 + 3 代幣)，南瓜仔未夠高，但職員俾佢玩喎！？但就要我陪 ....... 嘩！轉到呢，我差點想嘔 ><，南瓜仔就無事喎！！

南瓜妹：「哥哥玩左3次，我玩左1次！」

我：「咁你唔夠高嘛，我都叫你食多d飯！」(真心)

心軟既 hd ，又四周搵俾南瓜妹玩，仲俾南瓜妹發現 frozen 火車(3 + 3 代幣)，對眼發哂光 ............

期間，南瓜仔又話要玩，不過我地無俾南瓜仔玩，一來佢已經玩左3個機動遊戲，二來真係幾貴(前兩年，因為南瓜妹無得玩，而我地又要買20個代幣(入場費)，就可以俾哂佢玩哂，但現在南瓜妹都要玩，佢地就要平分，唔可以一人玩哂) ><

玩完就搭船去尖沙咀食飯 ......

去左 isquare，點解無乜人既！？？食食下，南瓜仔就有睡意， 所以就快快食完飯，諗住係車上瞓......

但南瓜仔係車上唔肯瞓喎(我已叫佢瞓)！？ 去到臨落車既兩個站先瞓(我話就回到家，唔好瞓住，但南瓜仔：「我真係好攰」，咁就瞓左 ><

而南瓜妹上車無耐就瞓左！

返到屋企，南瓜仔就要醒，因為仲要同佢沖涼 / 刷牙，不過呢段時間佢又精神番！！


P.S：呢個假期真係「體能大挑戰」，不過我會好好珍惜親子既時光，好快就下個(農曆新年)假期.......

親子好去處@【2017 元旦】時代廣場

01/01/2017 (4Y2M13D) + (2Y9M11D)

目的地：時代廣場(雪屋)

前天經過 IFC，南瓜仔話好鐘意睇雪，又係 fb 見到朋友去，好似幾好玩咁，但就話要排好耐隊 ......所以我地就一早去，希望唔駛排咁耐啦！！

我地10點到(10點開始)，已經見到人龍，但就唔太多人(每節10-20人，10分鐘) ........ 排呀！排呀！咁就排左50分鐘，咁就輪到我地啦！！

↑ 原本南瓜妹著同我同一款既雪橇，但對雪橇太大對，所以轉左另一款俾佢 (因為要等上一場 既人還左對細d既雪橇先！！)

著住對雪橇，對南瓜兄妹來說可能有點難，但估唔到南瓜仔完全無問題，仲係場地不停咁行，仲係地下拎左 d 雪拋雪球玩 ....... (又係埋下伏線.....)

南瓜妹就無咁靈活，所以全程都拖住佢，不過就玩得好開心！！

雖然只係玩左短短既10分鐘，但足以令佢地玩得開心 ~~~~~

之後南瓜仔：「媽咪，真係好好玩呀！但點解d雪唔落落黎既！？」

傻仔！哈！哈！

玩完之後就食埋個 lunch，就回家了！！


P.S：出呢個 blog 時，已經完左呢個活動了！

親子好去處@【2016 除夕】長洲

31/12/2016 (4Y2M12D) + (2Y9M10D)

目的地：長洲

一直都好想帶小朋友去離島，所以就決定去行下 ........

朝早，南瓜妹不斷叫我陪佢著 boots +裙，我平時唔會著裙，見佢話想同佢一樣，咁我咪陪佢 ....... 點知中伏左 ><

↑ 去左 IFC 食番個早餐先，經過佢地既場地佈置，咁啱有 d 雪落落黎，南瓜仔好興奮添！！

南瓜仔：「媽咪，我鐘意落雪呀！」(唔 ...... 係時候計劃去外遊了)

之後就去碼頭，南瓜仔見到 AIA 就話要去玩，我就同佢講：「今日唔去啦，下次先帶你去啦！」(呢個係伏線 ><)

我地咁啱可以搭快船入去，而呢兩個小朋友亦係船上瞓左 ~~~~~


入到長洲，hd 租了家庭單車，仲話要車埋我！？？我話唔駛啦，咁危險 (三個人既重量喎 ><)

但 hd 堅持要我上埋單車，佢話我係地下行，萬一小朋友郁來郁去，咁仲危險 .........

就係咁，hd 以一人之力，就車住我地1大2小！！

踏踏下，就去左張保仔，hd 問我去唔去，我就話無所謂啦.........咁我就仲伏左，因為我完全唔記得左著住裙，著住裙入張保仔洞！？？太奇怪了 ><

入到洞，真係好黑，好彩前面有 pair 情侶開了電話既燈，所以都見到d路，佢地仲幫我扶住南瓜仔添，而南瓜妹就由 hd 睇住，但 hd 背住個大書包，差點出唔到洞口！哈！哈！

個洞好短，所以好快就行哂 .......

之後就去長洲食下美食！！

- 大魚蛋，但我唔覺好好食囉，南瓜兄妹都係各自食左一粒！！

- 串串薯片，南瓜兄妹大愛，南瓜妹仲唔停咁食！！

- 糕點，南瓜妹好鐘意食，但要食完之後，要買件俾婆婆食 (因為之後會去婆婆家食飯)

我地再去埋沙灘行下，咁就回程去婆婆家了！！

親子好去處@【2016 聖誕】志蓮淨苑 + 南蓮園池

爸爸單拖系列：七

30/12/2016 (4Y2M11D) + (2Y9M9D)

目的地：志蓮淨苑 + 南蓮園池

是日，我要返工，所以由 hd 帶佢地去玩......

詳情我都唔知，只係知道行左好多路！哈！哈！


目的地：荷里活廣場 (熊本熊)

唔知點解，hd 鐘意熊本熊！？所以佢就小朋友黎影下相！

影完相就去食麥當當！

親子好去處@【2016 聖誕】中文大學 + 益力多廠 + 星夢動物園

28/12/2016 (4Y2M9D) + (2Y9M7D)

目的地：中文大學

原本諗住入去影紅葉  + 約朋友食飯，點知南瓜兄妹係車上瞓左喎！？？(明明南瓜仔8:45先起床，點解 11點多就瞓返！？)

見佢地瞓左，就取消左去睇紅葉 .........

變左只係約朋友食飯！！


目的地：益力多廠

呢個活動係 919 既活動，約左 14:30 .......不過我地就遲到 ><，所以佢地就入去先，我地隨後先入去。

唔知 miss 左 d 乜，入到去已經見到工廠，對於南瓜仔來說就好新奇，而南瓜妹應該未知乜東東！！

之後就聽講座，職員話答中左就會送支益力多 .......

南瓜兄妹就舉手答問題，第一條就係由南瓜妹答中，職員就送左支益力多！！

南瓜仔見到，當然好唔開心，因為妹妹有，佢無 ........ 佢就不斷咁舉手，但南瓜仔根本就唔識答，好彩由 hd 幫佢，而我呢個媽媽已經將d野「送」番俾老師，哈！哈！

職員：「小腸吸收乜！？大腸吸收乜！？」

南瓜仔舉手！！(南瓜仔，你知咩叫吸收！？咩叫大腸/小腸！？)

南瓜仔答中問題後，就有支益力多 ......... 但呢個小朋友仲好貪心，仲不斷咁舉手答問題，終於俾佢答多一條問題，佢先肯「收手」，仲講：「我多過妹妹啦！」

最後，我地用左批發價買左半排($40.5)益力多！！


目的地：星夢動物園

回到屋企樓下，hd 話去睇戲！？？咁突然！？？ hd 買了南瓜仔同大人票，計劃南瓜妹就留左家中！

因為 5 點多先有場，所以我地回左家休息一回，再落去 .......

正當我地諗住落街睇戲時，南瓜妹又話一齊去 (其實我心知南瓜妹一定唔會坐定，平時係屋企都唔會坐定定睇DVD)，心軟既 hd 就話帶埋妹妹去 ><

未開場，南瓜兄妹就不停咁食爆谷，但一開場南瓜仔就專注係螢幕上，無再食爆谷.......而南瓜妹呢！？仲係不停咁食爆谷，食完啦........佢就郁來郁去，我相信佢對眼應該無乜望過螢幕 ><

完場啦，正當大家講緊鐘意乜動物時，南瓜妹：「老虎」=.=" (好明顯，南瓜妹係無睇過啦，佢應該仲講緊上次去動物園睇既動物囉，都話放南瓜妹係屋企啦 ><)

南瓜妹，媽咪下次一定唔再帶你去，等你再大點先！！

親子好去處@【2016 聖誕】舊同學聚會

27/12/2016 (4Y2M8D) + (2Y9M6D)

目的地：會所

約左我班舊同學聚會！！

最大既小朋友已經6年級了，我兩個小朋友仲係幼稚園 ........

不過朋友們都紛紛講要好好珍惜幼稚園階段 (0 - 6 歲)，因為上左小學真係無可能玩咁多，而且再大d 就不會再跟住父母，呢個我都明白，所以我地平日假期都係以玩為主，我會好好珍惜現階段！！
 

三個小男孩雖然有年齡差距(小六、小一)，但都係心愛車，玩到不知幾開心！

而兩個小女孩 (小三，K3)，就好照顧南瓜妹，而南瓜妹又好鐘意同佢地玩喎！！

友人仲好好心機，帶埋棉花糖機黎整棉花糖添！

親子遊世界@【2016 聖誕】深圳野生動物園 + 沙田新城巿(璃光星河)

某人突然話去番禺，仲無端端襯自己放假，帶埋妹妹去接哥哥放學，一齊去做回鄉卡 ........

仲要做快證(點解旅遊都可以俾申請呢！？另加$280)！？？駛唔駛咁急呀？？只係5日工作天就拎到........

只係帶小朋友身份證 + 親身去(因為要即時影相) + 父母陪同就可申請 (應該要網上預約，但 hd 打去問，話可以 walk-in 都可以)！



但 ......最後某人話去番禺貴(兩日一夜，$4xxx)，無端端變左深圳，話百幾蚊入場費 (永東購買)，即日來回，好抵。

我一向對深圳無乜好感(其實係反感)，但南瓜仔想睇動物， 所以唔多想去都帶南瓜仔去 ........

而我最擔心係洗手間問題，我好怕洗手間 dirty，諗起都想嘔  (上網搵資料時，睇到肚B媽話好 dirty )><


26/12/2016 (4Y2M7D) + (2Y9M5D)

目的地：深圳野生動物園

我地揀左搭火車去落馬洲 (1.5小時，成人車費 $22)，再轉地鐵去(0.5小時，成人車費 RMB 12)，車程約2小時！

南瓜仔比我想像中更開心，更大膽 ....... 對所有動物都好有好奇心！


首站我地就睇雀仔，但 d 人好衰，用朱古力 / 餅食 d 雀仔食，又無管理員理喎 (即使無管理員，都唔應該咁做啦......)

南瓜仔都鐘意孔雀，但就唔清楚乜叫「孔雀開屏」，今次可以見到真既孔雀開屏啦！！

呢個時候就差不多12點，我地帶左乾糧黎食，等佢地食完再出發 ~~~~~

期間又有雞、羊、猴子等等動睇 ........

不過講到鐘意，就一定鐘意餵動物食野 (收錢既地方先有管理員！？)

餵長頸鹿(RMB 10)：南瓜仔一見到就話要餵佢地，我就一手抱住南瓜仔，另一隻手就拎住樹葉(！？)，嘩 .....  d 長頸鹿又幾大力，南瓜仔餵完之後就輪到南瓜妹，但南瓜妹有點怕，就由 hd 抱住佢啦！

再去餵另一隻長頸鹿(RMB 10)：呢隻就仲近d，但就用一隻碟放住d乾糧，所以比較接近。

餵大象(RMB 20)：大象會用鼻拎食物，放入口。起初南瓜仔有點怕，將 d 紅蘿蔔放得好遠，後來就無咁驚.......南瓜妹見哥哥餵，佢又怕又要跟，放到好遠俾象食！！不過南瓜妹放得仲遠！哈！哈！

行行下見到有爆谷食，只係 RMB 10，好抵！！

餵斑馬：今次南瓜仔仲大膽，全程都係自己拎住d草俾佢地食，而d斑馬又幾大力，但南瓜仔仲可以拎住d草！！南瓜妹就由我陪佢。

期間見到袋鼠、熊貓、小熊貓等等既動物 ......

入去左馬戲團睇表演，南瓜妹已經有攰意，所以睇到一半就瞓左，而南瓜仔仲好精神 + 好投入睇表演，而我就d表演就無乜興趣 ......

睇完之後就出發下一站，南瓜妹就醒左 (應該瞓唔到 15分鐘) ><

終於到南瓜仔最想見到老虎同獅子，南瓜仔一去到就話要坐車餵！！

坐車餵老虎同獅子(成人：RMB 50，小童免費)：上到車，第一件事就叫佢地唔好放手出籠，我亦用手捉住南瓜仔既手(真係怕有危險) .......

我地首先見到大熊、獅虎 (老虎同獅子生既)、老虎、獅子，管理員會每人派一件雞肉(用义)，d 老虎同獅子就會行埋黎食 ..........

落車後，南瓜仔又要去餵老虎 (RMB 10)：我都係好怕佢地會放手入籠，所以都捉得佢好好實 ........

之後就係外圍睇動物，行行下見到熊，南瓜仔又話要餵(RMB 10)：今次係將d瓜拋落去俾 d 熊，但南瓜兄妹太細粒，要抱住佢地拋落去 ........

睇到四點幾就走人，但臨走前當然要我最怕去既洗手間啦 ><

hd 帶左南瓜仔去先，出到黎 hd 話都唔 dirty，而且仲係蹲廁 ........ 而我就做了一個好衰既決定，就係由 hd 帶南瓜妹去 (我應該唔夠力抱南瓜妹去蹲廁，而且我真的好怕 dirty 洗手間 ><)

南瓜仔見到有長頸鹿既公仔話想要，但我地都無理佢，不過去到最尾，hd 都失手買左俾南瓜仔，係呢個時候........南瓜妹又話要老虎，最後一人一隻 (園入面賣 RMB 25，但園外賣 RMB 30，職員仲話佢地果 d 大隻d，我先唔信佢)

(P.S：呢個行程真係好抵，只係用左 $500咋，包埋車費、入場費、餵動物)

回程啦！！

南瓜兄妹都好累，而南瓜仔好叻，全程無抱過 (除左唔夠高睇/餵動物外)，所以上左深圳地鐵無耐就瞓左啦 (兩兄妹都係瞓左唔夠20分鐘就醒左) ~~~~~


目的地： 沙田新城巿(璃光星河)


↑ 返到香港，我地就去左沙田新城巿食晚餐，飯後就去左食雪糕火鍋 (我既至愛)，南瓜仔就唔多欣賞，食左一個雪糕球就唔食，而南瓜妹就食得好dirty ><

再去行「璃光星河」，好多人到呢 .......

咁就搭巴士回家啦，但呢兩個小朋友太開心，係巴士上嘈到呢 ......... 真係怕被人放上網 ><

親子好去處@【2016 聖誕】聖堂 + 公園 + 聖誕派對

25/12/2016 (4Y2M6D) + (2Y9M4D)

目的地：聖堂

聖誕節，當然要去聖堂啦！！

不過氣氛就不是我想像中咁濃厚，可能無聖誕老人.....哈！哈！


目的地：飲茶 + 公園

約左 6299 同 表姐們去飲茶，之後就同表姐們一齊去公園玩.......

表姐們真係好鐘意南瓜妹，長期照顧南瓜妹，我呢個媽媽就可以休息下！哈！


目的地：婆婆家 (聖誕派對)

呢幾年都係去婆婆家攪聖誕派對 .......

一早就預告俾南瓜妹知有聖誕老人會來，南瓜妹：「媽咪，我唔去婆婆屋企，我留係屋企！」

我：「但哥哥、爸爸、媽咪都去喎.......」

南瓜妹：「咁媽咪陪我留係屋企！」

我：「婆婆會送 hello kitty 俾你喎！」

南瓜妹：「咁叫婆婆黎我地屋企！」(佢又幾醒喎！)

↑ 聖誕派對開始了 .......我地就食完野，不過呢班小朋友想玩多過食野喎！！

我地首先安排小朋友入房，之後聖誕老人(因為聖誕老人要換衫！哈！哈！)就按門鈴黎 .......

南瓜妹當然好驚啦，所以我就陪佢係房，佢半步都唔俾我離開  ><

聖誕老人黎到，當然係送禮物啦 .........

南瓜妹要確保聖誕老人走左，佢先敢出房門！

我睇番d短片，班小朋友見到聖誕老人真係好開心，由於今年聖誕老人無講(上年就係有出聲，小朋友一聽就知......)，所以南瓜仔：「呢個聖誕老人係 dana 爸爸扮！」(因為上次學校聖誕派對，係佢同學仔爸爸扮)，哈！！

之後呢班小朋友就拆禮物(雖然未到 boxing day).......

現在小朋友真幸福，有咁多既禮物！！

親子好去處@【2016 聖誕】摘士多啤梨 + 雲泉仙館 + 聖誕大餐 + 聖誕燈飾

 一連幾日既假期開始........

去左邊！？摘士多啤梨 > 雲泉仙館 > 聖誕大餐 > 聖誕燈飾 > 聖堂 > 聖誕派對 >深圳野生動物園 > 璃光星河 > 益力多廠 > 星夢動物園 > 志蓮淨苑 > 長洲 > 時代廣場(雪屋) > 坪洲 >友邦歐陸嘉年華......

只係睇行程，就知道有幾攰....... 但就開心過返工，哈！哈！

24/12/2016 (4Y2M5D) + (2Y9M3D)

約埋表哥一齊去摘，南瓜仔仲記得同表哥一齊摘過，南瓜仔記性真的不錯！！

去之前，已經教左南瓜兄妹咩叫「靚」士多啤梨，希望佢地去到時唔好亂摘......

目的地：士多啤梨觀光園
地點：粉嶺打鼓嶺李屋新村坪輋坭路

呢度，真係好遠，場地又唔大，所以全場得我地去 ........ 而且可能啱啱落完雨，地下d泥地都幾dirty，最怕係佢地唔小心跌係地上 ><


↑ 南瓜妹又幾鐘意摘，真係好用心去搵靚士多啤梨，仲講：「媽咪，呢粒唔靚，唔摘得！」，仲自已好細心用剪刀剪(南瓜妹好鐘意係屋企剪紙)然後放入籃用(係我呢個媽咪拎住個籃，俾佢放入去)，不枉我之前教左佢！！

南瓜仔就同hd一齊摘！

表哥就不定咁摘，佢一定唔知係俾錢買，哈！哈！

d 士多啤梨都 ok，但要 $120 一磅 =.="

之後就去食午餐！！


目的地：雲泉仙館

呢間係好出名既素菜館，最出名係白飯/白粥係任食 .......


↑ 呢個係最細既圍餐($400)，但4大3小都食唔哂！


↑ 食完就係館內行下，呢度都好寧靜，感覺幾舒服！！

之後就回家休息 ~~~~~~


目的地：聖誕大餐

聖誕節前夕，hd 話要去食芝士火鍋 ........ 最經濟當然係去 pizza hut 啦！！


↑ 而「節日」永遠是最多人食，所以未到 6點，我地已經入坐！哈！哈！

食完就去尖沙咀睇燈飾！！


目的地：聖誕燈飾

唔.......南瓜仔4歲，我地都未帶過南瓜仔去，主要係因為佢地平時9點左右就瞓，所以今次安排左佢地長d既午睡，等佢地今晚可以玩耐 d ~~~~


睇燈飾，當然要去尖沙咀啦，但 ....... 完全無野好睇囉 ><

行行下，南瓜兄妹見到警察，佢地仲同警察講：「聖誕快樂！」，個警察仲走上前同佢兩個握手添！(南瓜仔既志願係做警察)

原本諗住搭船去中環，但多人到呢~~~~~~ 咁就轉去灣仔啦！！

去完灣仔，就慢行去地鐵站，就回家了！！

南瓜仔真係大個仔了，全程已經無叫我地抱，只係太多人時(佢地太細粒)，我地先會主動抱！

回到家已是11時，仲要攪掂佢地沖涼，攪攪下都12點多！

2016 回顧 + 2016 重要生活點滴 + 2017 展望

2016 回顧 

睇番上年既展望…….

1) 全家人都身體健康，希望連小病都無乜！
→ 呢一年真的太好，南瓜兄妹無乜病，連小病都無乜！！而我就上半年就多d病，下半年情況就好轉左！

2) 南瓜兄妹相親相愛！
 → 有時都會有爭吵，但基本上都相親相愛！！

3) 南瓜妹入到心儀 PN ，真係唔想 K1再黎大作戰！
→   南瓜妹入到我心儀既 PN，但都安排左佢再大作戰 K1，結果仲未知哂 (不過都係 ><)！

4) 再多一點親子時間！
→  同上年差不多。
 
5) 搬個大單位， 希望2016年樓價真係會跌啦！！ 
→ 望左 N 咁多年，都係有升無跌 >< 


2016 重要生活點滴

南瓜仔：

呢年大個左好多，學既野就越來越快，特別一d 我唔想佢學既野，不過呢d野無得避，只能再教佢「對與錯」.......

去街亦沒有再叫我地抱，原來小朋友去到某個時候，會自自然然自己會行。

有自己既性格，有次我係街罵佢 ....... 南瓜仔行行下就停左，我問佢乜事！？南瓜仔：「我唔鐘意你街罵我！」之後個樣仲好唔開心！

過多大半年南瓜仔就要考小學 ........ 

我地壓力唔算大，因為我地有母校分(已經比其他人好)，而且南瓜仔讀緊既幼稚園，九成都可以升到佢地既小學，萬一自行/統一派位失敗，都有間私小做backup！

南瓜仔考唔到考到私小或直資，都係靠佢自己，不過我都唔抱太大期望，龍年 + 細b +男仔真係要好醒先考到 ><


南瓜妹：

駁咀越來越叻，我都唔明點解咁細個都學識！？
例如：
我：「唔好食糖！」
南瓜妹：「我拎住之嘛，都無食！」
 
不過佢氹人都越來越叻，會突然抱住爸爸講：「爸爸，我真係好鐘意你！」，氹到爸爸不知幾開心！
 

2017 展望
1) 全家人都身體健康！ 
2) 南瓜兄妹相親相愛！
3) 南瓜仔/南瓜妹入到適合佢地既學校。