親子好去處@2015 中秋節(玩燈籠)

南瓜仔好鐘意 mcqueen ，所以買左 mcqueen 燈籠俾佢，而南瓜妹就買勞蘇燈籠 (因為公主燈籠太大)，點知南瓜仔就「睇中」勞蘇，好彩南瓜妹鐘意 mcqueen 燈籠，下次都係帶佢地去買，唔係大家一齊搶玩仲煩！！

我地未到中秋節當天，已經落左街玩燈籠啦，因為南瓜仔不斷講要睇月亮，仲問：「點解月亮唔係圓形！？」

27/09/2015 (36M8D) + (18M6D)

目的地：婆婆家 (玩燈籠)

今年約埋表哥、表妹(姐)、表弟一齊去玩燈籠！！

是日提早食晚餐，等小朋友可以玩耐少少，食完晚飯就出發啦！！

 ↑ 不過呢班小朋友無玩燈籠，得南瓜妹一個玩，仲要拎住3個燈籠，而其他人係去遊樂場玩，唔......咁同平日去公園有乜分別！？


↑ 玩完就返去婆婆屋企食月餅，咁就回家！！

回到屋企樓下，又見到個月亮喎，仲要好圓添 ~~~~~
 

親子好去處@兒童遊戲室(坑口體育館 + 香港單車館)

21/03/2015 (18M)

對於南瓜妹，我時常都覺得照顧不足，好多時都係俾南瓜仔分了時間，同南瓜妹單獨相處時間真係好少，唔計去醫院、健康院既地方外，可能只得幾次！

是日南瓜妹去健康院，我就決定請一天假陪佢 .......


目的地：坑口體育館 (奇妙水世界)

平日去既好處，就係無乜人，仲要全場都有軟墊，唔怕小朋友會撞親，對於好似南瓜妹咁細既小朋友就最適合！！

 ↑ 玩樂中既南瓜妹！

見到南瓜妹玩得好開心，自己都好開心！！

地點：將軍澳培成路38號  西貢將軍澳政府綜合大樓1樓


目的地：香港單車館 (極限運動)

見仲有時間，帶埋南瓜妹去玩多一個兒童遊戲室！！


↑ 南瓜妹都係好開心！！

地點：將軍澳寶康路105-107號


玩完就返到屋企樓下食午餐，之後就回家食水果，跟住就係午睡！！

↑ 南瓜妹午睡時，我就有時間揀南瓜妹 5 - 12 個月既相整相架 (hd 叫左我好耐)，之後南瓜妹起身後就同佢玩。

去到三點多，我就去接南瓜仔放學 (南瓜仔返全日至今，我未接過佢放學了)，當佢見到南瓜仔時，我見到南瓜仔笑得好開心！！ 

南瓜妹@健康院 (18個月)

21/09/2015 (18M)

又黎健康院時間啦 ........

原本諗住我送南瓜仔返學後，公公就係港鐵站等我，但朝早黃色暴雨，所以都係叫公公係屋企等埋我先出發啦！！


↑ 南瓜妹一入去健康院就喊，去到磅重時仲未停，同佢講俾餅佢食，佢先停喊 ......

磅完重就俾餅佢食！！

體重：9 kg (19.8磅) - 生長線10%

到見姑娘啦，南瓜妹去到唔多合作，入到去再喊過 .........

姑娘俾左3舊積木叫佢砌，南瓜妹喊住講：「唔要！」

姑娘：「唔緊要啦，你餵bb(玩具)食野，好唔好呀！？」

南瓜妹喊住講：「唔要！唔要！」

姑娘：「你講野又幾好喎！」，之後就俾左粒星星餅俾食，停左喊 .......

咁姑娘就問左我問題先 (期間南瓜妹已砌好積木同餵左bb食野)

1. 咩人照顧！？
→ 已返全日制，不計在校時間，就係父母照顧。

2. 用杯未！？
→ 用緊 (係學校一定要用杯)

3. 戒奶樽未！？
→  戒左

4. 識講乜 (指物件，不計跟口水尾)！？
→ 爸爸、媽媽、公公、老師、蘋果、蕉 、bear 、波波、車車等等

5. 識眼耳口鼻未！？
→  自己識講埋

6. 識行未！？
→  識

7. 睇野/聽野有無問題！？
→  應該無問題

8. 是否多菜少肉！？可食幾多！？
→ 多菜少肉，睇心情，好既大半碗都食野，又時食得少少。

9. 幾多餐奶！？幾多安！？
→  2餐奶，6安

10. 固體食幾多餐！？食幾多！？
→ 學校有2餐早點、1餐午餐、1餐茶點，屋企1餐晚飯

11. 識唔識指野！？
→  識

無乜特別，下次覆診係4歲，而南瓜妹係私家打針，所以見到姑娘就走人！！

南瓜妹@18個月

21/09/2015 (18M)

不經不覺已返左個半月學，已經可以返全日了！

呢排接南瓜妹放學，日日都有人問：「咁細個就返學！？幾大呀！？」，好似我好怪獸咁！！

俾南瓜妹返學，係因為我同hd要返工，有時會諗 ....... 不如轉做 FTM，不過真係諗下！！哈！哈！

07:15  奶 (6安)
07:45  換校服 + 刷牙 + 洗面 + 換片
08:20  上校巴
08:25  到校
17:00  放學
17:20  落校巴
17:30  遊戲時間
18:45  晚餐 + 水果
19:30  遊戲時間
19:50  洗白白
20:00  遊戲時間
20:45  奶 (6安)
21:30  瞓

食
已經食大人飯餸，而食哂都係睇心情，時好時壞，無哂佢地辦法！！

學校食飯就一般，例如炒米粉就唔多食 (17個月食炒米粉！？)，不過，我南瓜妹學校餐單好好，每日都有飯、有菜、有生果，連湯都有埋，而南瓜妹就最愛飲湯！！

大便
1 -2次。

瞓
呢排間唔中半夜會喊醒，抱下佢就好快瞓著！

早上有時六點幾就醒左，平日多數七點左右就自己醒！

發展 
語言能力：
- 對話：
接南瓜妹放學，我會抱住佢落車，我：「自己行啦！」
南瓜妹：「唔好！」(抱實我)
我：「要抱抱！？」
南瓜妹：「係！」
我：「鐘唔鐘意媽咪！？」
南瓜妹：「鐘意！」
我：「咁爸爸呢！？」
南瓜妹：「鐘意！」
我：「咁瞓覺呢！？」(尋晚半夜喊醒左)
南瓜妹：「唔鐘意.....」
我：「點解唔鐘意呀！？」
南瓜妹：「呀...呀....呀.....呀..........」，之後就傻笑 (其實佢點識答我！)

活動能力：
- 自己會爬上椅，離開椅子會"泊"好張椅！
- 有時堅持自己食飯，但一定係勁dirty，除左地下全部都係飯，而頭髮都有埋飯！
- 示意poo poo，但未肯坐係廁所，一放落去就喊！


返學
正式返全日了，前幾日問主任可否直升 PN，主任話以南瓜妹一定可直升，咁即係南瓜妹一定有學返！

南瓜妹好鐘意揹書包，佢係完全唔俾我地掂，最煩係返到屋企都唔肯除。

而南瓜妹就"蝦"我，公公話南瓜妹放學係自已行返屋企，但我接佢放學，佢就一定要我抱，唔可以放低佢！(呢樣同南瓜仔一樣 >< )

其他
-  12隻牙
-  19.8磅(9kg)
-  "痴"媽症上身，只係行開一陣就狂喊，要抱住佢先停，連hd抱都唔肯，有無咁掛住我呀！？
-  真係好鐘意用袋，有次出街我幫佢著哂衫同鞋，當我自己換完鞋就唔見左南瓜妹，原來佢入左房拎袋 >< 
有次仲過份，帶佢去游水，入到更衣室死到唔肯放個袋，諗住帶左佢出去玩，佢會忘記啦，點知佢不斷不斷講 ：「袋！袋！袋！袋！袋！袋！」，玩左半小時，仲係講住 .........


↑ 18個月！！買左個三眼仔蛋糕同南瓜妹慶祝一下 ~~~~~

親子好去處@ 整薄餅 (Pizza Express)

20/09/2015 (36M1D) + (17M30D)

目的地：Pizza Express (apm)

南瓜仔試過好幾次係屋企整薄餅，今次就試下出街整 .......

首先一定是多謝肚b媽既安排，又去搵資料，仲去埋俾訂金，多謝哂呀！！^3^

每位小朋友有廚師帽、圍裙、果汁、氣球各一，當然唔少得預先準備好的十吋薄餅餅底來製作薄餅啦！！

首先係排隊著圍裙 + 廚師帽 ........

 ↑ 開始整 pizza 啦，職員好有耐性教小朋友教pizza .......

1. 洗手
2. 拍餅底
3. 加茄汁做底
4. 加食材 (磨菇、蕃茄、火腿、雞肉、黑橄欖)
5. 加馬蘇里拉芝士
6. 完成

之後我地就一個個排隊俾個pizza職員，再將pizza拎去焗！！

多謝各位bloggers慶祝埋南瓜仔生日 ^^，個蛋糕真係好好味呀！！


↑ 而我地都破例俾南瓜妹食朱古力蛋糕添 ......

食完蛋糕後，大爺借左架車俾南瓜仔玩，當要走時，南瓜仔唔捨得架車 (又唔見佢唔捨得我呢個媽咪喎)，不斷咁喊，唉 ......... 真係煩！！><

個 pizza 我地無即場食，拎左返屋企，hd 就整埋個意粉一齊食，個 pizza 真係好好味，南瓜仔仲食左兩大塊添，自己整係好味 d！！


收費：每位$198 (另加一)，而每間分店既最低消費額不一。(「兒童薄餅派對」)

好彩我地bloggers齊心，所以夠人去玩！！yeah ~~~~~

南瓜仔@3歲生日會

19/09/2015 (36M)

呢個懶媽咪 join 左 「919 生日會」，最係好多謝 919 既家長們用心攪活動，我只係做左俾錢，咩野都無做！哈！哈！

約左14個同年、同月、同日出世既小朋友一齊玩！(南瓜仔仲未識得咩叫「 同年、同月、同日出世」)

 ↑ 南瓜仔去到時，有姐姐扭埋個 mcqueen 氣球俾佢，不知幾開心 ......

之後就去玩南瓜妹最鐘意既波波池，而南瓜仔當然最鐘意係"車"啦！！


↑ 玩左一陣就係食野，又估唔到佢南瓜兄妹又幾食得喎，可能d食物吸引佢地啦 ........

食完野就係影蛋糕時間，影完之後南瓜仔妹又去玩過！！


↑ 小型吹氣滑梯，當然係南瓜仔最愛啦，hd 話佢玩左20以上.......哈！哈！

 
↑ 最後就係大抽獎啦，南瓜仔妹好鐘意呢份禮物呀！！


場地：Five by 5
地點：荔枝角青山道702-704號  合興工業大廈4樓G室

到會：Pantry G.M ($3000)

蛋糕：不清楚 ($1080)

banner：不清楚 ($300)

汽球佈置 + 1.5 時扭波：不清楚 ($2000)

攝影師：919 家長 (免費)

VCD 制作：919 家長搵贊助  (免費)

南瓜仔@36個月

19/09/2015 (36M)

3歲啦，時間真係過得好快，由手抱既bb變左現在識跑識同你既野既小朋友，真的捨不得佢得成長.......

食
除左煩，無野可以講！！

但南瓜仔係學校會自己食飯，連平時唔食既菜、菇，全部都會食，套用一句「仔，要人地教！」。

瞓
返學有午睡！

晚上，上左床之後，大約10分鐘就瞓左！

發展
自理能力：
有少少進步，返學已經唔駛再抱，但其餘都係差不多，行到一半又話出哂汗，懶到死，成日唔肯自己行！

仲攪笑係我問佢：「你學校點去vee vee！？」
南瓜仔：「自己去囉！」
我：「咁你屋企又唔自己去！」
南瓜仔 ：「........」 (傻笑)

說話能力：
係屋企無端端會唱普通話歌！

返學
升左 K1 後，老師主動打過1次電話俾我，就係同我講 9月係南瓜仔生日，可以幫佢預備1個細細個蛋糕，其實唔收電話都係好事，證明南瓜仔係學校無乜特別野，但作為家長當然想知佢地平時學校係點啦 ......

咁老師打來，我當然問下南瓜仔學校既情況啦！！

- 自己食飯，無偏食，食到九成
- 有午睡

之後我就問下南瓜仔平時同我講既野，是否「真有其事」！？估唔到南瓜仔同我講既野全部都係真！！(可能返得全日制，大部份家長都係在職父母，無家長接放學 (即使  ftm 都係揀搭校巴)，所以"訊息"無以前咁多，但小朋友都大個左，懂得講出來，都略知一二！)

不過南瓜仔係選擇性講，例如：我問佢有無食飯，佢一定扮聽唔到！

佢只係答一定唔太關佢事既野， 例如：XX 用乜水樽、YY 坐係邊、ZZ 唔聽老師講野！

亦因為係返全日，基本上係做完功課先返屋企，不過有時hd 見佢做得太 hea，要佢再做好一點！

其他
- 好小事或有乜唔滿意喊同大叫，煩到死！

南瓜妹@親子功課(自製燈籠)

南瓜妹學校有自製燈籠比賽 ，可自由參賽........

講真，我就無興趣參賽，即使參賽都諗住hea做，但hd唔係咁諗，佢想做「榜樣」俾小朋友睇，要認真對待每一件事，佢有咁諗法，我當然無限量(精神上)支持！！

成果過程，由設計>買材料 (我有陪佢去買)>製作，都花唔少時間，只係製作燈籠花了四天時間，而每天要用2小時！！

而製作燈籠既過程，hd 會係小朋友面前做 ，而南瓜仔亦有少許參與 (但比賽係南瓜妹喎！？)

學校有三組比賽：親子組、環保組、創意組，好明顯一定唔係親子(我相信17個月大既小朋友無可能做得到 )或環保，所以參加左創意組！！

↑ 半製成品(一)：以 LINE 做藍圖，扎左個頭先 (hd 係第一次扎)

 
↑ 半製成品(二)：扎埋做身同手 (hd 對手仲流埋血 >< )

我覺得只係得個頭都好靚，但hd話要做埋做身同手先得喎！！


 ↑ 半製成品(三)：用雪梨紙做皮膚 (因無白色玻璃紙，又要透光)，再整埋眼、耳、口、鼻 (由南瓜仔幫手貼上去)。

line既皮膚係一塊一塊貼上去，唔係一幅過，這樣做會更美觀，但花既時間亦好長。


↑ 製成品 (仲有燈架！)

這個燈籠大了少少，南瓜妹應該拎唔到，亦放不了家中 (參賽完就變垃圾！？？)，所以我決定打這篇blog，希望佢兩個會學爸爸一樣 (唔好似我！)，凡事都要去認真去做！！

真心，我都不得不佩服hd！！

最攪笑係........因為燈籠係跟校車，公公話全架車最細粒係南瓜妹，但佢既燈籠係最大！哈！哈！

後記：南瓜妹既燈籠真係拎左獎 「親子中秋花燈設計比賽  最佳親子合作獎」(我一直以為係創意組添！) - 23/09/2015

親子好去處@香港單車館公園

13/09/2015 (35M25D) + (17M23D)

目的地：香港單車館公園

呢度黎過幾次，今次唔同係帶埋南瓜仔既生日禮物黎玩！！

我地食完午餐就出發，是日天氣好好，有陽光仲有微風添，好適合戶外活動 .......

↑ (1) 踏單車：估唔到南瓜仔第一次踏就踏到，雖然係 "龜速"，但可以踏到一段距離，都算好叻！(hd 講，佢行路仲快過踏單車 >< )

最攪笑係我俾南瓜妹坐上去，南瓜仔：「唔係咁，對腳要放係呢度 (腳踏)！」，但妹妹點夠高呢！？

(2) 遙控船：咁啱遇到一班遙控船友 (全部都係大人)，佢地既船超快，南瓜仔：「我地架船好慢！」(傻笑)

(3) 遙控車：勁鐘意呢架 Mcqueen  遙控車，仲控制得好好添！！

玩到三點多就回家，南瓜妹係車度已瞓著，而南瓜仔同我 ....... 亦回家後好快都瞓埋！哈！

南瓜仔@預祝3歲生日

12/09/2015 (35M24D)

我唔鐘意攪大型生日會，一來又要請人，二來又要安排食物、遊戲、場地，我會等到南瓜仔同我講想攪生日會，我先會去諗下攪唔攪 ......

今次都係叫我屋企人來我屋企食下「便飯」就算！！

而南瓜仔差不多3歲，同上年唔同，佢已經好清楚發生乜事，真係大個仔了！！


↑ 生日蛋糕：同南瓜仔去美心西餅揀蛋糕，明明之前話要「三眼仔蛋糕」，去到時又改左要「Mcqueen 蛋糕」！  (訂完之後日日提><)


↑ 生日禮物：由hd去揀禮物 (幫埋親友買埋)

單車 (去到大埔買，平過屋企附近$200)、平衡車(原本只係買單車，但hd 朋友話平衡車更容易學)、 Mcqueen遙控車、 遙控船。

生日用品：去左玩具反斗城買左個 Mcqueen "happy birthday" 既 banner 同去左文具店買左個 "3" 字既氣球！


↑ 生日食物：我地都好 "求其" 叫左 pizza hut + 元氣壽司 + 燒味 + 自家製炒菜

南瓜仔未食完飯都話要拆禮物，仲講：「拆一份好唔好！？」，明明答左佢等食完蛋糕先拆，但都不停不停咁問 ><

好不容易等到食蛋糕，南瓜仔一見到個 Mcqueen 蛋糕就勁開心，最開心唔係食蛋糕，而係蛋糕上既玩具車，未影相已經想拎走2架玩具車 .......

影完相、切完蛋糕就到拆禮物啦！！
 

南瓜妹@歲半班(DAY 9-27)

17/08/2015 - 12/09/2015 (16M24D - 17M22D) - DAY 09-27

不經不覺南瓜妹已返了個多月學 .......

-  05/08/2015 (DAY 01) 返1小時
-  10/08/2015 (DAY 04) 返2小時
-  17/08/2015 (DAY 09) 返3小時
-  20/08/2015 (DAY 12) 留校午膳
-  26/08/2015 (DAY 16) 留校午睡 (放14:30)
-  01/09/2015 (DAY 20) 放 15:05
-  08/09/2015 (DAY 25) 放 15:30
-  14/09/2015 (DAY 28) 正式返全日

學校安排南瓜妹慢慢適應，不過呢段期間就辛苦了公公，因為要返全日先有校巴搭，公公要去學校接南瓜妹放學 (雖然是同區，但都要搭5分鐘車)！！

黎緊就係我接受挑戰，因為南瓜妹會係 17:20 落校巴，而我係放工係 17:00 ......

- 17:05 老公楂車 (大前提係未必日日做到)
- 17:12 自己搭港鐵 + 快步
- 17:15 自己搭港鐵 + 正常步行

上堂時間表 (由其他家長提供)：

- 早餐
- 主題活動
- 玩玩具
- 遊樂場
- 早點
- 普通話 或 英文堂
- 午餐
- 午睡
- 下午茶
- 唱遊
- 放學 / 遊戲
- 上校巴

班主任評語：
- 自己收拾玩具
- 鐘意上音樂堂 (會跟住跳舞)
- 坐定定
- 自己食飯 (但都要老師協助)
- 用杯飲水 (不用協助)
- 會叫班主任 (即叫：老師)

由於我想知道南瓜妹可否直升PN，所以我就打俾主任問下情況 .....

我：「我見你地已收 PN 申請表，我駛唔駛填表！？」

主任：「唔駛啦，以 XX (南瓜妹名) 完全無問題，可直升 PN！」

我：「咁即係一定收！」

主任：「係呀！到時會通知你交留位費！」 (太好了，南瓜妹一定有書讀)

主任：「XX 好懂事，全班最細係佢 (**佢地班同學係12月頭 - 1月尾，2月無同學，3月尾就係南瓜妹)，但最懂事就係佢！我地最初仲以為要多加照顧佢，原來係唔駛！」

我：「可能有哥哥係屋企，所以學野係快 d！」

我聽到主任咁講，當然好開心加感動，不過就唔知主任是否「美化」南瓜妹，hd 話學校想你繼續係呢度讀書喎！
____________________________________________________

南瓜仔 / 妹都返學(全日制)後生活：

佢地返左全日，我再唔駛 lunch time 趕返屋企，hd 買餸就改由工人姐姐負責，真係舒服左好多！

南瓜仔：由我帶南瓜仔返學(上校巴)，放學就由工人姐姐接。

南瓜妹：由公公帶南瓜妹返學(上校巴)，放學就由我接。

我又唔駛擔心工人姐姐 1 個對住 2 個小朋友，公公又可以休息一下，佢地返學又有老師 / 同學，又可以學到自理能力！！

親子好去處@香港濕地公園

06/09/2015 (35M18D) + (17M16D)

目的地：香港濕地公園

想去左好耐，但我又怕太熱，仲諗住等秋天先去......

咁啱家姐一家話想去，所以我二話不說就 JOIN 佢地，不過 hd 就唔多 like，話咁熱南瓜仔一定唔肯行 ><

但我已應承左，又同南瓜仔講又鱷魚睇，最攪笑南瓜仔話：「我唔帶 gingerbread man 去，鱷魚會食左佢！」(哈！哈！)


↑ 去到時差不多三點，由於室外好曬，所以我地睇完貝貝(鱷魚)後，就係室內睇入面既館 ......


↑ 呢幾個小朋友對睇魚好有興趣，見差不多四點三，我地就去室外見，不出 hd 所料，南瓜仔出左去唔夠5分鐘，就話出哂汗，要我地抱 (我已抱緊南瓜妹) ><

好不容易叫佢行一陣，但最後都 "失手" 要抱佢 (不過都係抱一陣，又要佢自己行)！！

差不多行完，我就拖住南瓜仔：「媽咪，我地以後唔好再黎！」

我：「點解！？」

南瓜仔：「我唔鐘意，我出哂汗！」

南瓜仔真係好鬼懶，出少少汗就話熱，又要人抱，都唔知點教佢好！！

地址：天水圍濕地公園路香港濕地公園

之後就去左元朗田中日本料理食晚飯，但呢間餐館勁多人，只係六點三已排哂隊，仲要限時食45分鐘，不過佢地既分量又好足，味道都不錯！！

親子好去處@香港公園

03/09/2015 (35M15D) + (17M13D)

多左一日「抗日戰爭」假期，最佳節目係屋企睇「閱兵」啦，南瓜仔都有興趣，南瓜妹就零興趣！


目的地：香港公園

今次係約 hd 既家人去玩，呢一日由暑假約到現在先去得成，點解！？

因小朋友太多興趣班了，學游水、網球、小提琴、跳舞等等，加上各有各去外地旅行，大人又要返工，不過有心唔怕遲，今日約齊人，幾個小朋友可以一齊玩啦 ~~~~~~

我地約左去下午飲茶，呢幾個小朋友好快就食完野，食完野又乖乖留係位度畫下畫喎！

之後就去香港公園啦！！


↑ 去到香港公園，當然去睇下動物先 ......

** 唯一一張可以影哂6個小朋友，但只係影到背脊，好過無啦！！


↑ 睇完就去公園遊樂場放電，小朋友一玩，連"攰"字都忘記哂，見住6個小朋友一齊玩，我地大人都好開心！！

玩完就去行一陣太古廣場，因為太熱啦，要降下溫先 ......


↑ 南瓜仔對於呢個 "轉轉" 十分有興趣，玩完又再玩，仲要迫埋我同hd一齊玩！！

之後就屋企啦 ，又係一上車就瞓左，我都可以休息一下啦！